Gɔ̃mèjèje be Xoma 24

Izàk le àlɔ̀ ku Rebekà

1Abràham ku tɔgbe ɖo e sĩ xɔ̀ èpè fuu, eye Tɔhonɔ̀ tu sì na ɛ̀ lè ènuwo kpata mè. 2Abràham gblɔ̃ na yebe àxomè be sumɔ̃vi àmègãxotɔa, kè kpɔna yebe ènu nɔ̀amèsiwo kpata jia be: “Sɔ àpo àlɔ̀ dà ɖo àpe àta gɔ̃mè 3eye wòa tà Tɔhonɔ̀, jiŋùkusi ku ànyigbã be Mawu a, be yè mu la na èvi nyè ŋusùa la ɖè Kanàntɔ kèwo dòmè mù lèa be vi nyɔ̃nù ò. 4Vɔ̀a wò la yì kplɔ̀ nyɔ̃nù lè àpe èdù mè lè àpe xòmè mè na èvi nyè Izàk ŋusùa.” 5Sumɔvia ɖo e ŋuti na ɛ̀ be: “Ta mu nyɔ òa, nyɔ̃nù kèa mu la lɔ̃ kplɔ̀ mù do va èdù kèa mè ò; ma gbìgbɔ̀ kplɔ̀ èvi wò ŋusùa yì èdù kè mè wò soa mèa?” 6Abràham gblɔ̃ na ɛ̀ be: “Kpɔ nyuɛ̃ ɖe ne wòa kplɔ̀ èvi nyè ŋusùa yì funu. 7Tɔhonɔ̀, jiŋùkusi be Mawu a, kplɔ̀ mù to lè ètɔ nyè be àxomè, jo lè àpe xòmè nyigbã ji. E pò nupo na mù eye be ɖùzò kèa ku mù be: “Mù la sɔ èdù kèa na àpo jìjimèviwo”; e ye ke la ɖo yebe àtikplɔtɔ la nɔ̀ ŋùkɔ̀ na wò; eye lè funua, wò la kplɔ̀ nyɔ̃nù na èvi nyè ŋusùa. 8Ne nyɔ̃nùa mu lɔ̃ be yèa kplɔ̀ wò do òa, wò la vò lè ènu kè wò tà na mù a si, vɔ̀a mù gbà kplɔ̀ èvi nyè ŋusùa yì funu ò.” 9Sumɔvia sɔ yebe àlɔ̀ ɖo Abràham, yebe àpetɔa be àta gɔ̃mè eye be kã àtãŋu ɖo ènyà kèa ji. 10Sumɔvia sɔ èsɔ kpovè èwo eye e so jè èmɔ̃. Ekè e sɔ àpetɔa be àdɔ̀kùnuwoa, e jè èmɔ̃ yì Mèzòpòtamìa be èvègo lè Nàhɔr be èdùa mè. 11E na èkpovè-sɔawo jè èklò ɖo vudo to lè èdùa godo, lè wɛ̀trɔ kpa ji, lè gà pòpo kè mè ye nyɔ̃nùwo la to yì kù èsìa. 12E gblɔ̃ be: “Tɔhonɔ̀, àpetɔ nyè Abràham be Mawu, na be ma wɔ̀ gòdo nyuɛ̃ egbè eye wòa ɖè àpo lɔ̃lɔ̃ kè wò ɖo na Abràham wòa fiɔ. 13Kpɔɖa mù lètè lè èsìdoa gbɔ, eye èdùa mè be nyɔ̃nùviwo la to va yì kù èsì. 14Eye nènea, tùgbɛ̀jɛvi kè mù la gblɔ̃ na be: “zã èkpeze wòa viɖe ne ma nù èsì” eye be la ɖo e ŋuti be: “nù èsì, eye mù la na èsì èsɔ kpovènɔ̀ wòawo cã”, e ye la nyi àmè kè wò ɖè ɖovò na àpo sumɔ̃vi Izàk; so funua mù la nya be wò ɖo lɔ̃lɔ̃ na àpetɔ nyèa.” 15Vɔ̀, mu kpɔ tɔtè nupo pòpo gbɔ̀xue ye Rebekà to ku èkpeze ɖèka lè àbɔta ò. E nyi Betùɛl be dèvi nyɔ̃nù, Bɛtùɛl kè Milkà jì na Nàhɔr, Abràham be nɔ̀vi ŋusùa. 16Tùgbɛ̀jɛvia nya kpɔ ŋutɔ; eye mu nya ŋusù ò. E ɖiɖi yì èsìdoa to, kù èsì ɖɔ yebe èkpezea eye be trɔ gbãnà.

