2 Maccabées 9
9
Antiyookuusi Eepiifaani lítì iween pu
(1 Maka 6.1-17, 2 Maka 1.11-17)
1Ŋyunti gbantee ubɔti Antiyookuusi nyánní Peersi ki fātìń nì tinyool fiii. 2Di sá yii u nìn kɔ́ Peerseepooliisi tiŋkin ki mākaǹ kí fūkul̀ tiwan tin bí kunimbɔtidiin niinee kí kpáàa já kí fōō kitiŋee. Ama niin nib kaa nìn kíí bi-ba pu ní ki yōoǹ tijanjawan ki jáń ki jìn̄-u. An dāa kúntèe, u sáǹ ní ki nín gítiń nì icoo gbòooo. 3U bāań Eekibataanee ní ki gbìl̄ tin jítì Niikanɔɔr nì Tiimootee janjaliibi puee. 4Niinee ní u fōō diŋuul ŋkpitim pu. U nìn lēē yii u làá dū tin Peersi yab ŋá ki yāntì u sáǹee kí nyìntī Juuda yab pu. An pu ní u nìn tīī un ŋàal̀ u-tɔrɔkuuee mara yii ú nīn pée cá kí taa yūĺ áli kí tin bà laakin bi cée. U-lambilee ní u bí yii: «M yaa bàn̄ Jeerusaleem tiŋkinee, m làá yàntī kitiŋee ń kpántí Juuda yab ceeku ní.»
Ama waa nyí yii Unimbɔti bɔ́ntì kí sòoǹ u-bɔti. 5U bíi sòoǹ u-nyɔkɔ kaa láá ŋmíl̀ ní ti-Dindaan un wāĺ tikɔkɔee, Isirayeel yab Nimbɔtiu dū kuweeŋkpiiu kun baa wāĺ kaa ŋūǹ kí cáaǹee ki tɔ́ u-pu. Ipɔŋween in pɔ̄ɔ̄ ki múkù ina kaa gbèentée di nìn cúú-u. 6Falaabi gbanti māaǹ-u, di sá yii úǹ u-ba túń atuun ŋin kaa bím̀ee ki yāntì binib nai nìn múkù. 7Nì míǹ kɔkɔee, u-lambil kaa nìn bātì báà fiii. U nìn gbíntìi dáá máká u-ba pu ní ki nìn díkí Juuda yab pu diŋuul, ní ki tīī un ŋàal̀-uee mara ú cù malaa. Ama dicilpu dicilpu niin ní u nyáń u-tɔrɔkuu un nìn bíi sáń malaa malaayee poon ki lítì. U nìn lítì mpɔn, an puee u-ŋalii nì u-taaŋi kɔkɔ nìn kɔ́fì kɔ́fì.
8Kí wàatī míǹ ń ŋée, u nìn máká u-ba pu, ní ki nìn dàkafī yii u jítiǹ báà ŋma. U nìn dàkafī yii u ŋūǹ kí tīī tinyiŋgban mara ní ki ŋūǹ kí dū ajoofɔkɔ kí páań saniya pu kí ŋmàntī! Kɔŋkɔnnee, úǹ di dɔ̄ kitiŋ, ní an sá bí yòon̄-u kilambaŋ kin bi ŋúb̀ee puee. Niin dàkà un sá kamaa yii an sá Unimbɔti pɔŋŋu. 9Unikpiti gbanti nìn dáá bí dimaŋfalin, ama u nìn bíi jīǹ falaa tikpil. U-wunnanti nìn tìfī u-wunti pu ki lítí ní akoosibil gbí u-nimbiliŋin ki cáá nyìki nyiki. U-wunti tin nìn sūūyee nìn núù ki kóò u-janjaliibi kɔkɔ. 10Kí wàatī tibɔti gbantee ń bàńee, ubɔti nìn dàkafī yii u làá ŋmā kí jɔ̄m̀ kí tūū iŋmalbijaa in bí kutaa puee. Kɔŋkɔnnee, ubɔ kaa ti ŋūǹ kí yòon̄-u, di sá yii u nìn gíti núù an jítì mara pu.
11An nìn nāaǹ Antiyookuusi ní dúsi dusi. Unimbɔti nìn fáá-u, ní u dɔ̄ ki jīǹ falaa tikpil an kaa kúntí. Niinee ní u kíĺ ki bíi féeń u-lambikpaandi ki bíi béetí tin poon u bée. 12Úǹ u-ba kaa nìn gíti ŋūǹ kí tíkí u-nunnuŋu. Niinee ní u bí yii: «An ŋān̄ unil ń nīn tɔ́ Unimbɔti. Nisaaleen ń taa dū u-ba kí ŋmàntīǹ Unimbɔti.» 13Unikpiti gbanti nìn kíĺ ki bíi mèé ti-Dindaan, ama úǹ kaa nìn gíti ŋūǹ kí sɔ̄ u-saai. 14Antiyookuusi nìn pōoǹ ki lī yii: «M nìn bíi ŋáań malaa malaa kí cùú nàan̄ circir tiŋki nee kí dū-kì kí kpántí kuceeu. Ama kɔŋkɔnnee m pú kinyɔkɔ yii kì kíǹ ki bí ki-ba pu. 15M nìn lēē yii m làá dū Juuda yab nì bi-biyaamu nikpiliŋ kí tīī ipeecuncuti nì kaajiikub ní. Di sá yii man ceeyee, baa máaǹ kí síb́-bi dikaakulin. Kɔŋkɔnnee, m là yii Juuda yab ń nīn cáá nsan kí ŋá tikɔkɔ kii Ateeni yabee. 16Dooooyee m nìn kɔ́ kunimbɔtidiin ki fúkúl̀ tiwan. Ama kɔŋkɔnnee, m làá dū saraamɔntiibi ní kí nyāantì-ku. Saraa sambiliŋ ŋin bi nìn yōoǹee, m làá tīī ŋin jítiǹ mimmee bí dūú téeǹ. Mama m-ba nimbiliŋ ní m làá dūú dā tiwan bí dūú ŋá saraabi. 17Kí kūtèe, m làá kpántí ujuudaja ní kí cù ntimu mun kɔkɔ poon binib bée kí sòoǹ Unimbɔti pɔŋŋu pu.»
