Mahendo 2

Kudza kwa Ruhu Mudheru

1Nsiku ya *Pentekost̯e ipfofika, hawaḍe wonse wamuhikiziyeo *Kirist̯o wat̯ut̯aa pfantu pfamodza. 2Ḅwikira, wadzawasikia saut̯i kuyawa yuwinguni iyokuwa dza saut̯i ya vut̯o kali, na idzaa humu nyumbani mwonse wemokaa chihako. 3Makisa waona vija vivyo dza viḅiliḅili vya moho vikwakud̯achaani na kuhama dzuu ya kula mumodza jwao. 4Wonse wadzajwa ni Ruhu Mudheru na waḍabva kunena na lugha garagara, dza vya Ruhu awapfiyevyo kunena.

5Kwiwa Wayahud̯i weowakikaa Yerusalemi. Wewa wantu wamuhiliyeo Muungu, wayawiyeo kula nsi ya lumwengu. 6Wepfosikia hiyo hoisa, t̯ut̯a nkuu ya wantu idziana hapfaḍe. Wamaka, koro kula mumodza kawasikia hawa wamuhikiziyeo Kirist̯o wakiwa kunenani na hi lugha yakwe mwenye 7Wamaka muno hat̯a wamba, “Dzaambia awa weokunenani na lugha garagara si Wagalilaya tswee? 8Viiwadze d̯ubva, kwamba hwonse hwakuwasikiani wakiwa kunenani na lugha zehu wenye? 9Huyawa Pathia, Midia na Elami, na wangine wayawa Mesopotamia, Yud̯aya, Kapadokia, Ponto, Asia, 10Furugia, Pamufilia, Rumi, Misiri na ḍanda za nsi ya Libiya ziizo hafufi na Ukirene, 11hangu Wayahud̯i na hat̯a wantu wa vyeet̯i vingine wauḅiyeo ḍini ya Kiyahud̯i. Na wangine wehu wayawa Kirete na Araḅuni. Ela hwonse hwakuwasikiani wakiwa kunenani na lugha zehu wenye dzuu ya haya mambo makuu ya Muungu ahendeeyo!” 12Kwa dzambo ḍya kimako na kipapo wechokuwa nacho, waḍabva kuuzana wao na wao wakyamba, “Hivihivi maanaye ni?” 13Ela wantu wangine wawabaladhaiya hawa wahikiza wawamba, “Hawa waruma nawe!”

Kut̯imizwa kwa ahad̯i ya Muungu

14Pet̯ero eyekuwa pfamodza na hawa *ntumi kumi na mumodza, kasumama wima. Kaḍabva kunena ne t̯ut̯a ya wantu na idzwi kuu kamba, “Wenzangu Wayahud̯i nanywi nyonse mwiwokukaani Yerusalemi, pfindiiyani muno hivi vyuuwo vyangu. 15Hawa wantu ntawakuruma dzevi vyenu mwivyokut̯arani hat̯a. Koro amaale ni saa ntahu#2:15 Hii iwa saa ya mayombo kwa Wayahud̯i. Wewa ntawadzahahuya hat̯a kanwa, koro iwa nsikunkuu na wantu ntawangize kintu kanwani wasidzakwenda mayomboni. t̯u za magura. 16Ela haya ndiyo yanenejweyo ni *nabii Yoeli akyamba, ‘Muungu kamba:

17Haya ndiyo nidzeyohenda nsiku za mwiso.

Wantu wonse nidzawakakanyia Ruhu jwangu.

Wanawayume na wanawake wenu wadzayavya unabii.

Orani wenu wadzaona nzozi,

na wazee wenu wadzayoheswa ndoho.

18Ndivyo, hat̯a wahumisi wangu, wake kwa wayume,

nsiku hizo nidzawakakanyia Ruhu jwangu,

nao wadzayavya unabii.

19Nidzahenda mafara ya kumakisa yuwinguni dzuu,

na kuyanga vihambwiizo lumwenguni.

Kudzahika mwazi,

na kudzawa moho na mosi muziho.

20Hiḍi dzuwa ḍidzagijwa ḍinjie kiza,

na hu mwezi nao udzagijwa

na unapfyehuka ranji ya moho dza mwazi.

Haya yadzahendeka kaḅila hi Nsiku ya Ḅwana ya kujuhukumu lumwengu ntaidzafika.

21Makisa, yuḍejwonse adzeemuiya Ḅwana,

huyo kadzapfonywa.’ ”

22Kawii Pet̯ero kamba, “Wantu wa Isiraeli, pfindiiyani hivi vyuuwo! Yesu jwa Nazareti ewa muntu atsanijwe kuhenda kazi ya Muungu. Nanywi mwiiyangwa tswee na mambo ya mafara, mambo ya kumakisa, na vihambwiizo vya Muungu ahendeevyo kuchiiya kwakwe. Nywinywi wenye muyamanya haya, koro yahendeka hapfa, kahi yenu. 23Muungu ewa kesakuhuna kwamba Yesu angizwe mikononi mwenu. Koro iwa miroye mwenye, na evimanya vyonse hat̯a visidzahendeka. Nanywi mumuyaga, kwa kuhendeza wantu wanabvise wamupfatsike muhini mwa mpatsa. 24Ela Muungu kamufufuya kuyawa kwa wafu. Kamunwiiya tsungu wa kufwa, kwa dzambo ḍya kwamba kifo ntachindeweza kumuweka mufungwa. 25Koro D̯aud̯i kanena dzuuye, kamba,

‘Nimuona Ḅwana usoni yangu kut̯wa,

jeje anami, ndookomu sit̯osukusika.

