Romains 2

Unimbɔti bɔsooŋyi

1Ŋma ní a sá, sii un sòoǹ bin béeyee bɔti yii bi nín ŋáań puee kaa ŋān̄ee. Aa cáá nnaakpal ŋubɔ kí dāá kpáĺ#2.1 Dūú ŋmàntī nì Maat 7.1, Luuki 6.37.. Di sá yii sii un bíi sòoǹ bin béeyee bɔti yii bi nín ŋáań puee kaa ŋān̄, ní ki ŋáań míǹ a-bee, a bíi kù a-ba bɔti dee. 2Ti nyí yii Unimbɔti nín sòoǹ ki kù bin ŋáań an tuuŋŋee bɔtee, u cáá ibaamɔn. 3Mimmee, sii un kù bin béeyee bɔti ki mun ŋáań míǹ mbaantiimee, a dàkafī yii a làá nyā Unimbɔti bɔsooŋyinaaa? 4Unimbɔti ŋanti tin u cáá tikpilee, nì u-mɔtiiki nì u-niti ní a cáa kpèé fámaaa? Aa nyí yii Unimbɔti nín ŋáań-si tiŋan puee, u là kí tūtuǹ-si á kpántí a-bimbim níii? 5Di sá yii a nín pɔ́ɔkí a-pɔbil pu ki yíití, kaa là kí kpántí a-bimbimee, a mɔ̀tīi kútí a-ba ditafadaaldi din a làá fōō Unimbɔti ŋuul dalee, ŋwiin ŋun Unimbɔti làá dāá dū ibaamɔn kí sòoǹ binib bɔtee ní. 6Yaadal ní u làá pà báà ŋma u-tundi paati#2.6 B. 5: kpèè Seefa 1.14-18, 2.2-3. - B. 6: dūú ŋmàntī nì Ilan 62.13, Alaŋ 24.12.. 7U làá dū dimaŋfal din kaa cáá dikúntilee kí tīī bin pɔ̄ɔntí ki ŋáań tiŋan ki nyàab̀ tinyool nì ipampaka nì dimaŋfal din bí kaa kúntée. 8Bin yíì, kaa là kí nóó u-baamɔŋyi ki là kí nīn nóó tin kaa ŋān̄ee, u làá dāá fōō diŋuul bi-pu kí dáaĺ bi-tafal. 9Falaa nì dinimbinaamandi dɔ̄ ki cí bin kɔkɔwoooo ŋáań tin kaa ŋān̄ee. Juuda yab tafal ní Unimbɔti làá péé péé kí dáaĺ kí wàatī, ní kí dāá nín dáaĺ bin kaa sá Juuda yabee tafal. 10Ama, tinyool nì ipampaka nì ŋgbansɔŋfi dɔ̄ ki cí bin kɔkɔwoooo ŋáań tiŋanee. Juuda yab ní bi làá dāá péé kí tīī kí wàatī, ní kí nín tīī bin kaa sá Juuda yabee. 11Di sá yii Unimbɔti kaa gàntī binib#2.11 Dūú ŋmàntī nì Ditee 10.17..

12Bin kaa béè marab bin Unimbɔti tīī Mooyiisee yaa ŋá ikpitee, bi làá wāŋkì, ama marabee ní baa làá dūú sòoǹ bi-bɔti. Ní bin kɔkɔ nyí marab gbanti ní ki ŋáań ikpitee, marabee ní bi làá dūú sòoǹ bidambi bɔti. 13Kaa sá bin pílifí marabee di sá deedeedambi Unimbɔti nimbiin. Ama bin bin ŋáań marabee nín lī puee, bíǹ ní bi dāa yíì deedeedambi. 14Mimmee, bin kaa sá Juuda yab, kaa nyí Mooyiisi marab puee, bi-pɔbiliŋ yaa yāntì bí ŋmā kí ŋá min nóó nì marabee, báà bi yaa kaa nyí marab, bi nyí tiŋan diŋál kii marab nín lī puee. 15An dàkà yii marab tuuŋŋi taapu ŋmàn̄ bi-pɔbiliŋ poon. Min máaǹee dòoń bi-neeŋyin, ní bi-landɔkɔi tùkù-bi ŋyunti ŋubɔee, tin bi yaa ŋá an ŋān̄ee, nì tin bi yaa ŋá an kaa ŋān̄ee. 16Ŋwiin ŋun Unimbɔti làá yàntī Yeesu Kriisitoo ń bìitī nnibiyaamu tuuŋŋi ŋin bí dibalinee pu kí sòoǹee, tin tin báà ŋma làá dāá kée dee, kii Tibɔmɔntiil tin man Pɔɔl sòoǹee nín lì puee.

Juuda yab nì mara

17Ama sii un bi yíì Juuda yɔu, a máká Mooyiisi marab pu, ki dàkà a-ba yii a nyí Unimbɔti, 18ki nyí u nín là puee, marab dàkà-si á lēē laakin ŋān̄ee. 19A nyí a-ba yii a ŋūǹ kí kpòotī bijɔfub kí nīn sá ŋwalifi kí tīī bin bí dibɔmbɔndinee, 20ki là kí nīn dàkà bin nimbiliŋ kaa ŋúbitèe nì bin kaa nyí tiba nnimbɔtisan poonee, kun puee a béè marab ní marabee dàkā-si iciin nì ibaamɔn kɔkɔ. 21Too, ba ŋá ní sii dàkà bin kíǹee, ní kaa dàkà a-ba ní? Ba ŋá ní sii un sòoǹ ki tùkù bin kíǹee yii bí taa yɔ̀ee, yù ní? 22Sii un lì yii an kaa máaǹ bí ŋá tilaakpaalee, ba ŋá ní sii ŋáań tilaakpaal ní? Sii un ná awaayee, ba ŋá ní a kóò awaadiinni ki yù tiwan ní#2.22 Dūú ŋmàntī nì Ditee 7.25.? 23Sii un gà a-bindi yii a nyí marabee, ŋyunti ŋun a yìntīǹ marab gbantee, Unimbɔti yindi ní a bíi bíiĺ, 24kii Unimbɔti gbɔŋku poon nín lī puee yii: «Nimbi Juuda yab pu ní bin kaa sá Juuda yabee sòoǹ ki bíiĺ Unimbɔti yindi#2.24 Kpèè Yees 52.5..»

25A yaa tɔ́ marabee, ní digiil din a gííyee ŋān̄ ki tīī-si, ama a yaa yìntī marabee, nì min kɔkɔ bi gíí-see, an sá fám ní. 26Unil un kaa gííyee yaa kpáafí marabee, nì min kɔkɔ baa gíí-uee, Unimbɔti kpèé-u kii u gííyee ní. 27Un baa gíí, u nóó marabee làá dāá jīǹ sii un gíí ki cáá marab gbɔŋku ki gíti yìntī marabee ibaamɔn. 28An kaa sá un bi wāĺ yii u sá Juuda yɔu, bi gíí-u, u cáá kudaaŋŋu u-wunti puee di sá Juuda yɔu ubaamɔn: 29un sá Juuda yɔu ubaamɔnee di sá un sá Juuda yɔu u-pɔbil poonee. Bi gíí-u nì digiil din sá Unimbɔti Fam gíitamee, kaa sá marab gbɔŋku nín lī puee gíitam#2.29 Dūú ŋmàntī nì Ditee 30.6.. Unimbɔti di pàkà an niliuee, an kaa sá binib di pàkà-u.

Currently Selected:

Romains 2: BASSARDC

Highlight

Copy