Matthieu 15

Juuda yab yaajakoobiliŋ

(Kpèè Maar 7.1-23)

1 Fariisab nì bimaradakaliibi biba nyánní Jeerusaleem ki dɔ́miń Yeesu cee ní ki bālifì-u yii: 2«Ba pu ní a-boonnooliibi kaa nóó ti-yaajakoobiliŋ ní? Kun puee baa fíntí bi-ŋalii kí wàatī ní kí nín jī tijin, kii ti-koobiliŋ nín sá puee#15.2 Dūú ŋmàntī nì Luuki 11.38..» 3Ní Yeesu kíí-bi yii: «Kin nimbi fáà, ni nín nóó ni-yaajakoobiliŋ ki yìntī Unimbɔti marabee! 4Unimbɔti bí yii: <Á nīn tɔ́ a-baa nì a-na,> ní ki gíti bí yii: <Un di yaa sòon̄ ki bíil̀ u-baa kii u-nee máaǹ bí kpɔ̀-u#15.4 Kpèè Disa 20.21 nì Ditee 5.16, Disa 21.17 nì Akoo 20.9..> 5Ama ní nimbi dàkà binib yii a ŋūǹ kí tùkù a-baa àá a-na yii: <M nín bàà làá tīī-si tiŋyee m dūu ŋá Unimbɔti saraa.> 6A yaa gíti dáá lī mimmee, an kaa ti sá á tūtuǹ a-baa. Ni nín ŋáań pu ki kpìtī Unimbɔti bɔti ki ŋáań min ni-naanjab dàkèe dee. 7Mpoonnyoondambi! Unimbɔti bɔnaatiliu Yeesaya nín sòon̄ ni-pu miŋyee sá ibaamɔn. U nìn lī yii:

8<Unimbɔti bí yii: Binib nee nyɔ́ŋkí-mi nì bi-nyɔmmu fám ní,

bi-pɔbiliŋ dátiǹ-mi.

9Bi jáaḿ-mi fám ní,

kun puee tin binib náańee ní bi dàkà,

ní ki cáa yíì man marab#15.9 Yees 29.13..>»

Tin kɔ̄ntí unil tijɔkɔndee

10Míǹ boonee ní Yeesu yíiń kunipaauee u-cee ní ki bí-bi yii: «Ní pīlifì kí gbìl̄ tibɔti nee taapu tiŋan. 11An kaa sá tin di kóò unil nyɔkɔnee di kɔ̄ntí-u tijɔkɔndi Unimbɔti nimbiin, ama an sá tin nyēē unil nyɔkɔnee di kɔ̄ntí-u tijɔkɔndi.»

12Niinee, u-boonnooliibi sútìń ki bí-u yii: «Aa nyí yii tibɔti tin a bàà sòon̄ee wùn̄ Fariisabaaa?» 13Ní Yeesu bí yii: «Busubu bun kamaa ní m-Baa un bí yilpuee kaa cóoǹee, bi làá dāá fùkù-bu kí fá ní. 14Yàntīmaan-bi. Bi sá bijɔfub ní ki dàtī bijɔfub: ujɔfu yaa dàtī ujɔfuee, see bi-liitil ń lítí mboon.» 15Ní Peetroo bí-u yii: «Tùkù-ti dilaŋkpandi din a bàà gāāyee taapu.» 16Ní Yeesu bí-u yii: «Ni mun kaa láá cáá iciin níii? 17Naa nyí yii tin kɔkɔ kóò unil nyɔkɔnee cá u-poon, ní boonee ú cùú sɔ́ntáaa? 18Ama tin nyēē kinyɔkɔnee nyēē unil pɔbilin ní, an di kɔ̄ntí unil tijɔkɔndi Unimbɔti nimbiin, 19kun puee unil pɔbilin ní ilandɔkɔkpiti kɔkɔ nyēeń: nnikpaakoon, bininjab nì binimpoobi laakpaati, binaacimpɔmbi nì bisapɔmbi jɔkɔnti, bunaayubu, abɔgaan, asiibil. 20Tin kɔ̄ntí unil tijɔkɔndi Unimbɔti nimbiinee dee. An yaa sá á jī tijin kaa fíntì a-ŋalii kii akoobil nín sá puee, an kaa kɔ̄ntí-si tijɔkɔndi Unimbɔti nimbiin.»

