Toto jo 16

Manà

1Wo jo lè Elìm, eye Izràɛlviwo be àmèha a keŋu va ɖo Sin be zògbè a ji, lè Elìm ku Sinaì be ètoa dòmè, kè wo to so Ejiptè vɔ̀a be wètri èvègɔ̃a be ŋùkèkè woeàtɔ̃gɔ̃a gbè. 2Lè zògbè a jia, Izràɛlviwo be àmèha a ɖù àɖuklui ɖo Mosè ku Arɔ̀n ŋuti. 3Izràɛlviwo gblɔ̃ na wo be: “Aò! Mì la kè tàsi mi, mia ku lè Tɔhonɔ̀ be àlɔ̀ mè, lè Ejiptè be èdùa mè, wàlɛbɛ kè mi nɔ̀nà ànyi ɖo èlã mème be èzò kɔ̀a, wàlɛbɛ kè mi ɖùnà kpɔ̃nɔ, ɖɔnapòa! Mì kplɔ̀ mi to va zògbè kèa ji, ne mìa tàsi àmèha gãa kèa bèa ku àdɔ̀-ku!”

4Tɔhonɔ̀ gblɔ̃ na Mosè be: “Mù la na kpɔ̃nɔ la jà so jiŋùkusi va na mì. Dùkɔ̃a la nɔ to gbè sìa gbè, la nɔ xɔ̀ ekè jè na gbè sia gbè be ènu ɖùɖua; mù la sɔ do è kpɔ be e la zɔ̃ ɖo àpe èse ji loo, àlo mu la zɔ̃ ɖo e ji ò! 5Ŋùkèkè àdɛ̃gɔ̃a gbèa, ne wo la ɖà ènu kè wo hɛ̃ gbɔ̀a, wo la xɔ̀ ènu kè wo xɔ̀nà gbè sia gbèa be tèpe èvè.” 6Mosè ku Arɔ̀n gblɔ̃ na Izràɛlviwo kpata be: “Wètrɔ kèa, mì la nya be Tɔhonɔ̀ ye ɖè mì to so Ejiptè be ànyigbã ji; 7ne èŋù kèa, mì la kpɔ Tɔhonɔ̀ be gogo, ɖoa, e sè nupo ke mì pò ɖo Tɔhonɔ̀ ŋutia. Miawo yaa, nukɛ mi nyi, eye mì la nɔ pò nupo ɖo mia ŋuti ò? 8Mosè ji be yè a to na wo be: 'Mì la kpɔ ɛ̀, wàlɛbɛ kè Tɔhonɔ̀ la na mì èlã, mì la ɖù, fìɛ̃si mè, eye be la na mì kpɔ̃nɔ, mì la ɖù, la ɖɔpò, ŋùdekɛ̃nyɛ mèa, ɖo Tɔhonɔ̀ sè nupo kè mì pò ɖo ye ŋutia. Miawo yaa, nukɛ ye mi nyi ò? Mu nyi miawo ŋuti ye mì le pònupo ɖo ò, vɔ̀a Tɔhonɔ̀ ŋutɔ tututu ŋuti ye!'”

9Mosè gblɔ̃ na Izràɛlviwo be àmèha a kpata be: Mì dɔ̃ va Tɔhonɔ̀ gbɔ, ɖoa, e sè nupo kè mì pò ɖo e ŋutia.' 10Eye, wàlɛbɛ kè Arɔ̀n le pò nupo na Izràɛlviwo kpata be àmèha a, wo trɔ jè ŋùkɔ̀ zògbè a: eye Tɔhonɔ̀ be gogoa ze lè lilikpo bablaa mè. 11Tɔhonɔ̀ pò nupo na Mosè be: 12“Mù sè Izràɛlviwo be nupo. Gblɔ̃ na wo be: 'Fìɛ̃si mèa, mì la ɖù èlã; ŋùdekɛ̃nyɛ mèa, mì la ɖù kpɔ̃nɔ, la ɖɔpò, eye mì la nya be ènyè ye nyi Tɔhonɔ̀ mìabe Mawu.'”

13Wètrɔ ŋua mè kea, tèkleviwo zrò va cɔ̃ àsàɖaa ji; eye kè èŋù kèa, àhũvi ɖe va trɔ do àsàɖaa. 14Àhũvia va jo, eye lè zògbè be ànyigbã jia, ènu wuwlui ɖe ci ànyi, ènu ɖe kè lè gbã xlãxlãa, ènu ɖe kè lè sìgbè èsì-kpe be èwɔ nène, kpɔ̀tɔ̀ lè ànyigbã. 15Izràɛlviwo kpɔ ɛ̀, eye wo gblɔ̃ be: 'Màn hu?' 'Nukɛ ye nyi ekèa ò?' Ɖoa, wo mu nya ènu kè be nyi ò. Mosè gblɔ̃ na wo be: “Ènuɖùɖu kè Tɔhonɔ̀ na mì, be mìa ɖùa ye be nyi. 16Ègbè kè Tɔhonɔ̀ ɖèa ye nyi ekèa: 'Mì lɔ ekè àmè sia àmè la teŋu ɖùa. Mì la lɔ àgbã ɖèka na àmè ɖekpekpe àmè be ɖùɖu, na mìabe àmèwo, àmè sia àmè ɖo àmè nenè kè lè yebe gòxɔ mèa nu.'”

