Gɔ̃mèjèje be Xoma 39

Yosɛ̀f lè Potifàr, Ejiptè ŋusùa gbɔ

1Kè wo kplɔ̀ Yosɛ̀f yì ɖo Ejiptè-nyigbã jia, Ejiptè be kobonɔ̀ kè nyi Faraɔ̀n be ènujikpɔtɔwo be ègaa, plè è lè Ismàɛltɔ kèwo kplɔ̀ ɛ̀ vaa si. 2Tɔhonɔ̀ nɔ̀ ku Yosɛ̀f kaka be ènuwo keŋu jènà e ji na ɛ̀ be e trɔ zũ àmè ŋùkuta. Eye e yì nɔ̀ Ejiptè ŋusù kè nyi àpetɔa be àxomè. 3Àmè kèa kpɔ be Tɔhonɔ̀ lè ku Yosɛ̀f eye e nana ènu kè yebe àlɔ̀ wɔ̀a, jènà e ji nyuɛ̃ ɖe. 4Yosɛ̀f be wɔ̀na jè e ji na àpetɔa eye be le è ɖo ŋuti. E sɔ yebe àxuea ku yebe ènunɔ̀amèsiwo do àlɔ̀mè na ɛ̀. 5Eye, kaka kè be sɔ yebe àxue ku ènuwo sɔ do àsi na ɛ̀a, ke ye Tɔhonɔ̀ tu sì na Ejiptètɔa be àxuea ɖo Yosɛ̀f ŋuti. Tɔhonɔ̀ be sìtua ɖiɖi ɖo yebe àxuedo ku yebe àgblèwo kpata ji. 6E tàsi ènunɔ̀amèsiwo kpata na Yosɛ̀f; eye e kè e lè e gbɔa, mu gbà wɔ̀nà ènu ɖekpe ò, to vò lè ènu kè e la ɖù a ŋuti ò.

Yosɛ̀f ku àpetɔa be èsrɔ̃

Yosɛ̀f nyi ɖèkajɛ kè nya kpɔkpɔ ŋutɔ 7eye lè àzã ɖewo yomè a, àpetɔa be èsrɔ̃ be ŋùku jè e ji eye e gblɔ̃ na ɛ̀ be: “Va dɔ̃ ku mù!” 8Vɔ̀a, Yosɛ̀f gbe eye e gblɔ̃ na àpetɔa be èsrɔ̃ be: “Kpɔ be àpetɔ nyèa sɔ mù wɔ̀ nɔ̀via eye e sɔ àxuedo a ji kpɔkpɔ do àsi na mù. E sɔ yebe àdɔ̀kùnuwo kpata do àsi na mù. 9Lè àxue kèa ŋutɔ cã mèa, mu wu mù ò eye mu gbe ènu ɖe na mù kpɔ wu èwò kè nyi èsrɔ̃a kpò ò. Nukɛ ŋuti ye ma teŋu wɔ̀ ènu bàɖà gã kèa sɔ jè àgɔ̀ lè Mawu ji ɖo ò?” 10Gbè sia gbèa, nyɔ̃nùa gblɔ̃nà na Yosɛ̀f be ne dɔ̃ kudo yè, vɔ̀a, mu ɖona èto è gbèɖe ò. 11Vɔ̀ gbè ɖèka kè Yosɛ̀f va àxuea mè ne bèa wɔ̀ yebe èdɔ do àsia, eye sumɔ̃viawo dòmètɔ ɖekpe mu lè òa, 12àpetɔa be èsrɔ̃ jè yebe àwù ji gblɔ̃ be: “Dɔ̃ ku mù fifì!” Yosɛ̀f ɖè àsi lè yebe àwù kè be lea ŋuti na ɛ̀, si lè e gbɔ, to jo lè àxuea mè. 13Wàlɛbɛ kè be kpɔ be Yosɛ̀f gble yebe àwù ɖo àlɔ̀mè na yè, si joa, 14e yɔ yebe àmègbɔnɔ̀viwo gblɔ̃ na wo be: “E yɔ̀a! Wo kplɔ̀ Hebrùvi ɖe va ne bèa wɔ̀ ènu kè jro èa ku mi! E va gbɔ nyè be yèa dɔ̃ ku mù eye mù do àpa lelele biɔ xɔ̀namètɔ. 15E kè be sè be mù kɔ ègbè yì ji le biɔ àlɔ̀doa, e si jo lè àxuea mè gble yebe àwùa ɖo àxàdamè na mù.” 16E tàsi Yosɛ̀f be àwùa ɖo yebe àxàdamè kaka èsrɔ̃a Potifàr gbɔ̀ va àxomè. 17E gbà gblɔ̃ ènyà ɖèka ŋùmèa ke na ɛ̀ be: “èkluvi, Hebrù kè wò kplɔ̀ va na mia, va be yèa do àfɔ̀gbe na mù. 18Kaka kè ye mù do àpa a, e si jo lè àxuea mè gble yebe àwù ɖo fikèa.” 19Ekè àpetɔa sè ènyà kè èsrɔ̃a gblɔ̃ be: “Kpɔ àlekè ye èkluvi wòa wɔ̀ va gbɔ nyèa ɖa!” E do àdɔ̀mèze ŋutɔ. 20E na wo le Yosɛ̀f yì do gàkpa mè lè àgbògbòa mè àfi kè ye wo tuna èfìɔ be gàmènɔ̀tɔwo ɖoa.

Yosɛ̀f lè gàkpamè

Wàlɛbɛ kè e lè funua, lè àgbògbòa mèa, 21Tɔhonɔ̀ nɔ̀ kudo è. E gbà ɖè yebe àdɔ̀mè nyuɛ̃ fiɔ ɛ̀ eye be na yebe ènu jè e ji na àgbògbòa ji kpɔtɔwo be ègaa. 22Àgbògbòa be èga sɔ gàmènɔ̀tɔ kpɔ̀tɛawo kpata do àsi na Yosɛ̀f; ènu ɖekpekpe kè wo la wɔ̀a, Yosɛ̀f ye nana wo wɔ̀ na ɛ̀. 23Ègaa mu gbà kpɔna ènu kè wo do àsi na Yosɛ̀f be ne wɔ̀a ò, ɖo Tɔhonɔ̀ lè kudo è, eye ènu ɖekpekpe ènu kè be la wɔ̀a, Tɔhonɔ̀ nana e jènà e ji na ɛ̀.

Currently Selected:

Gɔ̃mèjèje be Xoma 39: GEN

Highlight

Copy