2 Maccabées 10
10
Bi ŋá kunimbɔtidii circir
(1 Maka 4.36-61)
1Ti-Dindaan nìn kpōotì Juudasi Maakabee nì u-yab ní bi fātìi fōō kunimbɔtidii nì Jeerusaleem tiŋki. 2Bi nìn gbáń ki wīil̀ isaraafan in binicambi nìn máń imɔŋkijaa pu nì iwaatootipaan puee. 3Bi nìn ŋá kunimbɔtidii circir ní ki fātìi máń nsaraafan mpɔɔn. Bi nìn gāā dikpeetil ní ki kpāā ŋŋmi nsaraafan pu. Bi ŋá míǹ ki dóòyee ní ki ŋá saraabi. Bi nín kaa ti ŋá saraabi míǹ nee, abin ali sèé. Bi nìn tūū talaalub ki sēē fitilab ní ki cáań kpɔnɔb ki páaǹ ki dūu ŋá saraa ki tīī Unimbɔti. 4Bi ŋá míǹ ki dóòyee ní ki tātìi gbāaǹ bi-yigbeeŋi tūū kitiŋ. Bi nìn mēē ti-Dindaan yii: «Taa ti yàntī inaabukpaan nee juti ń jēetí ti-pu. Ti yaa ti yīntì-see, á dáaĺ ti-tafal kí ŋmàntī, ama á taa ti dū-ti kí ŋá atimbun ŋin sìí-si ki cáá inimbinaakulim nee ŋaan.»
5An tú ŋwiin ŋun binicambi nìn kɔ́ǹ kunimbɔtidii tijɔkɔndi, an dàkà yii Kiisileewu ŋmaliu iwiin mmuŋku nì iŋmoo dalee, ní Maakabee nì u-yab ŋá-ku circir. 6Bi nìn jíń jiŋaal gbanti nì dipɔɔpindi iwiin inii kii bi nín jīǹ tibìń jiŋaaliu puee ní. Bi nìn jíń-u ki téetì yii an kaa yúntì, ajoonni nì itaŋkpalɔkɔn ní bi jíń tibìń jiŋaaliu kii ipeelee. 7An pu ní kɔŋkɔnnee bi ŋúb́ tifaasɔn nì apampɔmbil nì tikpakpati ki gà ilan ki pàkà un tútúǹ-bi bi ŋá kunimbɔtidii circiree. 8Bi nìn tɔ́ cáacaa ní ki tīī Juuda yab kɔkɔ mara yii bí nīn jīǹ jiŋaal gbanti dibintil kamaa.
Eepatɔɔr fōō u-baa Eepiifaani yil
9Antiyookuusi un bi gíti yíì yii Eepiifaanee nín kpíì puee dee. 10Kɔŋkɔnnee m làá sòoǹ Unimbɔti nannanliu jipɔɔn Antiyookuusi Eepatɔɔr pu ní. M làá sòoǹ kí kūlifì tijáti gbanti nín cáań inaabu iŋyee pu.
11Ubɔtiija gbanti nín fōō dibeelee ní u dū kijapaai kiba bi yíì-kì Liisiyasi ki kāaǹ gɔminakpaan Siiriikpaan nì Feenisii timmu pu. 12Liisiyasi nìn fōō Pitooleemee un bi gíti páaǹ diyindi yii Makrɔnee yil. Bi nín kɔ́ǹ Juuda yab agìń ŋin kɔkɔ poon boonee, Pitooleemee di nìn sá gɔminapeepeekaa un ŋá tin bí deedeeyee ki tīī Juuda yab. U nìn mākaǹ kí jī bi-pu dibeel nì ŋgbansɔŋfi. 13Míǹ puee <Ubɔti bɔɔbi> kúŋfì u-boon Eepatɔɔr cee. Binib nìn kíǹ ki lì yii u nyáń ubɔti boon. Eejipiti bɔtiu Filoomeetɔɔr nìn dū Siipiri tiŋki ki ŋúbiǹ-u. Ama Pitooleemee nìn fātì u-boon ki tīī kitiŋ kin nnyim māntìi tú gbanti ní ki gítì Antiyookuusi Eepiifaani jandi pú. Kii u nín kaa nìn gíti ŋūǹ kí jī dibeel nì jilmee ní u nyùn̄ ndabiim ki kpíì.
