Mahendo 13

Baranaba na Sauli wahumwa

1Humu mwa hiḍi tsanganiko ḍya wantu wa Antiokia kwiwa manabii na waalimu. Wewa Baranaba, Simioni eyeakihanwa Mweusi, Lukio jwa kuyawa Ukirene, Manaeni ayeyejwee pfamodza na haju *Herod̯e,#13:1 Huyu ewa ni Herod̯e Antipa, mwana jwa Herod̯e Mukuu eyekuwa haju ngera ya Yesu avyaijweyo. na Sauli. 2Wepfowakimuyomba Ḅwana na kufunga, Ruhu Mudheru kawamba, “Munitsaniyeni Baranaba na Sauli, kuhenda hi kazi niwahaniiyeyo.” 3Wafunga na kuyomba. Wawapfaza mikono, makisa wawagonzoza.

Baranaba na Sauli wasumwiiya hukuḍe Kupuro

4D̯ubva Baranaba na Sauli wepfohumwa ni huyu Ruhu Mudheru, wenda hat̯a Selukia wendeekowakinjia chomboni wakyenda kilulu cha Kupuro. 5Wepfokwojeka mudzi wa Salami waḍabva kusumwiiya chuuwo cha Muungu humu masunagogini mwa Wayahud̯i. Wewa pfamodza na Yohana Marko, eyeakiwagijiija na hi kazi. 6Wenda kula pfantu humuḍe kiluluni hat̯a wafika mudzi wa Pafo. Hapfa wat̯ongana na muntu mumodza mutsawi eyenahanwa Bariyesu. Ewa Muyahud̯i adzifwarizie kwamba ni *nabii. 7Ewa ḅamujwe huyu mukuu jwa hichi kilulu eyeakihanwa Sagio Paulo, eyekuwa muntu karo. Sagio Paulo kamuhana Baranaba na Sauli kwakwe, kwa dzambo ḍya kwamba ekitsaka kusikiiya hichi chuuwo cha Muungu. 8Kenge huyu mutsawi Elima (Elima maanaye ni mutsawi Kiyunani), kawakaiya machingama. Kaḍema kumuhendeza huyu mukuu jwa hichi kilulu atsehikiza faro ya Wakirist̯o. 9D̯ubva Sauli, amanyikaniye pia na sari ḍya Paulo, kadzajwa ni Ruhu Mudheru. Kamud̯eḍea gu huyuḍe mutsawi 10na kamwamba, “Wewe mwana jwa Shaat̯ani! Kazi yako ni kupfinga kula kintu chicho chema! Una kula namuna ya makulekule, na meshi kwakuḍemani kuzipfohowa njia za Ḅwana zirongaariyezo! 11Ḅwana anakuhukumu saambi. Nawe unawa ntumbu matso, nkut̯oweza kuuona hu muyanga wa hiḍi dzuwa kwa muḍa.” Iyo saa matso yamuhenda mawizawiza na yanjia kiza. Kenda akipfapfasa huku na huku akilacha muntu jwa kumugija yuroi. 12Huyu mukuu jwa hichiḍe kilulu epfoona haya yahendekeeyo kahikiza, koro ewa kamakiswa muno ni haya mayongweezo dzuu ya Ḅwana.

Baranaba na Paulo wasumwiiya mudzi wa Antiokia wiwo Pisidia

13Paulo na hawa wenziwe wanjia chomboni na Pafo, wenda hat̯a mudzi wa Paga, wiwo Pamufilia. Ela hapfo Yohana Marko kat̯ana nao, kauja Yerusalemi. 14Ae Baranaba na Paulo wanuka na Paga na wenda mudzi wa Antiokia wiwo Pisidia. Nsiku ya *Sabato, wenda wanjia *sunagogini wakaa chihako. 15Hawa wakuu wa hiḍi sunagogi wepfokwisa kusoma chuoni mwa *Sharia za Musa na matsoro ya manabii, wawahumia muntu Paulo na Baranaba wawamba, “Wandugu, hunatsaka munene na hawa wantu ikiwa kwamba muna vyuuwo vya kuwafunda.”

