Luc 3

Yoowaneesi unyiŋfaldi sòon̄ Unimbɔti bɔti

(Kpèè Maat 3.1-12, Maar 1.1-8, Yoow 1.19-28)

1Gɔminakpaan Tiibeer nín kāl̀ dibeel nee, an ŋá abin saalku dee. Dibindi gbanti poonee, Pɔnsi Piilati di nìn sá gɔmina Juudee tiŋkin, ní Eeroodi sá ubɔti Galiilee tiŋkin ní u-maan Fiiliipi mun sá ubɔti Iituree nì Trakoonii timmun, ní Liisaniyasi sá ubɔti Abileen tiŋkin, 2ní Ana nì Kaayiifi sá bisaraaŋakpilib. Ŋyunti gbanti ní Unimbɔti nìn sòon̄ nì Yoowaneesi, Sakari jipɔɔn kuteeun. 3Ní Yoowaneesi kíĺ ki bíi yìiǹ ntimu mun bí Jɔɔdan buŋŋu caŋinee ki sòoǹ yii: «Kpántímaan ni-bimbim bí fàl̀-ni Unimbɔti nyim, ní Unimbɔti ń dū ni-kpitii kí pɔ̄-ni.» 4An nóó nì Unimbɔti bɔnaatiliu Yeesaya nín ŋmàn̄ u-gbɔŋku poon puee yii:

«Ubɔ báakí kuteeun yii:

Bɔ́ntímaan ti-Dindaan saŋŋu

kí tàntīmaan u-sàmbiyaamu kí cīití-u.

5Atantaka kɔkɔ làá dāá gbīŋkì,

ajoon nì ŋgbantamu kɔkɔ làá bìtī.

Asaŋgɔŋgɔl làá tàntī.

Isan in cáá abɔbil abɔbilee làá ŋāŋkì.

6Ní báà ŋma ń dāá ká Unimbɔti nín fìil̄ binib puee#3.6 Yees 40.3-5..»

7Yoowaneesi nìn lì kunipaau kun nìn dòoń ú fàl̀-bi nnyimee yii: «Nimbi bin tū kii ikoowaatee, ŋma di tùkū-ni yii ni ŋūǹ kí sāǹ kí ŋmátí Unimbɔti ŋuul din dòońee ni? 8Lòom̀maan abil ŋin dàkà yii ni kpántì ni-bimbimee, kí taa nín̄ kā ki dàkafī yii Abraam sá ni-naanja#3.8 Dūú ŋmàntī nì Yoow 8.33,37,39.! M tùkù-ni ibaamɔn ní, di sá Unimbɔti ŋūǹ kí dū ataŋkpee nee kí kpántí Abraam naantiibi. 9Áli gba, Unimbɔti bɔ́ntì kicɔkɔ ki bíl̀ isufi taapu: busubu bun kamaa yaa kaa lòoǹ abimɔntee, bi làá gāā-bu kí tɔ̄ ŋŋmin.»

10Ní kunipaauee bíi bàlifī-u yii: «Mimmee, ti làá ŋá mana ní kí fáatí Unimbɔti?» 11Ní u kíí-bi yii: «Un yaa cáá abɔkuti alee ń lēē diba kí tīī un kaa cááyee. Un mun yaa tí cáá tijinee, ń lēē kí tīī un kaa cáá kí jēe.»

12Ní bifɔtiliibi mun dɔ́miń bí fàl̀-bi Unimbɔti nyim, ní ki bālifì Yoowaneesi yii: «Ukpil, ti máaǹ kí ŋá mana ní?» 13Ní u bí-bi yii: «Bi nín yóoǹ mara yii bí nīn fɔ́tí puee, ní taa fɔ́tí kí lákatí míǹ pu.»

14Ní soojab mun dɔ́miń ki bālifì-u yii: «Timbi máaǹ kí ŋá mana?» Ní u kíí-bi yii: «Ní taa nín̄ dàkà binib mpɔn, kí taa nín̄ gífí inyimɔn ki tūntí binib pu, ama ní yàntī tipaal tin ni fòol̄ uŋmal uŋmalee ń nīn mɔ̄ǹ-ni.»

15Kii báà ŋma nín nìn kā ki cí Meesiyayee puee ní bi kíǹ ki bàlifī bi-ba yii Yoowaneesi di kalin sá Meesiyaaa? 16Niinee ní Yoowaneesi bí bi-kɔkɔ yii: «Man fùul̀-ni nì nnyim ní, ama ubɔ dòoń, u-pɔŋŋu jítiǹ man yɔŋu. Man kaa kpántì kí nīn sá u-yumbuu kí kútí u-naataaŋmiii gba. Úǹ di làá dāá fàl̀-ni nì Unimbɔti Fam nì ŋŋmi. 17Úǹ di ŋúb́ u-yubakalkaaku#3.17 kuyubakalkaau : kpèè Maat 3.12. ki làá bàkal̀ kí gàntī idi nì tifin, kí dū idee kí ŋá kulɔŋŋun, ní kí dū tifin kí tɔ̄ ŋŋmi ŋun kaa kúù jaanjaanee ni.»

18Míǹ ní Yoowaneesi nìn sáŋkí binib, ki gíti kútí-bi tibɔti tikpil ní ki sòoǹ nì bi tibɔmɔntiil. 19Yoowaneesi wòon̄ ubɔti Eeroodi un nìn cáá u-maan nimpuu Eeroodiyadee nì u nín túń atuŋkpiti tikpil ŋin ki kútèe. 20Niinee ní Eeroodi gíti túń dituŋkpitil diba ki kútì, di sá yii u cúú Yoowaneesi ki pīiǹ kudii.

Bi fùl̄ Yeesu Unimbɔti nyim

(Kpèè Maat 3.13-17, Maar 1.9-11)

21Báà ŋma nìn cá bi fùul̀-bi Unimbɔti nyim. Yeesu mun nìn fùl̄ Unimbɔti nyim. U fùl̄ ki bíi mèéyee, kutagbɔŋu cúu pīitì, 22ní Unimbɔti Fam kpákatìń u-pu ki náań nì dibeenanjil ní bi gbìl̄ Unimbɔti sòon̄ní kutaa pu yii: «Sii di sá man Jipɔɔn un m néeń tikpilee, sii ní m-pɔbil fáatì#3.22 Dūú ŋmàntī nì Ilan 2.7, Yees 42.1..»

Yeesu naanjab yiŋŋi

(Kpèè Maat 1.1-17)

23Yeesu nìn ŋá kii abin mmuŋku nì saalaa ní ki kíĺ u-tundi. Binib nìn nyí-u yii u sá Jooseefi jipɔɔn, ní Jooseefi baa sá Eelii. 24Eelii baa sá Maataati, ní Maataati baa sá Leefii, ní Leefii baa sá Meelki, ní Meelki baa sá Jaanayi, ní Jaanayi baa sá Jooseefi, 25ní Jooseefi baa sá Maatatiyasi, ní Maatatiyasi baa sá Amoosi, ní Amoosi baa sá Nawum, ní Nawum baa sá Eeslii, ní Eeslii baa sá Nagayi, 26ní Nagayi baa sá Maatiyasi, ní Maatiyasi baa sá Maatatiyasi, ní Maatatiyasi baa sá Seemeeyiin, ní Seemeeyiin baa sá Jooseeki, ní Jooseeki baa sá Jooda, 27ní Jooda baa sá Joowana, ní Joowana baa sá Reesa, ní Reesa baa sá Sooroobabeel, ní Sooroobabeel baa sá Salatiyeel, ní Salatiyeel baa sá Neerii, 28ní Neerii baa sá Meelki, ní Meelki baa sá Adii, ní Adii baa sá Koosam, ní Koosam baa sá Eelmadam, ní Eelmadam baa sá Eer, 29ní Eer baa sá Yeesuwa, ní Yeesuwa baa sá Eeliyeeseer, ní Eeliyeeseer baa sá Jooriim, ní Jooriim baa sá Maataati, ní Maataati baa sá Leefii, 30ní Leefii baa sá Simeeyɔn, ní Simeeyɔn baa sá Juuda, ní Juuda baa sá Jooseefi, ní Jooseefi baa sá Joonam, ní Joonam baa sá Eeliyaakiim, 31ní Eeliyaakiim baa sá Meeleeya, ní Meeleeya baa sá Meena, ní Meena baa sá Maataata, ní Maataata baa sá Naatan, ní Naatan baa sá Daafiidi, 32ní Daafiidi baa sá Jeesee, ní Jeesee baa sá Joobeedi, ní Joobeedi baa sá Boowaasi, ní Boowaasi baa sá Salmɔn, ní Salmɔn baa sá Naasɔn, 33ní Naasɔn baa sá Amiinadaab, ní Amiinadaab baa sá Adameen, ní Adameen baa sá Arinii, ní Arinii baa sá Eesiroom, ní Eesiroom baa sá Fareesi, ní Fareesi baa sá Juuda, 34ní Juuda baa sá Jaakɔb, ní Jaakɔb baa sá Isaaki, ní Isaaki baa sá Abraam, ní Abraam baa sá Teera, 35ní Teera baa sá Naakɔɔr, ní Naakɔɔr baa sá Seeru, ní Seeru baa sá Ragoo, ní Ragoo baa sá Faleeki, ní Faleeki baa sá Eebeer, 36ní Eebeer baa sá Sala, ní Sala baa sá Kayinaam, ní Kayinaam baa sá Aripakisaadi, ní Aripakisaadi baa sá Seem, ní Seem baa sá Noowa, 37ní Noowa baa sá Lameeki, ní Lameeki baa sá Matuseela, ní Matuseela baa sá Eenɔki, ní Eenɔki baa sá Jareedi, ní Jareedi baa sá Maleeleel, 38ní Maleeleel baa sá Kayinan, ní Kayinan baa sá Eenɔsi, ní Eenɔsi baa sá Seeti, ní Seeti baa sá Adam, ní Adam úǹ sá un Unimbɔti péé ki náańee.

Currently Selected:

Luc 3: BASSARDC

Highlight

Copy