Mahendo 1

1Kwa Muhilwa Tofilo:

Kuzimuni mwa chuo changu cha d̯ura nyora dzuu ya mambo yonse ya Yesu ahendeyeyo na kuyongweeza, hangu nsiku aḍabviyeyo kaziye 2hat̯a nsiku adzeyoakihwajwa dzuu mbinguni. Asidzahwajwa dzuu mbinguni, kawaḍama kwa nguvu za Ruhu Mudheru hawa wantu atsaniyeo dza *ntumi wakwe. 3Kwa nsiku miyongo mine ḅaad̯a ya kupfatsikwakwe, Yesu kawat̯upukia ntumiwe mweedha kwa mweedha kwa namuna isiyokajeleka kwamba ka mojo. Wamuona na kanena nao dzuu ya Uhaju wa Muungu. 4Epfokuwa pfamodza nao amaale, kawaamuru kawamba, “Namutsenuka Yerusalemi, ela indani t̯ola ya Baba amuahid̯iyeyo, niyomwambia. 5Yohana kat̯opya wantu na madzi, kenge nywinywi mudzat̯opyegwa na Ruhu Mudheru ḅaad̯a ya nsiku kachuchu.”

6Hawa ntumi wepfot̯ut̯aa pfamodza na Yesu, wamuuza wamwamba, “Ḅwana, munamba ujwakuwagalichia uhaju wantu wa Isiraeli mahafufini?” 7Yesu kawambukuya kawamba, “Ngera na nsiku vinawekwa ni Baba jeje heket̯u, ela si dzuu yenu kumanya ya kwamba vinawa ari. 8Ela Ruhu Mudheru adzepfomusukia, munadzazwa nguvu. Munawa mashaahiḍi wangu hangu Yerusalemi na nsi yonse ya Yud̯aya, Samaria, na hat̯a yukungo jwa lumwengu.” 9Epfokwisa kunena hivi, huku wakiwa kumuyowani, kahwajwa kwenda mbinguni. Kwa dzambo ḍya wingu ḍimufinikiziyeḍyo ntawakumuona kawii.

10Yesu epfoakipfaa mbinguni, hawa ntumi wewa kumakiani gu yuwinguni. Iyo saa, wantu wawii wavwaiyeo nguo nyeupe wasumama hafufi nao. 11Wawauza wawamba, “Wantu wa Galilaya, kut̯i musumama hapfa mukwakuḍabvani nd̯ulu yuwinguni dzuu? Huyu Yesu ahwaijwe kwenu kwenda mbinguni, anauja dza viviḍe mumuoneyevyo akiwa kwendani mbinguni.”

Matia kahwaa pfantu pfa Yud̯a

12Makisa hawa ntumi wauja Yerusalemi kuyawa Murima wa mihi ya Mizeituni, wiwokuwa hat̯uwa mfufi nze ya hu mudzi. 13Wanjia Yerusalemi na wenda hat̯a chumba cha d̯arini dzuu wemowakikaa. Wewa ni Pet̯ero, Yohana, Yakobo na And̯erea, Filipo na Tomasi, Bat̯olomayo na Matayo, Yakobo mwana jwa Alifayo, Simioni Muziloti#1:13 Waziloti wewa kit̯aro cha Wayahud̯i weowakihehea kuukuya ut̯awala wa Kirumi na nguvu. na Yud̯a mwana jwa Yakobo. 14Wekit̯ut̯aa kuyombani mweedha kwa mweedha pfamodza na wake wangine, na Maria mamajwe Yesu, na wanduguzwe Yesu.

15Hizihiziḍe nsiku, kwiit̯ut̯aa wantu wamuhikiziyeo *Kirist̯o chima cha gana modza na miyongo miwii. Pet̯ero kasumama kunena kahi yao. 16Kamba, “Wandugu zangu, haya yorejweyo kuzimuni mwa haya matsoro madheru yewa ni had̯i yat̯imiye. Ruhu Mudheru kamuhendeza D̯aud̯i kunena dzuu ya Yud̯a. Kayavya unabii wa haya ya Yud̯a andeyohenda, huyu ayongoweyee wantu wadzeowakimugija Yesu. 17Kwa kwamba Yud̯a ewa katsanwa kumuhumikia Muungu pfamodza naswi, ewa mumodza jwa kit̯aro chehu.”

18Yud̯a kaguya nkonde na hizi fwedha aipfijwezo kwa hendo ḍyakwe zuka. Nae kagwa pfapfaḍe, kaḅaika na kahi na ntumboze zonse ziyawa nze. 19Kula muntu jwa Yerusalemi kasikia haya yamuhendekeeyo Yud̯a. Ndookomu kwa lugha yao wenye waihana hiḍe nkonde “Hakelidama,” yani “Nkonde ihikiyeyo mwazi.” 20Pet̯ero kongeza kunena kamba, “Koro vyoregwa chuoni mwa Zaburi, ‘Nyumbaye naiwe ntupfu, nakutseewa yuḍejwonse jwa kuishi humo humo.’ Na kawii vyoregwa, ‘Pfantupfe pfa uhumisi napfahwajwe ni muntu yungine.’ 21-22D̯ubva ni had̯i hutsane muntu mumodza jwa kuungana naswi kuwambia wantu kwamba Ḅwana Yesu kafufuka kuyawa kwa wafu. Ni awe mumodza jwa hichi kit̯aro chehu chichochikigijana na Ḅwana Yesu ngera zonse, hangu ngera at̯opyejweyo ni Yohana hat̯a nsiku adzeyoakihwajwa kwenda mbinguni.”

23Ndookomu wahadza wantu wawii: Yusufu, eyehanwa Barisaba (pia ekihanwa Yust̯o) na Matia. 24Makisa wayomba wamba, “Ḅwana, kumanya myojo ya wantu wonse. D̯ubva, huyange huyu umutsaniyee kahi ya hawa wantu wowii, 25ahwae pfantu pfa uhumisi dza ntumi. Hu ni uhumisi wa Yud̯a ayatsiyeo kwenda ekonamala kuwa.” 26Makisa wabiga kura, na kura imugwiya Matia. Nae wamungiza hichi kit̯aro cha hawa *ntumi kumi na mumodza.

Currently Selected:

Mahendo 1: pkb

Highlight

Copy