Yòhanɛ̀s 9

Yesù hũ ŋùkuvi na ŋùvìnɔ̀ ɖe

1Wàlɛbɛ kè Yesù va le yìa, e kpɔ ŋusù ɖe kè nyi ŋùvìnɔ̀ so jìjimèa. 2Yebe nukplaviwo biɔ ɛ̀ be: “Ènufiɔtɔ, àmè kɛ ye wɔ̀ ènuvuɛ̃, eye wo jì ŋusù kèa ŋùvìnɔ̀ ò? Ye ŋutɔ ye loo, àlo yebe àjìtɔwo ye?” 3Yesù ɖo e ŋuti na wo be: “Mu nyi àmè kèa, àlo yebe àjìtɔwo be ènuvuɛ̃ ŋuti ye wo jì ì ŋùvìnɔ̀ ɖo ò. Vɔ̀a, ne Mawu bèa ɖè yebe ŋusɛ̃ fiɔ, to e ji ŋuti ye. 4Fifì kè èŋù kèa, mi ɖo la wɔ̀ àmè kè dɔ̃ mù ɖoɖaa be èdɔwo, ɖo, èzã la va do, eye àmè ɖe mu la gbà teŋu wɔ̀ èdɔ ò. 5Wàlɛbɛ kè mù kpɔ̀tɔ̀ lè xixea mèa, ènyè ye nyi xixea be kɛ̃klɛ̃.” 6Kè Yesù gblɔ̃ ènyà kèa, e tu ètã ɖo ànyigbã, sɔ ètãa nyà èkɔ. E sɔ bàba a sì ɖo ŋùvìnɔ̀a be ŋùkuviwo ji. 7Eye be gblɔ̃ na ɛ̀ be: “Yì lè èsì lè Silòa be tãkua mè.” Silòa gɔ̃mè ye nyi: “*Àmèdɔ̃dɔ̃.” E yì lè èsìa, eye ekè be to vaa, e le kpɔ ènu. 8Èkɔa mètɔwo kudo àmè kèwo kpɔna ŋusù kèa sã, wàlɛbɛ kè be nyi ènubiɔtɔawo gblɔ̃ be: “Mu nyi ŋusù kè nɔ̀nà ànyi, biɔna ènua ye nyi ekèa òa?” 9Àmè ɖewo le gblɔ̃ be: “E ye.” Àmè buwo le gblɔ̃ be: “Mu nyi e ye ò. Àmè ɖì àmè ye.” Vɔ̀a ŋùvìnɔ̀a ŋutɔ le gblɔ̃ be: “Ènyè ye.” 10Eye wo biɔ ɛ̀ be: “Àleke wɔ̀ ŋùkuvi wòwo va hũ ò?” 11E ɖo e ŋuti na wo be: “Àmè kè wo yɔna be Yesùa ye nyà èkɔ, sɔ sìsì ɖo àpe ŋùkuviwo ji, eye be gblɔ̃ na mù be ma yì lè èsì lè Silòa be ètɔ̀a to. Mù yì nyàwo, eye ekè mù lè èsìa vɔ̀a, ŋùkuvi nyèwo hũ.” 12Wo biɔ ɛ̀ be: “Fikɛ àmèa lè ò?” E ɖo e ŋuti na wo be: “Nyè mu nya ò.”

Farizìwo biɔ ènyà ŋùvìnɔ̀a

13Wo kplɔ̀ ŋusù kè nyi ŋùvìnɔ̀ sãa yì Farizìwo gbɔ. 14Yudàviwo be jɛ̃gbɔ̃zã gbè ye Yesù nyà èkɔ sɔ hũ ŋùkuvi na ŋùvìnɔ̀a. 15Eye Farizìwo cã biɔ ɛ̀ be àleke wɔ̀ ye yebe ŋùkuviwo hũ ma. E ɖo e ŋuti na wo be: “E nyà èkɔ sɔ sìsì ɖo ŋùkuvi nyèwo ji, eye mù lè èsì. Fifìa, mù le kpɔ ènu.” 16Farizìwo dòmètɔ ɖewo gblɔ̃ be: “Ŋusù kèa, mu so Mawu gbɔ ò; ɖo mu dona bùbu jɛ̃gbɔ̃zãa ŋuti ò.” Vɔ̀a àmè ɖewo cã gblɔ̃ be: “Àleke àmè kè nyi ènuvuɛ̃wɔ̀tɔa la teŋu wɔ̀ ŋùdãdɔ kèawo hati ò?” Eye mamã va woa dòmè. 17Wo gbà biɔ ɛ̀ be: “Èwò ya ɖe, nukɛ wò bù so àmè kè dà èdɔ̀ na wòa ŋuti ò?” E ɖo e ŋuti be: “Mawu be gblɔ̃ɖɛtɔ ye be nyi.”

