2 Maccabées 8
8
Juudasi Maakabee yíkì kaa kíí
1Juudasi Maakabee nì u-yab nìn yìiǹ ntimbilimun dibalin. Bi nìn yíì bi-nabiyaamu Juuda yab bí páań bi-boon. Bi nìn ká binib kutukub biluu bin ŋúb́ Juuda yab fookiiu gbīŋgbimee ki páaǹ bi-boon. 2Bi nín nìn gbāam̀ ti-Dindaan puee sɔ̀. Jòoń a-nibul din ní báà ŋma cáa sàantée. Sɔ̄ kunimbɔtidii kun binikpitib kɔ́ǹ tijɔkɔndee saai. 3Dàkà Jeerusaleem tiŋki kin bi nāaǹ ní ki làá nà dúsi dusi nee kulaŋŋaŋfitiiu. Pīlifì bin fatikuu gbáà ibiil a-watil pu yii á tɔ̄ bi-pɔntooŋyee nyɔkɔ. 4Téetí bin kūū mbiyaamu maanyiibabee kpitii pu. Taa súntí asiibil ŋin bi sīī-si nee pu. A yaa ŋá mimmee, a dàkā yii a ná tikpitil dee.
5Ŋyunti ŋun Juudasi Maakabee nìn sá ukpil ki kpòotī dijanjakitilee, ditimbundi diba kaa nìn ŋūǹ kí já kí pɔ̄ɔkiǹ-u. Di sá yii ti-Dindaan nìn fá u-ŋuul, ní ki bíi dàkà u-nibul u-poommɔŋŋu. 6Juudasi nìn tūuntí ntimu nì ntimbilimu ki jáà nì mu ní ki tùutī-mu ŋŋmi. U nìn jáń ki fōō ipaan in bɔti páb́ee, ní ki jìn̄ binannanliibi. 7Kunyeeu ní u cá ki jáà tijáti gbanti. Báà laakiŋyee, binib nìn sòoǹ u-baatandi pu ní.
Juudasi jáń ki pɔ́ɔkiǹ Niikanɔɔr
(1 Maka 3.38–4.27)
8Fiiliipi nìn ká yii Juudasi bíi ŋàfī ki cá ki jáà ki jīǹ iyunti tikpil. Niinee ní u ŋmàn̄ Siiriikpaan nì Feenisii gɔminau Pitooleemee kugbɔŋu yii ú dāá jòoń-u kí fīī-u ubɔti tuuŋŋi poon. 9Niinee ní Pitooleemee lēē Patrookil jipɔɔn Niikanɔɔr, <Ubɔti bɔɔbi> kansikin un sá ukpaanee. U nìn lēē ntimu kɔkɔ poon bijanjaliibi kutukub mmuŋku ki dūu ŋúbiǹ Niikanɔɔr ú cùú kpɔ̀ kí céetí Juuda yab. U nìn tīī ujanjakpil Gɔɔrgiyasi mara ú céeǹ-u. Kijapaayee nìn nyí kujaau tundi tiŋan.
10Ubɔti Antiyookuusi nìn cáá Room yab bɔtiu dipɔndi animbil tɔnnib imuŋku ili nì saalaa nì binaa. Niikanɔɔr nìn lēē yii u làá nyāfì Juuda yab kí pà dipɔndi gbanti. 11U nìn tú bí yíiń binib bin bí Meediiteeranee tiŋkuu caŋinee bí dāá dā Juuda yab. U nìn pōoǹ-bi yii u làá nyāfiǹ-bi binib imuŋku inaa nì saalaa animbil kiiloobi mmuŋku nì biluli. Waa nìn nyí ditafadaaldi din Mpɔŋkɔdaan làá dūú tɔ̄ u-puee.
