Jean 4

Yeesu nì Usamaariinimpu ubɔ bɔti

1Yeesu béè yii Fariisab gbìl̄ yii u kíǹ ki fùul̀ binib tikpil Unimbɔti nyim ki jítiǹ Yoowaneesi ní bi kpántí u-boonnooliibee, 2- ama an kaa nìn sá Yeesu u-ba di nìn fùul̀-bi nnyim, an sá u-boonnooliibi di nìn fùul̀-bi. - 3Ní u yíkì Juudee ki nín gítí Galiilee. 4Kí wàatī kí nín bà Galiileeyee, see ú dī Samaarii watil pú. 5Ní u dūu bàn̄ Samaarii tiŋki kin bi yíì Siikaar, kì pìlīǹ Jaakɔb saaku kun u nìn tīī u-jipɔɔn Jooseefee#4.5 Kpèè Diny 33.19, Joos 24.32.. 6Niin ní Jaakɔb lɔkɔu bí. Yeesu cōom̀ ki gīīyee, ki kāl̀ lɔkɔee nyɔɔgbandi pu. An nìn ŋmāntì awinsaan.

7U kēe ní Usamaariinimpu ubɔ dɔ́miń kí lúń nnyim, ní Yeesu bí-u yii: «Pɔ̄-mi nnyim ḿ nyɔ̀.» 8- Di sá yii u-boonnooliibi nìn búntì kitiŋin kí nyàabìń tijin. - 9Ní unimpuee kíí-u yii: «Sii sá Ujuudaja ní, ba pu ní a mèé man un sá Usamaariinimpuee nnyim?» - Di sá yii Juuda yab nì Samaarii yab kaa nìn kpí#4.9 Dūú ŋmàntī nì Luuki 9.52-53.. - 10Ní Yeesu bí-u yii: «A yaa bàà nyí Unimbɔti pɔ̄tam nì man un mèé-si nnyimee, sii gba di bàà làá mèè man nnyim, ní man ń bàà tīī-si nnyim min tìì dimaŋfalee.» 11Ní unimpuee bí-u yii: «Ukpil, aa cáá guuka, lɔkɔ mun di nyóòyee, kin a làá ŋá mana kí kánní nnyim min tìì dimaŋfalee gbanti? 12Ti-naanja Jaakɔb di nìn gbìn̄-ti lɔkɔ nee, ki nyùn̄ u-ba lɔkɔ gbanti nyim, ki kpáaǹ u-biyaamu nì u-waŋkuti. Mimmee, sii dàkafī yii a jítiǹ Jaakɔbaaa?» 13Ní Yeesu fātìi kíí-u yii: «Un sá kamaa yaa nyùn̄ nnyim neeyee, nnyinnyoo làá gíti cúú udaan. 14Ama un yaa nyùn̄ nnyim min man tììyee, nnyinnyoo kaa ti cútí udaan jaanjaan, kun puee nnyim min man tììyee kpántí nnyimbul u-pɔbilin, ní ki kíǹ ki pùub̀ ki tìì-u dimaŋfal din kaa cáá dikúntilee#4.14 Dūú ŋmàntī nì Yees 12.3, Yeer 2.13, 17.13..» 15Ní unimpuee bí-u yii: «Ukpil, yaa sée tīī-mi a-nyim gbanti ḿ nyɔ̀, nnyinnyoo ń taa ti cúú-mi, ḿ taa nín̄ gíti dòoń doo ki lúù nnyim.»

16Ní Yeesu bí-u yii: «Cùú yíiń a-cal kí fàtīí gítiń doo!» 17Ní u kíí-u yii: «Maa cáá cal.» Ní Yeesu bí-u yii: «A cáá nsan kí lì yii saa cáá cal, 18kun puee a mɔ́ǹ bininjab biŋmoo dee ki yíkì, ní un cee a bí kɔŋkɔnnee mun kaa tí sá a-cal. Míǹ puee, a sòon̄ a-baamɔŋyi ní.» 19Ní unimpuee bí yii: «Ukpil, kɔŋkɔnnee m ká yii a baasii sá Unimbɔti bɔnaatiliu ní. 20Di sá ti-naanjab nìn jáaḿ Unimbɔti dijool nee pu ní, ní nimbi Juuda yab bí yii Jeerusaleem ní bi máaǹ kí cùú jāam̀ ti-Baa Unimbɔti.» 21Ní Yeesu bí-u yii: «Unimpuee, á pīlifiǹ-mi! Ŋyunti ŋubɔ dòoń an kaa dāa gíti bàlifī yii unil ń cù dijool nee puɔɔɔ, Jeerusaleem ní kí jāam̀ Unimbɔti. 22Nimbi Samaarii yab, naa nyí kun ni jáaḿee, ama timbee ti nyí un ti jáaḿee, kun puee Unimbɔti dū difiil ki dīń Juuda yab pu ní#4.22 Dūú ŋmàntī nì Yees 2.3, Room 9.3-4.. 23Kɔŋkɔnnee, ŋyunti ŋubɔ dòoń, ŋu bāań gba, ŋun ni ní bin jáaḿ ti-Baa Unimbɔti mmɔntiiminee làá nīn jáaḿ-u nì Ŋfamin nì ibaamɔn. Kun puee bin jáaḿ-u mimmee ní ti-Baa Unimbɔti nyàab̀. 24Unimbɔti sá Ŋfam ní: míǹ puee, bin jáaḿ-uee máaǹ kí jāam̀-u nì ŋfamin nì ibaamɔn.» 25Ní unimpuee bí-u yii: «M nyí yii Meesiya - an dàkà yii Kriisitoo - làá dāan̄. Úǹ yaa láa bāańee, ní u làá tùkù-ti tikɔkɔ.» 26Ní Yeesu bí-u yii: «An sá man un bíi sòoǹ nì si nee di sá Kriisitoo.»

