Romains 3

1A yaa sá Juuda yɔuee, a gíti cáá diyimɔɔl dibaaa? Àá digiil sá tiwammɔntiilaaa? 2Tiŋman, bi-yimɔɔl jítiǹ bin béeyee yal kpataaa. Diyimɔɔpeepeekaal di sá Unimbɔti nín dū u-bɔti ki ŋúbiǹ Juuda yabee. 3Ama bi-kansikin biba kaa ŋúń ki yúl̀ deedee. Mimmee, bi nín kaa yúl̀ deedeeyee puee di làá yàntī Unimbɔti deedeeu ń ŋá fámaaa? 4Aayee, kpataaa! Unimbɔti di làá nīn pée sá deedeedaan, ní binib kɔkɔ ń nīn sá binyimɔndambi, kii Unimbɔti gbɔŋku nín lī puee yii:

«Binib máaǹ kí ká a nín sá deedee puee tin a sòoǹee poon,

ní bi yaa sòon̄ a-bɔtee, bí ká yii a cáá ibaamɔn#3.4 Ilan 51.6..»

5Ti nín ŋáań ikpiti iŋyee yaa dàkà yii Unimbɔti sá umɔntee, mimmee u nín dátí ti-tafal ti-kpitii puee, waa bí deedee deeyaa! (M sòoǹ nniyaamin ní). 6Aayee kpataaa! Unimbɔti yaa kaa bàà bí deedee, waan ŋūǹ kí sòoǹ duulinya bɔti.

7Mimmee, m-nyimɔŋyi yaa ŋūǹ kí yàntī Unimbɔti baamɔŋyi ń nyā mpaampiin pu bí wāl̀ kí tīī-u tinyoolee, ba pu ní bi làá gíti sòoǹ kí kpɔ̀ m-bɔti yii m sá unikpiti? 8Míǹ puee, tí lì yii: «Tí nīn ŋáań ikpiti, án dāá kpántí tiŋanaa!» Míǹ ní bin mɔ́ntí nnyimɔn ki tūntí ti-puee lì. Bin sòoǹ ti-pu mimmee máaǹ ditafadaaldi.

Ubɔ kaa bí ki bí deedee

9Mimmee, timbi Juuda yab jítiǹ binib bin kíǹeeee? Aayee, kpataaa! Kii m nín bàà pée lī puee, Juuda yab nì bin kaa sá Juuda yabee kɔkɔ bí ikpitin. 10Kii Unimbɔti gbɔŋku nín lī puee, yii:

«Unil báà ubɔ kaa bí ki bí deedee,

báà ubaanti, an kpá.

11Ubɔ kaa bí ki cáá iciin.

Ubɔ kaa bí ki nyàab̀ Unimbɔti.

12Bi-kɔkɔ yīntiǹ-u ki wáŋkì,

báà ubɔ kaa bí ki ŋáań tiŋan,

báà uniseen, an kpá.

13Dikaakul din wāā ki núùyee nín bí puee,

míǹ ní tibɔti tin bí bi-neeŋyinee bí.

Bi cáá bi-limbiliŋ ki kíiĺ binib,

bi-nyunculiŋ nín tábití ki sòoǹ tiŋyee sá tilool kii ukoowaati lootee ní.

14Bi-nyɔmmu poon gbí mbusu nì ntuntun.

15Bi yáb̀ nnikpaakoon pu.

16Laakin kamaa bi yaa cūtèe, see bí cáá bi-timbiilii nì falaa niin.

17Baa nyí ŋgbansɔŋfi saŋŋu.

18Baa fàŋkí Unimbɔti báà fiii#3.18 B. 10-12: Ilan 14.1-3 nì 53.2-4. - B. 13: Ilan 5.10, 140.4. - B. 14: Ilan 10.7. - B. 15-17: Yees 59.7-8. - B. 18: kpèè Ilan 36.2..»

