1 Maccabées 8
8
Bi bí ki pàkà Room yab
1Juudasi gbìl̄ bi bíi sòoǹ Room yab pu. Binib nìn lì yii bi pɔ̄ɔ̄ ní ki dàkà bin ŋá mpèé nì bee kulaŋŋaŋfitiiu. Bi píikí bin sòoǹ nì bee kubɔɔtiiu ní ki cáá mpɔn mun. 2Bi nìn máafì Juudasi tijáti tin bi jáńee, nì maamaaci tuuŋŋi ŋin bi túń Gooli yab ceeyee. Room yab nìn jáń ki pɔ́ɔkiǹ-bi, ní ki gíí-bi lampoo animbil tikpil bí nīn pà. 3Bi nìn tí jáń ki pɔ́ɔkiǹ Eespaanyi yab ki fōō laakin bi gbì ki nyāntí sindaariya nì animbil kitiŋ gbantinee. 4Bi fōō ntimu kɔkɔ ki gāā bi-bindi, kun puee bi béè dibɔ́ntil, ní ki cáá kimɔtii mun. Nì min kɔkɔ laakin bi cūtìi jáń kujaau gbantee nìn dátiǹ-bee, bi nìn jáń ki pɔ́ɔkiǹ bibɔtiibi bin nyánní kitiŋ gbeennyɔkɔ ki dɔ́miń ki jáń nì bee. Bi nìn jáń ki pɔ́ɔkiǹ-bi sɔ́kɔ sɔkɔ ki nàn̄-bi. Bin kíǹ kaa kpíìyee pà-bi lampoo ní dibindi sá kamaa. 5Room yab nìn tí jáń ki pɔ́ɔkiǹ Fiiliipi nì Peersee nì Maseeduwaan bɔtiibi, nì bin kɔkɔ nìn yíkì ki wúkutì bi-puee. Bi nìn dū-bi ki ŋá bi-taapu. 6Bi nìn ŋúń ki nàn̄ Antiyookuusi Ukpaan, Asii yab bɔtikpaaŋwu kunaau. Antiyookuusi nìn dū kujaau kuntib dilaataal nì mmuŋku nì bitanjakaliibi nì janjatɔrɔkub nì dijanjakitikpaandi ní ki jáń nì bi. 7Bi nìn cúú-u ní ki páb́ u nì bibɔtiibi bin līntiǹ-uee bí pà lampoo un nyìm̀ee, kí tīī-bi iyumbu. 8Bi nìn fōō Antiyookuusi cee Ndiya nì Meedii nì Liidii timmu nì u-beel poon timmu mun ŋān̄ee mubɔ mun ki dūu tīī ubɔti Eemeeni. 9Greeki yab nìn lēē yii bi làá cùú kúntí Room yab. 10Ama bíǹ gbìl̄ bi nín bíi búkù bi-pu miŋyee ní ki lēē ujanjakpil ubambaanti ú cùú jáǹ-bi. Kujaau gbanti poonee, Greeki yab tikpil nìn kpíì. Room yab nìn cúú bi-nimpoobi nì bi-biyaamu kuyuŋu. Bi nìn fúkúl̀ bi-gaajawanti, ní ki fōō bi-tiŋki ki kāl̀. Ní ki gbáń ki wīī bi-guŋkpaaŋŋi, ní ki ŋáań-bi kii iyumbuee áli ki dāa sāā díǹ. 11Abee nì ntimu mun nnyim māntìi túee nib nìn jáń nì Room yab iyunti iba poon, ama ní bíǹ dāa pɔ́ɔkiǹ-bi, ní ki dū-bi ki kpántì bi-yumbui. 12Ama Room yab yú nì bi-bɔɔbi nì bin máká bi-puee deedee. Bi dū bibɔtiibi bin pìlīǹ-bee nì bin dátiǹ-bee ki ŋá bi-taapu. Bin kɔkɔ yaa nìn pée gbìl̄ bi sòon̄ Room yab puee nìn fàŋkí-bi ní. 13Bin bɔti Room yab lèe ní bi tìì mpɔn ní kí dū-bi kí kàan̄ dibeel. Ama ní ki kpákatí bibɔtiibi bin bɔti kaa fáatì-bee dibeel pu. Bi-pɔŋŋu jɔ́m̀ ki bàn̄ yilpu yilpu. 14Nì míǹ kɔkɔee, aa kāntí uroomja cíkí kibeefuulii àá u pēē dibeebɔkutil án sá úǹ u-ba jilmau pu. 15Room yab nìn lēē bisaŋkiliibi binib alaataa ata nì mmuŋku. Ŋwiin kamaayee, binib gbanti kpáfí ní ki sòoǹ kitiŋ pu nì binib bɔti án nīn ŋān̄ ki tīī báà ŋma. 16Dibindi kamaayee, Room yab lèekī unibaanti ní kí dū kitiŋ kpèetam kí ŋúbiǹ-u ní u kpòotī kitiŋ kɔkɔ. Bi-kɔkɔ tɔ́ unibaanti gbanti ní. Ubɔ kaa cáá u-pu kináŋ àá ipoompoon.
