Luka 19

Zakayo kalacha kumumanya Yesu

1Yesu epfoakyenda Yerusalemi, kanjia na Yeriko. 2Humuḍe mudzini kwiwa mukuu jwa *wahwaa kuwa eyekuwa jabva, sariḍye ndiye Zakayo. 3Ekitsaka kumuona Yesu, ela nkakuweza kwa dzambo ḍye t̯ut̯a ya wantu na huku ewa mufufi. 4Ndookomu kad̯arama usoni ye t̯ut̯a, makisa kapfaa mukujuni dzuu ili amuone Yesu, koro Yesu ewa njwa kuchia nehiḍe njia. 5Yesu epfofika hapfa mukujuni, kayowa dzuu makisa kamwamba, “Zakayo, suka haraka koro yeo ni mugeniwo.” 6Zakayo kasuka nsi haraka, na kamupfokea Yesu na tsekea nkuu. 7Wantu wonse waoneyeo hivi waḍabva kuḅuguma-ḅuguma wakyamba, “Yesu kendawa mugeni nyumbani mwa munabvise!” 8Ela Zakayo kasumama kamwamba Ḅwana, “Ḅwana, nahwaa nusu ya vija nivyo navyo, naviwapfa makowesa. Na ikiwa kwamba niwa nihwaa kuwa kwa muntu kuchia chima na makulekule, namuujiza myeedha mine zaid̯i.” 9Yesu kamba, “Yeo wantu wa nyumba hii wapata mupfonyo. Koro hat̯a huyu nae njwa yuvyee jwa Iburahimu. 10Koro mimi *Mwana jwa Ad̯amu nidziya kuwalacha na kuwapfonya hawaḍe waariyeo.”

Wahumisi wahikizika na wasiohikizika

11Wantu wakwakupfindiiyani haya ya Yesu eyoakinena, wat̯ara ya kwamba Uhaju wa Muungu umaawa hafufi kut̯upuka. Koro ewa kamafika hafufi muno na Yerusalemi. Na Yesu kongeza kunena na inganyo 12kamba, “Kwiwa muntu mumodza jwa nyumba ya kihaju anjiiye charo cha kwenda nsi ya kuye akawekwe haju, makisa auje. 13Asidzanuka, kawahana wahumisiwe kumi, kawapfa fwedha sawa na kawamba, ‘Zihendeyeni guzi hizi fwedha hizi hat̯a nidzepfouja.’ 14Ela wantu wa hiḍe nsiye wemukeva. Ndookomu wahuma wantu nyumaye na ḍaamisa ya kunena kwamba, ‘Ntahumut̯aki huyu muntu awe haju jwehu.’ 15Epfowekwa haju kauja kwao. Makisa kawaḍama wahumisiwe awapfiyeo fwedha, wadze wamwambiye faiḍa wapatiyeo. 16Jwa d̯ura kadza kamwamba, ‘Ḅwana, nizihendea guzi na nipata myeedha kumi ya hizi fwedha unimpiyezo.’ 17Huyu ḅwana jwakwe kamwamba, ‘Kuhenda urembo muno! Wewe u muhumisi mwema na wiyenahikizika. Ndookomu nakuweka mukuu jwa midzi kumi.’ 18Muhumisi jwa pfii nae kanjia kamba, ‘Ḅwana, nipata myeedha mitsano zaid̯i ya hizi fwedha unimpiyezo.’ 19Na huyu ḅwana jwakwe kamwambukuya kamwamba, ‘Nakuweka mukuu jwa midzi mitsano!’ 20Makisa muhumisi yungine kadza kamwamba, ‘Ḅwana, ziziḍe fwedha unimpiyezo hizino. Niiwa nizibiga fundo nguoni nizifitsa. 21Nikikushooga wewe, koro nikumanya kwamba wewe u muntu mumu. Unatsaka ukihwaa kisichokuwa chako na ukivuna usipfoima.’ 22Huyuḍe ḅwana kamwamba, ‘Katsi wewe u muhumisi muzuka dzevihivi? Nakuhukumu na vyuuwo vya kanwako mwenye. Katsi kumanya kwamba mimi ni muntu mumu nitsakiye kuhwaa kisichokuwa changu na kuvuna nisipfoima! 23Kut̯i d̯ubva hizi fwedha nkukuziweka bengi ili kwamba nangaa zindenivyaiya?’ 24Makisa kanena na hawaḍe wantu wasumamiyeo kawamba, ‘Zimupfokeni hizi fwedha ezonazo na muzimumpe huyuḍe muhumisi ongezeye fwedhaze myeedha kumi.’ 25Ela wao wamwambukuya wamwamba, ‘Ḅwana, ae nkakwaa na fwedha nyinji hangu d̯ura!’ 26Nae kawamba, ‘Hachi nyakumwambiani, huyuḍe eye na kintu na akikitumia, huyo anakwongezejwa. Ela huyuḍe asikintu na akitsaawa muhikizika, ḅasi hat̯a hakaḍe kachuchu ekonako anakapfokwa.#19:26 Haya matsoro ya Kiyunani yana maana ya kwamba: huyuḍe eyenatsaka kunisikiiya anapfegwa kuimuka zaid̯i na zaid̯i, ela huyuḍe asiyetsaka kunisikiiya, hat̯a hakaḍe kachuchu amanyiyeko nako pia anakapfokwa. 27Ela nyabva wangu, wasiotsaka niwe haju jwao, wayeheni hapfa, muwayage usoni yangu!’ ”

