Gɔ̃mèjèje be Xoma 23
23
Sarà be èyɔ̀kpea
1Sarà be àgbè zã kpata nyi èpè èkà ètɔ̃ ci adrɛ̃ (127). 2Sarà ku lè Kanàn nyigbã ji lè Kìriyàt-Arbà kè gbà nyi Hebrɔ̀n. Abràham va la wɔ̀ ècɔ na Sarà eye be fã ɛ̀. 3E yomè a, e so jo lè ŋutilã kukua gbɔ yì pò nupo na Hɛtì be vi ŋusùawo be: 4“Mù lè ku mì sìgbè àmèjro nène, mì na mù tèpe ne ma jrà àmè kè ku na mù a ɖo lè mìabe àmèɖìbɔa mè.” 5Hɛtì be vi ŋusùwo ɖo e ŋuti na Abràham ku ènyà kèawo be: 6“Ɖoto mi, mia petɔ. Mawu sɔ wò ɖo èfìɔ lè mia dòmè, jrà àmè kè ku na wòa ɖo lè miabe èyɔ̀do nyuɛ̃awo dòmètɔ ɖèka mè. Àmè ɖekpe mu lè mia dòmè la gbe yebe èyɔ̀do sɔ sɔ na wò ne wòa jrà èsrɔ̃ wò kukua ɖo ò.” 7Abràham sitè yì do èta gũ lè dùkɔ̃a ku Hɛtì be vi ŋusùwo be ŋùkɔ̀. 8E gblɔ̃ lè ènyà kèawo mè na wo be: “Ne nyàwo ye be àmè kè ku na mù a ɖo la nɔ̀ mìabe èyɔ̀do mèa, mì ɖoto mù, ne mìa blìbɔ̀ ɖo èta nyè lè Sohàr be vi ŋusù Efrɔ̀n gbɔ, 9ne bèa ɖè àsi lè Màkpelà be àkpãdo ke nyi ye tɔ̀ lè yebe àgblè be vɔ̀vɔnua na mù. Ne bèa ɖè àsi lè e ŋuti na mù ɖo yebe àsì xɔ̀xɔ bliboa ji ne bèa nyi àpe àmèkuku jràɖope lè mìa dòmè.” 10Efrɔ̀n nɔ̀ ànyi lè Hɛtì be viwo dòmè; eye Efrɔ̀n, Hitìtɔa ɖo e ŋuti na Abràham lè Hɛtì be viwo ku àmè kèwo lè àgboanuawo be ŋùkumè, eye e gblɔ̃ be: 11“Aò, àpetɔ nyè, ɖoto mù: Àgblèa, mù sɔ ɛ̀ na wò! Àkpãdo kè lè e mèa, mù sɔ ɛ̀ na wò! Lè dùkɔ̃ mèviwo kpata be ŋùkumèa, mù sɔ ɛ̀ na wò, yì ɖì èsrɔ̃ wò kukua ɖo e mè.” 12Abràham do èta gũ lè dùkɔ̃a kpata be ŋùkɔ̀, 13eye e gblɔ̃ na Efrɔ̀n lè dùkɔ̃a be ŋùkumè be: “Oò, èwò, wò ji kpò be ye à sè àpe ègbèa! Mù la sɔ àgblèa be plè cia na wò! Xɔ̀ ɛ̀ lè àsi nyè, eye funua ye ma ɖì èsrɔ̃ nyè kukua ɖo.” 14Efrɔ̀n ɖo e ŋuti na Abràham eye e gblɔ̃ na ɛ̀ be: 15“Àpetɔ nyè, ɖoto mù. Nukɛ ànyigbã kè xɔ̀ klòsalò ga èkà èwoa la nyi lè ènyè gbàku èwò dòmè ò? Èsrɔ̃ wò kukua, yì ɖì ì!” 16Abràham le è kpɔ ku Efrɔ̀n. E tu ègà kè be yɔ, eye Hɛtì be viwo sà ɛ̀ na ɛ̀, klòsalò ga èkà èwo, lè àsìmè be ègà gbãgbã ji. 17Nène a ye Efrɔ̀n be àgblè kè lè Màkpelà jè ŋùkɔ̀ Mamrè, àgblèa ku àkpãdoa cã, gbàkudo àti kèwo keŋu lè ànyigbã kpata jia, 18trɔ zũ Abràham tɔ̀ ku kãkã ɖoji lè Hɛtì be vi ŋusùwo ku àmè kèwo va èdù gboanua be ŋùkumè. 19Lè e yomè a, Abràham yì ɖì èsrɔ̃a Sarà ɖo àkpãdo kè lè Màkpelà be àgblè jè ŋùkɔ̀ Mamrèa mè; kè nyi Hebrɔ̀n lè Kanàn nyigbã ji. 20Hɛtì be vi ŋusùawo ɖo èkpe ji na Abràham be àgblèa ku àkpãdoa nyi ye tɔ̀ tɛ̀gbɛ̀.
Currently Selected:
Gɔ̃mèjèje be Xoma 23: GEN
Highlight
Share
Copy
Want to have your highlights saved across all your devices? Sign up or sign in
Mina Bible © Bible Society of Togo, 2014.