26Ndookomu mojo wangu una tsekea,

nami nanena na tsaiko.

Na hat̯a ninkiwa muntu jwa kudzafwa,

nagija kuwa na madzikwat̯yo kut̯wa.

27Kwa kwamba wewe Muungu nkunaniyatsa lumwengu jwa wafu,

nolawe nkunamuyatsa muhumisi jwako mwema kufwa awowe.

28Kuniyanga njia za maisha,

na kwa dzambo ḍya kwamba kwaa pfamodza nami

nina tsekea nkuu muno.’

29Ndugu zangu, ni had̯i ninene wekeani tswee, dzuu ya bibi jwehu D̯aud̯i. Kafwa na kazikwa, na mbeeraye ya hapfa pfehu hat̯a yeo. 30D̯aud̯i ewa nabii, ndookomu emanya ahad̯i ya Muungu eyomuyapfia kwamba kadzamuhenda mumodza jwa kivyaziche kuwa haju, dzeviḍe vyakwe evyokuwa haju. 31D̯aud̯i ewa kaona mambo ya Muungu adzeyohenda. Ndookomu kanena dzuu ya kufufuka kwa Kirist̯o, epfokwamba, ‘Nkakuyatswa lumwengu jwa wafu, nolawe kivimbache ntachikuwowa.’ 32D̯ubva Muungu kamufufuya yuyo Yesu kuyawa kwa wafu, naswi hwonse humuona na matso yehu wenye. 33Kapfazwa dzuu hat̯a ḍanda ya mukono kuyume wa Muungu, na kapfokea Ruhu Mudheru dza vya Babajwe evyomuahid̯i. Ndookomu, mwichokuonani na kusikia hi hii saasambi ni huyu Ruhu Mudheru ayehejwe kwehu ni Yesu. 34Koro D̯aud̯i mwenye nkakwenda mumpaka mbinguni, ela kamba,

‘Ḅwana kamwambia Ḅwana jwangu,

“Ikaa mukono wangu wa kuyume,

35hat̯a nidzepfowangiza nyabvao mikononi mwako.” ’ ”#2:34-35 Haya matsoro ya Kiyunani yanakwamba, hat̯a nidzepfowaweka nyabvao nsii ya nyajozo.

36Pet̯ero kongeza kunena kamba, “D̯ubva wantu wonse wa Isiraeli, nawamanye hakika kwamba huyu Yesu, mumupfatsikiye nywinywi muhini mwa mpatsa, ndiye jwa Muungu amuhendeye Ḅwana na *Masiya!”

37Hawa wantu wepfosikia hivi, wanjijwa ni muhangaiko mukuu wa myojo. Ndookomu wamuuza Pet̯ero na hawa ntumi wangine, wawamba, “Ndugu zehu, huhendedze?”

38Pet̯ero kawambukuya kamba, “Pfyehuzani mama, kula mumodza jwenu, na mut̯opyegwe kwa sari ḍya Yesu Kirist̯o ili mupate kuyatsijwa nabvise zenu. Nae Muungu anamumpa t̯olaye ya Ruhu Mudheru. 39Koro ahad̯i ya Muungu iwa iwekwa kwenu na kwa vivyazi vyenu, na kwa wonse weo kuye, na kwa wonse wa Ḅwana Muungu jwehu ahaniyeo kwakwe.”

40Pet̯ero kawafunda na kuwangiza nguvu hawa wantu na vyuuwo vingine vinji akiwamba, “Dzipfonyeni, mutsekudzahukumigwa dza hawa wantu wazuka wa hizi hizi nsiku!” 41Wenji wao wahikiza vyuuwovye na wat̯opyegwa. Kit̯aro cha wahikiza chongezeka na wantu chima cha elefu ntahu hiyo hiyo nsiku. 42Hawa wonse wagija kuyongweezwa ni hawa ntumi, wakikaa pfamodza dza ndugu, wakihariana chakuḍyani#2:42 Wekiḍya vintu na chakuḍya cha Ḅwana pfamodza. na kumuyomba Muungu pfamodza.

Maisha ya hawa wahikiza

43Hawa ntumi wahenda mambo ya kumakisa na vihambwiizo vinji, hat̯a kula muntu kanjijwa ni oga. 44Hawa wamuhikiziyeo Kirist̯o wonse wakaa pfamodza dza ndugu, na kutumia kula wechokuwa nacho pfamodza. 45Koro wekiguza makonde yao na vija vyao, na kugawana hizi fwedha kahi yao wonse, kula muntu kwa chima cha haḍya yakwe. 46Kula nsiku wekitsanganika pfamodza Hekaluni. Ela wekikaa na kuḍya pfamodza madzumbani mwao. Wetsakana, na wekiḍya hicho chakuḍya na tsekea. 47Wekikaa na kumushad̯a Muungu, na weetsakwa ni wantu wonse. Ḅwana kagija kuchongeza hichi kit̯aro cha hawa wahikiza nsiku kwa nsiku, koro kula nsiku kwiwa wantu wangine weowakimuhikiza Ḅwana.

Currently Selected:

Mahendo 2: pkb

Highlight

Copy