Luc 6

Yeesu sá ŋwiŋŋuŋfikaa dindaan

(Kpèè Maat 12.1-8, Maar 2.23-28)

1 Ŋwiŋŋuŋfikaa ŋubɔ dalee, Yeesu nì u-boonnooliibi jītí bilee kpaaŋŋin, ní u-boonnooliibi bíi gífí bilee fiŋyi ki ŋmèem̄ abil ki ŋmóò#6.1 ŋmèem̄ abil ki ŋmóò: kpèè Ditee 23.26.. 2Fariisab biba ká mimmee, ní ki bí-bi yii: «Ba pu ní ni ŋáań min kòóyee ŋwiŋŋuŋfikaa dal#6.2 Kpèè Disa 34.21.?» 3Ní Yeesu kíí-bi yii: «Naa láá pée kàan̄ ŋkùm nín nìn cúú ubɔti Daafiidi nì u-naacimbi u ŋá pueeee? 4U nìn kɔ́ kunimbɔtidiin ní usaraaŋakpil tīī-bi kpɔnɔb bin bi nìn dūu ŋá Unimbɔti saraayee, ní u nì u-naacimbi ŋmɔ́, ama ti-marau poonee, báà ubɔ kaa máaǹ kí ŋmɔ́ an kpɔnɔb gbanti, see bisaraaŋaliibi baba di ŋmóò-bi#6.4 kpɔnɔb bin bi nìn dūu ŋá Unimbɔti saraayee...: kpèè 1 Sami 21.2-7. - see bisaraaŋaliibi baba...: kpèè Akoo 24.9..» 5Ní Yeesu gíti bí-bi yii: «Man Kinibiki di sá ŋwiŋŋuŋfikaa dindaan.»

Yeesu cáaǹ uninja ubɔ, u-ŋal fáká

(Maat 12.9-14, Maar 3.1-6)

6 Ŋwiŋŋuŋfikaa ŋubɔ mun dalee, Yeesu fātìi tí cūtì kukpafidiin, ní ki bíi dàkà binib Unimbɔti bɔti. Kijapaai kiba nìn bí niin, u-ŋaŋgiil fáká. 7Bimaradakaliibi nì Fariisab nìn bí ki cɔ́ŋkí Yeesu kí kpèè yii u làá cáaǹ ubɔ ŋwiŋŋuŋfikaa dalaaa, waa làá cáaǹ, kun puee bi nìn bíi nyàab̀ nnaakpal kí dūú ŋá-u tibɔti. 8Ama Yeesu nyí bi-landɔkɔi, ní ki bí un ŋal fákée yii: «Yīkì kí sīĺ binib kansikin,» ní u yáatìi yúl̀ bi-kansikin. 9Ní Yeesu bí-bi yii: «M bàlifī-ni, ti-marau lī yii ba ní? Tí ŋá tiŋan ŋwiŋŋuŋfikaa dalaaa, tikpitil ní? Tí fīī unilaaa, tí kpɔ̀-u ní?» 10Ní u fātìi kpēē bi-kɔkɔ ki māntì, ní ki bí un ŋal fákée yii: «Tàntī a-ŋal!» ní u tāntì-ŋu, ní u-ŋal fātìi gítìń ŋu-laŋki. 11Ní bi fōō mbum, ní ki bíi sòoǹ ki bɔ́ntí bi-kansikin kí béé bi nín làá ŋá Yeesu puee.

Yeesu lēē akpambal saalaa nì ali

(Kpèè Maat 10.1-4, Maar 3.13-19)

12Ŋyuntee ní Yeesu jɔ́m̀ dijool diba pu kí mèè Unimbɔti, ní ki dū kunyamɔŋu ki mēē. 13Kutaa wúntèe ní u yíiń u-boonnooliibi, ní ki lēē bi-kansikin saalaa nì bili bíǹ ń nīn sá u-kpambaliŋ. 14Akpambalee yiŋŋi sèé: Siimɔn un u nìn páaǹ diyindi yii Peetrooyee (an taapu di sá yii Ditaŋkpal), nì Siimɔn naal Andree, nì Yakubu nì Yoowaneesi nì Fiiliipi nì Bateeleemii 15nì Maatiiu nì Toomasi nì Yakubu un sá Alfee jipɔɔnee, nì Siimɔn un nìn là kí jáǹ Room yabee, 16nì Juuda, Yakubu jipɔɔn, nì Juudasi Isikaariyɔti un dāa dū Yeesu ki nyáfiǹ u-nannanliibee.