17Sumɔvia pu dù yì dogò è eye be gblɔ̃ be: “Tɔ̀ wò jɔ̀, na mù èkpeze wòa be èsì viɖe ma nù.” 18E ɖo e ŋuti be: “Àpetɔ nyè, nù èsì fàa!” Eye e ɖiɖi èkpezea kaba, na ɛ̀ èsì be nù. 19Ekè be na ɛ̀ èsì be nù vɔ̀a, e gblɔ̃ be: “Mù la yì kù èsì na èsɔ kpovènɔ̀ wòawo cã wo la nù.” 20E ɖèbla ɖɔ̀lì èsì kè lè èkpezea mèa kɔ̀ ɖo àdàwa kè mè èlãwo nùnà èsì lèa mè eye be gbà pu dù yì kù èsì lè vudoa to; e kù èsì na èkpovè-sɔawo kpata wo nù. 21Sumɔvi kèa le ŋùku ɖo tùgbɛ̀jɛvia ŋuti, ku ènubɔ̀kpoo, sɔ nya ne nyàwo be nyi be Tɔhonɔ̀ dà àsi ɖo yebe èmɔ̃ zɔ̃zɔ̃ a ji mà a. 22Kè ye èkpovè-sɔawo gbe nù èsì vɔ̀ kpòa, ŋusùa sɔ sìka lɔ̀gàvi ɖèka kè ɖo gramà àdɛ̃ be kpɛ̃kpɛ̃mè ku sìka lɔ̀ga èvè kèwo ɖo gramà èkà ètɔ̃ be kpɛ̃kpɛ̃mè. Àlɔ̀gàvia na yebe ŋɔ̀ti eye àlɔ̀gawo na yebe àlɔ̀tinuwo 23eye e gblɔ̃ be: “Àmè kɛ be vi nyɔ̃nù ye wò nyi ò? Tɔ̀ wò jɔ̀, na ma nya be ètɔ be àxuea la teŋu xɔ̀ mù àmèjro.” 24E ɖo e ŋuti na ɛ̀ be: “Mù nyi Betùɛl be vi nyɔ̃nù, Milkà be èvi ŋusù kè be jì na Nahɔ̀r-a.” 25E yomè a e gblɔ̃ na ɛ̀ be: “Nekpa (èko) ku ègbewo sùgbɔ lè mia si (gbɔ) eye èmɔ̃ cã lè na àmèjrowo.” 26Sumɔvia jè èklò eye be do èta gũ lè Tɔhonɔ̀ be ŋùmè 27gblɔ̃ be: “Sìtuɖeɖe ye nyi Tɔhonɔ̀, àpetɔ nyè Abràham be Mawu, kè be lɔ̃lɔ̃ ku ègbèjinɔ̀nɔ mu jo lè àpetɔ nyè ji wàlɛbɛ kè mù le zɔ̃ èmɔ̃a ò, eye Tɔhonɔ̀ ŋutɔ kplɔ̀ mù yì àpetɔ nyè be nɔ̀viwo be àxomè.” 28Tugbɛjɛvia pu dù yì gblɔ̃ ènu kè jɔ̀a na ènɔa lè àxomè. 29Rebekà ɖo nɔ̀vi ŋusù ɖèka kè wo yɔna be Labàn. E pu dù yì sumɔ̃via gbɔ lè èsìdoa to. 30Wàlɛbɛ kè be kpɔ àlɔ̀gàvia ku àlɔ̀gawo lè nɔ̀via nyɔ̃nùa be àlɔ̀woa, eye be sè nɔ̀via Rebekà gblɔ̃ na ɛ̀ be: “Nène a ye be gblɔ̃ na mù a yeŋu” e yì ŋusù kè tɔtè ku yebe èsɔkpovènɔ̀awo gbɔ lè èsìdoa to. 31E gblɔ̃ be: “Va, Tɔhonɔ̀ be sìtume. Nukɛ ŋuti ye wò jo ci àgboa ji ekè mù jrà tèpe ɖo na èsɔ kpovènɔ̀awo lè àxuea mè vɔ̀ ò.” 32Sumɔvia ɖo àxuea mè eye be ɖè àgbãsɔnuawo na èsɔkpovènɔ̀awo. Wo na wo èko ku ègbewo eye, na ye ŋutɔ ku yebe ŋutimewoa, èsì ne woa sɔ klɔ àfɔ̀. 33Wo hɛ̃ nuɖùɖu va na wo ne woa ɖù, vɔ̀a e do àpa be: “Nyè mu la ɖù ènu gbɔ̀xue ma gblɔ̃ ènyà kè mù ɖo la gblɔ̃a ò”. Wo ɖo e ŋuti na ɛ̀ be: “Pò nupo fàa”. 