Yòhanɛ̀s 14

Yesù nyi èmɔ kè yì Àta gbɔa

1“Mì mu gbà na ne mìabe àyè ne gbãdo ò. Mì xɔ̀ Mawu ji sè. Mì xɔ̀ nyè cã ji nyè sè. 2Nɔ̀pe sùgbɔ lè Ètɔ nyè be àxomè. Ne mu nyi nène òa, nyè mu la to na mì be mù la yì jrà tèpe ɖo ɖɛ na mì ò. 3Ne mù yì jrà tèpe ɖo ɖɛ na mì vɔ̀a, mù la trɔ va kplɔ̀ mì jo, àleke be àfi kè mù lèa, mìa cã mì la nɔ̀ funua. 4Mì nya èmɔ kè yì àfi kè mù le yìa.” 5Tomà gblɔ̃ na ɛ̀ be: “Tɔhonɔ̀, mi mu jèsi àfi kè wò le yìa ŋutɔ cã ò; leke ye mi la wɔ̀ la jèsi èmɔa ò?” 6Yesù ɖo e ŋuti na ɛ̀ be: “Ènyè ye nyi èmɔa, nyàwo a, kudo àgbè a. Àmè ɖe mu teŋu yì Àta gbɔ ne mu to ji nyè ò. 7Ne mì jèsi mùa, mì la jèsi Ètɔ nyè cã. Eye, so fifìa, mì kpɔ ɛ̀ eye mì jèsi ì.”

8Filipò gblɔ̃ na ɛ̀ be: “Tɔhonɔ̀, sɔ Àta fiɔ mi, kpòa, e sù.” 9Yesù gblɔ̃ na ɛ̀ be: “So kaka gbè ɖe gbè ke mù lè kudo mì, gãke wò mu jèsi mù kugbè ò, Filipò! Àmè kè kpɔ mùa, kpɔ Àta. Àleke wɔ̀ wò gbà le gblɔ̃ be: 'Fiɔ mi Àta ò?' 10Wò mu xɔ̀ ɛ̀ sè be mù lè Àta mè, eye Àta lè mè nyè òa? Ènyà kèwo mù le to na mìa, mu so gbɔ nyè ò. Àta kè lè mè nyèa, ye le wɔ̀ ye ŋutɔ be èdɔwo. 11Mì xɔ̀ ji nyè sè be: Mù lè Àta mè, eye Àta lè mè nyè. Ne mì mu le xɔ̀ ènyà nyèwo ji sè ò a, eŋuãa, mì kpɔ ɖo èdɔ kèwo mù le wɔ̀awo ŋuti ne mìa xɔ̀ ji nyè sè. 12Nyàwo ye mù le to na mì. Àmè kè xɔ̀ ji nyè sè a, la wɔ̀ èdɔ kèwo mù le wɔ̀awo, eye be la gbà wɔ̀ ekèwo wu e ŋuaawo cã. Đo mù le yì Àta gbɔ. 13Ènu kè mì la biɔ lè àpe nyikɔ mèa, mù la wɔ̀ ɛ̀ na mì. Ne Àta be gogo bèa ze lè Èvia mè. 14Ne mì biɔ ènu ɖekpekpe lè nyikɔ nyè mèa, mù la wɔ̀ ɛ̀ na mì.”