16Ndookomu Paulo kasumama, kawanwiiya mukono, na kanena nao kamba, “Waisiraeli wenzangu, nanywi nyonse musiokuwa Wayahud̯i mwiwonamuvunzia nkuhi Muungu, nisikiiyani! 17Huyu Muungu jwa wantu wa Isiraeli kawatsana wabibi zehu, na kawahendeza hawa wantu wawe kyeet̯i kikuu ngera wezowakikaa dza wageni Misiri. Muungu kawayavya Misiri na uwezowe mukuu. 18Na kwa myaka miyongo mine kawait̯isia myendo yao hukuḍe yuwandani. 19Kavinanga vyeet̯i vifungahe vya nsi ya Kanaani na kaihendeza hi nsi kuwa ya wantuwe 20kwa chima cha myaka magana mane na miyongo mitsano. Nyumae kawapfa mat̯oibi wawayongozeyeo hat̯a ngera ya nabii Samweli. 21Na wepfolacha kuwa na haju, Muungu kamuwapfa Sauli mwana jwa Kishi, kuyawa kyeet̯i cha Benyamini awe haju jwao kwa myaka miyongo mine.

22Muungu epfomunuya Sauli uhajuni, kamuweka D̯aud̯i kuwa haju jwao. Muungu kanena dzuuye kamba, ‘Niona kwamba D̯aud̯i mwana jwa Yese ndiye muntu nitsakiyee. Ndiye muntu adzeyehenda hayaḍe yonse niyonatsaka ahende.’ 23Muungu kamuhendeza Yesu, jwa yuvyee jwa D̯aud̯i, kuwa mupfonya jwa wantu wa Isiraeli, dza viviḍe evyoahid̯i. 24Yesu asidzaḍabva kaziye, Yohana kasumwiiya wantu wonse wa Isiraeli akiwamba wapfyehuze mama na wat̯opyegwe. 25Na Yohana epfokuwa hafufi kwisa kazi zakwe, kawambia hawa wantu, ‘Nywinywi mwakut̯arani ya kwamba mimi ni ga? Sikwaa huyu mwiyekuindiiyani hat̯a. Jeje kakudzani nyuma yangu, na sinamala hat̯a kumuvuya#13:25 Iwa ni kazi ya muhumwa kuvuya muntu viyahu. viyahuvye.’ ”

26Paulo kongeza kunena kamba, “Ndugu zangu wa yuvyee jwa Iburahimu, na wantu wonse wasiokuwa Wayahud̯i weonamuvunzia nkuhi Muungu; haya maagu ya mupfonyo huyayehejwa swiswi. 27Hawa wantu wa Yerusalemi na wakuu wao ntawakumanya ya kwamba Yesu ndiye huyu Mupfonya. Nolawe ntawakuimuka hivi vyuuwo vya hawa manabii vivyonasomwa kula nsiku ya Sabato. Ela wavihendeza hivi vyuuwo vya hawa manabii vit̯imiya wepfomuhukumu. 28Hat̯a wepfotsowa untu wa kumuyagia, wamuyomba Pilato amuhukumu kuyagwa. 29Na wepfokwisa kuhenda haya yonse ya matsoro yaneneyevyo dzuuye, wamususya napfa muhini mwa mpatsa, na wamungiza mbeerani. 30Kenge Muungu kamufufuya kuyawa kwa wafu. 31Na kwa nsiku nyinji, kenda na kuwat̯upukia-t̯upukia hawa eoakigijana nao hangu Galilaya hat̯a Yerusalemi. Na sasa ndiwo mashaahiḍi wakwe kwa hawa wantu wehu. 32Naswi hudzia kumuyehea haya *Maagu Mema: haya ya Muungu aahid̯iyeyo kwamba anawahendea wabibi zehu, 33sasa kesakuhuhendeya swiswi hwiwo yuvyee jwao, epfomufufuya Yesu kuyawa kwa wafu. Dza vyorejwevyo chuoni mwa Zaburi dhango ḍya pfii kwamba, ‘Wewe u Mwanangu, yeo nikuvyaa.’ 34Na dzuu ya kumufufuya kuyawa kwa wafu, na kutsauja kufwani kawii, Muungu kamba, ‘Hakika nakuvodhya dza viviḍe nivyomuahid̯i D̯aud̯i.’ 35Dza aneneyevyo kungine humu matsoroni akyamba, ‘Nkunamuyatsa muhumisi jwako mwema kufwa awowe.’ 36Ngeraze, D̯aud̯i kahenda miro ya Muungu. Makisa kafwa na kazikwa hafufi na wabibizwe, ela mwiiwe uwowa. 37Kenge huyu jwa Muungu amufufwiiye kuyawa kwa wafu, mwiiwe ntaukuwowa. 38-39Wandugu zangu, ni mumanye tswee kwamba mwakusumwiijwani haya maagu ya mayatsiyo ya nabvise kwa njia ya Yesu. Ni mumanye ya kwamba kula muntu amuhikiziyee anayatsijwa nabviseze zonse na anawa muhachi usoni kwa Muungu. Dzambo ḍya kwamba hi Sharia ya Musa ntaindeweza kuḍihenda. 40D̯ubva manyani, haya ya hawa manabii waneneyeyo, yatsekudzamupata nywinywi wepfokwamba,