27Niinee ní Yeesu boonnooliibi bāań, ní an ŋá-bi bitii bi nín ká u nì unimpu bíi sòoǹee, ama baa bālifì yii: «A là ba u-cee?» àá «A sòoǹ nì u tilati?» 28Niinee ní unimpuee yāntì u-nyimbool ki fātìi nín gítí kitiŋin ki tùkū binib yii: 29«Dāá kpèèmaan uninja ubɔ bīitì m-bɔɔŋŋi pu! An kaa kalin sá Meesiya?» 30Ní bi yíkìń kitiŋin ki nín dòoń Yeesu cee.

31Unimpuee búntèe, ní u-boonnooliibi bíi lì yii: «Ukpil, dāá jī tijin!» 32Ní u bí-bi yii: «Man cáá tijin tin nimbi kaa nyée.» 33Niinee ní u-boonnooliibi kíǹ ki bíi bàlifī tɔb yii: «Ubɔ kalin cáań-u tijin níii?» 34Ní Yeesu bí-bi yii: «M-jinti di sá ḿ ŋá un túnní-mee nín là puee, kí tɔ̄ u-tundi. 35Kéè, ni cáá yii an kíǹ iŋmal inaa dee, kudiceeuaa! Ama man tùkù-ni yii ní wáaǹ kí kpèè, tijin kūń ki ŋmāntì dical. 36Kii un cēēyee nín kōontí ki kpáfí ki fòol̄ u-paati puee, míǹ mbaantiim ni mun cáaḿmaan binib m-cee ḿ tīī-bi dimaŋfal din kaa cáá dikúntilee. Ní án mɔ̄ɔkiǹ un búĺee nì un cáńee kɔkɔ. 37Kun puee dilaŋkpandi din lì yii: <Ubɔ būul̀ ní ubɔ ń dāá cēe> sá tiŋman ní. 38Míǹ puee, m tú-ni ní cùú cā laakin biba búĺee ní, nimbi ń páatí bíǹ gìńdi pu.»

39Unimpuee nín tùkū-bi yii Yeesu bīitì u-bɔɔŋŋi puee, ní Samaarii yab bin kóò kitiŋ gbantinee tikpil fōō Yeesu ki kíí. 40Samaarii yab gbanti nín dāa bāań ki ká-uee, ní bi mēē-u yii ú kàl̄ bi-cee, ní u lafun kāl̀ iwiin ili. 41Binib tikpil nìn gíti fōō-u ki kíí tin u nìn sòon̄ nì bee pu. 42Ní binibee lī unimpuee yii: «Ti nín fōō ki kíí nee, an kaa ti sá sii nín lī puee ŋmaniŋma pu. U sòon̄ ti mun ti-ba gbìl̄ ki béè yii, ibaamɔn, u sá duulinya kɔkɔ Fiiliu.»

Yeesu cáaǹ ukàlinjakpaan ubɔ biki

43Iwiin ili gbanti boonee, Yeesu yíkì niin ki nín cá Galiilee. 44Kun puee úǹ u-ba nìn lī yii: «Unimbɔti bɔnaatiliu dumpu yab kaa tɔ́-u#4.44 Kpèè Maat 13.57, Maar 6.4, Luuki 4.24..» 45U nín bàn̄ Galiileeyee, niin yab fōō-u tiŋan, kun puee bi nìn cūtì Jeerusaleem ki ká u nín nìn ŋá tin kɔkɔ jiŋaalinee.

46Ní u fātìi gítì Kana, Galiilee timbiliiki, laakin u nìn dū nnyim ki kpántì ndaamee. Gɔmina kàlinjakpaaŋwu ubɔ nìn bí Kapeernayum u-jipɔɔn būǹ. 47U nín gbìl̄ yii Yeesu nyánní Juudee ki dɔ́miń Galiileeyee, ní u dɔ́miń u-cee ki gbāam̀-u ú cù Kapeernayum kí cáaǹ u-jipɔɔn un būǹ ki làá kpúee. 48Ní Yeesu bí-u yii: «Ni yaa kaa ká maamaacib nì tidaandi, naa fòol̄ kí kíí!» 49Ní ukàlinjakpaanee bí-u yii: «Ukpil, dāan̄ tí cù malaa, m-biki ń taa kpú!» 50Ní Yeesu kíí-u yii: «Nín̄ cá, a-jipɔɔn pɔ́ɔkì.» Uninjee fōō Yeesu nín lī puee ní ki nín cá. 51U bí nsanni ki fàtīi kùǹee, ní u-tɔntɔnliibi biba túŋkìń-u ki tùkū-u yii: «A-jipɔɔn pɔ́ɔkì.» 52Ní u bālifì-bi yii: «Ŋyunti ŋulɔŋu ní an yāntì-u?» Ní bi kíí-u yii: «Fool, wiŋkpooti kukúluu kubɔ, ní an cāntì-u, u-wunti kaa ti tùm̀.» 53Niinee ní u béè yii kukúluu gbanti deedee ní Yeesu tùkū-u yii: «A-jipɔɔn pɔ́ɔkì». Ní u nì u-dicaŋku kɔkɔ fōō Yeesu ki kíí#4.53 Dūú ŋmàntī nì Atuun 11.14, 16.14-15,31.. 54Yeesu nín yíkì Juudee ki fātì Galiileeyee, maamaacililiiti un u ŋée dee.

Currently Selected:

Jean 4: BASSARDC

Highlight

Copy