12Juudasi nìn gbìl̄ yii Niikanɔɔr kālìń nsan pu ki dòoń. U nìn kpáafì u-yab yii binannanliibi janjakitil tóobiń-bi. 13Niinee ní bifaantidambi nì bin kaa máká Unimbɔti deedee tuuŋŋi puee sáǹ ki búntì laaba. 14Bin kíǹee nìn dū bi-wanti ki nyáfì, ní ki bíi mèé Unimbɔti yii ú fīī bin ní baa láá kíĺ kujaau Niikanɔɔr unikpiti dūu nyáfèe. Bi nìn mēē ti-Dindaan yii: 15«Báà a yaa kaa làá fīī-ti timbi ti-ba puee, pée téetí mpèé ŋun si nì ti-naanjab nìn ŋée pu. Téetí yii bi yíiń a-yiŋkpaandi din cáá tinyoolee ti-pu.»
16Maakabee kóoǹ u-janjaliibi ki kpáfì. Bi nìn nyáń binib kutukub biluu ní. U nìn bí-bi yii: «Ní taa yàntī binannanliibi ń kɔ́ǹ-ni dinyoondi. Ní taa fàŋkì kuniwaawiiu kun kaa nyí Unimbɔti ki bíi jáà nì ti an kaa cáá taapu nee. Ní jámaan nì tininjati. 17Ní téetí atuŋkpiti ŋin binib gbanti ŋá kunimbɔtidiiyee pu. Bi kɔ́ǹ Jeerusaleem tiŋki icoo, ní ki kúntì ti-yaajakoobiliŋ.» 18U nìn kútì ki bí-bi yii: «Ti-nannanliibi máká bi-janjawanti nì bi-pɔŋŋu pu ní, ama timbee, ti máká Unimbɔti Mpɔŋkɔdaan pu ní. U ŋūǹ kí gāā u-yil dibaja kí lábití bin dòoń kí jáǹ-ti nee kí cìb̄, ki kpáaǹ gba duulinya kɔkɔ.» 19U nìn kàan̄-bi Unimbɔti nín nìn wúń bi-naanjab pu ŋfunyɔm tikpil puee. Kii Seenakeeriibi yuntiŋuee, u nìn kūū binib kutukub dilaataal nì imuŋku inaa nì biŋmoo ní#8.19 Kpèè 2 Bib 19.35.. 20Téetímaan kujaau kun bi nìn jáń nì Galaati yab Babiloon tiŋkinee. Yaadalee, Juuda yab binib kutukub binii nì Maseeduwaan yab binib kutukub binaa nìn jáń nì binib kutukub dilaataal nì mmuŋku. An nìn nyāŋkiǹ Maseeduwaan yab, ama nì Unimbɔti tūtuntam poonee, Juuda yab binib kutukub binii nìn jáń ki pɔ́ɔkiǹ bi-nannanliibi sɔ́kɔ sɔkɔ ki yōoǹ bi-gaajawanti tikpil.
21Nì anyɔɔbun gbanti ní Juudasi dūu tīī u-janjaliibi kunyannyaau, ní ki bɔ́ntì-bi bí dū bi-ba kí tīī kí kpú Unimbɔti marab nì bi-tiŋki pu. U nìn cúú u-janjaliibi ki yākatì akiti anaa pu. 22Dikitil kamaa nìn cáá bijanjaliibi kutuku ubɔ nì dijandi. U nìn dū u-naalib Siimɔn nì Jooseefi nì Joonatan ki līntì dikitil kamaa nyɔkɔpu. Úǹ u-ba nìn kpòotī dikitil diba. 23U nìn tīī Eesdriyaasi mara ú kàaǹ circir gbɔŋku poon. Míǹ boonee ní u tīī-bi dijanjanyɔɔbundi nee yii: «Nì Unimbɔti tūtuntam pu». Boonee ní u līntì dikitipeepeekaal nyɔkɔpu ki kíĺ kujaau nì Niikanɔɔr.