Yesu kanjia Yerusalemi na dheli

Matayo 21:1-11; Marko 11:1-11; Yohana 12:12-19

28Epfokwisa kunena haya, Yesu kawayongowa hawa wanafund̯iwe kwenda Yerusalemi. 29Epfofika Betifage na Betania, pfantu pfa Murima wa mihi ya Mizeituni, Yesu kahuma wanafund̯iwe wawii nguzi. 30Kawamba, “Endani huḍe mudzi wiwo usoni yenu. Mukwakuunjiani t̯u, munaona mwana hare asiyedzapfajwa ni muntu, kafungwa. Mufunguyeni, mumuniyeheye. 31Muntu akimuuza akimwamba, ‘Kut̯i mwakumufunguyani huyu mwana hare?’ Mwambeni, ‘Ḅwana ana shuuli nae.’ ”

32Hawa wanafund̯i wanuka na wendawaona dza viviḍe vya Yesu awambiiyevyo. 33Na wepfowakimufunguya huyu mwana hare, wenye wawauza wawamba, “Ayu mwana hare mwakumufungwiiyani?” 34Hawa wanafund̯i wawambukuya wawamba, “Ḅwana ana shuuli nae.” 35Makisa wamuhwaa huyu mwana hare na wamumupfiikia Yesu. Wakisa kumuhandika na nkanzu zao wamugijiija Yesu apfae. 36Epfoakichia, wantu wangine wahandika nkanzu zao njiani.#19:36 Wahenda hivi kumumpa hila Yesu, na kuyanga kwamba wadziyavya kwakwe. 37Na epfofika hafufi na t̯eremuko ḍya Murima wa Mizeituni, kit̯aro chonse cha wanafund̯iwe waḍabva kumushad̯a Muungu na madzwi makuu kwa haya mafara ya kumakisa yonse weyoona. Wamushad̯a wakyamba,

38“Kavodhyegwa jeje haju,

eyekudzani kwa sari ḍya Ḅwana!

Kuna naghea mbinguni

na marembo yaa kwa Muungu!”

39Ela *Mafarisayo wangine weokuwa humuḍe kit̯aroni wamwamba Yesu, “Mwaalimu, wambe hawa wanafund̯iwo wanyamae!” 40Ishinu Yesu kawambukuya kawamba, “Nyakumwambiani, hawa wakinyamaa, haya mawe yenye yanabiga madzwi.”

Yesu kat̯aḅiri kunangwa kwa Yerusalemi

41Yesu epfofika hafufi na Yerusalemi, akiuona hu mudzi na kahaku, kawiiya 42kamba, “Ad̯o ni mala ya kwamba undemanya yakumaliyeyo kuhenda ili uwe na naghea! Ela kwaa kizani nkukwakuonani. 43Koro nsiku zakudzani, nyabvao wadzepfokunjiiya na kukuzinga na kula ḍanda hat̯a utsowe njia ya kud̯aramia. 44Wadzakunanga wewe na kuwayaga wantuwo. Ntakukudzahafa iwe hat̯a modza dzuu ya iwe ḍingine. Koro nkukuhambuya ngera za Muungu adziyezo kukupfonya.”

Yesu kad̯aramisa waguzi Hekaluni

Matayo 21:12-13; Marko 11:15-16; Yohana 2:13-16

45Epfofika Yerusalemi, Yesu kenda kanjia *Hekaluni na kaḍabva kuwad̯aramisa waguzi. 46Kawamba, “Vyoregwa kwamba, ‘Nyumba yangu inawa nyumba ya mayombo.’ Ela nywinywi muihendeza mpango ya wadhara!”

Yesu kayongweeza Hekaluni

Marko 11:17-19; Yohana 2:17-22

47Yesu kayongweeza Hekaluni kula nsiku. Wakohani wakuu, waalimu wa *Sharia, na wayongozi wa wantu, walacha kumuyaga. 48Ela ntawakuweza, koro wantu wonse wegija kusikiiya vyuuwovye, na ntaku atsakiye kut̯ana nae.

Currently Selected:

Luka 19: pkb

Highlight

Copy