17Izràɛlviwo wɔ̀ nènea, wo lɔ ɛ̀; àmè ɖewo tɔ̀ sùgbɔ, àmè ɖewo tɔ̀ hùe. 18Kè wo jije è ku jijegbãa; ènu ɖekpe mu wu lè àmè kè tɔ̀ sùgbɔa mè ò, eye ènu ɖekpe mu hùe wu, lè àmè kè tɔ̀ hùea mè ò! Àmè sia àmè lɔ ènu kè be la teŋu ɖùa.

Ɖoɖo vòvòwo so Manà ŋuti

19Mosè gblɔ̃ na wo be: “Àmè ɖekpekpe tɔ̀ mu gbà ci ànyi, èŋù ne kè do è ò!” 20Àmè ɖewo mu ɖo èto Mosè ò, eye wo dà ɛ̀ ɖɛ, èŋù kè do è, eye be jè èyevi, eye be le huɛ̃. Ekèa ŋutia, Mosè do àdɔ̀mèze do wo. 21Ŋùdekɛ̃nyɛ sia ŋùdekɛ̃nyɛa, wo lɔna ekè àmè sia àmè la teŋu ɖùa. Ne èwè le sɛ̃ŋua, e srènà.

22Ŋùkèkè àdɛ̃gɔ̃ a gbèa, wo lɔ ènu ɖùɖua be tèpe èvè, ekè le nyi àgbã èvè na àmè sia àmè. Àmèhaa be ŋùkɔ̀nɔ̀tɔwo keŋu va gblɔ̃ ɛ̀ na Mosè. 23E gblɔ̃ na wo be: “Ènyà kè Tɔhonɔ̀ gblɔ̃a ye nyi eŋuã: Èsɔ̀ ye la nyi Sabat, Yudàviwo be jɛ̃gbɔ̃zãgbè kè wo ɖo kɔ̀kɔ̀ɛ na Tɔhonɔ̀a. Mì ɖà, ènu kè wo la ɖàa, mì fìɔsì ènu kè wo la fìɔsìa. Ènu kè ci e jia, mi ɖo è ànyi, kaka èŋù ne kè.” 24Wo sɔ ɛ̀ ɖɛ, kaka èŋù kè, sìgbè lekè Mosè gblɔ̃ na woa nène. Ɖekpe mu huã, àlo jè èyevi ò. 25Mosè gblɔ̃ be: “Mì ɖù ì egbè. Egbè ye nyi Tɔhonɔ̀ be jɛ̃gbɔ̃zãgbè. Egbèa, mì mu gbà la kpɔ ènu ɖùɖua la lɔ lè xixenu ò. 26Ŋùkèkè àdɛ̃ ye mì la nɔ lɔ ɛ̀; vɔ̀a ŋùkèkè adrɛ̃gɔ̃ a, ye nyi jɛ̃gbɔ̃zãgbè; mu la gbà nɔ̀ ànyi ò.”

27Gãkea, ŋùkèkè adrɛ̃gɔ̃ a gbèa, àmè ɖewo gbà lè dùkɔ̃a mè, ekèwo to ne woa lɔ ènu ɖùɖua, vɔ̀a wo mu kpɔ ènu ɖekpe ò. 28Tɔhonɔ̀ gblɔ̃ na Mosè be: “Kaka na gà kɛ mè ye mì la gbe be yèwo mu la zɔ̃ ɖo èse nyèwo ji ò? 29Mì kpɔ be ne Tɔhonɔ̀ na mì jɛ̃gbɔ̃zãa, ŋùkèkè àdɛ̃gɔ̃a gbèa, e nana mì ŋùkèkè èvè be ènu ɖùɖu. Àmè sia àmè ne nɔ̀ ye tèpe. Àmè ɖekpekpe mu gbà to so yebe nɔ̀pe ŋùkèkè adrɛ̃gɔ̃ a gbè ò.” 30Eye dùkɔ̃a gbɔ̃jɛ̃ ŋùkèkè adrɛ̃gɔ̃ a gbè.

31Izràɛl be àxuea yɔ ènu kèa be Manà. E lè sìgbè àtikusɛ̃sɛ̃ kè le ɣe, eye be vivi sìgbè klàko kè mè wo do ànyisia nène.

32Mosè gblɔ̃ be: “Èse kè Tɔhonɔ̀ do a ye nyi ekèa: “Wo ne do àgbã ɖɔɖɔ ɖèka ɖɛ, na mìabe jìjimèviwo, ne woa jèsì ènu ɖùɖu kè mù sɔ nyì mì lè zògbè jia, wàlɛbɛ kè mù kplɔ̀ mì to so Ejiptè be ànyigbã jia.” 33Mosè gblɔ̃ na Arɔ̀n be: “Sɔ èze ɖe, kɔ̀ manà jije ègbã ɖo e mè, eye wòa sɔ ɛ̀ ɖo Tɔhonɔ̀ be ŋùkɔ̀, na miabe jìjimèviwo.” 34Arɔ̀n sɔ ɛ̀ dà ɖo Zòɖùɖu Ɖakà a be ŋùkɔ̀, sìgbè àlekè Tɔhonɔ̀ ɖè ègbè na Mosè a nène.

35Izràɛl be èviwo ɖù manà èpè èkà, kaka sɔ na wàlɛbɛ kè wo ɖo tèpe kè àmèwo lèa; manà ye wo ɖù, kaka na hùenu kè wo gogo Kanàn be èdùa. 36Jije ègbãa, le nyi jije-tɔ̀ka ɖèka be tèpe èwogɔ̃a.

Currently Selected:

Toto jo 16: GEN

Highlight

Copy