Yòhanɛ̀s 21

Yesù ze ɖo yebe nukplaviwo ji le Tiberìa be ètɔ̀a to

1E yomè a, Yesù gbà ɖè ye ɖokoe fiɔ yebe nukplaviwo lè Tiberìa be ètɔ̀a to. Àlekè be yì ɖoa ye nyi ekèa. 2Simɔ̀n Petrò ku Tomà kè wo yɔna be Vènàvia kudo Natanàɛl kè so Kanàn, lè Galilea be ànyigbã jia, gbàkudo Zebedeo be èvi-ŋusù èvèawo, ku Yesù be *nukplavi èvè buwo lè èdu. 3Simɔ̀n Petrò gblɔ̃ na wo be: “Mù le yì ètɔ̀ ji.” Wo gblɔ̃ na ɛ̀ be: “Mia cã mi la yì kudo wò.” Wo so eye wo ɖo èhũa mè; eye wo mu le èlã ɖekpe, èzã ŋua mè ò. 4Kè èŋù kèa, Yesù va nɔ̀tè lè ètɔ̀a to, vɔ̀a nukplaviawo mu nya be e ye ò. 5E gblɔ̃ na wo be: “Èvi nyèwo, èlãvi ɖe lè mìa sia?” Wo ɖo e ŋuti na ɛ̀ be: “Aò!” 6E gblɔ̃ na wo be: “Mì dà èɖɔa ɖo èhũa be ɖùsi mè, ne mìa kpɔ.” Wo dà ɛ̀, eye wo le èlãvi sùgbɔ, àleke be wo mu gbà teŋu dɔ̃ èɖɔa to ò. 7*Nukplavi kè Yesù dèvea gblɔ̃ na Petrò be: “Tɔhonɔ̀ ye!” Ekè Petrò sè be Tɔhonɔ̀ ye à, e sɔ yebe àwù sã ɖo àlì, ɖo, àwù mu lè èkɔ̀ na ɛ̀ gà ŋua mè ò, eye be tìkpo jè ètɔ̀a mè. 8Nukplavi kpɔ̀tɛawo trɔ kù èhũa va àgo, eye wo le dɔ̃ èɖɔ kè ɖɔ kudo èlãviwoa. Wo mu dìdì do àgoa ò; wo lè kpò sìgbè àlɔ̀gba èkà àtɔ̃ nène. 9Ekè wo va àgoa, wo kpɔ àka-zo kè ji èlãvi ku kpɔ̃nɔ lèa. 10Yesù gblɔ̃ na wo be: “Mì fɔ̀ èlãvi kèwo mì le fifìawo be èɖe va.” 11Kè Yesù gblɔ̃ nènea, Simɔ̀n Petrò yì èhũa mè; e dɔ̃ èɖɔa ɖo ànyigbã. Èlãvi gãgã èkà ètɔ̃ takpo ci woètɔ̃ ye lè e mè. Togbɔ be èlãviawo sùgbɔ cã a, èɖɔa mu zɛ̃ ò. 12Yesù gblɔ̃ na wo be: “Mì va ɖù ènu.” Nukplaviawo dòmètɔ ɖekpe mu biɔ be: “Àmè kɛ ye wò nyi ò?” Đo wo nya be Tɔhonɔ̀ ye. 13Eye Yesù, va, sɔ kpɔ̃nɔa, ma ɛ̀ na wo. E ma èlãvia cã na wò. 14Ekèa ye le nyi zè ètɔ̃gɔ̃ kè Yesù le ɖè ye ɖokoe fiɔ yebe nukplaviwo, so gà kè mè be fɔ̃ so èkua.