Juudasi jáń nì Idumee timmu
(1 Maka 5.1-8)
14Gɔɔrgiyasi nìn kpántì Idumee tiŋki gɔminau, ní ki fōō binicambi janjaliibi. U nìn nyàab̄ isan kɔkɔ kí já nì Juuda yab. 15Kí kūtèe, Idumee yab bin nìn kóò sintil difɔkɔŋinee nìn jáà nì Juuda yab kaa gbèentí. Bi nìn fòol̄ binib bin bi nìn jì Jeerusaleem tiŋkinee, ní ki ŋáań min bi pée ŋūǹee kujaau ń nīn nìkì.
16Maakabee nì u-janjaliibi nìn kpáfì ki mēē mpaampiin pu ki bālifì Unimbɔti ú kūtì bi-pu bí já kujaau. Bi mēē míǹ ki dóòyee ní ki kíĺ nsan kí cùú já nì Idumee yab bin kóò sintil difɔkɔŋinee. 17Bi nìn jáń nì bi mpɔmpiin ki pɔ́ɔkiǹ bin nìn tɔ́kɔ́ agun pu ki jáàyee ki fōō bi-paaŋyi. Bi nìn kù bin kɔkɔ bi nìn pée kāntée. Bi nìn kūū binib kii kutukub mmuŋku nyɔkɔm.
18Nì míǹ kɔkɔee, bijanjaliibi kutukub biwa nìn sáǹ ki kɔ́ adifɔkɔ ali ŋin bi máń agun ki tú tiŋan puee. Bi nìn cáá tin kɔkɔ làá ŋmā kí tūtuǹ-bi bí já kujaau kí yúntée. 19Maakabee nìn dū Siimɔn nì Jooseefi nì Saasee nì bijanjaliibi tikpil ki yóoǹ sintil difɔkɔŋee nyɔkɔpu bí nìkī kujaau. Míǹ boonee ní úǹ u-ba nín cá laakin u-bítam bɔti páb́ee. 20Ama Siimɔn yab nìn néeń animbil tikpil. Bi nìn yāntì bin cí adifɔkɔee dū animbil ki dá-bi. Bi nìn kíí ki fōō animbil jitɔmbi kutukub imuŋku ita nì saalaa ki yāntì bijanjaliibi tikpil ŋmátì. 21Bi nín tùkū Maakabee tin jítèe, ní u kóoǹ ajanjakiti kpilib ki kpáfì ní ki wòon̄ bin nìn dū bi-nabiyaamu ki nyáfèe. Di sá yii animbil puee, bi yāntì bi-nannanliibi sáǹ ki ŋmátì. 22Niinee ní Maakabee kūū bin nyáń bi-nabiyaamu boon gbantee dicilpu, ní ki jáń ki fōō sintil difɔkɔŋi ali gbanti. 23U jáń ki pɔ́ɔkiǹ u-nannanliibi tijáti gbanti poon, ní ki kūū binib kutukub mmuŋku nì ipaa.
Juudasi jáń ki pɔ́ɔkiǹ Tiimootee
24Juuda yab nìn pée jáń ki pɔ́ɔkiǹ Tiimootee ŋyunti ŋubɔ poon. Tiimootee nìn fōō binicambi bijanjaliibi, ní ki cáań itaamu tikpil Asii pú. U ŋá míǹ ki dóòyee ní u-janjakitil dūu bāań Juudee tiŋkin kí já kí fōō-kì. 25Bi tóob́ kí bèe ní Juudasi Maakabee nì u-naacimbi bíi mèé ki gbàam̄ Unimbɔti. Bi nìn dū ntam ki pùkū bi-yiliŋ, ní ki pēē tikpɔwan. 26Bi nìn gbāā bi-yigbeeŋi tūū kitiŋ nsaraafan nyɔkɔpu ki mèé yii: «Óo Unimbɔti, dàkà-ti a-laŋŋaŋfitiiku. Nín̄ sá ti-nannanliibi nannanliu kí nīn sá ti-pulincɔntiibi pulincɔnti, kii a nín pōoǹ pu a-marab poonee.»
