Romains 1

Pɔɔl jáaḿ Room yab

1Man Pɔɔl un sá Yeesu Kriisitoo tɔntɔnliu, Unimbɔti yíiń-mi ki gāntì ḿ nīn sá Yeesu kpambal kí sòoǹ u-bɔmɔntiitee di jáaḿ-ni.

2Dooooyee ní Unimbɔti nìn dī u-bɔnaatiliibi pu ki pōoǹ-ti u-bɔmɔntiiti gbanti ki ŋá u-gbɔŋku poon ki síiǹ#1.2 Kpèè Yees 52.7, 61.1.. 3U-Jipɔɔn, ti-Dindaan Yeesu Kriisitoo pu ní tibɔtee sòoǹ. Ti yaa làá kpèè tinitanee, u nyánní ubɔti Daafiidi maaliŋu poon ní. 4Ti yaa làá tí kpèè u-Fam min sá circiree jandi púee, Unimbɔti nín fīkitì-u ditaŋkpiilinee, u dàkā nì mpɔn yii u sá u-Jipɔɔn#1.4 Daafiidi maaliŋu poon: kpèè Maat 1.1. - Unimbɔti Jipɔɔn: kpèè Ilan 2.7.. 5U-pu ní m ká diyimɔɔl kí nīn sá u-kpambal kí tīī Kriisitoo tinyool, án nín làá ŋá pu atimbun kɔkɔ nib ń fōō-u kí kíí kí nīn tɔ́-uee. 6Nimbi Room yab bin Unimbɔti yíiń ní nīn kíǹ ki sá Yeesu Kriisitoo yabee mun kútì poon.

7Nimbi ní m ŋmàn̄ kugbɔŋu nee, nimbi bin kɔkɔ Unimbɔti néeń ki yíiń ní nīn sá u-yabee. Ti-Baa Unimbɔti nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi!

Pɔɔl là kí cùú màntì Kriisitoo yab bin bí Roomee pu

8Mpeekaaminee, m dī Yeesu Kriisitoo pu ki jáaḿ m-Nimbɔtiu ni-kɔkɔ pu, kun puee bi sòoǹ ni nín fōō Unimbɔti bɔti ki kíí puee ilaan kɔkɔ. 9M téetí ni-pu múlmul m-wimmeem poon. Unimbɔti un m nóó nì m-pɔbil kɔkɔ ki sòoǹ u-Jipɔɔn bɔmɔntiitee nyí yii tin m lèe sá ibaamɔn. 10Baabadal m-wimmeem poonee, m bàlifī Unimbɔti yii an yaa sá u-lammi, ú pɔ̄-mi nsan ŋyunti nee ḿ dāan̄ kí màntì ni-pu. 11Di sá yii m-nimbiliŋ máǹ ḿ dāan̄ ni-cee kí cáań-ni Circir Fam pɔ̄kaati tiba tin ŋūǹ kí kūtì-ni mpɔnee. 12M nín làá lì puee di sá tí ŋmā kí dū ti-fookiiu un ti-kɔkɔ cáá Unimbɔti puee kí tīī tɔb kunyannyaau.

13Nnabiyaamu, m là ní béé yii m mākafì miŋa nì miŋa kí bàà dāan̄ ni-cee, ama nìn díǹ maa ká nsan. M bàà là yii m-tundi ń lòoǹ abil ni-cee kii dì nín lòon̄ atimbun ŋin kíǹee cee puee#1.13 Kpèè Atuun 19.21.. 14An sá-mi dipɔndi ní ḿ sòoǹ Yeesu bɔti kí tùkù báà ŋma, bin nimbiliŋ ŋúbitèe nì bin nimbiliŋ kaa ŋúbitèe, bin nyí iciinee nì bin kaa nyí tibee. 15Míǹ pu ní m-nimbiliŋ máǹ ḿ dāan̄ kí sòoǹ Tibɔmɔntiil gbanti kí tùkù nimbi bin bí Roomee mun.

Mpɔn ŋun bí Unimbɔti Bɔmɔntiitinee

16An kaa cáá-mi icoo ḿ sòoǹ Tibɔmɔntiil gbanti, kun puee tì sá Unimbɔti pɔŋŋu ki fìil̄ bin fòol̄-tì ki kíikée. Mpeepeekaamee, Juuda yab, ní boonee ki dāa nín kpáaǹ bin kaa sá Juuda yabee mun. 17Tibɔtee dàkà-ti nsan ŋun Unimbɔti dì ki kpántí unil deedeedaan u-nimbiinee: an sá unil ń fōō kí kíí ní. An kífí nì fookii ní kí tin kúntí nì fookii, kii an nín ŋmàn̄ Unimbɔti gbɔŋku poon puee yii: «Deedeedaan kāntí dimaŋfal u-fookiiu pu ní#1.17 Deedeedaan kāntí dimaŋfal u-fookiiu pu ní: kpèè Abak 2.4..»

