Zephaniah 2
2
Hay Pangiyal'alu'andah Puntutuyuan
1Ya ha"in an hi Zephaniah ya inali' di,
“Ma'amung ayu an da'yun mi'id ah bainan tatagu
2ti la'tot ya umat tu'u tatagwah nan dugin itayap di dibdib eden gutud
an pangipattigan Apo Dios hi ongol an bungotnan ditu'u!
3At ditu'uh tun babluy an mumpa'ampa nongkay ya mangunud hinan mandal Apo Dios
ya ma'ahhapul an dayawon tu'u Hiya,
ya aton tu'uy maphod,
ya ipa'ampa tu'u goh di odol tu'u
ta olom ya melwang tu'un den timpun pangipuhayanah nan nidugah an bungotna!”
Hay Ahumalyaan nan iPhilistia
(Isa. 14:28-32; Jer. 47:1-7; Ezek. 25:15-17; Joel 3:4-8; Am. 1:6-8; Zech. 9:5-7)
4Ya ha"in an hi Zephaniah ya inali' nan ma'at hinan babluy ad Philistia an inali' di,
“Nan siudad ad Gaza ya mabukawan,
ya mun'apa"i goh ad Ashkelon,
ya ma'amin an mun'apatoy nan tatagud Ashdod hi tongan di algaw,
ya mun'akaphul an amin nan tataguh ad Ekron an babluyda.
5Ti ma'idutan ayun numpunhituh nan pingit di baybay#2:5 Unu nan Mediterranean Sea. an da'yun holag Kereth
ti da'yuy a'atan nan inalin Apo Dios an inalinay,
Pumpatoy'u da'yu ta engganay un mi'id ah ma'angang!
Hiyah ne inalina.
6At henen babluyyuh nan pingit di baybay
ya mumbalin hi pumpahtulan ya pu'od di kalnilu,
7ya nan agguy natoy an holag Judah di ad bagih nan pumpahtulanyu.
Ya wa ay ta mahdom ya umuyda molo' hinan a'abung ad Ashkelon
ti hi Apo Dios an Diosda ya ipapto'na dida,
at ipabangngadna dida ta hakuponda din babluyda.”
Hay Amoltaan nan iMoab ya nan i'Ammon
(Moab: Isa. 15:1-16:14; 25:10-12; Jer. 48:1-47; Ezek. 25:8-11; Am. 2:1-3; Ammon: Jer. 49:1-6; Ezek. 21:28-32; 25:1-7; Am. 1:13-15)
8Hi Apo Dios ya inalinan ha"in an hi Zephaniah di,
“Dengngol'u nan munha'it an panaphapit nan iMoab ya nan i'Ammon hinan tatagu'
ti mumpahiyada ahan an alyonday,
Polhonmi nan babluyyu!
9Mu Ha"in an matattagun Dios an Diosyun holag Israel
ya ihapata' an mapatoy nan tatagud Moab an umatdad Sodom,
ya nan tatagud Ammon an umatdad Gomorrah
ti mumbalin danen babluy an adi tummol di mitanom hi enggana.
Mu nan tatagu' hi pidwa ya hidiy pumbabluyanda!”
10Ya ha"in an hi Zephaniah ya inali' goh di,
“Hiyah ne aat di pummoltan Apo Dios an nidugah di abalinanah nan tatagud Moab ya ad Ammon
an dumalat nan pumpahiyaanda ya nan pamihupihulandah nan tataguna.
11At nidugah an atata'ot di ipaholtap Apo Dios ay dida,
ya pumbalinona an amin nan abulubulul an inyamman di tataguh tun lutah mi'id di hulbida.
At la'tot ya an amin di tataguh nan abablubabluy an awadan nan lutada tuwali ya hi Apo Dios di dayawonda.”
Hay Amoltaan nan iCush#2:12 Unu nan i'Ethiopia.
(Isa. 18:1-7; 20:1-6)
12Ya alyo' goh an hi Zephaniah di,
“Da'yun iCush ya ipa'alin goh Apo Dios nan titindalun nan buhulyu#2:12 Mid mapto' ya nan iBabylon.
ta pumpatoy da'yu.”
Hay Amoltaan nan i'Assyria
(Isa. 14:24-27)
13Ya alyo' goh an hi Zephaniah di,
“Usalon Apo Dios nan nidugah an abalinana an mama"ih nan babluy ad Assyria
an wah immapit hi iggid hi un hagangon di buhu'an di algaw,
ya ta"on ad Nineveh an kapitulyuda ta mumbalin hi mapulun an mi'id danum ta mun'amaganan nan luta.#2:13 Gapu ta napa"id Nineveh hidin 612 B.C. at mahapul an hidin gutud din impa'innilan Zephaniah ya ahi ma'at 612 B.C.
14At hiyay a'amungan nan animal hi inalahan ya nan numbino'ob'on an animal,
ya nan guup, ya tu"u'an, ya akup ya mumpunhitudah nan nun'apa"i an timpluda,
ya ma"adngol di alidah nan do'ol an tawa.
Ya humelhelda goh hinan bunol di abung,
ya mun'a'aan an amin nan ayiw an cedar an niyammah nan a'abung.#2:14 Nabayag an na'aliwan nan lugal hi awadan din napa"in siudad ad Nineveh, mu ad ugwan ya inah'upanday awadana.
15Umat hinay ma'at hinan a'abung hinan siudad
ti nan tatagu ya nidugah di pumpahiyaandah nan abalinanda
ti hay ninomnomda ya malenggopda.
Ya hay ninomnomda goh ya nan siudadday ma'abbi'ah hi an amin an asiudasiudad hitun luta,
mu ad ugwan ya nun'apa"i an hiyay punhituwan nongkay nan numbino'ob'on an animal hi inalahan.
At an amin nan maluh an mannig hi aatna ya abatlanda ya mungwigiwigdan mannig.”
Currently Selected:
Zephaniah 2: NHAD
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