24Unimbɔti Mpɔŋkɔdaan nìn bí Juuda yab jandi pú. Bi nìn kūū binannanliibi an jítì kutukub biwa pu. Bi nìn tīī Niikanɔɔr janjaliibi tikpil tiweendi ní bi sáǹ. 25Bi nìn fōō bin nìn dɔ́miń kí dā-bee nimbiliŋ ní ki jìn̄ bin sáǹee ki kɔ́ǹ ndan. Ama, kii kunyeeu nín nìn bíi móotée puee, bi nìn fātìi gítìń. 26Di sá yii an nìn sá kutaa ń wúntí ŋwiŋŋuŋfikaa dal ní, an puee baa nìn nìkī ki jìn̄-bi. 27Bi nìn kóoǹ binannanliibi janjawanti nì bi-gaajawanti. Míǹ boonee ní bi jíń ŋwiŋŋuŋfikaa jinti. Bi nìn gāā ilan ki nyɔ́ŋkì ti-Dindaan ní ki mēē ŋwimmeem tikpil ki jáam̀-u. Tiŋman, ŋwiin gbantee, ti-Dindaan nìn lafun fīī-bi. U nìn kíĺ ki bíi dàkà-bi u-laŋŋaŋfitiiku. 28Ŋwiŋŋuŋfikaa jítèe ní bi dū tigaajawan tin bi fōoń kujaaunee ki yākatì bin bi sāaǹee nì bikpiipoobi nì ataŋkpiibil. Míǹ boonee ní bi dū tin kíǹee ki yākatì bi nì bi-biyaamu. 29Bi ŋá míǹ ki dóòyee ní ki kpáfì ki mēē ti-Dindaan dicilpu. Bi nìn mēē ti-Dindaan un poon mɔ̄ee yii u nì u-tɔntɔnliibi kansikin ń mɔ̄ɔkì kí nīn cá jaanjaan.
Juudasi jáń ki pɔ́ɔkiǹ Tiimootee
30Boonee ní Juudasi nì u-yab cūtì ki jáń nì Tiimootee nì Bakideesi. Bi nìn kūū binannanliibi janjaliibi binib kutukub mmuŋku ki jáń ki fōō sintil difɔkɔŋi ŋin fɔ̀kɔ̀ tikpilee. Bi nìn cúú tigaajawan tin bi jáń ki fōōyee ki yākatì mili pu. Dijandi diba pu nìn sá ki tīī bíǹ bi-ba ní dijandi din kíǹee sá ki tīī bin bi nìn sāaǹee nì bikpiipoobi nì ataŋkpiibil. Baa nìn súntì bijaŋkpilib pu. 31Bi nìn kóoǹ binannanliibi janjawanti ki bɔ́ntì mmɔntiim ki cáá-tì ki yóoǹ laakin kítèe. Míǹ boonee ní bi cáá tin kíǹee ki cūnnì Jeerusaleem. 32Bi nìn kūū ajanjakiti ŋin nìn kútì Tiimootee pu bi jáàyee kpiliu. Kijapaayee nìn baasii sá unikpiti ní ki nìn ŋá Juuda yab tikpitil tikpil. 33Bi bíi jīǹ dijajil jiŋaaliu Jeerusaleemee, ní bi wùn̄ bin nìn sēē kunimbɔtidii punyɔmmuee ŋŋmi. Bi nìn wùn̄ Kaliisteeni un nìn sáǹ ki kɔ́ kidiwaai kiba poonee ŋŋmi. U fōō ikpiti in u ŋá Unimbɔtee paati dee deedee.
Niikanɔɔr sáǹ ki búntì Antiyɔɔsi
34Niikanɔɔr unikpiti mita puee nìn cáań binyampoobi kutuku bí dāá dā Juuda yab. 35Ti-Dindaan tūtuntam puee, binib bin u nìn kpēē fám gbantee nìn sīntiǹ-u taapu. U nìn pēetì u-janjawanti tin ŋān̄ee ki bíl̀, ní ki dūu túĺ tisatin u-baba kii uyumbu un di sáǹ u-dindaanee. U nìn ŋá diyimɔɔl ki bàn̄ Antiyɔɔsi tiŋkin ŋyunti ŋun ní bi kūū ki céetì u-janjaliibee. 36U nìn pōoǹ Room yab yii u làá nyāfì Jeerusaleem yab kí pà ubɔti pɔndi. Ama kɔŋkɔnnee u béè yii baa ŋūǹ kí já kí pɔ̄ɔkiǹ Juuda yab. Tiŋman bi cáá ubɔ mɔ́tí bi-pu, di sá yii bi ŋúb́ marab bin ní un mɔ́tí bi-puee tīī-bee.
Currently Selected:
2 Maccabées 8: BASSARDC
Highlight
Share
Copy
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.