Ukanaannimpu ubɔ fookiiu

(Kpèè Maar 7.24-30)

21Boonee, Yeesu yíkì niin ki nín cá Tiir nì Siidɔn watil pú. 22Ukanaannimpu ubɔ nìn nyánní niin pú ki dɔ́miń ní ki fáá mbiil yii: «Ukpil, Daafiidi naantiiu, sɔ̄ m-saai! Di sá arasinii ubɔ kā m-bisal pu ki páb́-u ŋkpitim pu.» 23Ama ní Yeesu kaa pée gātì-u tiba, ní u-boonnooliibi dɔ́miń ki gbāam̀-u yii: «Jà unimpu nee, di sá u pá ti-boon ki tátí kaa gbèentí.» 24Ní Yeesu kíí yii: «Bi túnní-mi Isirayeel yab bin wáŋkì kii ipiiyee ŋmaniŋma cee ní.» 25Ama ní unimpuee dɔ́miń ki gbāaǹ u-nimbiin ní ki bí yii: «Ukpil, jòoń-mi!» 26Ní Yeesu lī yii: «An kaa máaǹ bí dū mbiyaamu jinti kí tīī mbɔbiyaamu.» 27Ní unimpuee bí yii: «Tiŋman Ukpil, ama nì míǹ kɔkɔee, mbɔbiyaamu dindambi yaa bíi jīǹee, mbɔbiyaamu mun tòó igbasigbasi in lítée ní ki jīǹ.» 28Niinee ní Yeesu bí yii: «Unimpu nee, a-fookiiu wīikéeee! A nín là puee, án ŋá míǹ kí tīī-si.» Niin niin ní u-bisalee pɔ́ɔkì.

Yeesu cáaǹ bibunliibi tikpil

29Yeesu yíkì niinee ní ki búntì Galiilee mɔɔgbandi, ní ki cūtìi jɔ́m̀ dijool diba pu ki kāl̀. 30Kunipaau nìn dɔ́miń u-cee ki yōoǹní bin tà bi-taaŋi puee nì bin wɔ̀b̄ee, nì bijɔfub, nì bimɔɔmiimbi, nì bibunliibi biba mun tikpil, ní bi cáań-bi ki bíl̀ u-nimbiin, ní u cáaǹ bi-kɔkɔ. 31An nìn ŋá kunipaauee maamaaci bi nín ká bimɔɔmiimbi sòoǹ, bin wɔ̀b̄ee pɔ́ɔkì, bitaakpalfub kíǹ ki còom̄ tiŋan, ní bijɔfub mun wál̀ee puee, ní bi bíi pàkà Isirayeel Nimbɔtiu.

Yeesu kpíiǹ binib kutukub binaa

(Kpèè Maar 8.1-10)

32Yeesu yíiń u-boonnooliibi, ki bí-bi yii: «Nnibiim nee gbí-mi falaa: di sá iwiin ita sèé nee bi nín bí m-cee, kaa cáá tiba kí jēe. Maa là kí jà-bi bí nīn kùǹ nì ŋkùm, bi-wunti ń tin yɔ̀tī nsanni.» 33Ní u-boonnooliibi bí-u yii: «Kin, la ní ti làá nín kánní tijin kuteeu nee ni kí kpíiǹ nnibiim min bí nee dee?» 34Ní Yeesu fātìi bālifì-bi yii: «Kpɔnɔb biŋa ní ni cáá ní?» Ní bi kíí-u yii: «Biluli, nì njɔŋkaaŋkaamu.» 35Niinee ní u bí samaayee kɔkɔ ń kàl̄ taapu, 36ní ki fōō kpɔnɔb bilulee nì ijɔmee, ki jáam̀ Unimbɔti an pu, ní ki gífì gífì ki tīī u-boonnooliibi yākatì kunipaauee. 37Ní báà ŋma jíń ki díkí, ní bi kóoǹ agin ŋin nìn kíǹee ki gbéeǹ tikabiti tiluli. 38Bin nìn jíń tijikaal gbantee nyáń bininjab kutukub binaa, baa kàan̄ binimpoobi nì mbiyaamu. 39Bi jíń ki dóòyee, ní Yeesu yāntì kunipaauee nín kùǹ ní u kɔ́ buŋalimbu u nì u-boonnooliibi búntì Magadan watil pú.

Currently Selected:

Matthieu 15: BASSARDC

Highlight

Copy