34E yì e ji gblɔ̃ be: “Mù nyi Abràham be sumɔ̃vi. 35Tɔhonɔ̀ be sìtu kèwo lè àpetɔ nyè jia na be e trɔ zũ àmè gã tɔ̀xɛ ɖe. E na ɛ̀ àlɛ̃wo ku ènyìwo, klòsalò ku sìka, sumɔ̃vi ŋusùwo kudo sumɔ̃vi nyɔ̃nùwo, èsɔkpovènɔ̀wo kudo èsɔàkɛtɛwo. 36Sarà, àpetɔ nyè be èsrɔ̃a teŋu va jì ŋusùvi ɖèka na ɛ̀ lè yebe nyagãkuku mè. 37Àpetɔ nyè sɔ yebe àdɔ̀kùnuwo kpata na ɛ̀ eye e na mù kã àtãŋu ku ènyà kèawo be: “Wò mu la ɖè Kanàntɔ kèwo be ànyigbã ji mù lèa be vi nyɔ̃nù na èvi nyè ŋusù ò. 38Ta ènu be yè la yì kplɔ̀ nyɔ̃nùvi lè ètɔ nyè be àxomè, le àpe xòmè mè na èvi nyè ŋusùa.” 39Eye mù gblɔ̃ na àpetɔ nyèa be: “Ta mu nyɔ òa, nyɔ̃nù kèa mu la kplɔ̀ mù do gbɔ̀ ò!” 40E ɖo e ŋuti na mù be: “Tɔhonɔ̀ kè be nɔ̀nɔmè mè mù le zɔ̃ lèa, la ɖo yebe àtikplɔtɔ la nɔ̀ ku wò eye e la na èmɔ̃zɔ̃zɔ̃ wòa la jè e ji: wò la yì kplɔ̀ nyɔ̃nù lè àpe xòmè mè lè ètɔ nyè be àxomè na èvi nyè ŋusùa. 41Wò mu la vò lè kpɛ̃sɛ̃ nyèa si ne wò mu yì tɔ̀nyèawo gbɔ ò; nènea ke, ne wo mu sɔ nyɔ̃nùa na wò òa, wò la gbà vòa yeŋu.” 42Egbèa, mù va ɖo èsìdo kèa gbɔ eye mù gblɔ̃ be: “Tɔhonɔ̀, Àpetɔ nyè Abràham be Mawu, ne nyàwo, wò jro la na zɔ̃zɔ̃ sui èmɔ̃zɔ̃zɔ̃ kè ji mù lèa, 43kpɔɖa mù lè èsìdoa gbɔ: eŋuã tùgbɛ̀jɛvi kè la to yì kù èsì eye mù la gblɔ̃ na be: 'Na mù èkpeze wòa be èsì vi ɖe ma nù', 44ne e ɖo e ŋuti na mù be wò ŋutɔ nù, eye mù la kù èsì na èsɔkpovènɔ̀ wòawo cã, e ye la nyi nyɔ̃nù kè Tɔhonɔ̀ cã na àpetɔ nyè be èvi ŋusùa.” 45Nyè mu kpɔ tɔtè ènyà kèa gbɔ̃gblɔ̃ lè àpe susu mè gbɔ̀xue Rebekà to ku èkpeze lè àbɔta ò; e ɖiɖi yì èsìdoa to la yì kù èsì. Mù gblɔ̃ na ɛ̀ be: “Tɔ̀ wò jɔ̀, na mù èsì ma nù.” 46E ɖèbla ɖiɖi yebe èkpezea eye e gblɔ̃ na mù be: “Nù èsì eye mù la kù èsì na èsɔkpovènɔ̀ wòawo cã.” Mù nù èsìa eye e na èsì èsɔkpovènɔ̀ nyèwo cã. 47Mù biɔ ɛ̀ ènyà sè be: “Àmè kɛ be èvi ye wò nyi ò?” E ɖo e ŋuti be: “Mù nyi Betùɛl kè Milkà jì na Nahɔ̀r-a be èvi nyɔ̃nù” eye mù do àlɔ̀gàvi yebe ŋɔ̀ti ku àlɔ̀ga yebe àlɔ̀tinuwo. 