Yòhanɛ̀s 8

[ 1Eye Yesù yì Àmìtitoa ji. 2Ekè èŋù kèa, e gbìgbɔ̀ yì mawuxɔa mè ŋùdekɛ̃nyɛ fùtùu. Kè àmèwo zɔ̃ hòo va e gbɔa, e nɔ̀ ànyi, eye be tɔ wo ènufiɔfiɔ. 3Wàlɛbɛ ŋua, èsefiɔtɔwo kudo Farizìwo kplɔ̀ nyɔ̃nù ɖe va. Wo sò nyɔ̃nùa do, be le wɔ̀ *àhasì, eye wo kplɔ̀ ɛ̀ va ɖotè lè àmèwo be ŋùkɔ̀. 4Wo gblɔ̃ na ɛ̀ be: “Ènufiɔtɔ, wo sò nyɔ̃nù kèa do, be le wɔ̀ *àhasì. 5Mosè ɖè ègbè na mi, lè èsea mè be mia pò èkpe leke be nyɔ̃nùawo wù. Nukɛ wò ya wò kpɔ so e ŋuti ò?”

6Wo le gblɔ̃ ekèa, ne woa sɔ tè è kpɔ, ne woa sè ènyà lè e nu, sɔ dohùɛ do è. Vɔ̀a Yesù bɔ̀bɔ̀, tɔ ènu ŋɔ̀ŋlɔ̃ ɖo ànyigbã kudo yebe àlɔ̀vi. 7Kè wo kpɔ̀tɔ̀ le biɔ ɛ̀ ènyàa, Yesù fɔ̃ yì ji, gblɔ̃ na wo be: “Mìa dòmètɔ kè mu wɔ̀ ènuvuɛ̃ kpɔ ò a, ne dà ɛ̀ èkpe cucugbã.” 8E gbà bɔ̀bɔ̀ le ŋlɔ̀ ènu ɖo ànyigbã ke. 9Kè wo sè ènyà kèawoa, wo jo, ɖèka ɖèka, so àmègãwo ji, eye, e va kpɔ̀tɔ̀ Yesù ɖèka kudo nyɔ̃nùa. Ekè nyɔ̃nùa kpɔ̀tɔ̀ lè ètè lè ŋùkɔ̀ na ɛ̀a, 10Yesù kɔ èta yì ji, eye be gblɔ̃ na ɛ̀ be: “Nyɔ̃nù, fikɛ wo lè ò? Àmè ɖekpe mu gblehùɛ do wò òa?” 11Nyɔ̃nùa ɖo e ŋuti be: “Àpetɔ, àmè ɖekpe mu gblehùɛ do mù ò.” Yesù gblɔ̃ na ɛ̀ be: “Nyè cã nyè mu gblehùɛ do wò ò. Jo yì; vɔ̀a, mù gbà wɔ̀ ènuvuɛ̃ ke ò.”]

Yesù ye nyi xixea be kɔ̀kɔ̀ɛa

12Yesù gbà pò nupo na àmèha a be: “Ènyè ye nyi xixea be kɛ̃klɛ̃a. Ne àmè ɖe kplɔ̀ mù do a, àmè ŋua mu la zɔ̃ lè vìvìti mè ò, vɔ̀a, e la ɖo kɔ̀kɔ̀ɛ kè nana àgbè a.” 13Farizìwo gblɔ̃ na ɛ̀ be: “Wò ŋutɔ wò le ɖù ɖase na ɖokoe wò; ɖase wòa mu nyi àdodoe ò.” 14Yesù ɖo e ŋuti na wo be: “Ne mù le ɖù ɖase na ɖokoe nyè ŋutɔ cã a, ɖase nyèa nyi nyàwo, ɖo mù nya àfi kè mù so, kudo àfi kè mù le yìa. Mìawo yaa, mì mu nya àfi kè mù so, kudo àfi kè mù le yìa ò. 15Mì ɖona kòjo sìgbè àgbètɔwo nène. Gãke nyè yaa, nyè mu le ɖo kòjo na àmè ɖe ò. 16Vɔ̀a ne e nyi be mù ɖo kòjo cã a, mù sònà ènyà jɔ̀jɔɛ; ɖo mu nyi ènyè ɖèka ye ɖona kòjoa ò. Vɔ̀a, ènyè ku Ètɔ nyè kè dɔ̃ mù ɖoɖaa ye. 17Wo ŋlɔ̀ ɖo mìabe Èse Xoma a mè be, ènu kè àmè èvè ɖù ɖase ɖèka na a nyi nyàwo. 18Mù le ɖù ɖase so ɖokoe nyè ŋuti, eye Ètɔ nyè kè dɔ̃ mù ɖoɖaa cã le ɖù ɖase na mù.” 19Wo biɔ ɛ̀ be: “Fikɛ Ètɔ wòa lè ò?” Yesù ɖo e ŋuti be: “Mì mu jèsi mù ò; mì mu jèsi Ètɔ nyè cã ò; ɖo ne mì kè jèsi mùa, mì la jèsi Ètɔ nyè cã.”