Juuda yab nì Room yab ŋá mpèé
17Juudasi nìn lēē Yoowaneesi jipɔɔn Eepooleem, Akoosi naantiiu, nì Eelasaar jipɔɔn Jaasɔn. U nìn dū-bi ki tú Room bí cùú ŋá mpèé nì Room yab bí kpántí bibɔɔtiibi. 18Juudasi ŋá míǹ kí ŋmā kí léetí kpancikil un Greeki yab bin sá Siiriiyee dūu léeǹ Juuda yabee. Di sá u nìn ká yii dibeel nee poonee, Isirayeel yab bíi kpántí iyumbu. 19Eepooleem nì Jaasɔn nín cá Room tiŋkin. Nsan gbanti nìn dátì tikpil, ama ní bi dāa dūu bàn̄ ki kɔ́ ki yúl̀ bisaŋkiliibi kitil nimbiin. Bi nìn sòon̄ nì samaa ki bí yii: 20«Juudasi Maakabee nì u-naalib nì Juuda yab samaau di túnní-ti ni-cee yii tí dāá ŋá mpèé nì ni ŋgbansɔŋfi ń nīn bí ti-kansikin. Ti là kí kpántí bin bí ni-jandi púee nì ni-bɔɔbi.»
21Tibɔti tin bi nìn cáańee nìn mɔ́ɔkiǹ bisaŋkiliibee. 22Bi nìn dū kigaai ki ŋmàn̄ tasa kúti pilinti pu ki tú bi cūnnì ki tīī Jeerusaleem yab. Kugbɔŋu gbanti làá nīn téetí Juuda yab yii bi nì Room yab ŋá mpèé bi kpántì bi-bɔɔbi. Tin bi ŋmàn̄ kugbɔŋu gbanti poonee sèé:
23«Ti mèé yii án bútí Room yab nì Juuda yab baabadal kitiŋ pu nì tiŋku pu! Unimbɔti ń péetí kujaau nì binannanliibi kí wàatī-bi! 24Ama biba di yaa bíi jáà nì Room yab àá dinibul din sá Room bɔɔbee dibee, 25Juuda yab làá dāá kūtì Room yab pu bí kpāfì kí já nì binannanliibi kii an nín máaǹ puee. 26Room yab lēē yii Juuda yab kaa máaǹ kí tīī bi-nannanliibi bilee nì tijanjawan nì animbil nì meelab. Juuda yab máaǹ kí nīn ŋúb́ bi nín pōoǹ puee kí taa nín̄ kā ki cí kí fōō tiba. 27Míǹ mbaantiim ní biba yaa bíi jáà nì Juuda yabee, Room yab mun làá dāá kūtì bi-pu ní bí já kii an nín máaǹ puee. 28Room yab pōoǹ Juuda yab yii baa làá tīī bi-nannanliibi bilee nì tijanjawan nì animbil nì meelab. Room yab máaǹ kí nīn ŋúb́ bi nín pōoǹ puee, nnyimɔn ń nīn kpá poon.» 29Anyɔɔbun ŋin pu Room yab tɔ́kɔǹ ki ŋá mpèé nì Juuda yabee dee. 30Ama boon pú Room yab nì Juuda yab yaa láa ká yii bi làá kūtì tiba àá bi làá bàtī tiba tin bi sòon̄ ki síiǹee puee, bi dāa ŋūǹ kí ŋá míǹ. Tin bée di sá yii bí dāá nīn ŋúb́ tin bi kútì àá bi bātèe. 31Kí kūtèe, ti ŋmàn̄ kugbɔŋu ki tùkū ubɔti Deemeetriyusi ibɔkpiti in bi ŋá Juuda yabee. Ti nín ŋmàn̄-u puee sèé: «Ba pu ní a dū a-kpancikiliu ki léeǹ Juuda yab bin sá ti-bɔɔbi ti nì bi ŋá mpèéyee? 32Bi yaa gíti yáliŋkì a-puee, ti làá dāan̄ kí mɔ̄tì bi-pu ní kí jáǹ-si tiŋku nì kitiŋ pu.»
Currently Selected:
1 Maccabées 8: BASSARDC
Highlight
Share
Copy
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.