19Ti nyí yii marab nín sòoǹ tiŋyee kɔkɔee, bi sòoǹ ki tìì bin bin Unimbɔti nìn tīī u-marabee ní. Míǹ puee, ubɔ kaa dāa cáá kinyɔkɔ kí wàan̄ kí tīī nnaakpal. Kitiŋ pu yab kɔkɔ dāa béetí yii bi sá binikpitib Unimbɔti nimbiin. 20Di sá yii unil nín ŋúb̀ marab mmɔntiimin puee kaa ŋūǹ kí yàntī ú nīn bí deedee Unimbɔti nimbiin#3.20 Kpèè Ilan 143.2., kun puee marab tundi di pée sá bí dàkà binib kun di sá ikpitee.

Min ní Unimbɔti dì kí fīī unilee

21Ama kɔŋkɔnnee, Unimbɔti dàkā min ní unil ŋūǹ kí dī kí kpántí deedeedaan u-nimbiin kí taa dī marab puee: Mooyiisi gbɔnti nì Unimbɔti bɔnaatiliibi mun nìn sòon̄ an bɔti pu. 22An sá ti nín fōō Yeesu Kriisitoo ki kííyee pu ní Unimbɔti kpántì-ti deedeedambi u-nimbiin. Unimbɔti kaa gàntī binib, an sá ki tīī bin kɔkɔ fōō Yeesu ki kííyee, 23kun puee báà ŋma ŋá ikpiti ki dátiǹ Unimbɔti nyooti. 24Unimbɔti ŋáań-ti tiŋan ki yàntī ti kpántí deedee nib u-nimbiin faalaa, Yeesu Kriisitoo nín dū u-ba ki fīī-ti ki líìyee pu. 25Úǹ ní Unimbɔti yōoǹ ki lēē-ti saraa, u-fatikuu ń pítí bin kɔkɔwoooo fōō-u ki kííyee kpitii, bi nì Unimbɔti kansikin ń ŋāŋkì. Unimbɔti ŋá míǹ kí dàkà u nín sá deedeedaan puee ní. Di sá yii dooooyee, u nìn jíń kimɔtii kaa nìn dátí binikpitib tafal bi-kpitii pu. 26Ama kɔŋkɔnnee, u dàkā binib u-deedeeu: u-deedeeuee di sá u dū Yeesu ki pàn̄ ti-kpitii pɔndi, ní ki yíì bin kɔkɔ fòol̄ Yeesu ki kíikée deedeedambi.

27Mimmee, unil cáá nsan kí dàkà u-baaa? Aayee, nsan kaa bí báà fiii. Ba pu ní a ká difiil? A nín nóó Mooyiisi marabee puɔɔɔ? Aayee, an sá a nín fōō ki kííyee pu. 28Ti nyí yii unil un fōō Yeesu ki kííyee di kpántí deedeedaan Unimbɔti nimbiin, an kaa sá marab bin u nóóyee pu. 29An yaan sá marab puee, mimmee, Unimbɔti bàà sá Juuda yab ŋmaniŋma Nimbɔtiu naa! Waa bàà sá bin kaa sá Juuda yabee mun Nimbɔtiu. Ama u sá báà ŋma Nimbɔtiu ní. 30Di sá yii u pée sá Unimbɔtibaanti ní#3.30 Kpèè Ditee 6.4., ki làá yàntī Juuda yab bin gíí dikpancandi ki fōō Yeesu ki kííyee nì bin kaa sá Juuda yab, kaa gíí, ki mun fōō Yeesu ki kííyee kɔkɔ ń kpántí deedeedambi u-nimbiin. 31Mimmee, an dàkà yii ti yaa fōō Yeesu ki kííyee, taa ti dù marab kí yíiń tiba deeyaaa? Aayee, an kaa sá míǹ. Ŋyunti gbanti ní ti nín tìì marab mpɔn.

Currently Selected:

Romains 3: BASSARDC

Highlight

Copy