Lûk 22
22
Bɔ me kɨ ebùŋe a Yesò
(Mat 26:1-5; Mk 14:1-2; Jn 11:45-53)
1Èpǎ̧ bled kà wua nkɔ̀Ꞌɔ #22:1 Bled kà wua nkɔ̀Ꞌɔ wu bled kà yea yis., bɔ̀ɔ ntɔ nê èpǎ̧ Màntsea a ègwet la e li me kɨꞋɨ, 2bètǎt bèntsìà mèpɨ̧̀ Mbɔ̧ɔ̧mà bɔ̂ bènyɨꞋtà mbɨ̧te Musì e me kɨ èlu̧ bɔ̀ɔ nɨ ebùŋè a Yesò a ndò̧, nkàà ndɨ bɔ̀ɔ mbɔ̀a bòt bɔb la.
Judàs bɨ̧̀ɨ̧̀nê efɨ̧̀ɨ̧̀ne a Yesò
(Mat 26:14-16; Mk 14:10-11)
3Satàn nyi a èntɨ̧ɨ̧ wakatè Yesò kǒ ane bɔkatè tò bu ntsɔ̀b babe èlen tò wu Judàs Iskaliòt la. 4Tà ghà nkwène ane bètǎt bèntsìà mèpɨ̧̀ Mbɔ̧ɔ̧mà bɔ̂ bètǎt bèmbaabà lob nɨ̧ Mbɔ̧ɔ̧mà, bɔ̂ tò ba e làŋkè ndɨ tàa fɨ̧̀ɨ̧̀ne a Yesò abua yɔb la. 5Bɔ làŋkè ale, ànəê yu a taꞋa bɔ̀ àwɔb, bɔ nê bɔɔ ŋa atò èkab. 6Judàs bɨ̧ɨ̧ne, mbê mbùꞋ me kɨ ndɨ yèa ghɨ̌ bɔɔ baãaã a Yesò kà bòt e ko la.
Yesò tàŋke ejɨ èghɨjɨ èpǎ̧ Màntsea a ègwet
(Mat 26:17-25; Mk 14:12-21; Jn 13:21-30)
7Àlia èpǎ̧ bled wu nàa ka kɔꞋ la à nkɨ̀Ꞌɨ̂, è wu àli yu bɔ̀ɔ nkɨ̧̀ɨ̧̀ma bɔɔnjɨ̀ ane èghɨjɨ èpǎ̧ Màntsea a ègwet la. 8Yesò tu̧u̧ a Pità bɔ̂ Jɔ̌n nê, “Bɨ̀ ghǎ ntàŋke èghɨjɨ èpǎ̧ Màntsea a ègwet, bà kɨꞋɨ njɨ.”
9Bɔ biite atò nê, “Aà nkɨà nê bà gha ntàŋke a ka adzìꞋ à?”
10Ale, Yesò bɨ̀ɨ̀lè nê, “Bɨ̀ gha a èbem àpfəèà nɨ̧, ko wòt kǒ tà ŋeꞋe èkɨŋ mèleb la naa kwene ane yɨ̧, bɨ kuŋe atò nga a èbem lob tàa nga enyi la. 11Bɨ̀ nyi, bɨ shu abua tǎt lob nê, ‘NyɨꞋtà laꞋnê ntàŋ wu bɔ̂ bɔkatè bi àa jɨ èghɨjɨ èpǎ̧ Màntsea a ègwet bɔb a èbèm la àa waa?’ 12Ko taa nyɨꞋte awɨ̧ taꞋà àtsəa lob a ègwet bɔ naŋe la. Eyaa wu àdziꞋa bɨ̀a taŋke èghɨjɨ èpǎ̧ Màntsea a ègwet bu la.”
13Bɔkatè tò e gha àpfəèà nɨ̧ yu, me ye àghɨ àgème a wu mbɨ̀Ꞌɨ̀ tà ghɨ̂ shu la. Ale, bɔ taŋke èghɨjɨ èpǎ̧ Màntsea a ègwet bu.
