Gɔ̃mèjèje be Xoma 16
16
Abràm, Saraì ku Ismàɛl
1Saraì, Abràm be èsrɔ̃a mu jì èvi na ɛ̀ ò. E ɖo sumɔ̃vi nyɔ̃nù Ejiptètɔ kè wo yɔna be Hagàr, 2eye Saraì gblɔ̃ na Abràm be: “Kpɔɖa Tɔhonɔ̀ tu èmɔ̃ na mù ne ma jì èvi. Yì dɔ̃ ku àpe sumɔ̃via, ta mu nyɔ òa, to e jia, mù la va ɖo ŋusùvi ɖèka.” Abràm ɖoto Saraì be ètopòɖoa. 3Lè èpè èwo yo mè ekè Abràm sò àxue ɖo Kanàn nyigbã ji vɔ̀a, Saraì èsrɔ̃a kplɔ̀ Hagàr, yebe sumɔ̃vi ejiptètɔa, ne bèa sɔ na Abràm sìgbè èsrɔ̃a nène. 4E dɔ̃ ku Hagàr ye e fɔfu. Ekè e kpɔ be yè fɔ èfua, yebe àpenɔ̀a mu gbà nyi ènu ɖe lè ŋùmè na ɛ̀ ò. 5Saraì gblɔ̃ na Abràm be: “Èzũ kè wo le zũ na mù a kpɔ ŋùkumè na wò. Ènyè ye sɔ àpe sumɔ̃via do èxɔ̀ na wò. Kaka kè e kpɔ be yè fɔfu kpòa, nyè mu gbà nyi ènu ɖe lè yebe ŋùkumè ò. Tɔhonɔ̀ ne wɔ̀ cãcã lè ènyè gbà ku èwò dòmè!” 6Abràm ɖo e ŋuti na Saraì be: “Kpɔɖa, sumɔ̃vi nyɔ̃nù wòa lè àpo ŋusɛ̃ gɔ̃mè, wɔ̀ ènu kè nyɔ na wòa ku ì.” Nène a, Saraì do fùnya-fùnya na Agàr kaka e yì sò ci zògbè ji.
7Tɔhonɔ̀ be àtikplɔtɔ va kè ɖo e ŋuti lè èsìdo ɖe to lè ègbegbàji, èsìdo kè lè Sur be èmɔ̃ jia, 8eye e gblɔ̃ be: “Hagàr, Saraì be sumɔ̃vi nyɔ̃nù, fikɛ wò so eye fikɛ wò le yì ò?” E ɖo e ŋuti be: “Mù si lè àpenɔ̀ nyè Saraì gbɔ.” 9Tɔhonɔ̀ be àtikplɔtɔa gblɔ̃ na ɛ̀ be: “Trɔ yì àpenɔ̀ wòa gbɔ ne wòa bɔ̀bɔ̀ ɖo yebe ègbèɖèɖe gɔ̃mè.” 10Tɔhonɔ̀ be àtikplɔtɔa gblɔ̃ na ɛ̀ be: “Mù la na àpo jìjimè la ji ɖo ji kaka be wo mu la teŋu hlɛ̃ ɛ̀ ò.” 11E gbà gblɔ̃ na ɛ̀ be: “Kpɔɖa wò fɔfu eye wò la jì ŋusùvi, wò la ɖo nyikɔ na ɛ̀ be Ismàɛl, ɖo Tɔhonɔ̀ kpɔ àpo ènuxàxa. 12Ŋusùvi kèa la nɔ̀ sìgbè ègbe-sɔ-àkɛtɛ àdodoe nène! Yebe àlɔ̀ la sitè ɖo àmèwo kpata ŋuti eye àmèwo kpata be àlɔ̀wo la sitè ɖo ye ɖèka ŋuti, lè nɔ̀viawo kpata be ŋùmèa, e la nɔ̀ àzɔ̀ge.”
13Hagàr pòmlã Tɔhonɔ̀ kè pò nupo na ɛ̀a be nyikɔ be: “Wò nyi Mawu kè le kpɔ mù a.” E gblɔ̃ ŋutɔ be: “Fikèa ye mù kpɔ wàlɛbɛ kè e kpɔ mù a?” 14Ènu kè ŋuti wo yɔna vudoa be: “Làhaì kè kpɔ mù a be vudo”; vudo kèa lè Kadɛ̀s ku Berɛ̀d dòmè. 15Hagàr jì èvi ŋusù na Abràm; e ɖo na ɛ̀ be Ismàɛl ŋusùvi kè Hagàr na ɛ̀a.
Èzòɖùɖu ku èvosòso
16Abràm ɖo èpè èkà èvè ci àdɛ̃ wàlɛbɛ kè Hagàr na ɛ̀ Ismàɛl.
Currently Selected:
Gɔ̃mèjèje be Xoma 16: GEN
Highlight
Share
Copy
Want to have your highlights saved across all your devices? Sign up or sign in
Mina Bible © Bible Society of Togo, 2014.
