Yòhanɛ̀s 15

Yesù be èyè ye nyi vɛ̃-gble àdodoe

1“Ènyè ye nyi vɛ̃-gble àdodoe a. Ètɔ nyè ye nyi vɛ̃gblèdàtɔa. 2Àlɔ̀zɛ̃ sia àlɔ̀zɛ̃ kè lè ŋuti nyè, eye mu sɛ̃na èku òa, Ètɔ nyè sònà ɛ̀ jo. Vɔ̀a, àlɔ̀zɛ̃ kè sɛ̃na èkua, e kɛ̃na ɛ̀, ne bèa gbà sɛ̃ èku kpe è. 3Ènyà kèwo mù to na mìa, kɛ̃ mìa ŋuti vɔ̀, eye mì ɖì. 4Mì nɔ̀ mè nyè, sìgbè àlekè ènyè cã mù lè mìa mèa nène! Ne àlɔ̀zɛ̃ ɖe mu tɛ ɖo vɛ̃tia ŋuti òa, mu la teŋu sɛ̃ èku lè ye ɖokoe sinu ò. Nène a ke ye be la nyi na mì, ne mì mu lè mè nyè òa. 5Ènyè ye nyi vɛ̃tia; mìawo ye le nyi àlɔ̀zɛ̃awo. Àmè kè lè mè nyè, eye nyè cã, mù lè e mèa, nènemea ye sɛ̃na èku sùgbɔ, ɖo, tovò lè ŋuti nyèa, mì mu teŋu wɔ̀ ènu ɖekpe ò. 6Ne àmè ɖe mu lè mè nyè òa, e lè sìgbè àlɔ̀zɛ̃ kè wo sòa nène, eye e puna. Wo bɔ̀nà àlɔ̀zɛ̃ pupuawo, kɔ̀ ɖo èzò mè, eye wo bìnà. 7Vɔ̀a, ne mì lè mè nyè, eye ènyà nyèwo lè mìa mèa, mì la biɔ ènu kè mì jro a, eye mì la xɔ̀ ɛ̀. 8Ètɔ nyè be gogo ye nyi be, mìa sɛ̃ èku sùgbɔ, la sɔ ɖèfiɔ be mì nyi àpe nukplaviwo nyàwo. 9Mù lɔ̃ mì sìgbè àlekè Ètɔ nyè lɔ̃ mùa nène. Ye ŋutia mì nɔ̀ àpe lɔ̃lɔ̃ mè. 10Ne mì wɔ̀ ɖo *èse nyèwo jia, mì la nɔ̀ lɔ̃lɔ̃ nyèa mè, sìgbè àlekè nyè cã mù wɔ̀ ɖo Ètɔ nyè be èsewo ji, eye mù lè yebe lɔ̃lɔ̃ mèa nène.”

11“Mù gblɔ̃ ènyà kèa na mì ne àpe jìjɔɛ bèa nɔ̀ mìa mè, ne mìabe jìjɔɛ bèa nɔ̀ blibo. 12Èse kè mù le na mìa ye nyi ekè: mì lɔ̃ mìa nɔ̀nɔwo sìgbè àlekè mù lɔ̃ mìa nène. 13Àmè ɖekpe mu lɔ̃ àmè wu àmè kè sò yebe àgbè ɖo ànyi ɖo yebe èxlɔ̃wo ta ò. 14Ne mì wɔ̀ ɖo ènyà nyèwo jia, eŋuãa, mì la nyi èxlɔ̃ nyèwo. 15Nyè mu gbà le yɔ mì be sumɔ̃viwo ò, ɖo sumɔ̃vi mu nyànà ènu kè àpetɔa wɔ̀nàa ò. Vɔ̀a mù le yɔ mì be èxlɔ̃ nyèwo, ɖo ènu kèwo keŋu mù sè lè Ètɔ nyè gbɔa, mù na mì nyàwo. 16Mu nyi mìawo ye cã mù ò; vɔ̀a ènyè ye cã mì, eye mù dɔ̃ mì ɖoɖa be mìa sɛ̃ èku. Èku kèwo la nɔ̀ ànyia. Ne mì sɛ̃ èkua, Àta la na mì ènu sia ènu kè mì la biɔ lè àpe nyikɔ mèa. 17Ènu kè mù le biɔ so mìa gbɔa, kpò ye nyi be mìa lɔ̃ mìa nɔ̀nɔwo.”

Xixea crì Yesù

18“Ne xixea le crì mìa, mìa nya be e crì mù jè ŋùkɔ̀ na mì. 19Ne xixea tɔ̀ mì nyia, xixea la kè lɔ̃ mì, sìgbè ye ŋutɔ tɔ̀wo nène. Vɔ̀a, mù cã mì jo lè xixea mè, eye mì mu gbà nyi xixea tɔ̀ ò. Ènu kèa ŋuti ye xixea le crì mì ɖo. 20Mì ɖoŋù be mù gblɔ̃ na mì sãa be: 'Sumɔvi mu wuna àpetɔa ò.' Ne wo tĩ yo nyè mèa, wo la tĩ mìa cã mìa yomè. Ne wo wɔ̀ ɖo ènyà nyèwo jia, wo la wɔ̀ ɖo mìa cã mìa tɔ̀wo ji. 21Wo la wɔ̀ ènu kèawo kpata ku mì, ɖo nyikɔ nyè ŋuti; ɖo wò mu jèsi àmè kè dɔ̃ mù ɖoɖaa ò. 22Ne ɖe ye nyè mu va ò a, ne ɖe ye nyè mu pò nupo na wo òa, wo mu la ɖo ènuvuɛ̃ ò. Vɔ̀a, fifì kè mù va, eye mù pò nupo na woa, woabe ènuvuɛ̃ mu gbà ɖo tàflacɛ ɖe ò. 23Àmè kè crì mùa, crì Ètɔ nyè cã. 24Ne ɖe ye nyè mu wɔ̀ èdɔ kèwo àmè ɖekpe mu wɔ̀ kpɔ gbèɖe lè woa dòmè òa, wo mu la ɖo ènuvuɛ̃ ɖe ò. Vɔ̀ fifìa, wo kpɔ èdɔ kèwo mù wɔ̀a, gãke wo kpɔ̀tɔ̀ le crì ènyè kudo Ètɔ nyè. 25Vɔ̀a, ne ènyà kèa kè wo ŋlɔ̀ ɖo woabe èse xoma a mèa, bèa zɔ̃ sù be: 'Wo le crì mù, gɔ̃mè sèse mà-ɖo.'”

26“Vɔ̀a, ne Àsiɖoàkɔnamètɔ kè mù la dɔ̃ ɖoɖa mì so Àta gbɔa vaa, nyàwo be gbɔ̃gbɔ̃ kè so Àta gbɔa la ɖù ɖase so ŋuti nyè. 27Mìawo cã, mì la ɖù ɖase so ŋuti nyè, ɖo mì nɔ̀ kudo mù so gɔ̃mèjèje a.”

Currently Selected:

Yòhanɛ̀s 15: GEN

Highlight

Copy