Mark 10

Ha Tudtuchun Jesus Mipanggop Si Ichang

(Mat. 5:31-33; 19:1-12; Luk. 16:18)

1Tilelan cha Jesus chi hachiʼn ili ot ummoycha si sakupon chi Judea ot chilemangcha bo chewwang un Jordan. Ot kasin bo lauppun cha amod un tagu kan Jesus ot tiludtuchuwala chicha un isun chi sigud un pin-ala killingwa.

2Si hachi, ummoy cha uchum un Pariseo kan siya ta mangin-in-ancha siya. Ot kalancha, “Ha ipalubus kamman chi lintog taku un ichangan chi leɏaki asawala?”

3Summongbyat si Jesus un kalala, “Simma imbilin Moses si awi?”

4Ot kalancha, “Inteun Moses un mangigili leɏaki si kasuɏatan un mangichangala si asawala ked makwa un peɏyawola siya.”#10:4 Deuteronomy 24:1-4

5Ngim kalan Jesus, “Gapu si kilatangkin cha tagu, inggilin Moses chi hachiʼn bilin. 6Ngim si chamchamu un langwaan Apudyus si lubung, killingwala leɏaki ya byebyai.#10:6 Genesis 1:27 7‘Ked hachi gapulan telan chi leɏaki cha amala kan ilala ked mitipug si asawala, 8ked mambyalincha ossaan un long-eg.’ Ked chakampun un chuwacha ngim ossaan un long-eg.#10:8 Genesis 2:24 9Ked lu silu cha lantipugon Apudyus, lappun kalobbongan chi taguʼn mampasila kan chicha.” 10Lilumlok pun cha Jesus si osaʼn byeɏoy, ilimus bo cha disipulusla mipanggop si ichang. 11Kalala kan chicha, “Lu silu leɏaki un mangichang si asawala ked mangasawa kasin, makabyasuɏ si chegchegas. 12Ked lu silu bo byebyaiʼn mangichang si asawala ked mangasawa kasin, makabyasuɏ bo si chegchegas.”

Ha Laminchisyulan Jesus Kan Cha Aalak

(Mat. 19:13-15; Luk. 18:15-17)

13Illinggew cha taguʼn langiyoy kan cha aalakcha kan Jesus ta ipatayla cha imala kan chicha ya binchisyulala chicha. Ngim ilomɏan cha disipulusla chicha. 14Ngim intullong pun Jesus, summanga ot kalala kan chicha, “Palubusanyu cha aalak un umali kan sakon. Achiyu ipalit chicha, ti cha katlaʼn aalak chicha cha mipati si Mampangatan Apudyus. 15Tuttuwa ibyegak kan chikayu, lu silu achipun mangipakumbyabya si long-egla si mamatiyala kan Apudyus, un isun chi kilakumbyabyan cha allaʼn aalak, achipun makwa un mipati si Mampangatan Apudyus.” 16Ot ilaklin Jesus cha aalak ot impatayla imala si kacha osa kan chicha ya bilinchisyulala chicha.

Ha Byaklang Un Leɏaki

(Mat. 19:16-30; Luk. 18:18-30)

17Si lummibbyatan cha Jesus un umoy manggaggakay, lalodchak chi osaʼn leɏaki un ummoy lampalintuming si sangwalanla ot ilimusla kan siya, “Bibiɏuʼn Mistulu, simma masapuɏʼn kook ta mataguwak kan Apudyus ing-inggala?”

18Ot kalan Jesus kan siya, “Puggey kalan un bibiɏu kan sakon? Lappun uchum si bibiɏu lu achi abus si Apudyus. 19Ammum cha bilin Apudyus un kalala: ‘Achika pumatoy, Achika makachegchegas, Achika man-akaw, Achim tistiguwan chi chakampun si tuttuwa, Achika malluku, ya Masapuɏʼn potgom cha amam kan ilam.’ ”#10:19 Exodus 20:12-16, Deuteronomy 5:16-20

20Ot kalala kan Jesus, “Mistulu, inggan chi kabyen-ogku, ilaminku killingwa cha bilin.”

21Laay-ayatan si Jesus un langitutullong kan siya ot kalala, “Awed chi ossaan un langkuɏangam. Man-ingilaka kan cha losan un kukkuwam ked idchom chi ngilala kan cha kapus, ta langit chi manguppulam si kilabyaklanglu. Ked umalika, mitun-ud kan sakon.”#10:21 Itullongyu 2:14 22Chingngeɏla pun chi imbyegan Jesus, ummoyon un manchachauy ti amod chi bilaklangla.

23Lansagung si Jesus kan cha disipulusla ot kalala kan chicha, “Patunged kakaskun chi mipatiyan chi byaklang si Mampangatan Apudyus!”

24Laschaaw cha disipulus si imbyegala, ngim ingkasin Jesus imbyega, “Aalakku, patunged kakaskun chi mipatiyan chi tagu si Mampangatan Apudyus! 25Ti lagodgochong chi lumlokan chi kameɏ si abut chi talud lu ha mipatiyan chi byaklang si Mampangatan Apudyus.”

26Laam-amod laschaaw cha disipulus ot kalancha kan siya, “Simman lù cha makwaʼn matatagu?”

27Ot intullong Jesus chicha ot kalala, “Lu tagu mangwa achipunla kabyeeɏan, ngim lu si Apudyus, makwala ti kabyeeɏala losan.”

28Ot kalan Peter kan siya, “Somsomkom, tilelanmi cha losan ta pigagey lu mitun-ud kami kan sika.”

