Luka 17

Mayongweezo dzuu ya kuyatsiana

Matayo 18:6-7, 21-22; Marko 9:42

1Yesu kawamba wanafund̯iwe, “Saa zonse kuna maḍemo ya kungiza wantu nabviseni, ela kadzawa na d̯ina iyodze muntu adzeeyeha haya haya maḍemo! 2Vindeewa urembo t̯ambere huyo huyo muntu andefungwa iwe ḍya kupaazia ot̯ini na angukijwe ḅaharini kuliko, kuyatswa ahendeze mumodza jwa hawa wachuchu hawa agwe nabviseni. 3D̯ubva dzit̯unzeni! Ndugujo akikutsowea mweere, na akigwa matsowa, muyatsie. 4Hat̯a akikutsowea myeedha mifungahe kwa nsiku modza, na kula mweedha akikuujia akikwamba, ‘Nitsowa.’ Ni had̯i umuyatsie.”

Mayongweezo dzuu ya nguvu za faro

5Makisa hawa *ntumi wamwamba Yesu, “Ḅwana, hwongeze faro yehu.” 6Ela Yesu kawambukuya kawamba, “T̯ambere mundeewa na faro hat̯a iyo ndoḍo dza mbeju ya tsare, mundeweza kuwambia hu mukuju huu, ‘Kuka na mizini na ukameye ḅaharini!’ Nao undemusikia.”

Kazi ya muhumisi

7Yesu kongeza kunena na wanafund̯iwe kamba, “Ikiwa kwamba mumodza jwenu ana muhumisi awee kuimani ambu kut̯ikisani mbuzi, akiuja na nkondeni ambu mat̯ungoni, anamwamba arebve aḍye nguzi chakuḍyache? 8Hat̯a! Ishinu, anamwamba, ‘Nielekanyia chakuḍya, na udzifunge kunihumikia ninkiwa kuḍyani na kunwa. Kisa nawe uḍye chakuḍyacho.’ 9Ayu ḅwana anamuyaviza asant̯a ayu muhumisi kwa kuhenda aya amwambiyeo ahende? 10Dza vivyo nanywi mukihenda mwambiijweyo, ambani, ‘Hangu d̯ura hu wahumwa, na huhenda haya yahumaliyeo kuhenda t̯u.’ ”

Yesu kapfonya wantu kumi weokuwa na kwanga

11Yesu epfokuwa charoni kwenda Yerusalemi, kavuka na mumpakani mwa Galilaya na Samaria. 12Epfokuwa hafufi kunjia mudzi mumodza, Yesu kat̯ongana na wantu kumi weokuwa na kwanga. Wasumama na jwa kuye 13na wamukulisa wamwamba, “Yesu, Ḅwana, hufwiye t̯ei!” 14Yesu kawayowa makisa kawamba, “Endani mukadziyanganye kwa wakohani.” Wepfowakyenda kwa wakohani, wadziona kwamba wadhereka na ntawa kwanga kawii. 15Mumodza jwao epfodzihambuya kwamba kapfonywa, kauja kwa Yesu, huku akimushad̯a Muungu na idzwi kuu. 16Kamugwiya Yesu maguuni kamuyavia ḍuḍa. Huyu huyu muntu ewa Musamaria. 17Makisa Yesu kamba, “Kwiwa wantu kumi wapfonyejweo, awa kenda wendaa? 18Kut̯i ni huyu mugeni jeje heket̯u aujie kumuyaviza Muungu ḍuḍa?” 19Ndookomu Yesu kamwamba, “Nuka wende, faroyo ikupfonya.”

Kudza kwa Uhaju wa Muungu

20*Mafarisayo wangine wamuuza Yesu kwamba Uhaju wa Muungu unakudza ari. Nae kawambukuya kawamba, “Uhaju wa Muungu ntonakudza na njia ya kuonekana na matso hat̯a. 21Na wala ntaku jwa kwamba, ‘T̯ayowa, hu Uhaju wa Muungu huuno hapfa!’ Ambu ambe, ‘Huuḍe hapfaḍe!’ Koro Uhaju wa Muungu wa kahi yenu.”

Kudza yupfii kwa Yesu

Matayo 24:23-28, 37-41

22Makisa Yesu kawambia wanafund̯iwe, “Ngera zidzakudza, mudzepfot̯amani kuniona mimi *Mwana jwa Ad̯amu, ela ntamukudzaniona. 23Kudzawa hawaḍe wadzeomwamba, ‘T̯ayowa, huyuḍe hapfaḍe!’ Ambu wamwambe, ‘T̯ayowa huyuno hapfa!’ Ela namutsehikiza muyawe kunilachani. 24Koro dza hiviḍe vya yupfepfe jwivyonamwala jukayangaza lumwengu yuzima, ndivyo vidzevyowa, mimi Mwana jwa Ad̯amu nidzepfokudza. 25Ela d̯ura had̯i nguzi nioneswe tsungu muno na kudzizwa ni wantu wa hizi hizi nsiku. 26Ngera ya kudza kwa Mwana jwa Ad̯amu, wantu wadzahendeka dza hiviḍe wevyohendeka ngera ye zuruwa ya Nuhu. 27Wantu wewa wakaiya raha ya lumwengu: Kuḍya na kunwa, kuhwaa wake na kuyoza wanawake wao, mumpaka hiḍe nsiku ya Nuhu anjiiyeyo humuḍe Safinani, na zuruwa ikidza ikiwayaga wonse. 28Vivyo, vidzahendeka dzeziḍe ngera za Loti. Kula muntu ewa kagija kuḍya na kunwa, kuguya na kuguza, kuhodza na kumbaka. 29Ela nsiku ya Loti ayawiyeo Sod̯oma, Muungu kasusya moho, uhikiyeo dza mvuya ya mawe kuyawa mbinguni na uwayaga tswee. 30Hivyo ndivyo vya wantu wadzevyohenda hat̯a nsiku yangu mimi Mwana jwa Ad̯amu nidzepfokudza. 31Hiyo hiyo nsiku, huyuḍe adzeewa paani#17:31 Iwa ni kawaiḍa kwa Wayahud̯i kuyavya hara d̯arini dzuu. Hiḍi d̯ari ḍiwa ni hiḍi paa ḍya nyumba ḍiḍyokuwa bampa. dzuu, natsesuka anjie nyumbani akahwae vijavye. Dza vivyo, muntu awee nkondeni natseuja nyumbani. 32Kumbukani yamuhendekeeyo mukaza Loti! 33Yuḍejwonse alachie kuyapfonya maishaye, anadzitsovya maisha ya kuunga na yuungo. Ela huyuḍe eye t̯ayari kudzitsovya maishaye ya lumwenguni, anadziwekea maisha ya kuunga na yuungo. 34Nyakumwambiani, siku huo, kunawa wantu wawii weokuyaani t̯at̯a modza, mumodza anahwajwa na yungine anahafa. 35Wake wawii wadzawa kupaazani pfamodza. Mumodza kadzahwajwa na huyu yungine kadzayatswa. [ 36Wayume wawii wadzawa kuimani nkondeni, mumodza anahwajwa, na yungine anayatswa.]”#17:36 Hivi vyuuwo vivyo humu mahani ntavipfo kwa matsoro yangine ya kae ya Kiyunani. 37Makisa wanafund̯iwe wamuuza wamwamba, “Yanahendeka ku, Ḅwana?” Yesu kawambukuya kawamba, “Kula kwipfo na kivimba, makutsu yanaundukizika hapfo hapfo.”

Currently Selected:

Luka 17: pkb

Highlight

Copy