Èghɨjɨ Lefɨ̀Ꞌ
(Mat 26:26-30; Mk 14:22-26; 1 Kɔ̀ 11:23-25)
14AfɨꞋa mànjɨa èghɨjɨ èpǎ̧ Màntsea a ègwet bu a kɨꞋɨ, Yesò tseke a si bɔ̂ bɔntu̧ bi me jɨ èghɨjɨ. 15Bɔ tseke ale, tà shu abua yɔb nê, “Maa lâ ngua nkɨ ejɨ èghɨjɨ èpǎ̧ Màntsea a ègwet bàa ba nɨ̧̀ ba, nè èntɨ̧ɨ̧ am ègème ka e bɔ eye ngoꞋ. 16TsiꞋ è shu awɨ̧ nê, è nka tsi jɨ èghɨjɨ baa, tè àli yu bòt àa ko lə èghɨjɨ mbɔŋ a kèfɔ̧̀ Mbɔ̧ɔ̧mà la a kùꞋ.”
17Ale, Yesò nɨ ndɔŋ, ŋa mènkɔ̀ŋke abua Mbɔ̧ɔ̧mà, mbɔ̂ nê, “Bɨ̀ nɨŋ nù bàgème. 18Maa shua wɨ̧ nê, è nka li tsi nu mèlùꞋ màa bɔ ghɨ ane tètaãaãte vȩn la a, tè àli yu màa nu mèlùꞋ fi a kèfɔ̧̀ Tǎt am la a kùꞋ.”
19Tà mè nɨa bled, ŋà mènkɔ̀ŋke abua Mbɔ̧ɔ̧mà, mbɔ̂ mbòꞋtê ŋa abua bɔntu̧ bi nê, “Eyaa wu mbɨ̧̀ ènyit yaã mâ ŋa abua yɨ̧ la. Bɨ̀ me ghɨa nɨa mɨ̀ɨ̀tè am.”
20Tà lɔ̀Ꞌ mè ngɨ̀ wuê a èlɨ ngaa nè ndɔŋ yu è shu nê, “Ndɔŋ yaa wu mènkàꞋa fi Mbɔ̧ɔ̧mà màa nɨ àlo̧ am enɨ ghɨ̌ aa tsəète a si nkàà wɨ̧ la. 21Bɨ̀ zə, wòt wu tàa fɨ̧̀ɨ̧̀ne am la, wua njɨ̀a èghɨjɨ ba tò. 22Waã Wòt naa pfə wuê mbɨ̀Ꞌɨ̀ Mbɔ̧ɔ̧mà li nɔ̀ŋè la, ka aa li bɨɨ àbâ wòt wu tàa fɨ̧̀ɨ̧̀nè atò la.” 23Bɔ bùꞋ me biite a kètsìà wɔb wòt nga e ghɨ̀ èwuu ànəê yaa la.