18Kaka kè wo mu kpɔ sè ènyà ɖe so ŋusùa be àjìtɔwo nu òa, wo mu le ji la xɔ̀sè be ŋùvìnɔ̀ ye ŋusùa nyi sãa, eye be va le kpɔ ènu fifì ò. 19Wo yɔ yebe àjìtɔwo, eye wo biɔ wo be, “Mìabe èvi ye nyi ŋusù kèa kè mì be yèwo jì ŋùvìnɔ̀a? Leke wɔ̀ ye be le kpɔ ènu fifì ò?” 20Àjìtɔawo ɖo e ŋuti na wo be: “Mi nya be miabe èvi ye be nyi, eye mi jì ì ŋùvìnɔ̀. 21Vɔ̀a, àleke wɔ̀ be lè kpɔ ènu fifìa, mi mu nya ɛ̀ ò. Àmè kè hũ ŋùkuvi na ɛ̀a, mi mu nya e cã ò. Mì biɔ ɛ̀ sè; mu gbà nyi vifɛ̃ ò. Ye ŋutɔ la ɖo e ŋuti na mì.” 22Àjìtɔawo gblɔ̃ ènyà kèa, ɖo wo le vɔ̃ Yudàviwo. Yudàviwo be àmègãwo bɔ̀, pò ɖodu vɔ̀ be yèwo la nyà àmè ɖekpekpe àmè kè la hũ e mè be Yesù ye nyi Mɛ̀siaa to lè bɔ̀bɔ̀pea. 23Ènu kèa ŋuti ye yebe àjìtɔwo gblɔ̃ be: “Mu gbà nyi vifɛ̃ ò, mì biɔ ɛ̀ sè.”

24Eye wo gbà yɔ ŋusù kè nyi ŋùvìnɔ̀ sãa, wo gblɔ̃ na ɛ̀ be: “Na gogo Mawu! Mi nya be, ŋusù kèa ènuvuɛ̃wɔ̀tɔ ye be nyi.” 25Ŋusùa ɖo e ŋuti na wo be: “Nyè mu nya ne èvuɛ̃wɔ̀tɔ ye be nyi ò. Ènu kè mù nyaa kpò ye nyi be ŋùvìnɔ̀ ye mù nyi sã, vɔ̀ fifìa, mù le kpɔ ènu.” 26Wo biɔ ɛ̀ be: “Nukɛ be wɔ̀ na wò ò? Àleke ye be wɔ̀, hũ ŋùkuvi na wò ò?” 27E ɖo e ŋuti na wo be: “Mù gblɔ̃ ɛ̀ na mì sã, vɔ̀a, mì mu ɖo èto mù ò. Nukɛ ŋuti ye mì le ji la gbà sè è ò? Àlo, mìawo cã, mì le ji la nyi yebe nukplaviwo ye à?” 28Farizìawo tɔ ɛ̀ zũzũ be: “Èwò ye nyi yebe *nukplavi. Mosè be nukplavi ye miawo ya mi nyi. 29Mi nya be Mawu pò nupo kudo Mosè, vɔ̀a, àmè kèa yaa, mi mu nya àfi kè be soa ŋutɔ cã ò.” 30Ŋusùa ɖo e ŋuti na wo be: “E wɔ̀ ŋùdã na mù ŋutɔ be mì mu nya àfi kè be soa ò, vɔ̀a, e ye jo hũ ŋùkuvi na mù! 31Mì nya be, Mawu mu ɖona èto àmè vuɛ̃ ò, vɔ̀a ne àmè ɖe sɛ̃nà Mawu nyuɛ̃ ɖe, eye be wɔ̀nà yebe jro a, nènemea ye be ɖona èto. 32So gà kè mè ye wo ɖo xixea, àmè ɖe mu sè be wo hũ ŋùkuvi na àmè kè wo jì ŋùvìnɔ̀a kpɔ gbèɖe ò. 33Ne ŋusù kèa mu so Mawu gbɔ òa, mu la teŋu wɔ̀ ènu ɖe ò.” 34Farizìwo ɖo e ŋuti na ɛ̀ be: “Èwò kè wo jì ɖo ènuvuɛ̃ mèa, èwò ye le ji la fiɔ mi ènua?” Eye wo ɖè è to.

Gbɔ̃gbɔ̃mè be ŋùvìnɔ̀ nyinyi

35Kè Yesù sè be wo ɖè è toa, e va kpɔ ɛ̀, eye be biɔ ɛ̀ be: “Wò xɔ̀ *Àgbètɔ be Èvia ji sè a?” 36Ŋusùa ɖo e ŋuti na ɛ̀ be: “Àpetɔ, àmè kɛ ye ò, ne ma xɔ̀ e ji sè?” 37Eye Yesù gblɔ̃ na ɛ̀ be: “Wò kpɔ ɛ̀ vɔ̀; àmè kè le pò nupo kudo wòa ye.” 38Ŋusùa be: “Mù xɔ̀sè Tɔhonɔ̀”, eye be cɔ̃ ŋùmè ànyi lè Yesù be ŋùkɔ̀, jè *èɖɛ̀ na ɛ̀. 39Eye Yesù gblɔ̃ be: “Kòjoɖoɖo ŋuti ye mù va xixea mè ɖo, ne àmè kèwo mu kpɔna ènu òa, woa kpɔ ènu, eye àmè kèwo kpɔna ènua, woa trɔ zũ ŋùvìnɔ̀wo.” 40Farizì kèwo lè Yesù gbɔawo, sè ènyà kèawo, eye wo biɔ ɛ̀ be: “Ŋùvìnɔ̀wo ye miawo cã mi nyia?” 41Yesù ɖo e ŋuti na wo be: “Ne ɖe ye mì nyi ŋùvìnɔ̀woa, mìabe ènuvuɛ̃wo mu la ci èkɔ̀ na mì ò. Vɔ̀a, fifìa, mì be: 'Mi le kpɔ ènu!' Ènu kèa ŋuti mìabe ènuvuɛ̃ kpɔ̀tɔ̀ ci èkɔ̀ ji na mì.”

Currently Selected:

Yòhanɛ̀s 9: GEN

Highlight

Copy