Petrò be àlɛ̃kplɔ̀tɔ be èdɔa

15Kè wo ɖù ènu vɔ̀a, Yesù biɔ Simɔ̀n Petrò be: “Simɔ̀n, Yòhanɛ̀s be èvi, wò lɔ̃ mù wu àlekè àmè kèawo lɔ̃ mùa?” E ɖo e ŋuti na ɛ̀ be: “Ɛ̃ɛ Tɔhonɔ̀, wò nya be mù lɔ̃ wò.” Yesù gblɔ̃ na ɛ̀ be: “Nyì àlɛ̃vi nyèwo.” 16Yesù gbà gblɔ̃ na ɛ̀, zè èvègɔ̃a be: “Simɔ̀n, Yòhanɛ̀s be èvi, wò lɔ̃ mùa?” Petrò ɖo e ŋuti na ɛ̀ be: “Ɛ̃ɛ Tɔhonɔ̀, wò nya be mù lɔ̃ wò.” Yesù gblɔ̃ na ɛ̀ be: “Kplɔ̀ àlɛ̃ nyèwo.” 17Yesù gbà biɔ Petrò, zè ètɔ̃gɔ̃a be: “Simɔ̀n, Yòhanɛ̀s be èvi, wò lɔ̃ mùa?” Àkpɔ̃ ɖɔ Petrò, ɖo Yesù biɔ ɛ̀, zè ètɔ̃gɔ̃a be: “Wò lɔ̃ mùa?” Eye Petrò ɖo e ŋuti na ɛ̀ be: “Tɔhonɔ̀, wò nya ènu sia ènu, wò nya be mù lɔ̃ wò.” Yesù gblɔ̃ na ɛ̀ be: “Na ènu ɖùɖu àlɛ̃ nyèawo. 18Nyàwo ye mù le to na wò. Kè wò lè ɖèkajɛ mèa, wò ŋutɔ ye blana ègo ji, yìnà àfi kè wò jro a. Vɔ̀a, ne wò va ku àmègãa, wò la kɔ àbɔ yì èji, eye àmè bu la bla ègo ji na wò, la kplɔ̀ wò yì àfi kè wò mu jro òa.” 19Yesù gblɔ̃ ènyà kèawo sɔ le ɖè àlekè Petrò la ku, la sɔ na gogo Mawu a fiɔ. E yomè a, Yesù gblɔ̃ na Petrò be: “Kplɔ̀ mù do.”

Yesù ku nukplavi kè be ɖève a

20Petrò trɔ kpɔ ŋùgbe, eye be kpɔ nukplavi kè Yesù ɖève a lè woa yomè. — Nukplavi ŋua ye gogo Yesù wàlɛbɛ kè wo le ɖù ènua, eye be biɔ ɛ̀ be: “Tɔhonɔ̀, àmè kɛ ye la xɔ̀kpli na wo ò?” — 21Kè Petrò kpɔ ɛ̀a, e biɔ Yesù be: “E ya ɖe, Tɔhonɔ̀, nukɛ ye la jɔ̀ ɖo e ji ò?” 22Yesù ɖo e ŋuti na ɛ̀ be: “Ne mù ji be ne nɔ̀ ànyi kaka ne ma vaa ɖe, fikɛ ye be kã wò ɖo ò? Wò ya, kplɔ̀ mù do.” 23So wàlɛbɛ ŋua ye wo le sàkà ènyà lè nɔ̀viwo dòmè be, nukplavi ŋua ya mu la ku ò. Gãke, Yesù mu gblɔ̃ na ɛ̀ be mu la ku ò, vɔ̀a, e gblɔ̃ be: “Ne mù jro be, bèa nɔ̀ ànyi kaka ma vaa, fikɛ ye be kã wò ɖo ò?”

24Nukplavi kèa ye le ɖù ɖase so ènu kèawo ŋuti. E ye ŋlɔ̀ wo, eye mi nya be nyàwo ye be to.

Ènuwunyàwo

25Yesù gbà wɔ̀ ènu sùgbɔ buwo, eye ne wo jro be woa ŋlɔ̀ wo, ɖèka ɖèkaa, mù bù be xoma kè wo la ŋlɔ̀awo la sùgbɔ kaka, xixe kplògòdòa mu la teŋu hɛ̃ woa kpata ò.

Currently Selected:

Yòhanɛ̀s 21: GEN

Highlight

Copy