Màteo 3

Yòhanɛ̀s Mawusilènamètɔa

(Mrk 1.1-8; Luk 3.1-18; Yòh 1.19-28)

1Wàlɛbɛ ŋua, Yòhanɛ̀s Mawusilènamètɔa va, le do Mawu be àŋɛ̀ lè Yudeà be zògbè ji#3.1 Zògbè ji: àmè ɖewo gblɔ̃nà be ègbegbà ji. Vɔ̀a, yebe gɔ̃mè ye nyi be ègbèa le ɖì co àmè ɖekpe mu le sɔ ɖe lè e mè ò.. 2E le gblɔ̃ be: “Mì ɖɔ̀lì èdɛ̃, ɖo Mawu be èfìɔɖùɖua lili.” 3Yòhanɛ̀s ŋuti ye Mawu be gblɔ̃ɖɛtɔ Ezayà pò nupo so wàlɛbɛ kè be gblɔ̃ be:

“Wo sè àmè ɖe le do àpa lè zògbè ji be:

mì jrà Tɔhonɔ̀ be èmɔa ɖo.

Mì jɔ̀ yebe àfɔ̀mɔwo nyuɛ̃ ɖe.”

4Yòhanɛ̀s dona àwù kè wo sɔ èsɔ-kpotɔnɔ̀ be fu wɔ̀a, eye e blana e ji ku èlãgbàze gojibla-kà. E ɖùnà hùesuviwo, nùnà ègbemè be ànyisì. 5Yèruzàlɛmtɔwo ku Yudeatɔwo kpata kudo àmè kèwo lè Yɔrdàn be àgowo jiawo kpata vana Yòhanɛ̀s gbɔ. 6Wo hũnà woabe ènuvuɛ̃wo mè na ɛ̀, eye e lènà mawusi na wo lè ètɔ̀ sàsra kè wo yɔna be Yɔrdàn mè.

Yòhanɛ̀s le do èjì mè tɔtrɔ be àŋɛ̀

7Ekè bè kpɔ be Farizìwo ku Sadusìwo sùgbɔ va e gbɔ ne bèa lè mawusi na woa, e gblɔ̃ na wo be: “Mìa jàkpàtà be xòmèviwo! Àmè kɛ ye fiɔ mì be mì teŋu si lè Mawu be àdɔ̀mèze kè gbãnà a nu ò? 8Mì nɔ wɔ̀ ènu kèwo la ɖè è fiɔ be mì ɖɔ̀lì èdɛ̃a. 9Mì mu gbà nɔ bù be ne mì gblɔ̃ lè mìa ɖokoewo mè be: 'Abràham ye nyi mia tɔgbe kpòa e sù vɔ̀ ò.' Đo nyàwo mù le to na mì be Mawu teŋu sɔ èkpe kèwo mì le kpɔ ŋuawo trɔ zũ èviwo na Abràham! 10Èfiɔ lè àtiwo be èkènu vɔ̀. Àti kè ma sɛ̃ èku nyuɛ̃ òa, wo la sò è, la lɔ ɛ̀ kɔ̀ ɖo èzò mè. 11Ènyè yaa, èsì ye mù sɔ le lè mawusi na mì, sɔ le ɖè è fiɔ be mì ɖɔ̀lì èdɛ̃; vɔ̀a, àmè kè gbãnà, lè yo nyè mèa, wu gã mù, eye nyè mu jè la ɖè yebe àfɔ̀kpawo tètè ò. E yaa, Gbɔ̃gbɔ̃ Kɔ̀kɔ̀ɛ ku èzò ye be la sɔ lè è na mì. 12E le yebe fàfà#3.12 Fàfà: àgbɛjɛ, sàsràdo àlo ènu funu. ɖo àlɔ̀ mè. E la fu *èlùawo, la lɔ wo kɔ̀ ɖo yebe àvà ji, vɔ̀a, e la tɔ èzò fòfloawo lè èzò kè mu cina gbèɖe òa mè.”

Yòhanɛ̀s lè mawusi na Yesù

(Mrk 1.9-11; Luk 3.21-22)

13Wàlɛbɛ ŋua, Yesù so Galilea nyigbã ji va Yòhanɛ̀s gbɔ lè Yɔrdàn ètɔ̀ sàsraa to, ne Yòhanɛ̀s bèa lè mawusi na ɛ̀. 14Vɔ̀a, Yòhanɛ̀s mu lɔ̃ ɖo e ji ò. E gblɔ̃ be: “Ènyè ye hiã be wòa lè mawusi na, eye wò yaa, wò gbà va gbɔ nyèa?” 15Eye Yesù ɖoeŋuti na ɛ̀ be: “Na ne bèa nyi nènea fifì jro, ɖo e jè be mia wɔ̀ ɖo Mawu be èjro ji.” Wàlɛbɛ ŋua ye Yòhanɛ̀s lɔ̃ na ɛ̀. 16Kè wo lè mawusi na Yesù vɔ̀a, e to lè ètɔ̀a mè. Gà ŋua mè kea, jiŋùkusi hũ, eye Yòhanɛ̀s kpɔ Mawu be Gbɔ̃gbɔ̃ a lè sìgbè àhɔ̃nɛ nène, ɖì va Yesù ji. 17Kpɔɖa, ègbè ɖe ɖì so jiŋùkusi gblɔ̃ be: “Àmè kèa ye nyi èvi nyè ɖève, ekè e jro mù be ma cã a.”

Currently Selected:

Màteo 3: GEN

Highlight

Copy