អេសេគាល 28
28
ព្រះបន្ទូលប្រឆាំងនឹងស្តេចក្រុងទីរ៉ុស
1ព្រះបន្ទូលរបស់ព្រះយេហូវ៉ាក៏មកដល់ខ្ញុំថា៖ 2«កូនមនុស្សអើយ ចូរប្រាប់ដល់ម្ចាស់ដ៏ធំនៃក្រុងទីរ៉ុសថា ព្រះអម្ចាស់យេហូវ៉ាមានព្រះបន្ទូលដូច្នេះ
ដោយព្រោះអ្នកកើតមានចិត្តធំ
ហើយបានពោលថា យើងជាព្រះ
យើងអង្គុយលើបល្ល័ង្ករបស់ព្រះនៅកណ្ដាលសមុទ្រ
ប៉ុន្តែ អ្នកជាមនុស្សទេ មិនមែនជាព្រះឡើយ
ទោះបើអ្នកបានតាំងចិត្តដូចជាព្រះហឫទ័យព្រះក៏ដោយ។
3អ្នកមានប្រាជ្ញាលើសជាងដានីយ៉ែលទៅទៀត
គ្មានការសម្ងាត់ណា ដែលលាក់កំបាំងនឹងអ្នកសោះ។
4អ្នកបានប្រមូលទ្រព្យសម្បត្តិ
ហើយប្រមូលមាសប្រាក់ដាក់ក្នុងឃ្លាំង
ដោយប្រាជ្ញា និងយោបល់របស់អ្នក។
5អ្នកបានចម្រើនទ្រព្យសម្បត្តិដោយសារប្រាជ្ញា
ដ៏ជ្រាលជ្រៅរបស់អ្នក និងការធ្វើជំនួញផង
ហើយចិត្តអ្នកបានស្ទួយឡើង
ដោយព្រោះទ្រព្យសម្បត្តិរបស់អ្នក។
6ហេតុនោះ ព្រះអម្ចាស់យេហូវ៉ាមានព្រះបន្ទូលថា
ដោយព្រោះអ្នកបានតាំងចិត្ត
ឲ្យបានដូចជាព្រះហឫទ័យនៃព្រះ
7យើងនឹងនាំសាសន៍ដទៃ គឺជាពួកអ្នកគួរស្ញែងខ្លាច
ពីគ្រប់សាសន៍មកលើអ្នក
គេនឹងហូតដាវទៅទាស់នឹងលម្អនៃប្រាជ្ញារបស់អ្នក
ព្រមទាំងបង្អាប់រស្មីរបស់អ្នក។
8គេនឹងទម្លាក់អ្នកទៅក្នុងជង្ហុកធំ
ហើយអ្នកនឹងត្រូវស្លាប់ដូចជាពួកអ្នក
ដែលត្រូវគេចាក់សម្លាប់នៅកណ្ដាលសមុទ្រ។
9នៅគ្រានោះ តើអ្នកនៅតែពោល
នៅមុខអ្នកដែលសម្លាប់អ្នកថា
យើងជាព្រះទៀតឬ?
ប៉ុន្តែ នៅក្នុងកណ្ដាប់ដៃអ្នកដែលសម្លាប់អ្នក
នោះអ្នកជាមនុស្ស មិនមែនជាព្រះឡើយ។
10អ្នកនឹងត្រូវស្លាប់ ដូចជាពួកអ្នកមិនកាត់ស្បែកដែរ
គឺដោយដៃនៃពួកសាសន៍ដទៃ
ដ្បិតយើងបានចេញវាចាហើយ
នេះជាព្រះបន្ទូលរបស់ព្រះអម្ចាស់យេហូវ៉ា»។
ទំនួញអំពីស្ដេចក្រុងទីរ៉ុស
11ព្រះបន្ទូលរបស់ព្រះយេហូវ៉ាបានមកដល់ខ្ញុំទៀតថា៖ 12«កូនមនុស្សអើយ ចូរផ្តើមពាក្យទំនួញពីដំណើរស្តេចក្រុងទីរ៉ុស ហើយប្រាប់ថា ព្រះអម្ចាស់យេហូវ៉ាមានព្រះបន្ទូលដូច្នេះ
អ្នកជាមនុស្សមានលក្ខណៈពេញខ្នាត
មានប្រាជ្ញាពេញលេញ
ហើយមានសម្ផស្សគ្រប់លក្ខណ៍។
13ពីដើម អ្នកបាននៅក្នុងច្បារអេដែនជាសួនរបស់ព្រះ
អ្នកបានប្រដាប់កាយដោយត្បូងដ៏មានតម្លៃគ្រប់មុខ
គឺសាមស៊ី ទោបុ័ត ពេជ្រ បេរីល អូនីក្ស
មណីជោតិ កណ្តៀង មរកត បារកេត និងមាស
ឯក្រាប់ និងខ្លុយរបស់អ្នក
បានត្រៀមទុកសម្រាប់អ្នកតាំងពីថ្ងៃដែលអ្នកកើតមក។
14អ្នកជាចេរូប៊ីនដែលបានចាក់ប្រេងតាំងឡើង
ជាអ្នកគ្របបាំង គឺយើងបានតាំងអ្នកឡើង
ឲ្យអ្នកបាននៅលើភ្នំបរិសុទ្ធរបស់ព្រះ
អ្នកក៏បានដើរទៅមកនៅកណ្ដាលថ្មភ្លឺចាំង។
15ចាប់តាំងពីថ្ងៃដែលអ្នកកើតមក
នោះអ្នកបានគ្រប់លក្ខណ៍ក្នុងគ្រប់ផ្លូវរបស់អ្នក
រហូតដល់ពេលដែលឃើញមាន
សេចក្ដីទុច្ចរិតនៅក្នុងអ្នក។
16ដ្បិតដោយសារការជួញប្រែដ៏បរិបូររបស់អ្នក
