Luc 2

Yeesu màaltam

(Kpèè Maat 1.18-25)

1Ŋyuntee ní gɔminakpaan Oogusti yóoǹ mara yii bí kàaǹ ntimu kɔkɔ nib. 2Dikaampeepeekaalee nìn sá ŋyunti ŋun Kriniyusi nìn sá gɔmina Siirii tiŋkinee ní. 3Báà ŋma nìn cá u-naanja tiŋkin bí kàaǹ-u. 4Míǹ puee ní Jooseefi mun yíkì Naasaareeti Galiilee tiŋkin ki nín cá ubɔti Daafiidi dumpu Beetileem, Juudee tiŋkin, kun puee u nìn sá Daafiidi naantitɔntɔkɔl ní. 5U nì u-bɔɔn Maarii un nìn sá upɔdaanee di nìn cūtì dikàandi gbanti. 6Bi bí Beetileem niinee, ní ŋwiin ŋun Maarii làá màal̀ee dūu bāań. 7U nìn màl̄ u-biseemal kibininjabiki ní ki dū iŋaabu ki fìn̄-kì. U nìn dū-kì ki bíl̀ laakin bi ŋáań tiwaŋkuti timool tì ŋmóòyee, kun puee binib nìn gbí kunicandii poon, baa nìn ŋūǹ kí kɔ́ niin.

Unimbɔti tuuŋŋu dɔ́miń bipikpaaliibi cee

8Kitiŋ gbanti poonee, bipikpaaliibi biba nìn dɔ̄ tisatin ki kpàá bi-piii. 9Unimbɔti tuuŋŋu ŋubɔ nìn cílìń bi-pu, ní ti-Dindaan walifiŋu ŋmíntì ki māntì ki tú-bi ní bi fāŋkì tikpil. 10Ní ntuunee bí-bi yii: «Taa fàŋkìmaan! Dinyɔɔbummɔɔndi din làá mɔ̄ɔkiǹ báà ŋma tikpilee ní m cáań-ni. 11Dinyɔɔbundi gbanti di sá yii díǹ nyeeku nee, bi màl̄-ni Ufiil ubɔ Daafiidi dumpu Beetileem. Úǹ di sá Kriisitoo, ti-Dindaan. 12Min ni làá dūu béé an bikee di sá, ni yaa bàn̄ee, ni làá ká ki dɔ̄ laakin bi ŋáań tiwaŋkuti timoolee, bi dū iŋaabu ki fìn̄-kì.»

13Kpalaayee, ní Unimbɔti tuuŋyi dikitikpaandi diba nyánní yilpu ki dɔ́miń ki kútì ŋun béeyee pu. I nìn kíĺ ki bíi nyɔ́ŋkí Unimbɔti yii:

14«Inyɔŋki sá ki tīī Unimbɔti un bí yilpu fɔ́ŋŋŋee,

ní u-gbansɔŋfiŋu sá ki tīī taapu doo nib bin fáatì-uee.»

Bipikpaaliibi búntì Beetileem

15 Ituunee yíkì ki nín gítí yilpuee, ní bipikpaaliibee sòon̄ yii: «Tí cùmaan Beetileem! See tí ká tin di bāań ní ti-Dindaan yāntì bi dɔ́miń ki tùkū-tee.» 16Niinee ní bi yíkì malaa malaa ki búntì. Bi bàn̄ee, ki ká Maarii nì Jooseefi nì kibiki, kíǹ dɔ̄ laakin bi ŋáań tiwaŋkuti timool tì ŋmóòyee poon. 17Bi ká kibikee, ní ki máafì Unimbɔti tuuŋŋu nín dɔ́miń ki tùkū-bi kibiki gbanti bɔti puee. 18Binib bin kɔkɔ nìn gbìl̄ tin bipikpaaliibee sòoǹee nìn bākatì ní sèeee. 19Ama Maarii úǹ dū an bɔti kɔkɔ ki kpáafì u-pɔbilin ki dàkafī ti-pu. 20Ní bipikpaaliibi fātìi nín gítí bi-pikpaaku laŋki ki nyɔ́ŋkí Unimbɔti ki pàkà-u bi nín gbìl̄ tiŋyee nì tin bi kée pu. Di sá yii ntuunee nín pée tùkū-bi puee, míǹ deedee ní bi ká.

