Zephaniah 3
3
Hay Aat nan Bahol ya nan Abaliwan ad Jerusalem
1Ya alyo' goh an hi Zephaniah di,
“Mahmo' tu'un iJerusalem ti nan babluy tu'u ya ma'idutan ya mapa"i
ti hiyay nido'lan nan nun'appuhiy pangatda
ti ta"on nan a'ap'apu tu'u ya paligaton ditu'u.
2Ya mi'id ahan denol tu'un Apo Dios,
ya adi tu'u mumpabadang ay Apo Dios.
Ya adi tu'u goh mumpatugun,
ya adi tu'u ahan umunud.
3Ya nan u'upihyal hitu ya umatdah nan atata'ot an layon,
ya nan huhuwis ya nipaddungdah nan wolves#3:3 Umatdah nan atata'ot an ahu, mu o"ongolda ya un nan ahu. an nabukang
an mid ah ang'angondah onondah nan mabiggat.
4Ya nan propetah tu ya mumpahiyada ya ahilalayahda,
ya nan papadih tu ya agaga"ihaw an umipabain di atondah nan Timplu
an adida unudon nan Uldin Apo Dios.
5Mu wagwadah Apo Dios an niniddum ay ditu'u
an na'ahhamad di gunna pangipapto' hinan tataguna an adina ipangngel.
Mu adi damdama bumain hanan gun mangamangat hinan nun'appuhi.”
6Ya inalin Apo Dios di,
“Pumpatoy'u nan Hentil hi abablubabluy,
ya pumpa"i' nan nun'ihamad an allupda ya nan pungguwalyaanda,
at mi'id ah ohah nan tataguh mundaldallanan hinan kalatada eden babluy.
7At hay ninomnom'u ya olom ya hiyah ne mangipata'ot ay da'yud Jerusalem
ta abulutonyu nan itugun'un mipadan ay da'yu,
ta way aton nan numbabluyanyun adi mun'apa"i
unu ta way ato' an adi mangituluy an mummoltan da'yu!
Mu unyuat goh inyal'alla an gun nangat hinan nidugdugah an na"appuhi!
8At hodonyu nan gutud di punhumalyaa'
ti ninomnom'un amungon nan anasyonasyon hitun alutaluta
ta ipuhay'un da'yu nan nidugah an bungot'u ti mamolta ayun amin,
ya mapa"in amin nan wah tun lutah nan ay apuy an bungot'u.
9Ya alpahan nen a'atana ya ipaphod'u mahkay nan panapit an amin nan tatagu
ta an amindan hinohha ya ma'amungdan mundayaw ay Ha"in,
ya mundedehhanda goh an munhulbin Ha"in.
10Ya ta"on din nun'iwa'at an tatagu' an immuy numpunhituh nan dammang di pingit di numbino'ob'on an wangwang hidid Cush#3:10 Unu ad Ethiopia. Heden amatagun Zephaniah ya ad Cush di a'adagwian an lugal an i'innilan nan Hudyu, at hay nipaddunganan ditu'ud ugwan ya ad Papua New Guinea.
ya iyalida nan e'nongdan midat ay Ha"in.
11Ya adida mahkay mabainan an dumalat nan nun'appuhin ina'inatda
ti pogpogo' an amin eten babluy nan umamlong an mumpahpahiya
ta adida munle'le'od hinan me'gonan an Timplu'.
12Mu waday ang'ango' hi middum ay da'yu an nan na'na'unnud ya mumpa'ampa
an mange'kod hi nitaguanan Ha"in.
13Ya nan ma'angang ay da'yun holag Israel ya adida mahkay aton di nappuhi,
ya adida munlayah unu bumalbali.
At unda mahkay mangmangan ya nolnolo'
ti mi'id al'alin dida mahkay ti mi'id di mangipata'ot ay dida.”
14At ha"in an hi Zephaniah ya inali' di,
“Ditu'un tatagud Zion ya umamlong tu'un mungkanta,
ya olton tu'un mangit'u' hinan amlong tu'un tatagud Israel.
Ya mundenol tu'u ya umamlong tu'u ahan an numpunhitud Jerusalem!
15Ti impadinong Apo Dios nan amoltaan tu'u ya nan mi'buhul ay ditu'u,
ya hi Apo Dios mahkay di mun'alin ditu'un holag Israel,
at mimiddum ay ditu'u.
At badangan ditu'u ta adi tu'u mahkay tuma'ot.
16Ya awni ta madatngan henen gutud at alyon nan tatagun ditu'un iJerusalem di,
Adi ayu tuma'ot an wad Zion,
ya adi ayu munlungdaya.
17Ti mimiddum ay da'yuh Apo Dios an Diosyu,
ya nidugah di abalinanan mamaliw ay da'yu,
at umabak ayu!
Ya nidugah di pangiyamlonganan da'yu,
at idatnay baluh pi'taguanyu an dumalat nan nidugah an pamhodna
ti dumalat nan pangipa'amlonganyun Hiya ya it'u'nan kumantah pun'am'amlongana!”
18Ti inalin Apo Dios di,
“Pogpogo' di punholholtapanyuh pangatanyuh behtayu
ta adi ayu mahkay munlungdaya ya mabainan.
19Ti immannung an awni ta madatngan henen gutud
at moltao' an amin nan mangipaligligat ay da'yu.
Ya baliwa' an amin nan nun'apilay,
ya amungo' an amin din nun'iwa'at hinan udumnan babluy,
ya idat'uy ipabagbagtuanda ya nan a'e'gonandah nan babluy an din gunda nabainan.
20Ya hene goh an gutudna ya amungo' nongkay da'yu
ta iyanamut'u da'yuh nan tono' an babluyyu.
Ya idat'uy ipabagbagtuanyu ya a'e'gonanyuh an amin hinan tataguh tun luta
ti ibangngad'uy pumhodanyu.
Ha"in an Dios di nanapit ete.”
Currently Selected:
Zephaniah 3: NHAD
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
