Genèse 37

JOOSEEFI (37–50)

Jooseefi damintiiti

1Jaakɔb nìn kóò Kanaan tiŋkin laakin u-baa nìn kāl̀ee ní. 2Jaakɔb jipɔmbi bɔti sèé. Jooseefi nìn cáá abin saalku nì ali ní u nì u-mambi kpàá ipii. Jooseefi nìn tāatí u-baa nimpoobi Biila nì Siilpa jipɔmbi ki cá kupikpaau ní ki nìn cāabìń tin bi ŋáań an kaa ŋān̄ee ki tùkù bi-baa. 3Bi-baa Isirayeel nìn néeń Jooseefi ki jítiǹ u-jipɔmbi bin kíǹee kɔkɔ, kun puee u nìn màl̄-u u-tikpiti poon ní. U nìn ŋáĺ-u dibɔkutimɔntiil diba. 4U-mambi nín dáań ki ká yii bi-baa néeń-u ki jítiǹ bíǹ kɔkɔee ní bi kíǹ ki ná-u kaa ti sòoǹ nì u an mɔ̄.

5Dalbee Jooseefi dámintì kudamintiiu kubɔ ní ki dūu máafì u-mambi. Niin ní kináŋ mɔ̄tìi nín pɔ́ɔkì. 6U tùkū-bi yii: «Ní pīlifìmaan kudamintiiu kun m dámintèe! 7M dámintì yii ti bí kusaau ki bōob̀ amɔpin, ní man yal yáatìi yúl̀, ní nimbi mɔpiŋŋi māntìi tú man mɔpindi ní ki lítì di-taapu.» 8Niinee ní u-mambi kíí-u yii: «Mimmee a dàkafī yii sii di làá nīn sá ti-bɔtiu deeyaaa, àá sii di làá nīn sá ti-kpiliu ní timbi ń nīn bí sii taapu ní?» U-damintiiku gbanti nì u nín sòon̄ puee yāntì bi-náŋki mɔ̄tìi wíiǹ u-pu.

9Boonee ní u gíti dámintì ní ki tí dūu máafì u-mambi yii: «M tí dámintì kudamintiiu kubɔ. M dámintì yii ŋwìiń nì uŋmal nì iŋmalbijaa saalaa nì ubɔ dòoń ki gbàantí m-nimbiin.» 10Ní u dūu lī u-baa nì u-mambi cee, ní u-baa bíi wòoǹ-u yii: «Ba damintiiku kúǹ dee! Mimmee man nì a-na nì a-mambi làá dāá gbàan̄ sii nimbiinaaa?» 11Ní u-mambi mɔ̄tìi díkí u-pu#37.11 Dūú ŋmàntī nì Atuun 7.9., ama u-baa úǹ dū an bɔtee ki ŋá u-taalin.

Jooseefi mambi dū-u ki nyáfì

12Dalbee ní Jooseefi mambi búntì Siikeem tiŋkin kí kpàà bi-baa piii. 13Ní Isirayeel bí Jooseefi yii: «Kéè a-mambi bíń Siikeem ki kpàá ipiiyaa! Dāan̄ ḿ tɔ̄-si bi-cee.» Ní u kíí u-baa yii: «Too, m sɔ̀.» 14Ní u-baa bí-u yii: «Á cù kí kpèè yii a-mambi pɔ̄ɔ̄ɔɔ, bi-waŋkuti mun bí mana, kí gítiń kí tùkù-mi.»

Eebrɔn tantakalin ní bi nìn bí ní Jooseefi baa tú-u ní u yíkìi búntì Siikeem tiŋkin u-mambi cee. 15U búntèe ní ki bàn̄ ki tú ki yìiǹ tisatin ní uninja ubɔ dāa ká-u ní ki bālifì-u yii: «A nyàab̀ ba?» 16Ní u kíí-u yii: «M nyàab̀ m-mambi ní. M gbāam̀-si, a yaa nyí laakin bi bí ki kpàá bi-waŋkutee, á dàkà-mi.» 17Ní uninjee bí-u yii: «Bi yíkì doo, di sá yaadalee m nìn gbìl̄ bi bíi lì yii: <Tí yīkìmaan doo kí nīn cá Dootan.>» Ní Jooseefi nín jì bi-boon Dootan ní ki tin ká-bi niin.

