Mahendo 3

Pet̯ero kapfonya muntu kihewi

1Nsiku modza Pet̯ero na Yohana wenda Hekaluni saa kenda za musikahi, saa za mayombo. 2Hapfaḍe pfa hu muḍyango wa *Hekalu wiwoukihanwa Muḍyango Mwema, kwiwa muntu eyekuwa kihewi hangu kuvyajwani kwakwe. Kula nsiku ekitsukujwa akawekwa hapfa muḍyangoni, ili ayombe fwedha kwa hawaḍe wantu weowakikaa na kunjia Hekaluni. 3Epfomuona Pet̯ero na Yohana wakwakunjiani Hekaluni, kawayomba wamumpe fwedha. 4Wamud̯eḍea gu huyu kihewi, makisa Pet̯ero kamwamba, “T̯ahuyowe!” 5D̯ubva kawaperukia akiyoweeya kupata kintu kuyawa kwao. 6Ela Pet̯ero kamwamba, “Si fwedha wala dhahaḅu za kukupfa. Ela nakupfa hikiḍe nichonacho: Kwa sari ḍya Yesu *Kirist̯o jwa Nazareti nyakukwambiani, nuka wenende!” 7Makisa kamugija mukonowe wa kuyume, kamusumamisa wima. Iyo saa maguuye na ngolokolaze zikumiiya. 8Katsumpiiya dzuu, kasumama, kaḍabva kudzyenendea. Makisa kagijana nao wanjia Hekaluni, akyenda na kutsumpa-tsumpa huku akimushad̯a Muungu. 9T̯ut̯a yonse ya wantu wamuona akiwa kwenendani na kumushad̯a Muungu. 10Wepfohambuya kwamba ni huyuḍe muntu eyeakikaa hapfaḍe pfa hu Muḍyango Mwema wa Hekalu akiyomba-yomba, wamaka na kut̯aḅanka kwa haya yamuhendekeeyo.

Pet̯ero kanena na wantu Hekaluni

11Huyu kihewi kamumat̯ana gu Pet̯ero na Yohana akwakwenendani. Na wantu wonse wamaka, na wawad̯aramia hat̯a uani kwikonahanwa Ua ḍya Sulemani. 12Pet̯ero epfowaona hawa wantu, kawamba, “Wantu wa Isiraeli, kut̯i mumakiswa ni hiḍi dzambo? Munahud̯eḍea muna? Mwakut̯arani kwamba nguvu zehu wenye ambu udheru wehu ndiwo uhuwezeseyeo kumuhendeza ayu muntu enende? 13Huyu Muungu jwa wabibi zehu aḍe Iburahimu, Isaka na Yakobo, kamurembosa Yesu, eye muhumisijwe. Mumungiza mikononi mwa wakuu wehu, nanywi mumudziza usoni ya Pilato, hat̯a Pilato epfohuna kumuyatsa huru. 14Yesu ewa kayawa kwa Muungu na ewa muhachi, ela nywinywi mumudziza. Ishinu mumuyomba Pilato amumufungwiiye muntu eyekuwa muyaji. 15Ndookomu mumuyaga huyu jwa kuyanga wantu maisha kindindi. Ela Muungu kamufufuya kuyawa kwa wafu. Naswi haya huyaona na matso yehu wenye. 16Nguvu za sariḍye ndizo zimumpiyezo huyu kihewi mumanyiyee na mwiyekuonani, kukumiiya maguuye. Faro yehu kwa Yesu ndiyo imumpiyeyo kuwa na matsea, dzevihivi mwivyokumuonani nyonse.

17D̯ubva wandugu zanguni, nimanya ya kwamba haya mumuhendeeyo Yesu nywinywi na wakuu wenu, muyahenda pfasipfo kuimuka mwiyomukihenda. 18Koro Muungu ewa kavilalabva kae na manwa ya manabii wakwe wonse kwamba huyu Mutsanwa jwakwe adzeyemuyeha, ni had̯i aoneswe tsungu. Nae Muungu kayat̯imiza haya aneneyeyo kwa hivi vyenu muhendeyevyo. 19D̯ubva pfyehuzani mama, na mumuujie Muungu, ili apate kumuyatsia nabvise zenu. 20Hendani hivyo ili Ḅwana amumpe ngera za kuyavya hara myojoni mwenu na pia amumuhumiye kawii Yesu, eye *Masiya amumutsaniyee hangu d̯ura. 21Ni had̯i ahafe mbinguni hat̯a ngera ya mambo yonse ya kuhendwa mapfya idzepfofika, dza vya Muungu evyonena kuchiiya na kwa manabii wakwe, hangu kae na kae. 22Koro Musa kamba, ‘Ḅwana Muungu jwenu kadzamuhumia *nabii dzami, jwa kyeet̯i chenu wenye. Ni musikiiye kula adzechonena. 23Yuḍejwonse asisikia vyuuwo vya huyo nabii anat̯anywa na wantu wa Muungu na kunangwa.’ 24Manabii wonse, hangu Samweli hat̯a hawa wamuuḅiyeo nyuma, wewa na hi hii ḍaamisa na walalabva haya mambo yadzeyohendeka hizi hizi nsiku. 25Mu wana wa hawa manabii na waḍala wa ḍamano ḍya Muungu ahendeeḍyo na wabibi zenu. Dza evyonena na Iburahimu akimwamba, ‘Kuchiiya na kwa yuvyeejo, navivodhya vyeet̯i vyonse vya humu lumwenguni.’ 26Ndookomu Muungu kamutsana na kumuhuma nguzi muhumisijwe kwenu Amuvodhye kwa kumuhendeza nyonse mupfyehuze njia zenu nzuka.”

Currently Selected:

Mahendo 3: pkb

Highlight

Copy