Gɔ̃mèjèje be Xoma 25

Abràham be ku: yebe jìjimèviwo

1Abràham gbà ɖè nyɔ̃nù bu; wo yɔna yebe nyikɔ be Keturà. 2E jì Zimràn, Yoksàn, Medàn, Madìan, Yìsabàk ku Suàh na ɛ̀. 3Yɔksàn jì Sabà ku Dedàn. Dedàn be vi ŋusùwo nyi Àcuritìtɔwo, Lètùsitìtɔwo kudo Leùmitìtɔwo. 4Madìan be vi ŋusùwo nyi Eyifà, Efɛ̀r, Hanɔ̀k, Àvidà ku Eldà. Woawo ye nyi Keturà be vi ŋusùawo kpata (kè be jì na Abràham). 5Abràham sɔ yebe àdɔ̀kùnuwo kpata na Izàk. 6Ne èsrɔ̃a kpɔ̀tɛawo be viwoa, e na wo ènuwo. Vɔ̀a, lè yebe àgbè nɔ̀zãwo mèa, e ɖo wo lè Izàk ŋuti, ɖo wo ɖoɖa Kedɛ̀m be ànyigbã ji. 7Kpɔɖa, Abràham be àgbè nɔ̀zã kpata nyi èpè èkà ènè ci woeàtɔ̃. 8E yomè a, Abràham jo gbɔ̃gbɔ̃a ɖɛ. E ku lè yebe tɔgbekuku nyuɛ̃ mè, ɖo e sĩ eye ènu sia ènu sù e si. Wo ɖì ì ɖo tɔgbeawo gbɔ. 9Èvia ŋusùawo Izàk ku Ismàɛl wo yì ɖì ɖo Màkpelà be àkpãdo kè lè Hitìtɔ, Soàr be vi Efrɔ̀n be àgblè kè jè ŋùkɔ̀ Mamrèa mè. 10Àgblè kè Abràham plè lè Hetì be vi ŋusùawo sia. Funua ye wo ɖì Abràham ku èsrɔ̃a Sarà ɖo. 11Lè Abràham be ku yomè a, Mawu tu sì na Izàk. E sò àxue ɖo Làhayì-Royì be vudoa be àkpa ɖèka. 12Kpɔɖa, Ismàɛl Abràham be vi ŋusù kè Hagàr Ejiptè nyɔ̃nù kè nyi Sarà be sumɔ̃via jìa be xòmè ye nyi ekè. 13Ismàɛl be vi ŋusùwo be nyikɔ sɔ zɔ̃ ɖo woabe xòmèwo ji yekè: Nebayɔ̀t, Ismàɛl be vi ŋusù àmègãxoa, Kedàr, Àdebɛ̀l, Mìvasàm, 14Mismà, Dumà ku Masà, 15Hadàd, Temà, Yetùr, Nafis ku Kɛdmà. 16Woawo ye nyi Ismàɛl be vi ŋusùwo, eye ekèawo ye nyi woabe nyikɔwo. Wo bɔ̀ woabe gòxɔwo do èhasòso mè eye wo sò kɔpewo; wo ɖo èkɔmèga woèvè ɖo woabe dùkɔ̃wo nu. 17Ismàɛl be àgbè nɔ̀zã nyi èpè èkà àtɔ̃ ci woèvè; e yomè a e jo gbɔ̃gbɔ̃a ɖɛ. E ku eye e yì tɔgbeawo gbɔ. 18Ismàɛlviwo sò kɔpe ɖo Havilà lè Sur nyigbã ji, lè Ejiptè be vɔ̀vɔnu, kaka va ɖo Àsur, woa kpata wo sitè ɖo woa nɔ̀nɔwo ŋuti.

Esaò ku Yakɔb

19Izàk, Abràham be ŋusùvia be xòmè ye kè. Ekè Abràham jì Izàk vɔ̀a, 20eye be xɔ̀ èpè èkà ɖèkaa, e ɖè Rebekà, Betùɛl Aràmvi be èvi nyɔ̃nù eye e gbà nyi Aràmvi Labàn be nɔ̀vi nyɔ̃nù. 21Izàk pòmlã Tɔhonɔ̀ na èsrɔ̃a, ɖo e nyi èkònɔ̀. Tɔhonɔ̀ ku ŋuzĩzĩ na ɛ̀, eye èsrɔ̃a Rebekà fɔ èfu, 22vɔ̀ èviawo le lɔ woa nɔ̀nɔwo lè yebe pòdomè eye e do àpa be: “Ne e lè nènea, ènu kɛ mù gbà nyɔ na ò?” E yì biɔ Tɔhonɔ̀ ènyà kèa sè. 23Tɔhonɔ̀ ɖo e ŋuti na ɛ̀ be:

“Dùkɔ̃ èvè lè àpo àdɔ̀mè,

èdù èvè la to so èwò mè.

Ɖèka la sɛ̃ŋu wu èvègɔ̃a

eye àmègãxoa la sumɔ vifɛ̃tɔa.”

24Wàlɛbɛ kè hùenu kè be la jì èvia ɖoa, vènàvi to lè pòdomè na ɛ̀. 25Ŋusùvi cucugbã kè toa bìa, èfu sùgbɔ lè e ŋuti sìgbè èlã be èfu nène: wo ɖo nyikɔ na ɛ̀ be Esaò. 26Nɔ̀via, va to e yomè, yebe àlɔ̀ le Esaò be àfɔ̀kpoji: wo ɖo nyikɔ na ɛ̀ be Yakɔb. Izàk ɖo èpè èkà takpo wàlɛbɛ kè be jì woa.

27Ŋusùviawo sĩ. Esaò nyi àdèlã gã kè ɖìnàsà to àgblèta keŋu; Yakɔb nyi ɖèvi ènunyatɔ kè nɔ̀nà gòxɔwo mè. 28Esaò be nu jɔ̀nàjì na Izàk, ɖo e lɔ̃nà èhũlã ɖùɖu: Yakɔb ya be nu jɔ̀nàjì na Rebekà. 29Gbè ɖèka, Yakɔb le ɖà ènu, Esaò gbɔ̀ so ègbe mè. Ènu tìkɔ̀ na ɛ̀ eye àdɔ̀ le wù ì 30eye e gblɔ̃ na Yakɔb be: “Na mù ènu kè wò le ɖà ŋua ne ma ɖù, ɖo àdɔ̀ le wù mù.” Ènu kè ŋuti wo yɔ ɛ̀ be Edɔ̀m, kè gɔ̃mè ye nyi àgbòjɛ̃ a. 31Yakɔb ɖo e ŋuti na ɛ̀ be: “Egbèa, sà àpo àmègãxo nyinyia na mù.” 32Esaò yì e ji be: “Kpɔ be mù lè èkudo nu, nukɛ àmègãxo nyinyi nyèa gbà nyi ò?” 33Yakɔb gblɔ̃ be: “Egbèa ke, tànu ɖo e ji na mù.” Esaò tànu ɖo e ji na ɛ̀, e sà yebe àmègãxo nyinyia na Yakɔb, 34kè na ɛ̀ kpɔ̃nɔ ku nuɖùɖu. E ɖù gbà nù, eye e sitè, jè èmɔ̃. Nène a ye Esaò dovlo yebe àmègãxo nyinyia.

Currently Selected:

Gɔ̃mèjèje be Xoma 25: GEN

Highlight

Copy