20Yesù le gblɔ̃ ènyà kèawo wàlɛbɛ kè be le fiɔ ènu lè mawuxɔa mè, lè tèpe kè wo yɔna be Ènujɔ̀pea. Àmè ɖe mu le è ò, ɖo yebe gàmè mu kpɔ sù hàɖe ò.

Mì mu la teŋu yì àfi kè mù le yìa ò

21Eye Yesù gbà gblɔ̃ na wo be: “Mù le jo, eye mì la ji mù vɔ̀a, mì la ku ci mìabe ènuvuɛ̃wo mè. Àfi kè mù le yìa, mì mu la teŋu va ò.” 22Yudàviwo le gblɔ̃ be: “E le ji la wù ye ɖokoe ye à? Đo e gblɔ̃ be: 'Mì mu la teŋu yì àfi kè mù le yìa ò.'” 23Yesù ɖo e ŋuti na wo be: “Ànyigbã kèa ji ye mì so. Ènyè yaa, jiŋùkusi ye mù so va. Xixe kèa tɔ̀ ye mì nyi. Ènyè yaa, nyè mu nyi xixe kèa tɔ̀ ò. 24Ye ŋuti ye mù gblɔ̃ na mì be, mì la ku ci mìabe ènuvuɛ̃wo mè. Ne mì mu xɔ̀sè be mù nyi àmè kè mù nyi òa, Ɛ̃ɛ mì la ku ci mìabe ènuvuɛ̃wo mè.” 25Wo biɔ ɛ̀ be: “Àmè kɛ ye wò nyi ò?” Yesù ɖo e ŋuti na wo be: “Àmè kè mù gblɔ̃ na mì so gɔ̃mèjèje a be mù nyia, kpò ye mù nyi. 26Mù ɖo ènyà sùgbɔ la to, eye mù la hɛ̃ so mìa ŋuti. Vɔ̀a, àmè kè dɔ̃ mù ɖoɖaa, nyàwototɔ ye be nyi; eye ènyà kè mù sè so e gbɔa kpò ye mù le to na xixea.”

27Wo mu sè e mè be Àta ŋuti ye be le pò nupo so na yèwo ò. 28Yesù gblɔ̃ na wo be: “Wàlɛbɛ kè mì la kɔ *Àgbètɔ be Èvia yì ji vɔ̀a, mì la nya be mù nyi Àmè kè mù nyia, eye nyè mu wɔ̀nà ènu ɖe lè ɖokoe nyè sinu ò: ènu kè Àta fiɔ mùa kpò ye mù gblɔ̃nà. 29Àmè kè dɔ̃ mù ɖoɖaa lè kudo mù. Mu gble ènyè ɖèka ɖɛ ò; ɖo ènu kèwo jè ŋùmè na ɛ̀a kpò ye mù wɔ̀nà.” 30Wàlɛbɛ kè be le pò nupo nènea, àmè sùgbɔ xɔ̀ e ji sè.

Abràham be jìjimèvi àdodoeawo

31Eye Yesù to na Yudàvi kèwo xɔ̀ e ji sèawo be: “Ne mì le ènyà nyèwo ɖo àsia, mì la nyi *nukplavi nyèwo nyàwo. 32Mì la jèsi nyàwo a eye nyàwo a la na, mì la vò.” 33Wo gblɔ̃ na ɛ̀ be: “Abràham be jìjimèviwo ye mi nyi, eye mi mu nyi kluvi na àmè ɖe kpɔ ò. Leke wò la teŋu gblɔ̃ be, mì la vò ɖo ò?” 34Yesù ɖo e ŋuti na wo be: “Nyàwo mù le to na mì. Àmè ɖekpekpe àmè kè wɔ̀nà ènuvuɛ̃a, ènuvuɛ̃ be kluvi ye be nyi. 35Kluvi mu nɔ̀nà àxomè kaka sɔ yì ò. Àxuevi ye nɔ̀nà àxomè kaka sɔ yì. 36Ye ŋutia, ne Èvia ye na mì vòa, eŋuã, mì la vò nyàwo. 37Mù nya be, Abràham be ènukuwo ye mì nyi. Vɔ̀a ekè àpe ènyàwo mu ɖo mìabe èjì mè ò a, mì le ji la wù mù. 38Ènu kè mù kpɔ lè Ètɔ nyè gbɔa, ye mù le to na mì. Mìa yaa, mì le wɔ̀ ènu kè mì sè so mìa tɔ gbɔa.” 39Wo ɖo e ŋuti na ɛ̀ be: “Abràham ye nyi mia tɔ.” Yesù gblɔ̃ na wo be: “Ne mì nyi Abràham be èviwo nyàwo a, mì nɔ wɔ̀ ènu sìgbè Abràham nène. 40Vɔ̀a, fifìa, mì le ji la wù mù, ènyè àmè kè to nyàwo kè mù sè so Mawu gbɔa, na mìa. Abràham mu wɔ̀ ènu kèa ò. 41Mìawo yaa, ènu kèwo mìa tɔ wɔ̀a ye mì le wɔ̀.” Wo ɖo e ŋuti na ɛ̀ be: “Ètɔ ɖèka kpò ye mi ɖo, eye nyi Mawu. Mi mu nyi àhasìviwo ò!” 42Yesù ɖo e ŋuti na wo be: “Ne Mawu ye nyi mìa tɔa, mì la kè lɔ̃ mù, ɖo Mawu mè mù so va. E ya ŋuti ye mù lè fikèa ɖo. Nyè mu va lè ɖokoe nyè sinu ò; vɔ̀a, e ye dɔ̃ mù ɖoɖa. 43Nukɛ ŋuti ye mì mu ŋɔjè ènu kè mù le gblɔ̃ na mìa mè ò? Kè ènyà nyèwo vena sèse na mìa ŋuti ye. 44Àbòsam ye nyi mìa tɔ, eye ènu kè be jro a ye mì jina la wɔ̀. Àmèwùtɔ ye be nyi, so kaka gɔ̃mèjèje a ke. Ye kudo nyàwo wo mu nyina ò. Đo nyàwo mu lè e ya mè ò. Ne e lè ɖà àjèa, e ɖènà yebe jɔ̀jɔmè fiɔna. Đo e nyi àjèɖàtɔ, gbà nyi àjèɖàɖa be ètɔ. 45Vɔ̀a, ènyè yaa, kè mù tona nyàwo a ŋuti ye mì mu xɔ̀ ji nyè sè ò ɖo. 46Mìa dòmètɔ kɛ ye la teŋu ɖè è fiɔ mù be mù wɔ̀ ènuvuɛ̃ ò? Ne mù jo le to nyàwo a, nukɛ ŋuti ye mì mu xɔ̀ ji nyè sè ɖo ò? 47Àmè kè nyi Mawu tɔ̀a ɖona èto Mawu be ènyàwo. Eye, kè mìawo yaa, mì mu nyi Mawu tɔ̀ òa, ye ŋuti ye mì mu le ɖo èto mù ò ɖo.”