Yesù fìã Gbɔ̃gbɔ̃ Kɔ̀kɔ̀ɛ be àjɔ̀gbè

15“Ne mì lɔ̃ mùa, mì la wɔ̀ ɖo *èse nyèwo ji. 16Mù la ɖè kuku na Àta, ne bèa na mì Àsiɖoàkɔnamètɔ bu kè la nɔ̀ ku mì kaka sɔ yìa. 17E ya ye nyi Nyàwo be Gbɔ̃gbɔ̃ a. Àmè kèwo nyi xixea tɔ̀awo mu teŋu xɔ̀ ɛ̀ ò, ɖo wo mu teŋu kpɔ ɛ̀ kaka la be yèwoa jèsi ì ò. Mìawo yaa, mì jèsi ì, ɖo e lè ku mì, eye be lè mìa mè. 18Nyè mu la gble mì ɖɛ sìgbè ècɔɛviwo nène ò. Mù la va mìa gbɔ. 19Zãɖe fifìa, àmè kèwo nyi xixe kèa tɔ̀awo mu la gbà kpɔ mù ò. Vɔ̀a mìawo yaa, mì la kpɔ mù, ɖo mù lè àgbè eye mìa cã mì la nɔ̀ àgbè. 20Gbè ŋua gbèa, mì la nya be mù lè Ètɔ nyè mè, be mì lè mè nyè, eye nyè cã mù lè mìa mè.”

21“Àmè kè si *èse nyèwo lè, eye be wɔ̀nà ɖo woa jia, àmè ŋua ye lɔ̃ mù. Àmè kè lɔ̃ mùa, Ètɔ nyè la lɔ̃ ɛ̀; ènyè cã mù la lɔ̃ ɛ̀, eye mù la ɖè ɖokoe nyè fiɔ ɛ̀.”

22Yudà, mu nyi Iskariɔt ò, biɔ ɛ̀ be: “Tɔhonɔ̀, nukɛ ŋuti ye wò le ji la ɖè ɖokoe wò fiɔ mi, vɔ̀a wò mu le ji la ɖè ɖokoe wò fiɔ xixea ò?” 23Yesù ɖo e ŋuti na ɛ̀ be: “Ne àmè ɖe lɔ̃ mùa, e la wɔ̀ ɖo èse nyè ji. Ètɔ nyè cã la lɔ̃ ɛ̀. Mi la yì e gbɔ, eye mi la ɖo nɔ̀pe ɖo e gbɔ. 24Àmè kè mu lɔ̃ mù òa, mu wɔ̀nà ɖo àpe ènyàwo ji ò. Ènyà kèwo mù to na mìawo mu so gbɔ nyè ò. Ètɔ nyè kè dɔ̃ mù ɖoɖaa gbɔ ye wo so. 25Mù le to ènyà kèawo na mì, wàlɛbɛ kè mù gbà kpɔ̀tɔ̀ lè mìa dòmèa. 26Àsiɖoàkɔnamètɔa, kè le nyi Gbɔ̃gbɔ̃ Kɔ̀kɔ̀ɛ kè Ètɔ nyè la dɔ̃ ɖoɖa mì lè àpe nyikɔ mèa, la fiɔ mì ènu sia ènu, eye be la ɖoŋù ènu kèwo keŋu mù gblɔ̃ na mì sãa na mì.”

27“Mù le gble fàfa ɖɛ na mì. Mù le na mì fàfa. Nyè mu le sɔ ɛ̀ na mì sìgbè lekè xixea nana ɛ̀a nène ò. Ye ŋutia, àɖìka mu gbà sò mì ò. Vɔ̃vɔ̃ cã mu gbà ɖo mì ò. 28Mì sè, mù gblɔ̃ be, 'mù le jo, vɔ̀a mù la gbà trɔ va mìa gbɔ.' Ne mì kè lɔ̃ mù ye à, wàlɛbɛ kè mù to na mì be mù le yì Àta gbɔa, mì la kè kpɔ jìjɔɛ. Đo Àta wu mù. 29Mù le to è na mì fifì, keŋu gbɔ̀xue bèa va jɔ̀, àleke be, ne e va jɔ̀ a, mìa xɔ̀sè. 30Nyè mu la gbà pò nupo kudo mì ke ò, ɖo xixe kèa mè be jiɖùtɔa gbãnà. Lè nyàwototo mèa, mu ɖo ŋusɛ̃ ɖekpe ɖo ji nyè ò; 31Vɔ̀a, e jè be xixea ne nya be mù lɔ̃ Àta, eye mù wɔ̀nà ɖo ènu kè be ɖo na mùa ji. Mì sitè ne mia jo lè àfi kèa!”

Currently Selected:

Yòhanɛ̀s 14: GEN

Highlight

Copy