Ànəa wɔ̀jûŋ
24Àyɔ̀ŋ a li ntsèke tè ndzə a kètsìà bɔkatè Yesò ane ànəa wòt tà wu wɔ̀jûŋ ane yɔb la. 25Yesò shu abua yɔb nê, “Bɨ ko nê bèfɔ̧̀ kà ko a Mbɔ̧ɔ̧mà àa ngɨ̀ bɔ me ghɨɨle bòt bɔb, bèkěm bɔb, e mè me kɨ nê bòt è me tɔ awɔb ane bèshu̧ banɔ̧̀. 26Ka a bakà bɔ ndɨ aà wu anè a kètsìà wɨ̧ la. Wɔ̀jûŋ ane yɨ̧ è bɔ̂ ndɨ tàa wu mbɨ̀Ꞌɨ̀ we kwèn la. Wòt tà tɨ̧ɨ̧ àtsə la bɔ̂ ndɨ tàa wu mbɨ̀Ꞌɨ̀ wafàꞋ la. 27Wàà wu wɔ̀jûŋ à? Wu wòt wu tà tseke a si me jɨ la, kò wòt tà bɨ̧ɨ̧ne ewu wafàꞋ tò la à? Ane nkûŋ, wu wòt tà tseke a si la. Ka e ngu a kètsìà wɨ̧ mbɨ̀Ꞌɨ̀ wafàꞋ. 28Ka wu ndàꞋà bɨ̀a, bɨ li ntɨ̧ɨ̧ a ngèt yaã àfɨꞋa e ndi mbùꞋ me ye ngoꞋ tê kɨꞋɨ edzəâ àfɨ̀Ꞌ yaa la. 29Ale, mbɨ̀Ꞌɨ̀ Tǎt am è yɔꞋ am ane Fɔ̧̀ la, wu ndɨ màa yɔꞋɔ awɨ̧ la. 30Bɨa li jɨ e mě nu ne nà̧ àfɨꞋa màa li tseke a ègwet àtɨ̧ kèfɔ̧̀ am la. ÀfɨꞋa mbɔŋ bɨa tsekte a ègwet ètɨ̧ nɨ̧, ka me saꞋa lətelob bòt Izəèlȩê tu èghem ntsɔ̀b tebe la.”
Yesò shu nê Pità nàa li tu̧ avi
(Mat 26:31-35; Mk 14:27-31; Jn 13:36-38)
31Yesò ghɨ̀ ale, ntɔ Simùn wu èlen tò ko wu Pità la nê, “Simùn, zə ànəa e nkɨ eshu awê la. Mbɔ̧ɔ̧mà bɨ̧̀ɨ̧̀nè nê Satàn kɨꞋɨ nyìꞋì àwɨ̧ bàgème, mbɨ̀Ꞌɨ̀ bɔ̀ɔ nyìꞋà ntsəètsə ntsìà èfaa la. 32Ka mâ tsàꞋte a Mbɔ̧ɔ̧mà àtsəa yê àwɔ̀ Simùn mbɨ̀Ꞌɨ̀ ka à tsì èntɨ̧ɨ̧ wê ane yaã. Ka aa me kua akwèn nkɨ̀Ꞌa abua am à zì mèntɨ̧ɨ̧ bɔnyɨ bè.”
33Pità bɨ̀ɨ̀lè nê “Tê, è màà ngu wuê fȩ ko maa nyi yùà ba nè, nguê èvə e mpfə ba nè.”
34Yesò shu abua tò nê, “Pità, kwàꞋ ane nkûŋ lu̧nkɔ̀Ꞌ naa me laꞋ nê yea ntɔ ètsəꞋ waa, à tû̧ ngò̧ tetat nê ye bakà ko am.”
Yesò nê bɔkatè bi è taŋke awɔb
35Yesò ghɨ̀ ale, mbììte awɔb nê, ye li lɔ̂Ꞌ ntù̧ àwɔb kà ye ntaꞋ kò ambè nè gùbtsə ale, bɔ bu àghɨ ako leꞋ?
Bɔ nê, “ÀwɔꞋ.”
36Yesò mè ntsìꞋi shu abua yɔb nê, “Ka àfɨ̀Ꞌ yaa, wòt ane yɨ̧ bɔ ntaꞋ kò wuê ambè leꞋ, tà ka ntɔ. Wòt kà bɔ àlùmbà̧, tà fɨ̧̀ɨ̧̀nè ndǐmàꞋa zi nju̧. 37TsiꞋ è shu awɨ̧ ane nkûŋ nê, èngǎ̧ Mbɔ̧ɔ̧mà wu e laꞋ nê, ‘Bɔɔ li nɨ atò mbɨ̀Ꞌɨ̀ wòt kàbɔ̀ŋ’ la, e bɔ ndɨ àa wu nkûŋ ane yaã la, nkàà nê àghɨa bɔ̀ le shɨ ane yaã la a bùꞋù tê me te.”
38Tà làꞋ ale, bɔkatè tò e shu abua tò nê, “Tê Yesò, ba bɔ èlùmbà̧ bebe.”
