Jean 5

Yeesu cáaǹ ufaliŋfaan ubɔ

1Boonee ní Yeesu nín jɔ́ḿ Jeerusaleem kun puee Juuda yab nìn cáá jiŋaal ubɔ. 2Dinyimbɔbil diba nìn bí Jeerusaleem, kadantikub biŋmoo māntìi tú-dì, bi yíì-dì eebru sooŋyin yii Beeteesda, di bí ki nákáǹ kipunyɔkɔ kin bi yíì ipii punyɔkɔkee. 3Bijɔfub nì bideembi nì bifaliŋfaambi nì bibunliibi tikpil nìn dɔ̄ kadantikub taapu. [Bi nìn cí ŋyunti ŋun Unimbɔti tuuŋŋu làá dāan̄ kí gbàtī nnyimee. 4Di sá ntuunee nìn dòoń ŋyunti ŋyunti ki gbàtī nnyim. Ŋu yaa gbātì míǹ, ní un yaa péé péé ki kɔ́ee kāntí dicáaǹdi, báà an yaa yāntì ki sá iween iŋyee#5.4 Tibɔti tin kā tinaabakal [ ] poonee kaa bí tigbɔŋkpikil tikpil poon..] 5Uninja ubɔ nìn bí niin ki būǹ doooo abin ali kpá imuŋku ili. 6Yeesu ká u dɔ̄ee, ní ki béè yii u būǹee an yúntì, ní u bālifì-u yii: «A là kí pɔ̄ɔkàaa?» 7Ní ubunlee kíí-u yii: «Ukpil, bi yaa gbātì nnyimee, maa cáá ubɔ ń yòon̄-mi kí tɔ̄ niin. Ŋyunti ŋun m bíi pɔ̄ɔntí ki cée ní ubɔ ń péeǹ-mi kí cùú jēetí.» 8Niinee ní Yeesu bí-u yii: «Yīkìí yūĺ kí yòon̄ a-kampeeku kí còom̀!» 9Kpalaa niinee ní uninjee pɔ́ɔkì ki yōoǹ u-kampeeku ki kíǹ ki bíi còom̄. An nìn sá ŋwiŋŋuŋfikaa dal ní. 10Míǹ pu ní Juuda yab kpilib nìn bí uninja un ká dicáaǹdee yii: «Díǹ di sá ŋwiŋŋuŋfikaa dal. Aa cáá nsan kí bùkun̄ a-kampeeku#5.10 Dūú ŋmàntī nì Yeer 17.21, Neey 13.19..» 11Ní u kíí-bi yii: «Un cáaǹ-mee di bí-mi yii ḿ yòon̄ m-kampeeku kí nīn còom̄.» 12Ní bi bālifì-u yii: «Ŋma di bí-si yii á yòon̄ a-kampeeku kí nīn còom̄aaa?» 13Uninjee kaa nìn nyí un di cáaǹ-uee, di sá yii Yeesu nìn nyáń kunipaau kansikin ki búntì.

14Boonee ní Yeesu dāa ká uninjee kunimbɔtidiin ní ki bí-u yii: «A nín pɔ́ɔkì pu nee, á taa ti ŋá ikpiti, án nín làá ŋá pu tiba ń taa láa gíti bàń-si kí jītíǹ tin bí neeyee!» 15Niinee, uninjee cūtìi tùkū Juuda yab kpilib yii an sá Yeesu di cáaǹ-u. 16Míǹ pu ní Juuda yab nìn nyáń Yeesu pu u nín ŋá míǹ ŋwiŋŋuŋfikaa dalee pu. 17Ní Yeesu kíí-bi yii: «M-Baa tūǹ ditundi baabadal, míǹ ní ma mun tūǹ.» 18Tibɔti tin u lēe puee, Juuda yab kpilib mɔ̄tìi bíi nyàab̀ kí kpɔ̀-u. An kaa sá u nín yīntì mara un sá bí taa tɔ̄ ditundi ŋwiŋŋuŋfikaayee ŋmaniŋma pu, an sá u nín lī yii Unimbɔti di sá u-Baayee, ki cáá u-ba ki ŋmàntīǹ Unimbɔtee pu.

Unimbɔti Jipɔɔn pɔŋŋu

19Niinee ní Yeesu bí-bi yii: «Ibaamɔn, ibaamɔn ní m sòoǹ nì ni, tin Ubaati ŋáańee ní u-Jipɔɔn kāntí ki ŋáań. An yaa sá fám, waa ŋūǹ kí ŋá tiba u-ba pu. Tin kɔkɔ Ubaati ŋáańee, u-Jipɔɔn mun ŋáań míǹ mbaantiim ní. 20Kun puee Ubaati néeń u-Jipɔɔn, ní ki dàkà-u tin kɔkɔwoooo u ŋáańee. U làá dāá gíti dàkà-u tin jítiǹ tin bí neeyee gba, án làá ŋá-ni maamaaci. 21Kii Ubaati nín fìkitī bitaŋkpiibi ki tìì-bi dimaŋfal puee, míǹ mbaantiim ní u-Jipɔɔn mun tìì un un u yaa lèe dimaŋfal. 22Ubaati kaa sòoǹ báà ubɔ bɔti. U dū ibɔsoon kɔkɔ ki ŋá u-Jipɔɔn ŋaan ní, 23án nín làá ŋá pu binib kɔkɔ ń nīn tìì-u jilma kii bi nín tìì Ubaati puee. Un kaa tīī Ubaati Jipɔɔn jilmee kaa tīī Ubaati un túnní-uee mun jilma dee.