41‘Pfindiiyani, nywinywi wabalifit̯u!

Makani mubad̯e!

Koro hichi nichokuhendani mukiwa mojo,

ni kintu cha kwamba ntamut̯okihikiza,

hat̯a muntu akikimusumwiiya!’ ”

42Paulo na Baranaba wepfowakiyawa nomu sunagogini, hawa wantu wawayomba wauje kawii Sabato ya nyuma, wadze wawasumwiiye zaid̯i dzuu ya haya mambo. 43Wantu wepfoyawa nomu sunagogini, Wayahud̯i wenji na wantu wa vyeet̯i wenji wauḅiyeo ḍini ya Kiyahud̯i, wamuuḅa Paulo na Baranaba. Hawa *ntumi wanena nao na kuwangiza mojo wagije kuserefat̯a t̯ei ya Muungu.

44Hi Sabato ingine ipfofika, hafufi wantu wa mudzi muzima wadza kusikiiya chuuwo cha Ḅwana. 45Kenge hawa Wayahud̯i wepfokiona hichi kit̯aro cha hawa wantu, wanjijwa ni wivu. Wamushindana na kumutsola Paulo. 46Ela Paulo na Baranaba wagija kunena pfasipfo oga, wawamba, “Iwa ni had̯i chuuwo cha Muungu kisumwiijwe kwenu nguzi. Kenge kwa dzambo ḍya kwamba muchidziza, na mudziona ntamunamala kuwa na maisha ya kuunga na yuungo, hunamuyatsa na hunawendea hawa wantu wa vyeet̯i vingine. 47Koro Ḅwana kahuamuru kahwamba,

‘Nikutsana wewe uwe muyanga wa wantu wa vyeet̯i vingine,

na uwe njia ya mupfonyo kwa lumwengu yuzima.’ ”

48Hawa wantu wa vyeet̯i vingine wepfosikia hichi chuuwo watsekea na wamushad̯a Ḅwana kwa maaguye. Na hawaḍe wa Muungu atsaniyeo kuwa na maisha ya kuunga na yuungo, wagala wahikiza. 49Chuuwo cha Ḅwana kid̯achaa kula pfantu hiḍe ḍanda. 50Ela hawa Wayahud̯i wawangiza nsunziirya hawa wakuu wa hu mudzi na hawa wake majabva wasiokuwa Wayahud̯i, weowakimuvunzia nkuhi Muungu. Wawakuntisa d̯ina aḍe Paulo na Baranaba makisa wawayavya humu nsini mwao. 51Ndookomu hawa ntumi wawakukuntiya vumbi ḍya maguuni mwao kuwaseresa, makisa wagija njia wenda Ikonio. 52Hawa Wanafund̯i weokuwa Antiokia wewa wadzajwa ni Ruhu Mudheru na wewa na tsekea nkuu.

Currently Selected:

Mahendo 13: pkb

Highlight

Copy