27Bi mēē míǹ ki dóòyee, ní ki yōoǹ bi-janjawanti ki nyáń Jeerusaleem ki nín cá. Bi tóob́ kí bà binannanliibi ceeyee ní ki sāā ki síl̀. 28Kutaa wúntì ŋwìiń nyánnée, ní ajanjakiti alee dūu gùl̄ kujaau pu. Kí já kí pɔ̄ɔkiǹ bi-nannanliibee, Juuda yab nìn máká bi-ninjati pu, ama cilinjee, ti-Dindaan tūtuntam pu ní bi nìn máká. Biba ceeyee, diŋuul din cáá-bee di nìn kpòotī-bi kujaau poon. 29Dikɔ̀ndi sīkitèe, bi bí yii bí kpèèyee, bitanjakaliibi binyaambi biŋmoo páaǹní kutaa pu ki kāń itaamu in breeki sá sindaariyee. Bi nìn līntì Juuda yab nyɔkɔpu. 30Bi nìn dū Juudasi ki sákaǹ bi-kansikin ní ki dū bi-janjawanti ki wúń u-pu tiba ń taa ŋá-u. Bitanjakaliibi gbanti nìn tòó ipiin nì itaaŋmɔŋmɔ ní. An ŋá mimmee, ŋwalifi gbanti yāntì binannanliibi kaa ti wāĺ, ní bi kíǹ ki sáń ki póotí an kɔkɔ pu lìbiti libiti. 31Bi nìn kūū bi-kansikin bijanjaliibi kutukub mmuŋku nì alaataa aŋmoo, ní ki kūū bitanjakaliibi alaataa aluu.
32Tiimootee u-ba nìn sáǹ ki cūtìi kɔ́ Geeseer tiŋki kin bi máń agun ki tú tiŋan pu ki wúń ki-puee. Keereeyaasi di nìn sá ujanjakpil niin. 33Juudasi Maakabee nì u-naacimbi cūtìi jáń nì kitiŋ gbanti yab nì difaŋgiil iwiin inaa. 34Bin nìn kóò niinee nìn máká bi-ba pu yii tiba kaa ŋūǹ kí ŋá-bi. An pu ní bi nìn bí ki bèel̄ Juuda yab Nimbɔtiu ní ki sìí bin nìn bíi jáà nì bee. 35Ŋwiŋŋmooŋmooti dal ŋwìiń bíi nyēēyee, Juudasi Maakabee janjakitil poon binaacimpɔmbi mmuŋku fōō mbum ibeel gbanti pu, ní ki dū bi-ba ki bíl̀ digundee watil pú nì tininjati. Diŋuul nìn cúú-bi bi fōō mbiim kii ipeecuncutee ki kù bin kamaa bi yaa pée kée. 36Biba nìn páaǹ bi-boon. Bi nìn māntìi tú kitiŋee gundi kí jáǹ bi-nannanliibi boon pú. Bi nìn gāā ŋŋmi ki tūū sintil difɔkɔŋi ki wùn̄ bin nìn bíi bèel̄ Unimbɔtee nì bi-nimbiliŋ. Biba nìn gbáń ki wīī mpunyɔmu ki pú nsan bijanjaliibi bin kíǹee ń ŋmā kí kɔ́. An kaa pée súŋkì ní bi jáń ki fōō kitiŋee. 37Tiimootee nìn sáǹ ki bál̀ dilɔkɔgindi diba poon. Bi nìn kūū u nì u-nabiki Keereeyaasi nì Apooloofaani.
38Juuda yab pɔ́ɔǹtam gbanti boonee ní bi gāā ilan ki nyɔ́ŋkì ti-Dindaan. Bi nìn jáam̀-u, di sá yii u nìn ŋá Isirayeel yab tiŋaŋkpaandi ki tīī-bi dijajil.
Currently Selected:
2 Maccabées 10: BASSARDC
Highlight
Share
Copy
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.