Mahendo 12

Hiḍi tsanganiko ḍikuntiswa d̯ina zaid̯i

1Hafufi ziziḍe ngera, haju *Herod̯e kaḍabva kuwakuntisa d̯ina wantu wangine wa hiḍi tsanganiko. 2Kaamuru kwamba Yakobo ndugujwe Yohana akentwe na mundu ayagwe. 3Epfoona ya kwamba hiḍi hendo ḍiwatsakiza hawa Wayahud̯i, kapfaa mwori, kamugija na Pet̯ero. (Hivi vihendeka ngera ya jila ya mikahe isiyongizwa bwoka.) 4Pet̯ero epfogijwa, kangizwa gerenzani. Kawekwa kwamijwani ni vit̯aro vine vya asikari wane wane. Herod̯e ekitsaka kumuhukumu Pet̯ero kacha ya wantu ḅaad̯a ye *Pasaka. 5Ndookomu asikari wagija kumwamia Pet̯ero gerenzani, kenge wantu wa hiḍi tsanganiko wagija kumuyombea muno kwa Muungu.

Malaika kamuyavya Pet̯ero gerenzani

6Kaḅila nsiku ya Herod̯e ya kumuyavya Pet̯ero kwa hawa wantu, huḍe sikuwe Pet̯ero ewa ekiyaa kahi ya wamia wawii. Ewa kafungwa na minyoro miwii, na kwiwa asikari weowakyamia hu muḍyango wa hi gerenza. 7Iyo saa malaika jwa Ḅwana kasumama hapfaḍe, na humuḍe gerenzani kuyangaa muyanga. Huyu malaika kamubiga-biga Pet̯ero humu mbavuni amuyamuse na kamwamba, “Yamuka haraka!” Na mweedha mumodza hi minyoro imont̯oka nomu mikononi mwa Pet̯ero. 8Makisa huyu malaika kamwamba, “Dzifunge mulao wako na uvwae viyahuvyo.” Pet̯ero kahenda hivyo, na huyu malaika kamwamba, “Vwaa na hi nkanzuyo, uniuḅe.” 9Pet̯ero kamuuḅa wayawa nomu gerenzani. Ela nkakuimuka kwamba haya mambo ya huyu malaika eyoakihenda yewa nza ḍugha. Ae kat̯ara ya kwamba ekiona nzozi. 10Wakichia hichi kit̯aro cha d̯ura cha wamia ne cha pfii, na mwiso waufika hu muḍyango wa chuma wa kunjiiya mudzini. Hu muḍyango ufunguka uo wenye, nao wayawa huku nze. Wagija njia waḍabva kwenda, na wepfoifika mwiso ḅwikira huyu malaika kamwaaria Pet̯ero. 11Ndipfo pfa Pet̯ero adzepfoakiimuka haya yamuhendekeeyo, na kamba, “Sasa nimanya kwamba katsi iwa ni ḍugha, kwamba Ḅwana emuhuma malaikajwe. Na kanipfonya kuyawa mikononi mwa Herod̯e na kuyawa kwa mambo yonse ya Wayahud̯i weyowakitsaka kunihendea.” 12Epfohambuya hivi, kenda hat̯a nyumbani kwa Maria, mamajwe Yohana Marko. Wantu wenji wet̯ut̯aa kuyombani humuḍe nyumbani. 13Pet̯ero kahana na hapfa muḍyangoni, na kudza muhumisi mwanamuke eyenahanwa Roda, amufungwiiye hu muḍyango. 14Epfoḍihambuya hiḍi idzwi ḍya Pet̯ero, katsekea hat̯a kad̯arama kauja humuḍe kuzimu, pfasipfo kufunguya hu muḍyango. Kenda kawambia kwamba Pet̯ero ewa ka hapfaḍe nze. 15Wamwambukuya wamwamba, “Munamba wewe una mat̯are?” Kenge jeje kasindiiya kuwamba ni ḍugha. D̯ubva wamwambukuya wamwamba, “Kuona huyu malaikajwe.” 16Huku ae Pet̯ero ewa kagija kuhana hapfa muḍyangoni. Mwiso wafunguya hu muḍyango, na wepfomuona wamaka muno. 17Kawanyamaza na mukonowe, na kawasumwiiya namuna ya hivi vya Ḅwana amuyaviyevyo na gerenzani. Na kongeza kamba, “Musumwiiyeni na Yakobo na hawa wandugu wangine.” Makisa kanuka kenda kuntu kungine.

18Ipfofika magurani, wamia wanjia kipapo kikuu. Waḍabva kuuzana wao na wao, wamba, “Ayu Pet̯ero kenda ku?” 19Herod̯e kayavya amuri alachwe, ela ntawakumuona. Ndookomu Herod̯e kawakora hawa wamia na kaamuru wayagwe. Makisa Herod̯e kanuka na Yud̯aya kenda Kaisaria, endeekoakikaa kwa muḍa.

Kufwa kwa Herod̯e

20Herod̯e ewa kawarejea muno wantu wa Turo na Sidoni. Ndookomu kwenda kit̯aro cha wantu kwa Herod̯e. Nguzi d̯ura wamanyana na Bulasto awe yupfande jwao. Bulasto ewa musumamizi jwa nyumba ya haju. Makisa wanuka wamwendea Herod̯e wakamuyombe kuwe na naghea. Koro chakuḍya cha hi nsi yao chikiyawa nsi ya haju Herod̯e. 21Hat̯a nsiku dzayo itsanijweyo, Herod̯e kavwaa mavwaziye ya kihaju, kakaa kitiche cha kihaju, na kaḍabva kunena na hawa wantu. 22Hawaḍe wantu wabiga madzwi wamba, “Huyu eyekunenani si muntu hat̯a, ni muungu haswa!” 23Iyo saa malaika jwa Ḅwana kamubiga na nd̯wari Herod̯e, kwa dzambo nkakumumpa Muungu hilaze. Kaḍigwa ni mvunyo kafwa. 24Ela chuuwo cha Muungu kigija kud̯achaa na tsanganiko ḍikuya. 25Baranaba na Sauli wepfokwisa kazi zao wanuka na Yerusalemi wauja Antiokia. Wakwakuujani wamuhwaa na Yohana Marko.

Currently Selected:

Mahendo 12: pkb

Highlight

Copy