Yeesu dàkā Unimbɔti bɔti ki cáaǹ bibunliibi

(Kpèè Maat 4.23-25)

17Yeesu nì u-kpambaliŋ kpákatìń ki bāań ki yúl̀ ditantakalin, laakin u-boonnooliibi kupaau nì binifantantiibi tikpil mun nìn yúee. Binib gbantee, biba nìn nyánní Juudee timmu kɔkɔn, ní biba nyánní Jeerusaleem tiŋkin, ní biba mun nyánní Tiir nì Siidɔn, ntimu mun bí dimɔɔl caŋinee. 18Binibee nìn dɔ́miń kí pīlifì Yeesu nín sòoǹ Unimbɔti bɔti pueeyaaa, ki là ú cáaǹ-bi mun. Ní bin pu arasiniibi nìn kēe ká dicáaǹdi. 19Báà ŋma nìn pée nyàab̀ kí gbēē Yeesu ní, kun puee mpɔn ŋubɔ nìn nyēeń u-ni ki cāantí bi-kɔkɔ.

Yeesu sòon̄ diyimɔɔl nì mbusu bɔti

(Kpèè Maat 5.1-12)

20Ní Yeesu kpēē u-boonnooliibi ní ki bí yii:

«Nimbi binandambi bí mmɔnneeee,

kun puee ni sá Unimbɔti Beelin yab.

21Nimbi bin ŋkùm cáá kɔŋkɔnneeyee bí mmɔnneeee,

kun puee ni làá dāá jī kí díkí.

Nimbi bin bíi sūǹ kɔŋkɔnneeyee bí mmɔnneeee,

kun puee ni làá dāá lā!

22«Nimbi bin bi ná, ki jì, ki sìí, ki bíiĺ ni-yiŋŋi man Kinibiki puee bí mmɔnneeee! 23Yaadalee, ní nīn fàal̀ ki nyàkantī án nīn mɔ̄ǹ-ni, kun puee ni-paati wīikí yilpu. Míǹ mbaantiim ní bi-naanjab mun nìn sāaǹ Unimbɔti bɔnaatiliibi#6.23 Dūú ŋmàntī nì 2 Kroo 36.16, Atuun 7.52..

24Ama nimbi bigaajab, mbusu dɔ̄ ki cí-ni,

kun puee nimbi jíń ni-mɔŋŋu doo.

25Nimbi bin bí digbíl poon kɔŋkɔnneeyee, mbusu dɔ̄ ki cí-ni,

kun puee ŋkùm làá dāá cúú-ni.

Nimbi bin bí tilaal poon kɔŋkɔnneeyee, mbusu dɔ̄ ki cí-ni,

kun puee ni làá dāá kɔ́ kunimbaaun kí sɔ̄.

26«Nimbi bin ní duulinya yab pàkà yii ni sá bimɔntiibee, mbusu dɔ̄ ki cí-ni, kun puee míǹ ní bi-naanjab nìn pàkà bin nìn mɔ́ntí yii bi sá Unimbɔti bɔnaatiliibee.»

An máaǹ tí nīn néeń ti-nannanliibi

(Kpèè Maat 5.38-48, 7.12a)

27«Ama m tùkù nimbi bin pílifíǹ-mi nee yii, ní nīn néeḿmaan ni-nannanliibi kí nīn ŋáaḿmaan bin ná-nee tiŋan. 28Bin bin tòó-ni mbusuee, mèèmaan Unimbɔti ń ŋá-bi tiŋan, kí mèè kí tīī bin sàantí-nee. 29Ubɔ yaa fáá a-taŋkpanjil diba ntampee, á fàtī din kíǹee kí tīī-u ú fáá. Ubɔ yaa yōoǹ a-kpalibuee, á yàntī ú yòon̄ a-bɔkutiwaaki mun. 30Ubɔ yaa mēē-si tibee, á tīī-u. Ubɔ yaa yōoǹ a-wanti, á taa bàlifì-u. 31Ni nín là bí ŋá min kí tīī-nee, ŋámaan míǹ kí tīī ni-jutiibi#6.31 Dūú ŋmàntī nì Room 13.8-10.. 32«Ni yaa néeń bin néeń-nee ŋmaniŋmee, ba paati ní ni gíti kā ki cí boon? Bin kaa nyí Unimbɔtee mun pée néeń bin néeń-bee ní. 33Ní ni yaa tí ŋáań tiŋan ki tìì bin ŋáań ni mun tiŋanee babee, ba paati ní ni gíti kā ki cí boon? Bin kaa nyí Unimbɔtee mun pée ŋáań tiŋan ki tìì bin ŋáań-bi tiŋanee ní. 34Ni yaa tí pìntí bin ni nyí yii bi làá téeǹ-nee ŋmaniŋmee, ba paati ní ni gíti kā ki cí boon? Binikpitib mun pée pìntí bi-jutiibi binikpitib ní ki nyí yii bi làá fàtīí téeǹ-bi bi-nimbiŋmiiku deedee. 35Min máaǹ ní ŋée di sá ní nīn néeḿmaan bin ná-nee, kí nīn ŋáań-bi tiŋan, kí nīn pìntímaan kí taa nín̄ dàkafī yii bi làá téeǹ-ni. Míǹ ní ni dāa fòol̄ tipaakpaandi ní ki dāa sá Unimbɔti un bí yilpuee biyaamu, kun puee úǹ ŋáań tiŋan ki tìì bin kaa nyí tiŋanee nì bin sá binikpitibee. 36Ní nīn cáá tiniti tikpil kii ni-Baa nín cáá tiniti tikpil puee#6.36 Dūú ŋmàntī nì Disa 34.6, Ilan 86.15..»

