Toto jo 15
15
Mosè ku Izràɛlviwo be èhà
1Eye Mosè ku Izràɛlviwo jì èhà kèa na Tɔhonɔ̀. Wo ji èhà be:#15.1 Avìm 15:1.
“Mù la ji èhà, sɔ kafu Tɔhonɔ̀,
ɖoa, e wɔ̀ ènu jɔ̀ àsu.
Èsɔ ku èsɔdotɔa,
e crɔ̃ wo ɖo àpù mè.
2Tɔhonɔ̀ ye nyi àpe ŋusɛ̃#15.2 Eza 12:2; Èhàw 118.14.
E ye nyi hlùɛ̃gã nyè; mù la kafu ì,
ɖoa, E ye nyi Mawu nyè, mù la lòlò è,
ètɔ nyè be Mawu ye be nyi!
3Tɔhonɔ̀ nyi àhùawɔ̀tɔ,
Tɔhonɔ̀ ye nyi yebe nyikɔ.
4Faraɔ̀n be àhùakèkewo ku àhùakɔ̃wo a,
e crɔ̃ woa kpata ɖo àpù mè.
Èsɔdotɔ kèwo sɛ̃ŋu wua,
e nyrɔ̃ wo ɖo plãŋùpòfɛ̃wo be àpùa mè.
5Àvlìmè cɔ̃ woa ji,
eye wo ɖo ègũa mè, sìgbè èkpe nène.
6Tɔhonɔ̀, ɖùsi-lɔ wòa le klɛ̃ ku ŋusɛ̃,
Tɔhonɔ̀, ɖùsi-lɔ wòa gbã kɛ̃tɔa hãnyà hãnyà!
7Àpo ègãnyinyi ɖo kpɛ̃kpɛ̃ mè.
E ye pò kɛ̃tɔ wòwo pu ànyi!
Wò le bì ku àdɔ̀mèze ɖe
kè le fiɔ̃ wo, sìgbè èbè nène.
8Àpo ŋɔ̀ti mè be gbɔ̃gbɔ̃,
na èsìawo bɔ̀ ɖodu,
eye èsìkɔ̃awo ɖo, sìgbè èglìwo nène,
àvlìmè nɔ̀tè kpoo, lè àpùa dòmè.
9Kɛ̃tɔa le gblɔ̃ be:
“Mù la tĩ woa yomè, mù la xe wo.
Mù la ma àmɔ̀nyɔ̀nuawo,
mù la ɖù, la ɖɔpò;
mù la ɖè èwui nyè a to,
eye àlɔ̀ nyè la crɔ̃ wo.”
10Wò na àya wòa pò,
eye àpùa cɔ̃ woa ji.
Wo nyrɔ̃ sìgbè suŋubui nène,
ɖo èsì ɖìnyiawo mè.
11Àmè kɛ ye lè sìgbè èwò nène, lè ènusɛ̃sɛ̃wo dòmè ò?
Àmè kɛ ye lè sìgbè èwò nène, le klɛ̃ ku kɔ̀kɔ̀ɛ ò?
Ekè be ènu jɔ̀ àsu wɔ̀wɔwo ɖo vɔ̃vɔ̃,
ekè wɔ̀nà àmlìmànuwo ò?
12Wò vlũ àpo ɖùsi-lɔa,
eye ànyigbã mì wo.
13Wò sɔ àpo màje kplɔ̀ dùkɔ̃ kè wò joa.
Wò sɔ àpo ŋusɛ̃ kplɔ̀ ɛ̀
va àpo Nɔ̀pe Kɔ̀kɔ̀ɛ.
14Dùkɔ̃wo sè è,
eye wo hũhũ,
Filistì be èdùmèviwo ci jojojoe.
15Vɔ̃vɔ̃ jè Edɔ̀m be èfìɔwo ji,
Mòab be èfìɔviwo le pò tìtìtì,
Kanàn be èdùmèviwo keŋu, bu woabe èjìdodo.
16Àdìka le sò wo eye àvìvɔfu le wo.