48Mù jèklò eye mù do èta gũ lè Tɔhonɔ̀ be ŋùkɔ̀; mù na gogo Tɔhonɔ̀, àpetɔ nyè Abràham be Mawu, kè kplɔ̀ mù tututu lè èmɔ̃zɔ̃zɔ̃ nyèa mè be ma kplɔ̀ àpetɔ nyè be àtàviyɔvi na èvia ŋusù. 49Eye fifìa, ne mì jro la ɖè lɔ̃lɔ̃ ku ànùkua wɔ̀wɔ fiɔ àpetɔ nyèa, mì ɖègblɔ̃ na mù. Ne mu lè e mè òa, mì gbà gblɔ̃ ɛ̀ na mù eye mù la gbà ɖè zɔ̃do yì ɖùsimè àlo èmìɔ̃mè.” 50Labàn xɔ̀ ègbèa. E ye ku Betùɛl wo do àpa be: “Tɔhonɔ̀ gbɔ ye ènyà kèa so va eye mi mu ɖo ènyà ɖekpe la gblɔ̃ na wò, lè ènyuɛ̃ àlo èvuɛ̃ mè ò. 51Rebekà lètè lè ŋùkɔ̀ na wò: kplɔ̀ ɛ̀ ne wòa yì. Ne bèa nyi àpetɔ wò be vi ŋusù be èsrɔ̃ sìgbè àlekè Tɔhonɔ̀ gblɔ̃ ɛ̀a nène.” 52Wàlɛbɛ kè Abràham be sumɔ̃via sè ènyà kèawoa, e do èta gũ lè Tɔhonɔ̀ be ŋùkɔ̀. 53Sumɔvia ɖè klòsalò ku sìkanuwo to gbàkudo àwùwo sɔ na Rebekà, nènea ke e na àdɔ̀kùnuwo nɔ̀via ku ènɔa. 54Wo ɖù ènu gbà nù ènuwo, e ye ku yebe ŋutimewo, eye wo ci funu dɔ̃. Ŋùdekɛ̃nyɛ kè wo fɔ̃a, e gblɔ̃ be: “Mì na mù èmɔ̃ ne ma yì àpetɔ nyè gbɔ.” 55Tùgbɛ̀jɛvia be nɔ̀vi ŋusù ku ènɔa gblɔ̃ na ɛ̀ be: “Na ne bèa nɔ̀ mia gbɔ viɖe kpe è (xɔ̀ àzã viɖe) sìgbè ŋùkèkè èwo nène, e yomè a e la jè èmɔ̃.” 56E gblɔ̃ na wo be: “Mì mu gbà le mù ɖɛ ò! Ekè Tɔhonɔ̀ gbe na èmɔ̃zɔ̃zɔ̃ nyè gbe jè e ji kpòa, mì na mù èmɔ̃ ne ma trɔ yì àpetɔ nyè gbɔ.” 57Wo yì e ji gblɔ̃ be: “Mia yɔ tùgbɛ̀jɛvia ne mia biɔ ɛ̀ sè àlekè be kpɔ so e ŋutia.” 58Wo yɔ Rebekà biɔ ɛ̀ sè be: “Wò ji be yèa kplɔ̀ ŋusù kèa do a?” E ɖo e ŋuti be: “Ɛ̃ɛ!” 59Wo tàsi woa nɔ̀vi Rebekà ku àmè kè hɛ̃a, na Abràham be sumɔ̃via kudo yebe ŋutimeawo eye wo jo, jè èmɔ̃. 60Eye wo tu sì na ɛ̀ le gblɔ̃ be: “Èwò, mia nɔ̀vi nyɔ̃nù, trɔ zũ hotu hotuwo be àjìnɔ̀, ne àpo jìjimèviwo woa xɔ̀ woabe kɛ̃tɔwo be tèpewo!” 61Rebekà so ku yebe sumɔ̃vi nyɔ̃nùwo. Wo lia èsɔkpovènɔ̀awo ji eye wo kplɔ̀ ŋusùa do. Abràham be sumɔ̃via kplɔ̀ Rebekà eye wo jè èmɔ̃. 62Ekè èwè le ɖo èxɔ̀a, Izàk trɔ gbãnà Làhayì-Royì be vudoa gbɔ. Ɖo e sò àxue ɖo Nègev be àgoji 63eye e to yì dè ŋùgblè wètrɔmè lè àgblèta. E kɔ ŋùkumè yì ji eye e kpɔ èsɔkpovènɔ̀wo trɔ gbãnà. 64Rebekà kɔ ŋùkumè yì ji, ekè e kpɔ Izàk-a, e tìkpo lè èsɔkpovènɔ̀a ji 65eye e gblɔ̃ na Abràham be sumɔ̃via be: “Ŋusù kɛ ye nyi ekèa lè àgblèta le zɔ̃ la dogò mì ò?” E sɔ yebe ŋùkumè xenua, sɔ cɔ̃ ŋùmè. 66Sumɔvia gblɔ̃ ènu kè be wɔ̀a keŋu na Izàk. 67Izàk kplɔ̀ nyɔ̃nùa ɖo yebe gòxɔa mè. Sarà ye nyi ènɔa; e kplɔ̀ Rebekà eye e trɔ zũ èsrɔ̃a. Izàk lɔ̃ Rebekà eye be lè ènɔa kukua tèpe na ɛ̀.

Currently Selected:

Gɔ̃mèjèje be Xoma 24: GEN

Highlight

Copy