29Kalan Jesus, “Tuttuwa ibyegak kan chikayu, lu silu malelan si byeɏoyla willu susuludla willu amala kan ilala, willu cha aalakla willu pitala gapu si mitun-uchela kan sakon ya mangiweɏagawagela si Bibiɏuʼn Chameg, 30ked maidchen si salaʼn timpu si ad-achu un byeɏoy ya susulud, ila ya aalak ya pita. Mapaligatan si allaʼn lubung ngim si umaliʼn eɏgew, maidchen si biyeg un mallalayun. 31Ngim achu cha langatuʼn tagu si sala ked mibyabyacha si umaliʼn eɏgew. Ya achu cha labyabya un tagu si sala ked mipangatucha si umaliʼn eɏgew.”

Ha Mikatluʼn Langibyeg-an Jesus Si Matoyala

(Mat. 20:17-19; Luk. 18:31-34)

32Si inggewancha si chaɏan un malagechaʼd Jerusalem, lamangpangu si Jesus. Laschaaw cha disipuluslaʼn lituntun-ud kan siya. Ked cha taguʼn lituntun-ud kan chicha, ummogyatcha. Ot intalin Jesus cha disipuluslaʼn lasawaɏan si chuwa ot kasinla bo ibyega makwa kan siya. 33Ot kalala, “Chongɏonyu. Alla pun un intaku ud Jerusalem ked Sakon un Alak chi Tagu si awi, mipuɏangak kan cha ap-apun cha papachi ya cha mimistulun chi lintog. Ked kodchongancha sakon un matoy, ked ipuɏangcha sakon kan cha Gentil. 34Ked am-amsiwolak ya tuppaalak ya sapsaplitalak, asicha ot sakon patoyon. Ngim si mikatluʼn eɏgew, umuliyak matagu.”

Ha Kangatuwan Si Mampangatan Apudyus

(Mat. 20:20-28)

35Ot ummachali cha James kan John, un alak Zebedee kan Jesus, ot kalancha kan siya, “Mistulu, pionmiʼn koom chi chawatonmi kan sika.”

36Ilimus Jesus kan chicha, “Simma pionyuʼn kook kan chikayu?”

37Ot kalancha kan siya, “Lu chumtong chi machaychayaw un manturayam, ipalubuslu u chikamiʼn makatugew kan sika, osa si machuwalanlu ya osa si machuwigim.”

38Ngim summongbyat si Jesus un kalala, “Achipunyu ammu chawchawatonyu. Ha maalusanyu kamman chi ligat un isun chi ligat un mipachasku? Ha makwa kamman un maiteɏodyu un matoy un isun chi inyootoyku?”

39Ot kalancha, “O, makwami.”

Ot kalan Jesus kan chicha, “Tuttuwaʼn maalusanyu ligat un isun chi mipachasku ya maiteɏodyu boʼn matoy un isun chi iyootoyku. 40Ngim lappun kalobbongak un mampili lu silu mantugew si machuwalanku willu machuwigik ti si Apudyus chi lanchutuk kan cha asi mantugew.”

41Chingngeɏn pun cha simpuɏuʼn disipulus chi alla, summangacha kan cha James kan John. 42Ilayagen Jesus chicha losan ot kalala kan chicha, “Tagammuyu cha maibilang un papangat utla pita, ipatutcha cha pioncha kan cha iturayancha. Ya cha langangatu saedcha, ipailacha kalobbongancha. 43Ngim chakampun otyan un kamatchi koonyu. Ti lu silu piolaʼn ngumatu kan chikayu, masapuɏʼn mansimbi kan chikayu losan. 44Ked lu silu simpion kan chikayuʼn mambyalin kangatuwan, masapuɏʼn mansimbi si losan un tagu un isun chi musassu. 45Ti Sakon un Alak chi Tagu si awi, chakampun si ummaliyak utla pita ta isimbiyalak kan cha tagu, ngim ummaliyak ta mansimbiyak kan cha tagu ya ichuyak chi biyegku un mansaka kan cha achuʼn tagu.”

Lakatullong Si Bartimaeus Un Lakuɏap

(Mat. 20:29-34; Luk. 18:35-43)

46Gummatong cha Jesus ya cha disipulusla ud Jerico. Ked si ummoyolancha si hachiʼn ili, litun-ud cha amod un tagu kan chicha. Ot illinggew chi osaʼn lakuɏap un ummaammuy si igid chi kesa un mampampalimus, si Bartimaeus un alak Timaeus. 47Chingngeɏla pun si Jesus un iNazareth un lumaus, illugilan mampokapokaw un kalala, “Jesus, un Galak Ari David, kacheguwalak u!”

48Achu cha langomeɏ kan siya ta gumilok otyan, ngim ilam-amodla impakuy un kalala, “Galak David, kacheguwalak u!”

49Oli pun, ummillong si Jesus ot kalala, “Ayagenyu siya utla.”

Ot ilayagencha hachiʼn lakuɏap un kalancha, “Matetteɏokka! Sumikedka, ti ilayagela sika.” 50Kakmala kilaan chi pokosla, summiked ot ummoy kan Jesus.

51Ilimus Jesus kan siya, “Himma piom un kook kan sika?”

Ot kalan chi lakuɏap kan siya, “Apu, piok un makatullong.”

52Kalan Jesus kan siya, “Makwa un ingkan uwayu ti ha pammatim kan sakon chi gapun chi lummin-awaam.” Ot kakma lakatullong ot litun-ud kan Jesus si chaɏan.

Currently Selected:

Mark 10: HUA

Highlight

Copy