Màteo 2
2
Ènunyatɔwo va ji Yesù kpɔ
1Wo jì Yesù lè Bɛtlɛhɛ̀m, lè Yudeà nyigbã ji lè èfìɔ Herod be hùenu. Wàlɛbɛ ŋua, ènunyatɔ kèwo kùnà ènu mè to wètriviwo jia, ɖewo so èwèzɛ̃pe va Yèruzàlɛm. 2Wo biɔ sè be: “Fikɛ Yudàviwo be èfìɔ kè wo jìa lè ò? Đo mi kpɔ wètrivi kè ɖè yebe jìji fiɔa, lè èwèzɛ̃pe, eye mi va be mia jè *èɖɛ̀ na ɛ̀.” 3Ekè èfìɔ Herod sè ènyà kèa, àgbɔ̃ ci ji na ɛ̀, eye be ci ji na Yèruzàlɛmtɔwo kpata. 4E yɔ * mawunɔ gãwo ku èsefiɔtɔwo kpata bɔ̀, biɔ wo be: “Fikɛ wo ɖo la jì Mɛ̀siaa lè ò?” 5Wo ɖoeŋuti na ɛ̀ be: “Wo la jì ì lè Bɛtlɛhɛ̀m lè Yudeà nyigbã ji. Đo, Mawu be gblɔ̃ɖɛtɔa gblɔ̃ be:
6''Èwò Bɛtlɛhɛ̀m, èdù kè lè Yudeà nyigbã jia,
wò mu nyi èdù kè hùe wu
lè Yudeà be èdù gãwo dòmè ò,
ɖo èwò mè ye èfìɔvi kè la kplɔ̀
Izràɛl dùkɔ̃ nyèa la to so.''”
7Kè e lè nènea, Herod yɔ ènunyatɔawo lè wawla mè, biɔ wo gà kè mè tututu wètrivia ze a. 8E yomèa, e dɔ̃ ènunyatɔawo ɖoɖa Bɛtlɛhɛ̀m, gblɔ̃ na wo be: “Mì yì ji ɖèvia nyuɛ̃ ɖe. Ne mì kpɔ ɛ̀ a, mì va to è na mù, ne ènyè cã ma yì jè *èɖɛ̀ na ɛ̀.”
9Ekè wo sè èfìɔa be ènyà vɔ̀a, wo jè èmɔ eye, wètrivi kè to lè èwèzɛ̃pe sãa, va lè ŋùkɔ̀ na wo le yì. Vɔ̀a, kè wètrivia ɖo àxue kè mè ɖèvia lèa be tamèa, e tɔtè. 10Kè wo kpɔ wètrivia, èjì jɔ̀ wo ŋutɔ. 11Eye ekè wo ɖo àxuea mèa, wo kpɔ vifɛ̃a ku ènɔa Maria, eye wo jè èklò, jè *èɖɛ̀ na ɛ̀. Eye ekè wo hũ woabe fòtrowoa#2.11 Fòtrowo: àɖakàvi kè mè kɛ̀sìnɔ̀nuwo nɔ̀nà na àmèa., wo sɔ àgbãmèkãnuwo na ɛ̀: sìka ku lifi kudo àbɛyɛ#2.11 Sìka, lifi, àbɛyɛ: Wo nyi Arabìa be àdɔ̀kùnuwo ku àmì hɔ̃hɔ̃ɛ kèwo xɔ̀ àsì, eye wo ɖo gɔ̃mèsèse na ènunyatɔ ŋuawo, hùe ŋua nu.. 12E yomèa, Mawu ɖo àfɔ̀ àfɔ̀ ji na wo lè èdrɔ̃ mè be wo mu gbà trɔyì Herod gbɔ ò, eye wo to èmɔ bu jo yì woa de.
Wo si yì Ejiptè
13Kè ènunyatɔ ŋuawo jo vɔ̀a, Tɔhonɔ̀ be àtikplɔtɔa to ɖo Yosɛ̀f ji lè àlɔ̃ mè, gblɔ̃ na ɛ̀ be: “Sitè, kplɔ̀ ɖèvia ku ènɔa ne mìa si yì Ejiptè. Nɔ̀ funu kaka na gà kè mè mù la to na wò be wòa trɔvaa, ɖo Herod la ji be yèa wù ɖèvia.” 14Yosɛ̀f sitè lè èzã ŋua mè, kplɔ̀ ɖèvia ku ènɔa eye wo si yì Ejiptè. 15E nɔ̀ funu kaka na gà kè mè Herod kua. Ekèa jɔ̀ ne ènyà kè Tɔhonɔ̀ gblɔ̃ to gblɔ̃ɖɛtɔa jia ne zɔ̃ sù be: “Ejiptè ye mù yɔ èvi nyè ŋusùa so.”
Wo wù ɖèviwo lè Bɛtlɛhɛ̀m
16Kè Herod kpɔ be ènunyatɔawo flù yèa, e bijì ŋutɔ. E kpɔ gà kè mè ènunyatɔawo to na ɛ̀ be wo jì ɖèvia, eye e ɖè ègbè be woa wù ŋusùvi kèwo ɖo èpè èvè ku kèwo mu kpɔ ɖo èpè èvè òa kpata lè Bɛtlɛhɛ̀m ku yebe àgowo ji. 17Nènea ye ènu kè Mawu be gblɔ̃ɖɛtɔ Yeremìa gblɔ̃a zɔ̃ sù be:
18“Àbòbo ɖì lè Ramà.
Wo sè àvifãfã ku àlenanawo.
Raxɛl ye le fã àvi ɖo yebe èviwo ta,
eye, mu le ji be woa ɖo àsi àkɔ na yè ò, ɖo yebe viwo dɛ̃.”
Yosɛ̀f trɔ so Ejiptè va ci Nazarɛ̀t
19Kè Herod ku yomèa, Mawu be àtikplɔtɔ ɖe ɖè ye ɖokoe fiɔ Yosɛ̀f lè èdrɔ̃ mè lè Ejiptè. 20E gblɔ̃ na ɛ̀ be: “Sitè, kplɔ̀ ɖèvia ku ènɔa ne mìa trɔyì Izràɛl nyigbã ji ɖo àmè kèwo le ji la wù ìawo ku vɔ̀.” 21Yosɛ̀f sitè nyàwo, jè èmɔ; e kplɔ̀ ɖèvia ku ènɔa, yì Izràɛl nyigbã ji. 22Vɔ̀a, kè be sè be Arkelaɔ̀s ye wo ɖo èfìɔ ɖo ètɔa Herod tèpe lè Yudeà, e vɔ̃ funu yìyi. Ekè Mawu fiɔ ɛ̀ ènu kè be ɖo la wɔ̀a to èdrɔ̃ mèa, e jo yì Galilea nyigbã ji. 23E va yì nɔ̀ èdù kè wo yɔna be Nazarɛta mè, ne ènu kè Mawu be gblɔ̃ɖɛtɔwo ŋlɔ̀ ɖɛa ne zɔ̃ sù be: “Wo la yɔ ɛ̀ be Nazarɛttɔ̀.”
Currently Selected:
Màteo 2: GEN
Highlight
Share
Copy
Want to have your highlights saved across all your devices? Sign up or sign in
Mina Bible © Bible Society of Togo, 2014.
