Gɔ̃mèjèje be Xoma 40

1Vɔ̀ lè eŋuãwo yomè a, Ejiptè be èfìɔa be àhàkùtɔa ku yebe kpɔ̃nɔnatɔa wo jè àgɔ̀ do woa àpetɔ Ejiptè be èfìɔa. 2Faraɔ̀n do àdɔ̀mèze ɖo yebe kobonɔ̀ èvè kèwo nyi yebe àhàkùtɔ gã ku kpɔ̃nɔnatɔ gã ŋuti, 3eye e do wo ègà lè àgbògbòa mè àfi kè wo le Yosɛ̀f cã ɖoa. 4Àgbògbòa-jikpɔtɔ gã sɔ wo do àsi na Yosɛ̀f eye be le kpɔ woa ji nyuɛ̃ ɖe.

Àhàkùtɔa ku kpɔ̃nɔnatɔa ku èdrɔ̃

Wo le wo ɖo ègàkpamè xɔ̀ àzã fuu eye, 5gbè ɖèkaa, èfìɔ be àhàkùtɔa ku kpɔ̃nɔnatɔa ku èdrɔ̃ lè èzã ɖèka ke mè lè àgbògbòa mè àfi kè wo le wo ɖoa. Àmè sia àmè ku ye ŋutɔ be èdrɔ̃ gbà ɖo gɔ̃mèsèse na ɛ̀ àmètɔ̀-àmètɔ̀. 6Kè èŋù kèa, Yosɛ̀f va woa gbɔ eye e kpɔ be wo ci kpɔ̃ɔ̃. 7E biɔ Faraɔ̀n be kobonɔ̀ èvè kèwo lè àpetɔa be ègàkpamè kudo èa, ènyà sè be: “Nukɛ ŋuti ye mì ci siayi egbèa ɖo ò?” 8Wo ɖo e ŋuti be: “Mi ku èdrɔ̃ eye àmè ɖe mu lè la ɖè e gɔ̃mè ò.” Eye Yosɛ̀f gblɔ̃ na wo be: “Mu nyi Mawu ye la ɖè e gɔ̃mèa? Mì gblɔ̃ ɛ̀ na mù.” 9Eye àhàkùtɔ gã gblɔ̃ yebe èdrɔ̃ kè be kua na Yosɛ̀f be: “Mù kudrɔ̃ be vɛ̃ti ɖe tɔtè lè ŋùkɔ̀ na mù 10eye àtia ɖo àlɔ̀zɛ̃ ètɔ̃. E kè e tɔ sĩsĩa, e pò èse eye yebe kusɛ̃sɛ̃awo na rɛ̀zɛ̃ be kpo ɖìɖiwo. 11Faraɔ̀n be kogòa lè àlɔ̀ mè na mù. Mù sɔ rɛ̀zɛ̃-kpoawo eye mù fiɔ̃ wo ɖo Faraɔ̀n be kogòa mè eye mù sɔ na Faraɔ̀n.” 12Yosɛ̀f gblɔ̃ na ɛ̀ be: “Sè yebe gɔ̃mèɖèɖe. Àlɔ̀zɛ̃ ètɔ̃awo nyi ŋùkèkè ètɔ̃. 13E kpɔ̀tɔ̀ ŋùkèkè ètɔ̃ ne Faraɔ̀n bèa trɔ do wò ɖo ji. E la trɔ sɔ wò ɖo èdɔ wòa nu eye wò la gbà nɔ sɔ kogòa na Faraɔ̀n zɔ̃ ɖo ɖoɖo sãtɔ̀a nu. 14Vɔ̀ ne wò ɖo ŋùkuvi be ye nɔ̀ ku mù a, wàlɛbɛ kè wò la kpɔ àgbɔ̃jèpòa, lɔ̃ jro ne wòa pò nupo so ŋuti nyè na Faraɔ̀n, ne bèa ɖè mù to lè fikèa. 15Ɖo kunù ji wo fĩ mù lè Hebrùwo be ànyigbã ji eye fikèa ŋutɔ cã, nyè mu wɔ̀ ènu kè jè ne woa do mù ègà ò.” 16E kè e kpɔ be Yosɛ̀f na ènyà gɔ̃mèɖèɖe nyuɛ̃a, kpɔ̃nɔnatɔ gãa gblɔ̃ na ɛ̀ be: “Nyè cã mù kudrɔ̃ be: 'Kekè àjàfi ètɔ̃ lè èta na mù'. 17Faraɔ̀n be kpɔ̃nɔ mème kèwo be ɖùnà kpata lè àjàfi èjitɔ̀a mè eye àyamè xèviwo va le ɖù lè àjàfi kè lè èta na mù a mè.” 18Yosɛ̀f xɔ̀ ènyà gblɔ̃ be: “Sè gɔ̃mèɖèɖea! Àjàfi ètɔ̃awo nyi ŋùkèkè ètɔ̃. 19E kpɔ̀tɔ̀ ŋùkèkè ètɔ̃ eye Faraɔ̀n la sò èta na wò. E la si wò èkà ɖo àti ŋuti eye àyamè xèviwo la va tɔ̃ àdɔ̃ àpo ŋutilã.” 20Vɔ̀, ŋùkèkè ètɔ̃a gbè, kè le nyi Faraɔ̀n be jìgbè zã gbèa, èfìɔa ɖo ènuɖùkplɔ̃ gã ɖe na yebe sumɔ̃viwo kpata eye lè woa dòmèa, àhàkùtɔ gã ku kpɔ̃nɔnatɔawo lè. 21E trɔ sɔ àhàkùtɔ gã ɖo yebe tèpe sãtɔ̀a eye be gbà le sɔ kogòa do àsi na ɛ̀ 22eye e do èkà èkɔ̀ na kpɔ̃nɔnatɔ gã ya. Nène a ye Yosɛ̀f be èdrɔ̃ gɔ̃mèɖèɖea zɔ̃ sùa yeŋu; 23Vɔ̀a, àhàkùtɔ gãa mu pò nupo so Yosɛ̀f ŋuti na Faraɔ̀n ò, ɖo e ŋlɔ̀be.

Currently Selected:

Gɔ̃mèjèje be Xoma 40: GEN

Highlight

Copy