18Bi nín ká-u u páaǹní ndan kaa láá bāań-bee, ní bi sòon̄ ki bɔ́ntì yii bí kpɔ̀-u. 19Bi nìn tùkù ki nàatī tɔb yii: «Kpèè tidamintiil daanee di dòońee. 20Tí cúúmaan-u kí kpɔ̀ kí dūú tɔ̄ dilɔkɔgindi diba poon ní kí lì yii upeecuncuti ubɔ di cúú-u ki ŋmɔ́. Ti yaa ŋá mimmee, tí kpèè u-damintiitee nín làá kúntí nì miŋyee.» 21Rubeen gbìl̄ míǹ ki là kí fīī-u bi-ŋaanee ní ki lī yii: «Tí taa lēē u-maŋfal.» 22U nìn bí-bi yii: «Ní taa kpɔ̀maan-u, ní dū-u kí tɔ̄ dilɔkɔgindi din bí kuteeun nee poon kí taa ŋá-u tiba.» U lī míǹ ki là yii bi yaa dū-u ki tɔ́ dilɔkɔgindinee, boonee úǹ ń dāá ŋá soooo kí nyāntí-u kí cáá-u kí kpìnnì kí tin tīī u-baa.

23Ŋyunti ŋun Jooseefi bāań bi-ceeyee ní bi pēetì-u u-bɔkutimɔntiil din u pēēyee. 24Bi nìn cúú-u ki dūu tɔ́ dilɔkɔgindin. Dilɔkɔgindi gbanti nìn kūń ní, nnyim nìn kpá di-poon. 25Bi ŋá mimmee ní ki cūtìi kāl̀ ki bíi jīǹ tijin. Bi dāa kpēēyee, Isimaayeel naakookun yab di páń tɔb pu ki nyánní Galaadi tiŋkinee. Bi-gutaamui nìn tú ikpafi nì talaalub ní bi nìn cáa cáǹ Eejipiti kí nyāfì. 26Ní Juuda bí u-nabiyaamu yii: «Ti yaa bál̀ ki kūū ti-naalee, ba ní ti páatì poon? 27Tí dū-u kí nyāfiǹ Isimaayeel yab kí taa kpɔ̀-u, kun puee u sá ti-nabiki, ní ti sá fatikubaanti.» Ní u-nabiyaamu gbìl̄ ki tīī nì u. 28Madiyan nyampoobi jītée ní bi nyántìń Jooseefi dilɔkɔgindi poon ní ki dū-u ki nyáfiǹ Isimaayeel yab#37.28 Bibɔ 8.22-24 dàkà-ti yii Madiyan yab nì Isimaayeel yab sá binibaantiibi ní.. Bi nìn nyáfì-u animbil jitɔmbi mmuŋku ní, ní bíǹ cáá-u ki búntì Eejipiti. 29Ŋyunti ŋun Rubeen dāa cūtì kí nyāntí Jooseefi dilɔkɔgindinee, u bàn̄ee u kpá, ní an wùn̄-u tikpil ní u dáaĺ tiwan tin u pēēyee ki cátì. 30Ní u nín fàtī u-naalib cee ní ki bí-bi yii: «Jooseefi gíti kpá dilɔkɔgindin! Kin man làá ŋá m-ba la?»

31Niinee ní bi kūū uŋɔja ní ki dū Jooseefi bɔkutil ki tɔ́ fatikun. 32Bi nìn dū dibɔkutimɔntiilee ki nākaǹ bí cáá tīī bi-baa kí lì yii: «Kpèè kun ti píińee, kpèè tiŋan yii an sá a-jipɔɔn bɔkutilaaa, an kaa sá?» 33Bi-baa fōō ki kpēē ki béè dibɔkutilee ní ki fáá mbiil yii: «M-biki Jooseefi bɔkutil dee! Upeecuncuti ubɔ cúú m-biki ki ŋmɔ́, Jooseefi ní an lafun cúú ki tɔ̄ntì!» 34Niinee ní Jaakɔb dáaĺ tiwan tin u pēēyee ki cátì ki dū kutuku ki gbìn̄ u-caŋ#37.34 dáaĺ ki cátì... kutuku ki gbìn̄: taapu di sá ú dàkà u-nimbaaku., ní ki dū iwiin kupaau ki súń u-biki kpool. 35U-jipɔmbi nì u-bisalib kɔkɔ nìn pɔ́ɔǹ kí ŋméeǹ-u, ama ní waa kíí bí ŋméeǹ-u, ní ki lì yii: «M làá nīn pée sūǹ m-jipɔɔn kpool míǹ ní kí dāá kpú kí bà-u ditaŋkpiilin.» Míǹ ní Jooseefi baa lafun súń u-pu.

36Ŋyunti gbantee Madiyan yab bíǹ dūu bàn̄ Eejipiti ní ki mun nìkī Jooseefi ki nyáfiǹ Pootifaar, ujanjakpil un cí Faaroo#37.36 Faaroo taapu di sá Eejipiti bɔtikpaaŋwu. cindee.

Currently Selected:

Genèse 37: BASSARDC

Highlight

Copy