Matthieu 14

Yoowaneesi unyiŋfaldi kúm

(Kpèè Maar 6.14-29, Luuki 9.7-9)

1Ŋyunti gbantee, Eeroodi un nìn sá ubɔti Galiileeyee gbìl̄ bi nín sòoǹ Yeesu pu miŋyee 2ní ki bí u-tɔntɔnliibi yii: «Unee di sá Yoowaneesi un fùul̀ binib Unimbɔti nyimee. U fātìi fīkitì ní, an pu ní u cáá mpɔn ki ŋáań maamaacib míǹ.»

3Di sá yii Eeroodi nìn tīī mara bí cúú Yoowaneesi kí bóob́-u iŋmii ní kí cáá-u kí tɔ̄ sarkan. Kun pu ní u nìn ŋá mimmee di sá yii u nìn cáá u-maan Fiiliipi nimpuu, bi yíì-u Eeroodiyadi#14.3 Kpèè Maar 6.17 nì tin bi ŋmàn̄ kugbɔŋu faaku taapuee.. 4Yoowaneesi nìn tùkū Eeroodi yii: «An kaa máaǹ á cáá unimpu gbanti#14.4 Kpèè Akoo 18.16, 20.21..» 5Niinee ní u kíǹ ki nyàab̀ kí kpɔ̀ Yoowaneesi, ama ní ki fàŋkí Juuda yab, kun puee báà ŋma nìn nyí Yoowaneesi pu yii u sá Unimbɔti bɔnaatiliu.

6Daliŋkin bi bíi jīǹ Eeroodi maaliwiiŋŋu jiŋaaliuee, Eeroodiyadi bisal ŋɔ́ń bin bi yíiń jiŋaalee nimbiin, ní an mɔ́ɔkiǹ Eeroodi. 7U nìn pūtì ki bí yii: «Kun kamaa ní a yaa lèe, á bàlifì-mi, m làá tīī-si kudɔŋu.» 8Ní usapɔɔnee na yāntì u lī yii: «Á tùkutī Yoowaneesi un fùul̀ binib Unimbɔti nyimee yil kí tàkan̄-mi kpaatan kɔŋkɔnnee.» 9Niinee, an kɔ́ ubɔti kunimbaau. U nín gíti dáá pūtì bin u yíińee nimbiinee ní u kíí yii u làá tīī-u, 10ní ki tú ubɔ ń cù kusarkadiin kí tìlīń Yoowaneesi un fùul̀ binib Unimbɔti nyimee yil kí cáań. 11Ní bi tīl̀ Yoowaneesi yil ki ŋá kpaatan, ki cáań ki tīī usapɔɔnee, ní u mun cáa tīī u-na. 12Yoowaneesi boonnooliibi nìn dɔ́miń ki yōoǹ-u ki cáa síb́, ní ki cūtì ki tùkū Yeesu tin jítèe.

Yeesu kpíiǹ binib kutukub biŋmoo

(Kpèè Maar 6.30-44, Luuki 9.10-17, Yoow 6.1-14)

13Yeesu nín gbìl̄ mimmee, ní u yíkì niin u nì u-boonnooliibi kɔ́ buŋalimbu ki búntì laakin binib kpée, ama ní kunipaau nyánní ntimun ki còom̄ ataa ki nín jì u-boon. 14Yeesu nì u-boonnooliibi nyáń buŋalimbunee, ní ki ká kunipaau nín tíibińee. Binibee nìn cúú-u falaa ní u kíĺ ki bíi cāantí bibunliibi.

15Kujoou bíi jóotée, ní u-boonnooliibi sútìń ki pìl̄-u, ní ki bí-u yii: «Binib kaa kóò laakin ti bí nee, kunyeeu mun bíi móotí. Míǹ puee, yàntī binib ń nīn cá ntimbilimun kí dā tijin kí jī.» 16Ní Yeesu kíí-bi yii: «An kaa bàlifī bí cù, nimbi ni-ba ń tīīmaan-bi tijin bí jī.» 17Ní bi bí-u yii: «Kpɔnɔb biŋmoo nì ijɔm ili ja di bí.» 18Ní u bí yii: «Yòon̄ kí cáaḿmaan-mi!» 19Niinee, ní u bí yii samaa kɔkɔ ń kàl̄ kumɔsɔŋu pu, ní u fōō kpɔnɔb biŋmoo nì ijɔm ilee ní ki wáaǹ ki kpēē kutaa, ki jáam̀ Unimbɔti, ní ki gífì gífì kpɔnɔbee ki dūu tīī u-boonnooliibi, ní bíǹ dūu yākatì binib kɔkɔ. 20Ní bi-kɔkɔ jíń ki díkí, an kíǹ, ní bi kóoǹ akpɔnɔkati nì ajɔŋgin ŋin kíǹee ki gbéeǹ tikabiti saalaa nì tili#14.20 Dūú ŋmàntī nì 2 Bib 4.42-44.. 21Binib bin nìn jíń tijin gbantee nìn bàn̄ kii bininjab kutukub biŋmoo, baa kàan̄ binimpoobi nì mbiyaamu.

Yeesu cōom̀ nnyim pu

(Kpèè Maar 6.45-52, Yoow 6.16-21)

22Niinee ní Yeesu yāntì u-boonnooliibi kɔ́ buŋalimbu malaa ki līntì ki dūtì lapu buŋgbandi, ní Yeesu úǹ dáá bí niin ki tùkù binib yii bí nīn kùǹ. 23U yāntì bi nín kùǹee, ní u kākatì ŋkpaanceeti dijool pu kí mèè. Kunyeeu mɔ́ee u dáá gbíntìi bí niin u-baba. 24Buŋalimbuee mun nìn bàn̄ dimɔɔl kansikin kaa ti cá, kun puee kubuŋu nìn túŋkiń-bu ní tinyiŋgban nìn yāŋkí-bu. 25Ki cá kutaawuntuŋuee, ní Yeesu tɔ́kɔǹ nnyim pu ki còom̄ ki cá u-boonnooliibi cee. 26Bi nín ká u páaǹní ki còomìń nnyim puee, ní bi-pɔbiliŋ máĺ, ní bi bí yii: «Ufaŋfanti dee!» ní tifaandi kɔ́-bi ní bi bíi gbáà ibiil. 27Kpalaayee ní Yeesu bí-bi yii: «Cúúmaan ni-pɔbiliŋ, an sá man! Taa fàŋkìmaan!» 28Niinee ní Peetroo bí-u yii: «M-Dindaan, an yaa lafun sá sii, á yàntī ḿ tɔ́kɔń nnyim pu kí còom̀ kí dāan̄ a-cee.» 29Ní Yeesu bí-u yii: «Nín̄ dòoń!»

Ní Peetroo nyáń buŋalimbun ki tɔ́kɔǹ nnyim pu ki còom̀ ki nín cá Yeesu cee. 30U nín bíi còom̄ ki cá ki ká kubuŋu nín jītí pu mpɔnee, ní u fāŋkì, ki kíĺ ki bíi múl̀ nnyimin, ní ki fáá mbiil yii: «M-Dindaan, fīī-mi.» 31Kpalaayee ní Yeesu tāntì u-ŋal ki cúú-u ní ki bí-u yii: «A-fookiiu pátì, ba pu ní a fāŋkì?»

32Ní bi-liitil kɔ́ buŋalimbun, ní kubuŋu ŋmíl̀. 33Bin nìn kā buŋalimbunee gbāaǹ Yeesu nimbiin ki bí-u yii: «Ibaamɔn, a lafun sá Unimbɔti Jipɔɔn.»

Yeesu cáaǹ bibunliibi Geeneesareeti

(Kpèè Maar 6.53-56)

34Bi dūtì dimɔɔl ki bàn̄ Geeneesareeti tiŋki jandi dibee ní ki kpákatì#14.34 Kpèè Maar 6.53.. 35Niin yab kpáàa béè Yeesu, ní ki nākaǹ bi tùkū ajan kɔkɔ nib, ní bi yōoǹní bibunliibi kɔkɔ ki cáań u-cee 36ki mèé-u yii ú yàntī bí gbēē u-bɔkutijúti kpaŋkpam, ní bin kɔkɔ lafun gbēēyee pɔ́ɔkì.

Currently Selected:

Matthieu 14: BASSARDC

Highlight

Copy