Antiyookuusi ŋmàn̄ Juuda yab kugbɔŋu
18Antiyookuusi walifii kaa nìn sɔ̄ŋkì, di sá yii Unimbɔti di nìn bíi sòoǹ u-bɔti min máaǹee. Ubɔti nìn ká yii dimákal kaa nìn gíti bí. Niinee ní u ŋmàn̄ Juuda yab kugbɔŋu ki bíi gbàam̄-bi yam. U nìn ŋmàn̄-bi yii:
19Mama Antiyookuusi un sá ubɔti bijanjaliibi kpiliuee, m jáaḿ nimbi Juuda yab biniŋmambi. Unimbɔti ń tīī-ni ŋgbampɔn kí yàntī án bútí-ni tikɔkɔ poon!
20«Ni nì ni-nabiyaamu yaa pɔ̄ɔ̄ ní ni-tuuŋŋi còom̄ kii ni nín là pueeyee, m jáaḿ Unimbɔti an pu. Úǹ pu ní m máká. 21Mamee, m dɔ̄ ní kaa ti cáá mpɔn. Ama nì dineendi poon ní m téetí ni-pu, di sá yii ni tīī-mi disíndi ki dàkā-mi kulaŋŋaŋfitiiu.
«M nín nyáń Peersi tiŋkin ki kùǹee, iween iba cúú-mi. M ká yii an máaǹ ḿ kpèè min ní m làá ŋá ní bin kɔkɔ bí m-beelinee ń nīn bí nsɔŋfinee. 22M-wunti kaa yɔ̄tì m-weeŋyi gbanti pu, ama m máká yii m làá pɔ̄ɔkì. 23Nì míǹ kɔkɔee, m téetí yii m-baa nìn lēē un làá fōō u-yilee ní ki nín búntì ntimu mun bí yilpu puee ni kujaau. 24Waa nìn là yii tiba yaa túuǹ-bi àá kubɔkpiiu kubɔ yaa bāań u-beelin yab puee, bí taa béé min bi làá ŋée. Di sá yii báà ŋma nìn nyí un ní ubɔti dū kitiŋ pu bɔti ki ŋúbiǹee. 25Kí kūtèe, m dáań ki ká yii ntimu mun pìlīǹ m-beelee bɔtiibi nìn nyàab̀ ŋyuntimɔnti kí ŋá tiba, ní ki cɔ́ŋkí ki kpèé tin làá bàń-mee. An pu ní m lēē m-jipɔɔn Antiyookuusi ú fōō m-yil kí kpántí ubɔti. M nìn dū-u ki dàkā-ni ŋfunyɔm tikpil ní ki nìn dū-u ki kpāaǹ ni-kansikin tikpil, ŋyunti ŋun m nìn cá Yilpu pú timmunee. M ŋmàn̄-u kugbɔŋu kun m tīī ni mun nee.
26«Tin m mèé-ni tikpilee sɔ̀: Téetímaan tiŋan tin m nìn ŋá ki tīī ni-nibulee, nì ni-kansikin ubɔ ubɔee pu. Ní nīn gbíntìi dàkà man nì m-jipɔɔn kulaŋŋaŋfitiiu ki cá. 27M nín bɔ́ntì pu ki síiǹee, m cáá dimákal yii u làá nīn ŋúb́ míǹ. U làá nīn ŋúb́-ni soooo nì kulaŋŋaŋfitiiu, ní ni làá gbìlīǹ tɔb tiŋan.»
28Míǹ ní unikpɔl un sīī Unimbɔtee dāa kúntì u-maŋfal wiiŋyi falaakpaambi poon kii u nín yāntì bin kíǹee jíń falaakpaambi puee. U kpíì nsansaaŋkúm kinicantiŋin dijool pu. 29Fiiliipi un sá u-bɔɔ doooo tibiyatinee di yōoǹní-u ki cáań Antiyɔɔsi. Ama waa nìn cáá u-jipɔɔn Antiyookuusi pu dimákal. An puee ní u nín cá Eejipiti tiŋkin, ubɔti Pitooleemee Filoomeetɔɔr cee.
Currently Selected:
2 Maccabées 9: BASSARDC
Highlight
Share
Copy
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.