Genèse 35

Jaakɔb yíkì Siikeem tiŋkin ki búntì Beeteel

1Dalbee ní Unimbɔti bí Jaakɔb yii: «Yīkì doo kí nīn jɔ́ḿ Beeteel kí cùú nīn kóò niin. Á mā nsaraafan laakin m nìn nyántì m-ba ki dàkā-si ŋyunti ŋun a nìn sáń a-maan Eesayuuyee.»

2Ní Jaakɔb bí u-dicaŋku yab nì bin kɔkɔ bí u-ceeyee yii: «Nyāntímaan awaa ŋin bí ni-ceeyee, kí ŋá ni-ba circir kí kpántí ni-wampeeŋkaati. 3Tí yīkìmaan kí cù Beeteel. Ti yaa bàn̄ niinee, m làá mā nsaraafan kí tīī Unimbɔti un un fōō m-wimmeem ŋyunti ŋun m nìn bí dinimbinaamandi poon ní ki céeǹ-mi m-saŋkiŋŋi kɔkɔ poonee.» 4Niinee ní bi nyántì awaa ŋin bí bi-ceeyee, ki túutì bi-falfatib ki tīī Jaakɔb ní u cáa gbìn̄ ki síb́ teereebinti#35.4 Teereebinti sá buwaasubu ní Kanaan tiŋkin kii ti mun cee ditul nín sá puee ní. subu bun yú ki pìlīǹ Siikeem tiŋkee taapu. 5Bi yíkèe ní Unimbɔti yāntì dinyoondi kɔ́ ntimu mun kɔkɔ māntì ki tú-bee, ní báà ubɔ kaa mākaǹ kí jà bi-boon.

6Ní Jaakɔb nì u-nipaaku dūu bàn̄ Luusi, an dàkà yii Beeteel, Kanaan tiŋkin. 7Ní u máń nsaraafan ní ki pú niin diyindi yii Eel-Beeteel, taapu di sá yii: <Beeteel Nimbɔtiu>, kun puee niin ní Unimbɔti nìn nyántì u-ba ki dàkā-u ŋyunti ŋun u nìn sáń u-maan Eesayuuyee.

8Niin ní Deeboora un nìn lōō Reebeekee kpíì ní bi síb́-u seeni#35.8 seeni mun sá buwaasubu Kanaan tiŋkin kii teereebintee ní. subu bun yú ki pìlīǹ Beeteelee taapu. Ní Jaakɔb pú busubu gbanti diyindi yii <Nsiim subu.>

9Jaakɔb nín nyáń Padan-Aram ki bàn̄ Beeteelee, Unimbɔti nìn gíti nyántì u-ba ki dàkā-u ní ki bīiǹ u-boon. 10Ní Unimbɔti bí-u yii: «Bi yíì-si Jaakɔb ní, ama baa làá nīn gíti yíì-si míǹ. Bi làá nīn kíǹ ki yíì-si yii Isirayeel ní.» Di sá Unimbɔti pú-u diyindi yii Isirayeel. 11Ní Unimbɔti gíti bí-u yii: «Man di sá Unimbɔti Mpɔŋkɔdaan. M làá bùtī a-maaliŋu tikpil tikpil. Sii maaliŋu poon ní atimbun làá nyā. A-maaliŋu poon ní bibɔtiibi làá nyā. 12Kitiŋ kin m nìn tīī Abraam nì Isaakee, m làá dū-kì kí tīī sii nì a-naantiibi bin làá páanní boonee.»

13Unimbɔti sòon̄ nì u míǹ ki dóòyee ní ki yíkì niin ki nín jɔ́ḿ. 14Ní Jaakɔb dū ditaŋkpal ki cóoǹ laakin Unimbɔti sòon̄ nì uee, ní ki dū ndamam nì ŋkpam ki fá di-pu án nīn sá kudaaŋŋu. 15Ní Jaakɔb pú mpaan ŋun pu Unimbɔti nìn sòon̄ nì uee yii Beeteel.

Beenjameen màaltam nì u-na Raseel kúm

16Jaakɔb nì u-dicaŋku yíkì Beeteel. Bi cá ki tóob́ Eefiraata tiŋkee ní Raseel màl̄. U-maaliŋu gbanti nìn pɔ́ɔkì tikpil. 17Ŋyunti ŋun u bíi yáliŋkí imatiŋween ki làá màal̀ee ní umatimmaanli bí-u yii: «Pɔ́ɔǹ a-ba, kibininjabiki ní a làá gíti màal̀.» 18Ŋyunti ŋun u bíi dátí u-ba kí sìntēe ní u pú kibiki kin u màl̄ee diyindi yii Been-Oonii, taapu di sá yii: <M-falaau biki.> Ama ní ki-baa yíiń-kì yii Beenjameen, taapu di sá yii: <M-ŋaŋgiil pu biki#35.18 ŋŋaŋgiil pu biki taapu sá yii diyimɔɔl biki..> 19Raseel kpíìyee ní bi síb́-u Eefiraata dandi kpaanceetiŋu. Kitiŋ gbanti ní bi gíti yíì yii Beetileem. 20Ní Jaakɔb dū ditaŋkpal ki cóoǹ dikaakul pu án nīn sá Raseel kaakul daaŋku. Di bí ki dāa sāā díǹ.

21Isirayeel yíkì niinee ní ki cūtìi gāā u-tantib Miigidaal-Eedeer tiŋki nyɔkɔpu. 22Ŋyunti ŋun Isirayeel nìn kóò kitiŋ gbantinee ní u-jipɔɔn Rubeen dōoǹ nì u-nimpuwaaki Biila, ní u-baa gbìl̄.

Jaakɔb jipɔmbi nìn sá saalaa nì bili ní. 23Leeya jipɔmbi di sá Rubeen un sá Jaakɔb jipɔŋkpiliuee, nì Simeeyɔn nì Leefii nì Juuda nì Isakaar nì Sabulɔn. 24Ní Raseel jipɔmbi sá Jooseefi nì Beenjameen. 25Raseel yumbusapɔɔŋwu Biila jipɔmbi di sá Daani nì Neefitalii. 26Ní Leeya yumbusapɔɔŋwu Siilpa jipɔmbi sá Gaadi nì Aseer. Jaakɔb jipɔmbi bin u nìn màl̄ Padan-Aram tiŋkinee dee.

27Jaakɔb nìn bàn̄ u-baa Isaaki cee Mamiree, Kiiriyati-Ariba tiŋkin. Niin ní bi gíti yíì yii Eebrɔn. Abraam nì Isaaki nìn kāl̀ kitiŋ gbantin. 28Isaaki biŋŋi ŋin u ŋá ki nín kpíìyee sá abin dilaataal nì imuŋku inaa. 29U nìn púĺ ki kāl̀ ki bál̀ ní ki nín kpíì ki cūtìi ŋàl̄ u-naanjab. Ní u-jipɔmbi Eesayuu nì Jaakɔb síb́-u.

Currently Selected:

Genèse 35: BASSARDC

Highlight

Copy