Binib nín ŋáań ikpiti puee

18Di sá yii doooo yilpu ní Unimbɔti dàkà u-ŋuul nnibiyaamu bimbikpitim pu. Baa tɔ́ úǹ Unimbɔti ní ki ŋáań ikpiti. Bi-tuŋkpitiŋ kaa yàntī ibaamɔn ń tɔ̄ i-tundi bi-ni. 19Kun pu ní Unimbɔti làá dáaĺ bi-tafalee di sá bi wál̀ kun unil ŋūǹ kí ká kí béé Unimbɔtee. An sá Unimbɔti di nyántì ki dàkā-bi. 20Di sá yii doooo Unimbɔti nín náań yilpu nì taapuee, atuun ŋin u túńee ŋūǹ kí yàntī unil ń béé u-ban Unimbɔti bimbim min baa wāĺee, an dàkà yii u-pɔŋŋu ŋun kaa kúntée nì u-nimbɔtiiti. Mimmee unil kaa ŋūǹ kí ká nnaakpal yii waa nyí-u. 21Bi nyí Unimbɔti, ní kaa pàkà-u, kaa jáaḿ-u u-ŋanti pu min máaǹ bí jāam̀-uee. Bi fá-u, ki nóó bi-landɔkɔi in kaa bí deedeeyee, ki kpántì bigbaambi, ní bi-pɔbiliŋ kɔ́ dibɔmbɔndin. 22Bi bí ki gà bi-biŋŋi yii bi cáá iciin, kaa nyí yii bi wáatì ní. 23An nín bàà sá bí nyɔ̄ŋkì Unimbɔti tinyooldaan un kaa kúùyee puee, ní bi nyɔ́ŋkí tiwan tin bi kpítì ki nántiǹ unil un kúùyee nì inoon nì tiwaŋkuti nì tin fù kitiŋee mun#1.23 Dūú ŋmàntī nì Ditee 4.16-18..

24Kii bi-pɔbiliŋ poon bi nín lēē kí nīn ŋáań tijɔkɔndee puee, Unimbɔti dū-bi ki líiǹ tijɔkɔndi, bí nīn bíiĺ bi-ba. 25Bi dū Unimbɔti bɔti tin sá ibaamɔnee ki fá, ki yōoǹ inyimɔn, ní ki nóó ki tòotī tiwan tin Unimbɔti náańee, ní ki fá unáanli u-ba, úǹ un máaǹ bí nīn nyɔ́ŋkí-u baabadal kí nīn cée! Ameeni.

26Míǹ pu ní Unimbɔti dū-bi ki líiǹ kukpeeu kun kɔ̄ntí-bi icooyee. Di sá yii an nín bàà sá binimpoobi ń mɔ̄ǹ bininjabee, ní bi fàtīi cáa mɔ́ń bi-nimpujutiibi. 27Míǹ mbaantiim, bininjab kaa ti là binimpoobi, ní ki kíǹ ki là tɔb ŋmaniŋma tikpil ki dɔ̀ nì tɔb. Bi-tuuŋŋi gbanti cáań ditafadaaldi din sá bi-paati tin máaǹ-bee ki tɔ́ bi-pu.

28Kii bi-landɔkɔi nín sá yii Unimbɔti kaa máaǹ bí béé-uee puee, Unimbɔti dū-bi ki líì, ní bi-landɔkɔi gátì, ní bi kíǹ ki ŋáań min kaa máaǹ bí ŋée. 29Bi kpántì binikpitib mbaamɔm, ki ŋáań min kaa ŋān̄ee, ki cáá nnimbitaataam nì ntoom, ki cáá kináŋ nì nnikpaakoon tikpil, ki néeń kujaau, ki ŋmàtíǹ tɔb, ki kíiĺ tɔb, ki sòoǹ ki bíiĺ tɔb, 30ki sìí tɔb. Bi sá Unimbɔti nannanliibi, ki kpèé ki sɔ́kɔ̀ binib, ki yòontí bi-ba yilpu, ki dàkà bi-ba, ki nāantí isampɔɔn in pu bi dì ki ŋáań ikpitee, ní kaa tɔ́ bi-nab nì bi-baabi. 31Baa cáá iciin. Bi yaa pōoǹee, baa ŋáań tin bi pōoǹee. Baa cáá dineendi, kaa sūǹ bin kíǹee saai. 32Nì min kamaa bi baasii nyí tiŋan yii Unimbɔti bí yii bin bin ŋáań ikpiti gbantee máaǹ ŋkúmee, bi gbíntì ki ŋáań ikpiti gbanti. Tin gíti lákatèe di sá bi bí yii bin ŋáań ikpiti gbantee di ŋáań min kítèe.

Currently Selected:

Romains 1: BASSARDC

Highlight

Copy