Mù lè xoxo gbɔ̀xue Abràham va jɔ̀

48Yudàviawo ɖo e ŋuti be: “Kè mi be wò nyi Sàmarìatɔ, eye gbɔ̃gbɔ̃ vuɛ̃ lè èwò mèa, wò mu kpɔ be miabe ènyà lè e mè ò a?” 49Yesù ɖo e ŋuti na wo be: “Aò! Gbɔ̃gbɔ̃ vuɛ̃ mu lè mè nyè ò. Ètɔ nyè ye mù le na gogo, vɔ̀a mìawo yaa, mì jo le do vlo mù. 50Nyè mu le ji gogo na ɖokoe nyè ò. Àmè ɖe lè, kè le wɔ̀ ɛ̀. E ye nyi kòjoɖotɔa. 51Nyàwo ye mù le to na mì be, ne àmè ɖe wɔ̀ ɖo àpe ènyàwo jia, àmèa mu la ku gbèɖe ò.”

52Wàlɛbɛ ŋua, Yudàviawo gblɔ̃ na ɛ̀ be: “Mi nya fifì be, gbɔ̃gbɔ̃ vuɛ̃ ye lè èwò mè, ɖo Abràham ku, gblɔ̃ɖɛtɔwo cã ku, co gãkea, wò le gblɔ̃ be: 'Ne àmè ɖe lebè na ènyà nyèwoa, mu la ɖɔ èku kpɔ ò.' 53Wò wu mia tɔgbe Abràham kè kua? Mawu be gblɔ̃ɖɛtɔwo cã ku! Àmè kɛ ŋutɔ ye wò bù be yè nyi ò?” 54Yesù ɖo e ŋuti na wo be: “Ne mù kè le na gogo ɖokoe nyè ye à, gogo nyèa mu la ɖo gɔ̃mè sèse ɖekpe ò. Ètɔ nyè ye le na mù gogo, Ètɔ nyè kè mì be e ye nyi mìabe Mawu a. 55Mìabe Mawu kè mì mu jèsi òa. Ènyè yaa, mù jèsi ì. Ne mù gblɔ̃ be nyè mu jèsi ì òa, mù la nyi àjèɖàtɔ sìgbè mìawo ke nène. Vɔ̀a, mù jèsi ì, eye mù wɔ̀nà ɖo yebe ènyàwo ji. 56Èjì jɔ̀ mìa tɔ Abràham, wàlɛbɛ kè be le bù àpe vava be ŋùkèkèa ŋuti kpɔa. E kpɔ ɛ̀ nyàwo, eye yebe èjì hũhũ kudo jìjɔɛ.” 57Yudàviwo gblɔ̃ na ɛ̀ be: “Nukɛ! Wò mu kpɔ ɖo èpè èkà ci èwo hàɖe ò, vɔ̀a wò jo kpɔ Abràham a?” 58Yesù ɖo e ŋuti na wo be: “Nyàwo ye mù le to na mì: mù lè xoxo keŋu gbɔ̀xue Abràham va jɔ̀.” 59Wàlɛbɛ ŋua, wo fɔ̀ èkpewo la sɔ pò è; vɔ̀a, Yesù bè, eye be to jo lè mawuxɔa mè.

Currently Selected:

Yòhanɛ̀s 8: GEN

Highlight

Copy