Luka 18

Namutsedhimwa kuyomba

1Makisa Yesu kawambia wanafund̯iwe inganyo ḍya kuwayongweeza kuyomba meshi pfasipfo kudhimwa. 2Kawamba, “Kwiwa t̯oibi jwa mudzi mumodza asimushooga Muungu, nolawe kumuḍyali muntu. 3Na mumo mudzini kwiwa muke muchiwa eyesindiiya kumwendea huyu t̯oibi akilacha hachiye, akimwamba, ‘Nipfonya na huyu muntu niiye na d̯ubi nae.’ 4Huyuḍe t̯oibi kadziza kwa muḍa muyeya, ela mwisowe kamamat̯a mojoni mwakwe, kamba, ‘Hat̯a ninkitsamuḍyali Muungu ambu muntu yuḍejwonse, 5had̯i nimuhendeye hachi huyu muke huyu kwa kwamba kakunisumbuwani muno. Na ninkitsahenda hivyo, ananitsovya nsoho.’ ” 6Makisa Yesu kongeza kuwambia wanafund̯iwe, kamba, “Avi vya ayu t̯oibi muzuka aneneyevyo muviimuka urembo? 7Jeje t̯u akihenda dzavyo, ehe fat̯i Muungu, nkanawahendea hachi hat̯a awa wantuwe weonamuyomba siku na musikahi? Anawa mumpompowe kwambukuya viiyo vyao? 8Hachi nyakumwambiani, anawalachia hachi pfasipfo kuḍaḍamaa. Ela mimi *Mwana jwa Ad̯amu nidzepfokudza lumwenguni, nidzat̯onga wantu weo na faro?”

Mukiyomba na hachi Muungu anamufwiya t̯ei

9Makisa Yesu kawambia na inganyo wantu wadziserefat̯iyeo kwamba ni wahachi, na wabalifiyeo wangine. 10Kamba, “Kwiwa wantu wawii wendeyeo *Hekaluni kuyomba. Mumodza ewa Mufarisayo, na yungine ewa *muhwaa kuwa. 11Huyu Mufarisayo kasumama kadziyombea na mojoni kamba, ‘E Muungu, nina asant̯a kwamba mimi sikwaa dza wantu wangine wevi, weonakaiya wantu chihako na wavunza ukwe. Nina asant̯a kwamba sikwaa hat̯a dza huyu muhwaa kuwa huyu. 12Mimi nakaa na kufunga myeedha miwii kwa ḍyuma, na kuyavya fungu ḍya kumi kwa kula nichonapata.’ 13Ela huyu muhwaa kuwa kasumama na jwa kuye na nkakuweza hat̯a kunuya matsoye dzuu yuwinguni. Kadzibiga-biga ḅagwini kwa kudziut̯i na kayomba kamba, ‘E Muungu nifwiya t̯ei, mimi ni munabvise!’ ” 14Makisa Yesu kamba, “Nyakumwambiani, huyu endeyee nyumbani akiwa kayatsijwa nabviseze, ni huyuḍe muhwaa kuwa na wala si huyuḍe Mufarisayo. Koro kula adzikuziye anasuswa na kula adzisusiye anakuzwa.”

Yesu kavodhya wana vichuchu

Matayo 19:13-15; Marko 10:13-16

15Nsiku modza, Yesu kayehejwa wana vichuchu ili awapfaze mikono awavodhye. Ela hawa wanafund̯iwe wepfowaona, wawavingira hawaḍe wawayeheyeo. 16Ela Yesu kawahana hawa wana na kawambia wanafund̯iwe, “Wayatseni hao wana wadze kwangu. Namutsewavingira, koro Uhaju wa Muungu mbwa wantu weo dzao. 17Hachi nyakumwambiani, yuḍejwonse asiyeupfokea Uhaju wa Muungu dza mwana kachuchu, huyo nkawezi kuunjia meshi.”