Taa nín̄ sòoǹ a-juti bɔti

(Kpèè Maat 7.1-5)

37«Taa nín̄ sòoǹ a-juti bɔti, ní Unimbɔti mun ń taa láa sòoǹ a mun yati. Taa kpɔ̀ a-juti bɔti, ní Unimbɔti mun ń taa kpɔ̀ a-yati. Dū a-juti yìntitam kí pɔ̄-u, ní Unimbɔti ń dū a mun yìntitam kí pɔ̄-si. 38Tīī a-juti, ní Unimbɔti ń dāá tīī-si mun. Bi làá dāá ŋmàntī ní kí cìŋkì kí tēefì, ní án gbí púm, ní bí dūú sìtī a-lookun. A nín ŋmāntì pu ki tīī a-jutee, míǹ ní Unimbɔti làá dāá ŋmàntī kí tīī si mun.»

39Ní Yeesu gíti dū tibɔti nee ki ŋmāntì yii: «Ujɔfu ŋūǹ kí dàtì u-jɔfujutaaa? Bi-liitil kaa lítí mboonaaa? 40Utumbifil kaa bí ki jítiǹ u-kpiliu, ama, u yaa bífì tiŋanee, u dāa kpántí kii u-kpiliuee ní. 41«Ba pu ní a wāĺ kimɔmbiki kin kā a-nabiki nimbilinee ní kaa wāĺ didɔjal din kā sii yalinee? 42Àá mana ní sii un kaa wāĺ didɔjal din kā a-nimbilinee ŋūǹ kí lì a-nabiki yii: <M-nabiki, yàntī ḿ lēē-si kimɔmbiki a-nimbilin!> Mpoonnyoondaan, lēē didɔjal din kā sii a-ba nimbilinee kí wàatī, kí nín wāl̀ mmɔntiimin kí lēē kimɔmbiki kin kā a-nabiki nimbilinee.»

Busubu nì bu-biliŋ bɔti

(Kpèè Maat 7.17-20, 12.34-35)

43«Busumɔntiibu kaa lòoǹ asubikpiti, míǹ ní busukpitibu mun kaa lòoǹ asubimɔnti. 44Busubu kamaa bil pu ní bi béetí-bu. Baa kìtī kɔŋkib abɔjanaakun pu, kaa tí tòó atuun kikuŋkumbɔŋ pu. 45Unimɔnti tūǹ atummɔnti ní, kun puee u-pɔbil poon ŋān̄, ní unikpiti tūǹ atuŋkpiti, kun puee u-pɔbil poon kaa ŋān̄. Di sá yii tin gbí unil pɔbilinee, tíǹ ní u-nyɔkɔ sòoǹ.»

Adiin ali bɔti

(Maat 7.24-27)

46«Ba pu ní ni yíì-mi <ti-Dindaan, ti-Dindaan> ní kaa ŋáań min m bí yii ní ŋée ní? 47M làá dàkà-ni bin dòoń m-cee ki pílifí m-bɔti ki kpáafí-tee nín náań nì kuŋyee. 48Bi náań nì unil un di làá mā kudii, ki gbìn̄ kitiŋ an nyóò, ki dū kudii ki máń ki tɔ́kɔǹ ditaŋkpal puee ní. Utaakpaan dɔ́miń ki nìn̄, ní mbun gbí ki léeǹ kudiiyee pu, ama kuaa cīŋkì, kun puee ku tɔ́kɔ́ ditaŋkpal pu. 49Ama bin di pílifí m-bɔti nee, kaa kpáafí-tee, náań nì unil un làá mā kudii, kaa gbìn̄ kitiŋ ní ki dū kudiiyee ki máń ki tɔ́kɔǹ kitiŋ pu fámee ní. Utaa nìn̄ ní nnyiŋgbeen dɔ́miń ki léeǹ kudiiyee pu: kpalaayee, ku lítì ní ki nàn̄ dúsi dusi.»

Currently Selected:

Luc 6: BASSARDC

Highlight

Copy