Àpo àlɔ̀ sɛ̃sɛ̃a na be wo zĩ toto.
Eye wo ci hui, sìgbè èkpe nène,
wàlɛbɛ kè dùkɔ̃ wòa va le yìa,
Tɔhonɔ̀ wàlɛbɛ kè dùkɔ̃ kè wò cã a, va le yìa.
17Wò kplɔ̀ wo yì,
eye wò li wo ɖo ètoa ji,
ɖo tèpe kè wò jràɖo na àpo nɔ̀pea,
Tɔhonɔ̀, wò jrà nɔ̀pe ɖo,
tèpe kè wò la nɔ̀a.
Tɔhonɔ̀, àlɔ̀ wòwo tù kɔ̀kɔ̀ɛpe.
18Tɔhonɔ̀ le ɖùfìɔ tɛ̀gbɛ̀-tɛ̀gbɛ̀!
19Faraɔ̀n be èsɔa ɖo àpùa mè ku yebe àhùakèkeawo, kudo yebe èsɔdotɔawo, eye Tɔhonɔ̀ na àpùa be èsìawo trɔ va cɔ̃ woa ji: vɔ̀a, Izràɛlviwo yaa, wo zɔ̃ ànyigbã pupui ji, lè àpùa dòmè. 20Mawu be gblɔ̃ɖɛtɔ nyɔ̃nù kè wo yɔna be Mirìam, Arɔ̀n be nɔ̀viaa, sɔ àsihũvi; nyɔ̃nùwo keŋu to jè e yomè; wo le pò àsihũvia, eye wo le ɖuwè. 21Eye Mirìam to èhà ɖoɖa be:
“Mì jì èhà kafu Tɔhonɔ̀, E wɔ̀ ènu jɔ̀ àsu. Èsɔ ku èsɔdotɔa, e sɔ wo dãŋùgbe ɖo àpù mè!”
Marà be èsìa
22Mosè kplɔ̀ Izràɛlviwo jo lè plãŋùpòfɛ̃ be àpùa to, eye wo va yì jè Sur be zògbè a ji lɔ̀ge. Wo zɔ̃ lè zògbè a ji ŋùkèkè ètɔ̃, kè wo mu kè ɖo èsì ŋuti ò a. 23Wo va ɖo Marà, vɔ̀a, wo mu teŋu nù Marà be èsìa ò, ɖo, e vejè kpàa, àfi kèa ye wo kpɔ 'Marà' be nyikɔa so. 24Dùkɔ̃a ɖù àɖuklui so Mosè ŋuti be: “Nukɛ ye mi la nù ò?” 25Mosè do àpa ɖoɖa Tɔhonɔ̀, eye Tɔhonɔ̀ sɔ àti ɖe ŋùkumè fiɔ Mosè. E kã yebe èɖe, dà ɖo èsìa mè; èsìa trɔ, eye be vivi.
Tèpe kèa ye Tɔhonɔ̀ sɔ kɔ̀nu ku èse ɖewo do àsi na wo lè. Tèpe kèa ye be do wo kpɔ lè. 26E gblɔ̃ be: “Ne wò ɖo èto Tɔhonɔ̀ kè nyi àpo Mawu a be ègbè nyuɛ̃ ɖe a, ne wò wɔ̀ ènu kè jè ŋùmè na ɛ̀a, ne wò ɖo èto yebe èsewo, ne wò le yebe ɖoɖowo ɖo àsia, nyè mu la sɔ èdɔ̀ kèwo mù sɔ dɔ̃ èto na Ejiptè a, dòmètɔ ɖekpe dɔ̃ èto na wò ò, ɖoa, ènyè Tɔhonɔ̀ ye dànà èdɔ̀ na wò.”
27Wo va ɖo Elìm. Èsìdo woèvè ku ède vivi be àti kàtakpo ci-èwo lè funua. Wo do àsàɖa ɖo èsìa to.
Currently Selected:
Toto jo 15: GEN
Highlight
Share
Copy
Want to have your highlights saved across all your devices? Sign up or sign in
Mina Bible © Bible Society of Togo, 2014.