Jabva ntaungize muntu Uhajuni mwa Muungu

Matayo 19:16-30; Marko 10:17-31

18Nsiku modza, muyongozi mumodza jwa Kiyahud̯i kamuuza Yesu kamwamba, “Mwaalimu mwema, inanimala nihende kintu ga, ili niweze kuwa na maisha ya kuunga na yuungo?” 19Yesu kamuuza kamwamba, “Kut̯i kwakunihanani mwema? Ntaku eye mwema lamud̯a Muungu jeje heket̯u! 20Ezi amuri za Muungu nkukuzimanya? Zyamba, ‘Nkudzonjie rangani, nkudzoyage, nkudzokwiwe, nkudzomuneneye mwenziwo nsuwe, muhile babajo na mamajo.’ ” 21Huyuḍe muntu kambukuya kamba, “Hayo yonse niyagija hangu ninkiwa mwana.” 22Yesu epfosikia haya, kamwamba, “Kusaa na dzambo modza zaid̯i ḍya kuhenda. Guza vyonse wivyonavyo na hizi fwedha uwapfe makowesa. Ukihenda hivyo kudzawa na nkandi mbinguni. Makisa nzoo uniuḅe.” 23Huyuḍe muntu epfosikia hivi, kanjijwa ni ngiru na kagonzowa, koro ewa ni jabva muno. 24Yesu kamuyowa huyuḍe muntu kisa kamba, “Ni vyumu muno kwa muntu jabva kuunjia Uhaju wa Muungu! 25Koro ni vivodho muno kwa ngamia kuchia na kwa anga ḍya lilima, kuliko kwa muntu jabva kuunjia Uhaju wa Muungu.” 26Hawaḍe wantu weowakimusikiiya wamuuza wamwamba, “D̯ubva ikiwa kwamba ni dzevihivi mani ni ga jwa kupfona?” 27Yesu kawambukuya kawamba, “Ḍisiḍyowezekana kwa mwanaad̯amu, kwa Muungu ḍinawezekana.”

28Makisa Pet̯ero kamwamba Yesu, “T̯ayowa Ḅwana, swiswi huyatsa makwehu, hukuuḅa wewe.” 29Nae kamwamba, “Hachi nyakumwambiani, kula ayatsie nyumbaye, mukaziwe, wanduguzwe, wavyaziwe ambu wanawe kwa dzambo ḍya Uhaju wa Muungu, 30Muungu anamuujiza menji zaid̯i hizi hizi ngera na kumumpa maisha ya kuunga na yuungo ngera zizokudzani.”

Yesu kanena kawii dzuu ya kufwakwe na kufufukakwe

Matayo 20:17-19; Marko 10:32-34

31Makisa Yesu kawakuntia geri hawa wanafund̯iwe kumi na wawii na kawamba, “T̯asikiani, humaawa kwendani Yerusalemi, kudzekot̯imizwa kula kintu chorejwecho ni manabii dzuu yangu mimi Mwana jwa Ad̯amu. 32Nidzayavigwa kwa wantu wa vyeet̯i, nao wadzanibaladhaiya, wadzanihendea mambo ya kinyaya na kunikamia mahe. 33Wadzanibiga malucha makisa wadzaniyaga. Ela nsiku ya hahu, nidzafufuka kuyawa kwa wafu.” 34Ela wanafund̯iwe ntawakuimuka chuuwo hat̯a kimodza cha Yesu na wala maana ya hivi vyuuwovye koro viiwa mfitsoni.

Yesu kapfonya ntumbu matso

Matayo 20:29-34; Marko 10:46-52

35Wepfofika hafufi na Yeriko, waona ntumbu matso akaiye chihako geri ya njia akiyomba-yomba. 36Epfosikia hoisa ya kit̯aro chichochikichia na hapfaḍe, kauza kamba, “Munamba kunani?” 37Wamwambukuya wamwamba, “Ni Yesu jwa Nazareti kakuchiani.” 38Ndookomu kamukelelea kamwamba, “E Yesu *mwana jwa D̯aud̯i#18:38 Mwana jwa D̯aud̯i maanaye ni mudzukuu haju D̯aud̯i. nifwiya t̯ei!” 39Hawaḍe wantu wayongoweyeo wamupfohosa wamwamba anyamae. Ela huyuḍe ntumbu matso kongeza kuḅaa madzwi akyamba, “Mwana jwa D̯aud̯i ad̯o nifwiya t̯ei!” 40Yesu kasumama na kaamuru kwamba huyu ntumbu matso apfiikwe. Epfokwenda hafufi, Yesu kamuuza kamwamba, 41“Unatsaka nikuhendeye kintu ga?” Nae kamwambukuya kamwamba, “Ḅwana natsaka kuona.” 42Na Yesu kamwamba, “D̯ubva ona! Faroyo ikupfonya.” 43Nae pfapfo kaḍabva kuona. Ndookomu kamuuḅa Yesu, huku akimushad̯a Muungu. Na wantu wonse wayaoneyeo haya haya mafara wamushad̯a Muungu.

Currently Selected:

Luka 18: pkb

Highlight

Copy