Bi pú kibiki diyindi

21An tú winniiyee, bi gíí kibiki dikpancandi ní ki pú-kì diyindi yii Yeesu, kii Unimbɔti tuuŋŋu nín nìn pée tùkū u-na pu kí wàatī ú nín cáá dipoolee#2.21 Kpèè Akoo 12.3, Luuki 1.31..

Bi cáá Yeesu kunimbɔtidiin

22Ŋyunti ŋun sá bí ŋá Maarii akoobil kii Unimbɔti nín yāntì Mooyiisi ŋmàn̄ marab puee bàn̄ee#2.22 Kpèè Akoo 12.3,6., ní bi yōoǹ kibiki ki cáa cūnnì Jeerusaleem tiŋkin kí cáá-kì kí ŋá ti-Dindaan ŋaan. 23An ŋmàn̄ ti-Dindaan marau poon yii: «Kibiseebiki yaa sá kininjabikee, an sá bí gàntī kíǹ ki-ba kí yóoń ti-Dindaan#2.23 Kpèè Disa 13.2,12. 24ní kí cáá abeenanjipɔmbil ali àá nnanjilimu muli kí ŋá saraa, kii ti-Dindaan nín síiǹ mara puee#2.24 Kpèè Akoo 12.8..»

25Uninja ubɔ nìn bí Jeerusaleem, bi yíì-u Simeeyɔn. U nìn yú deedee ki tɔ́ Unimbɔti ní ki nìn kā ki cí un làá dāan̄ kí fīī Isirayeel yabee. Unimbɔti Fam nìn bí u-cee, 26ní ki nìn tùkū-u yii u làá ká Meesiya ní kí nín kpú. 27Unimbɔti Fam kpōotì Simeeyɔn ki kɔ́ǹ kunimbɔtidiin ŋyunti ŋun Yeesu na nì u-baa cáá-u niin kí ŋá mara nín bālifì miŋyee. 28Simeeyɔn nìn fōō-kì u-ŋaan ki jáam̀ Unimbɔti ki lī yii:

29«M-Dindaan, a nín nìn pōoǹ puee, an ŋá míǹ!

Kɔŋkɔnnee, yàntī a-tɔntɔnliu ń kpú nì ŋgbansɔŋfi,

30kun puee m-nimbil ká Ufiil

31un a bɔ́ntì ki yóoǹ inibool kɔkɔee.

32Úǹ di sá ŋwalifi ŋun làá yàntī atimbul kɔkɔ ń béé-see.

Úǹ di làá tīī a-nibul Isirayeel yab tinyool#2.32 Dūú ŋmàntī nì Yees 42.6, 49.6, 52.10..»

33Niinee, ní Yeesu baa nì u-na bākatì nì tibɔti tin Simeeyɔn bíi sòoǹ bi-biki puee. 34Ní Simeeyɔn mēē Unimbɔti ń bìin̄ bi-pu. U mēē ki dóòyee, ní ki bí Maarii yii: «Kpèè, Unimbɔti lēē kibiki nee. Ki-puee Isirayeel yab tikpil làá lítí ní tikpil mun ń yīkì. Úǹ di làá dāá nīn sá Unimbɔti daaŋku kun binib làá dāá kpákaǹee, 35ki làá dāá bìitī binib tikpil landɔkɔi in bál̀ bi-pɔbiliŋ poonee. Ama sii ubinaati, bi nín làá dāá ŋá-u puee làá dāá kɔ́ kí dóó-si, kii kitàataajiki ní bi dūu sāā a-pɔbilee.»

Unimbɔti bɔnaatiliu Ana

36Unimpu ubɔ mun nìn bí, bi yíì-u Ana. U nìn sá Unimbɔti bɔnaatiliu. Fanuyeel un sá Aseer naantitɔntɔkɔlee bisal dee. U nín mɔ́ǹ ticatee, u ŋá abin aluli ní u-cal kpíì, 37ní u gbíntì míǹ ki sá ukpiipu, kaa ti mɔ́ǹ, ní ki púĺ tikpil ki tin bàn̄ abin imuŋku inaa nì abin anaa. U nìn tūǹ Unimbɔti tundi ŋwiimpu nì kunyeeu ki bōob̀ kinyɔkɔ ki mèé Unimbɔti, kaa sútí kí wàatī kunimbɔtidii. 38Ŋyunti gbanti ní unimpuee bàn̄ ki ŋmāntiǹ-bi kunimbɔtidiin ní ki bíi pàkā Unimbɔti, ní ki sòoǹ kibikee bɔti ki tùkù bin kɔkɔ kā ki cí Unimbɔti ń dāá fīī Jeerusaleem yabee.

Jooseefi nì Maarii nín kùǹ Naasaareeti

39Yeesu baa nì u-na ŋá ti-Dindaan nín yóoǹ mara bí ŋá puee ki dóòyee, ní bi fātìi nín gítí bi-dumpu Naasaareeti, Galiilee tiŋkin. 40Kibikee nìn wīintí ki cíkití ki cáá iciin tikpil, ní Unimbɔti bīī ki-boon.

Yeesu ŋá abin saalaa nì ali ki kɔ́ kunimbɔtidiin

41Dibindi sá kamaayee, Yeesu baa nì u-na cá Jeerusaleem ní ki jīǹ Dilákatil jiŋaaliu. 42Yeesu bàn̄ abin saalaa nì alee, u-baa nì u-na tí cá Jeerusaleem jiŋaal kii mara nín bālifì puee#2.42 Kpèè Disa 12.1-27, Ditee 16.1-8., ní ki kpáaǹ-u. 43Bi jíń jiŋaal ki dóòyee, ní Yeesu úǹ gbíntì niin, ní u-baa nì u-na nín kùnní, kaa nyí yii Yeesu gbíntìń. 44Bi nìn cōom̀ ŋwimmɔn ki dàkafī yii u bí bi-saŋkinjutiibi bin kíǹee cee. Boonee ní bi kíǹ ki bíi nyàab̀-u bi-nabiyaamu nì bi-bɔɔbi cee. 45Baa ká-uee, ní ki nín gítí Jeerusaleem kí nyàab̀-u. 46Winta dalee, ní bi dāa ká-u kunimbɔtidiin, u kā bimaradakaliibi kansikin ki pílifí bi nín sòoǹ puee, ní ki bàlifī-bi tibɔti. 47Bin kɔkɔ nìn bí niin ki pílifée nìn bākatì u nín cáá iciin ki kíikí tibɔti miŋyee. 48U-baa nì u-na bāań ki ká-u niinee, ní bi bākatì, ní u-na bí yii: «M-biki, ba ŋá ní a ŋá-ti mimmee! Man nì a-baa nyàab̄-si, ti-nimbiliŋ mántì.» 49Ní u bí-bi yii: «Ba ŋá ní ni nyàab̄-mi? Naa nyí yii m máaǹ kí nīn bí m-Baa diikunaaa?» 50Ama baa nìn gbìl̄ u nín sòon̄ puee taapu.

51Niinee ní u yíkìi nóó-bi ki nín gítí Naasaareeti, ní ki sīntiǹ u-ba ki tīī-bi. Ní u-na cúú tin kɔkɔ jítì kunimbɔtidiinee ki kpáafì u-pɔbilin. 52Yeesu nìn wīintí ní u-ciiŋyi mun wīintí, ní u nìn mɔ̀tīi fáatíǹ Unimbɔti nì binib#2.52 Dūú ŋmàntī nì 1 Sami 2.26, Alaŋ 3.4..

Currently Selected:

Luc 2: BASSARDC

Highlight

Copy