នោះគេបានបំពេញអ្នកដោយសេចក្ដីច្រឡោត
ហើយអ្នកបានធ្វើបាប ហេតុនោះ
យើងបានបោះចោលអ្នកចេញពីភ្នំនៃព្រះ
ទុកដូចជារបស់អាប់ឱនទៅវិញ
ឱចេរូប៊ីនដែលគ្របបាំងអើយ
យើងបានបំផ្លាញអ្នកចេញពីកណ្ដាលថ្មភ្លឺចាំងនោះ
17ចិត្តអ្នកបានស្ទួយឡើង
ដោយព្រោះសេចក្ដីលម្អរបស់អ្នក
អ្នកបានបង្ខូចប្រាជ្ញាអ្នក
ដោយពន្លឺរស្មីរបស់អ្នក
យើងបានបោះអ្នកចុះដល់ដី
ព្រមទាំងដាក់នៅមុខពួកស្តេច
ឲ្យគេបានពិចារណាអ្នក។
18អ្នកបានបង្អាប់អស់ទាំងទីបរិសុទ្ធរបស់អ្នក
ដោយអំពើទុច្ចរិតដ៏បរិបូររបស់អ្នក
ហើយដោយសេចក្ដីទុច្ចរិតនៃការជួញប្រែរបស់អ្នក
ហេតុនោះ យើងបានធ្វើឲ្យមានភ្លើង
ចេញពីកណ្ដាលអ្នកមក
ភ្លើងនោះបានឆេះបំផ្លាញអ្នក
យើងបានឲ្យអ្នកទៅជាផេះនៅលើផែនដី
នៅចំពោះភ្នែកនៃអស់អ្នកដែលឃើញអ្នក។
19អស់អ្នកនៅគ្រប់ទាំងសាសន៍ដែលស្គាល់អ្នក
គេនឹងស្រឡាំងកាំងដោយព្រោះអ្នក
អ្នកបានត្រឡប់ជាទីស្ញែងខ្លាច
ហើយលែងមានជារៀងរហូតទៅ»។
ព្រះបន្ទូលប្រឆាំងនឹងក្រុងស៊ីដូន
20ព្រះបន្ទូលរបស់ព្រះយេហូវ៉ាបានមកដល់ខ្ញុំថា៖ 21«កូនមនុស្សអើយ ចូរតាំងមុខអ្នកត្រង់ទៅឯស៊ីដូន ហើយថ្លែងទំនាយទាស់នឹងទីក្រុងនោះថា 22ព្រះអម្ចាស់យេហូវ៉ាមានព្រះបន្ទូលដូច្នេះ
ម្នាល ស៊ីដូនអើយ យើងទាស់នឹងអ្នក
ហើយយើងនឹងបានតម្កើងឡើងនៅកណ្ដាលអ្នក
នោះគេនឹងដឹងថា យើងនេះជាព្រះយេហូវ៉ាពិត
ក្នុងកាលដែលយើងបានសម្រេច
សេចក្ដីយុត្តិធម៌ដល់វា
ហើយបានញែកជាបរិសុទ្ធនៅក្នុងវាដែរ
23ពីព្រោះយើងនឹងចាត់អាសន្នរោគទៅក្នុងវា
និងឈាមទៅគ្រប់ផ្លូវរបស់វា
ពួកអ្នកដែលត្រូវរបួសនឹងដួលនៅកណ្ដាលវា
ដោយមានដាវគ្របសង្កត់នៅគ្រប់ទិស
នោះគេនឹងដឹងថា យើងនេះជាព្រះយេហូវ៉ាពិត។
24ដូច្នេះ លែងមានបន្លាចាក់ចុចដល់ពួកវង្សអ៊ីស្រាអែល ឬបន្លាធ្វើទុក្ខនៅក្នុងសាសន៍ណានៅព័ទ្ធជុំវិញ ដែលប្រព្រឹត្តនឹងគេដោយមើលងាយទៀតឡើយ នោះគេនឹងដឹងថា យើងនេះជាព្រះអម្ចាស់យេហូវ៉ាពិត»។
ព្រះពរសម្រាប់អ៊ីស្រាអែលនៅពេលអនាគត
25ព្រះអម្ចាស់យេហូវ៉ាមានព្រះបន្ទូលដូច្នេះថា៖ «កាលណាយើងបានប្រមូលពួកវង្សអ៊ីស្រាអែល មកពីគ្រប់សាសន៍ ដែលគេត្រូវខ្ចាត់ខ្ចាយទៅនោះ ហើយយើងបានញែកជាបរិសុទ្ធនៅក្នុងពួកគេ ចំពោះភ្នែកនៃសាសន៍ដទៃ នោះគេនឹងអាស្រ័យនៅក្នុងស្រុករបស់ខ្លួន ដែលយើងបានឲ្យដល់យ៉ាកុប ជាអ្នកបម្រើយើង។ 26គេក៏នៅក្នុងស្រុកនោះដោយសុខសាន្ត គេនឹងសង់ផ្ទះ ព្រមទាំងដាំដំណាំទំពាំងបាយជូរ និងអាស្រ័យនៅដោយសុខសាន្តផង ក្នុងកាលដែលយើងសម្រេចសេចក្ដីយុត្តិធម៌ដល់ពួកអ្នកនៅជុំវិញដែលបានប្រព្រឹត្តនឹងគេដោយសេចក្ដីមើលងាយ នោះគេនឹងដឹងថា យើងនេះជាព្រះយេហូវ៉ា គឺជាព្រះនៃគេពិត»។
Currently Selected:
អេសេគាល 28: គកស១៦
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies
