Romains 10
10
1Nnabiyaamu, m-pɔbil poon nín là miŋyee nì tin tin m mèé Unimbɔti Isirayeel yab puee di sá bí ká difiil. 2M ká bi-pɔ́ɔǹtam dinimbɔtinoolin, ama, bi-pɔ́ɔǹtam gbantee, baa béè ki dóò. 3Di sá yii baa béè min ní Unimbɔti dì ki kpántí binib deedeedambi u-nimbiinee, ní ki bíi nyàab̀ bi-ba saŋŋu ŋun bi làá dī kí kpántí deedeedambee. Bi yíì, kaa sīntì bi-ba taapu Unimbɔti ń kpántí-bi deedeedambi. 4Kriisitoo di dɔ́miń ki kúntì marab dītam. Kɔŋkɔnnee, bin kpántì deedeedambee di sá bin kɔkɔ fōō Kriisitoo ki kííyee.
Ti-Dindaan fìil̄ bin kɔkɔ fōō-u ki kííyee
5Mooyiisi nìn ŋmàn̄ marab dītam nín cāabìń deedee uŋyee yii: «Un yaa nóó marab deedeeyee kāntí difiil bi-pu#10.5 Kpèè Akoo 18.5..» 6Ama deedee un nyēeń fookiinee nín sá puee sɔ̀. Unimbɔti gbɔŋku sòoǹ yii: «A-pɔbil poonee, taa lì yii, ŋma di ŋūǹ kí jɔ̄m̀ yilpu?» (Taapu sá yii bí jɔ̄m̀ kí cáań Kriisitoo), 7kí taa tí lì yii: «Ŋma di ŋūǹ kí sìntī taapu ditaŋkpiilin?» (Taapu sá yii bí nyāntiń Kriisitoo ditaŋkpiilin.) 8Mimmee, tí lì yii ba? Unimbɔti gbɔŋku lī yii: «Dinyɔɔbundi gbanti bí ki kɔ́ĺ-si, ki bí a-nyɔkɔn nì a-pɔbilin#10.8 B. 6-8: kpèè Ditee 9.4, 30.12-14..» Dinyɔɔbundi gbanti di sá fookii bɔti tin ti sòoǹee, yii. 9A yaa lī binib cee yii Yeesu sá a-Dindaan ki yaa fōō ki kíí a-pɔbilin yii Unimbɔti fīkitì-u ditaŋkpiilinee, a làá ká difiil. 10Di sá yii un kamaa yaa fōō Yeesu ki kíí u-pɔbil poonee kpántí deedeedaan u-nimbiin, ní un yaa lī u-nyɔkɔn yii u fōō-u ki kííyee, udaan kāntí difiil, 11kii Unimbɔti gbɔŋku poon nín lī puee yii: «Un kamaa yaa fōō ti-Dindaan ki kííyee, icoo kaa jīǹ udaan#10.11 Kpèè Yees 28.16..» 12Mimmee, digàntil kaa bí un sá Juuda yɔuee nì un kaa sá Juuda yɔuee kansikin. Bi-kɔkɔ Dindaan sá ubaanti ní. Úǹ ŋáań bin kɔkɔ yíì u-yindi ú fīī-bee tiŋan tikpil, 13kii an nín ŋmàn̄ puee yii: «Un kamaa yaa yíiń ti-Dindaan yindee kāntí difiil#10.13 Kpèè Joow 3.5..»
14Ama, bi yaa kaa fōō-u ki kíí, bi làá ŋá mana kí yíiń-u? Bi yaa kaa gbìl̄ u-pu, mana ní bi làá fōō-u kí kíí? Ubɔ yaa kaa bíi sòoǹ u-pu, mana ní bi làá gbìl̄? 15Unimbɔti yaa kaa túnní binib, mana ní bi làá sòoǹ-tì? Kii an nín ŋmàn̄ puee yii: «Bin sòoǹ Tibɔmɔntiilee nín dòoń bi-taaŋi ŋānní puee#10.15 Yees 52.7..» 16Ama bi-kɔkɔ kaa fōō tibɔmɔntiilee ki kíí, kii Yeesaya nín lī puee yii: «Ti-Dindaan, an kaa sá binib fiii di fōō ti-bɔti ki kííii#10.16 Yees 53.1.?» 17Mimmee bi gbìl̀ ní ki nín fōō ki kíí, ní tin bi gbìl̄ ki fōō ki kííyee sá Kriisitoo bɔti.
18Míǹ puee, Isirayeel yab kaa gbìl̄ tibɔmɔntiilee naaa? Bi gbìl̄-tì. An nóó nì min an ŋmàn̄ee dee, yii:
«Kitiŋ kɔkɔ gbìl̄ bi-neeŋyi pu,
ní tibɔti tin bi sòoǹee bàn̄ kitiŋgbeennyɔkɔ.»
19Mimmee, Isirayeel yab kaa gbìl̄ tibɔtee taapu naaa? Dooooyee ní Mooyiisi nìn pée sòon̄ bi-pu yii:
«Man Unimbɔti làá yàntī
binib bin kaa bí tibanee ń nīn jīǹ mmɔn,
ní án nīn wù nimbi,
kí yàntī ní fōō diŋuul binib
bin kaa nyí iciinee pu.»
20Ní Yeesaya mun sòon̄ ki cántì yii:
«Bin bin kaa nìn nyàab̀ man Unimbɔtee ká-mi,
ní m cáá m-ba ki dàkā bin kaa bàlifī m-puee.»
21Ama tin u sòon̄ Isirayeel yab puee sèé:
«M tāntì m-ŋalii kutaafaau áli kujoou
ki yíìń bin kaa tɔ́-mi, bi-yiliŋ pɔ̄ɔ̄yee#10.21 B. 18: Ilan 19.5. - B. 19: kpèè Ditee 32.21. - B. 20-21: Yees 65.1-2..»
Currently Selected:
Romains 10: BASSARDC
Highlight
Share
Copy
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