24«Ibaamɔn, ibaamɔn ní m tùkù-ni, un yaa pílifì m-bɔti ki fōō un túnní-mee ki kííyee kāntí dimaŋfal din kaa cáá dikúntilee. Udaan kaa dāa gíti bí ibɔsoon ni, u nyáń ŋkúmin ki póotì dimaŋfalin. 25Ibaamɔn, ibaamɔn ní m tùkù-ni, ŋyunti ŋubɔ dòoń, ŋu bāań gba, ŋun ni bitaŋkpiibi làá gbìl̄ Unimbɔti Jipɔɔn neenee, ní bin yaa láa gbìl̄ u-neen gbantee dāa kāntí dimaŋfal. 26Ubaati nín cáá mpɔn kí tīī dimaŋfal puee, míǹ ní u tīī u-Jipɔɔn mpɔn u mun ń nīn tìì dimaŋfal, 27ní ki tīī-u mpɔn ú nīn sá ubɔsoonli kun puee u sá Kinibiki. 28Tin bí nee kɔkɔ ń taa bàkatīǹ-ni, kun puee ŋyunti ŋubɔ dòoń ní bin kɔkɔ dɔ̄ akaakul poonee làá dāá gbìl̄ u-neen pu 29kí nyānní. Bin yaa ŋá tiŋanee ń fìkitī kí ká dimaŋfal, ní bin yaa ŋá ikpitee ń fìkitī kí kɔ́ ibɔsoon ni#5.29 Kpèè Dani 12.2.. 30Maa ŋūǹ kí ŋá tiba m-ba. M-bɔsooŋyi nóó nì un túnní-mee nín tùkù-mi puee ní. M sòoǹ tibɔti deedee kun puee maa nyàab̀ kí ŋá min man m-ba lèe, see un túnní-mee nín là puee.

Unimbɔti di lèekī Yeesu pu seera

31M yaa sòon̄ tiba m-ba pu, an kaa ŋūǹ kí dàkà ibaamɔn, 32ama ubɔ di lèekī m-pu seera, ní m nyí yii tin u sòoǹ m-puee sá ibaamɔn. 33Ni nìn tú binib Yoowaneesi cee ní u sòon̄-ni ibaamɔn m-pu. 34Kun pu m lì mimmee di sá m là ní ká difiil, an yaa sá fám, maa nyàab̀ ubɔ ń lēē m-pu seera. 35Yoowaneesi nìn sá fitila ní ki ŋmíntí nyáka nyaka, ní ni nìn kíí ki nóó u-walifiŋu gbanti ŋyunti ŋubɔ poon, ní an mɔ̄ǹ-ni. 36Ama m cáá kun lèekī m-pu seera ki jítiǹ Yoowaneesee: di sá yii atuun ŋin m-Baa tīī-mi ḿ tɔ̄ m bíi tūnnèe sòoǹ ki dàkà m-pu yii m-Baa di lafun túnní-mi. 37Ní m-Baa un túnní-mee mun u-ba lèekī seera m-pu. Naa láá pée gbìl̄ u-neen pu dalba, kaa láá ká u-nimbiin dalba, 38kaa kpáafí u-bɔti mun ni-ni, kun puee naa fōō un u túnnée ki kíí. 39Ni bífí Unimbɔti gbɔŋku poon ki dàkafī yii niin ní ni ŋūǹ kí ká dimaŋfal din kaa cáá dikúntilee. An sá man pu ní kugbɔŋuee sòoǹ, 40ama naa là kí dāan̄ man cee kí ká dimaŋfal.

41«Man kaa nyàab̀ binib pampakaku, 42di sá yii m nyí-ni, naa cáá Unimbɔti neendi ni-ni. 43M-Baa di túnní-mi, ní naa là kí fōō-mi, ama bin dòoń bi-ba puee, ni fòol̄ bíǹ. 44Mana ní ni ŋūǹ kí fōō kí kíí, nimbi bin néeń ni-jutiibi ń nīn pàkà-nee, kaa nyàab̀ kupampakau kun Unimbɔtibaanti tììyee? 45Ní taa dàkafì yii man làá dāá bàlifì-ni tibɔti m-Baa nimbiin. An sá Mooyiisi di làá dāá bàlifì-ni tibɔti#5.45 Dūú ŋmàntī nì Ditee 31.26-27., úǹ un pu ni dū ni-mákal ki ŋée. 46Ni yaa bàà fōō Mooyiisi ki kííyee, ni bàà tí fòol̄ ma mun ní kí kíí, di sá yii man bɔti ní Mooyiisi nìn ŋmàn̄#5.46 Dūú ŋmàntī nì Ditee 18.15.. 47Ni nín kaa fōō tin Mooyiisi nìn ŋmàn̄ee ki kííyee, ni làá ŋá mana kí fōō man bɔti kí kíí?»

Currently Selected:

Jean 5: BASSARDC

Highlight

Copy