Yesò nê, “Bɨ̀ tsiꞋi ànəa ngaa ale.”
Yesò tsaꞋtè a Mbɔ̧ɔ̧mà a ègwet èbȩ Olìf
(Mat 26:36-46; Mk 14:32-42)
39Yesò dzəè àpfəèà nɨ̧ yu ngà a ègwet èbȩ Olìf mbɨ̀Ꞌɨ̀ tàa ndzìà ngɨ̀à la, bɔkatè tò e kùŋe atò ngà mɨ̧̂. 40Tà kɨꞋɨ tê tà dzə abot, tà shu abua yɔb nê, “Bɨ̀ me tsàꞋte a Mbɔ̧ɔ̧mà shù̧ù̧te atò mbɨ̀Ꞌɨ̀ bɨ kwen a èbem ètaãaãte mènəè.” 41Tà sà àwɔb nyaꞋa nga a endɨ̌, ntèmè tènjûŋ ti a si ntsàꞋtè a Mbɔ̧ɔ̧mà nê, 42“Tê, nɨ ndɔŋ ngoꞋ yaa abua am la, na à kɔ̀ŋkà la. Ka à ka ngɨ̀ àghɨa e nkɨa la, ghɨ̀ wuê àyea àa nkɨà la.” 43[Wantu̧ Mbɔ̧ɔ̧mà kǒ chu a ègwet ndzì èntɨ̧ɨ̧ tò. 44Mbɨ̀Ꞌɨ̀ tà ghɔ̧ɔ̧na a èntɨ̧ɨ̧ vi nyaŋ la, tà tsènè ntsàꞋta Mbɔ̧ɔ̧mà nè èntɨ̧ɨ̧ vi ègème. Èlemne tò e me chɨ̧ɨ̧te a si mbɨ̀Ꞌɨ̀ tètabte àlo̧.]
45Tà tsàꞋtè mpàa, ndɔ̀Ꞌ a si nga nkwene ane bɔkatè bi ndìa, bɔ kaã nyaŋ ngu ndɨ ènyit yɔb e tsa ègème ane ànəa mbɔŋ la. 46Tà bììte awɔb nê, “Bɨ̀ lia ghà à? Bɨ̀ lɔ̀Ꞌɔ a si me tsàꞋte a Mbɔ̧ɔ̧mà, mbɨ̀Ꞌɨ̀ bɨ kwen a èbem ètaãaãte mènəè.”
Bɔ baãaã Yesò
(Mat 26:47-56; Mk 14:43-50; Jn 18:3-11)
47Mbɨ̀Ꞌɨ̀ Yesò bèla ndàꞋà la, ènɔ̧̂ bòt ko e kɨꞋɨ̀ nkwène ane yɔb. Wantu̧ ko ane bɔntu̧ Yesò bu ntsɔ̀b babe bɔ̀ɔ ntɔ nê Judàs la, li ngua nɨa awɔb nkɨ̀Ꞌâ. Tà kɨꞋɨ ale ngà a ngèt Yesò, me kɨ etaꞋa atò. 48Yesò bììte atò nê, “Judàs, nko nê à kɨ etaꞋa Waã Wòt mbɨ̀Ꞌɨ̀ efɨ̧̀ɨ̧̀ne atò?”
49Mbɨ̀Ꞌɨ̀ bɔkatè bu bɔ wu bɔ̂ Yesò la e ye àghɨa nkɨ e ghɨ̀ la, bɔ nê, “Lefɨ̀Ꞌ, bà sɔ̀ŋke èlùmbà̧ nkòꞋte awɔb?” 50Wakatè ko sɔ̀ àlumbà̧ mì ndo àtû̧ àbualu̧ àbùꞋ a àtsəa bèntsìà mèpɨ̧̀ Mbɔ̧ɔ̧mà.
51Yesò bê shu abua yɔb nê, “Bɨ̀ tsiꞋa yu ale.” Mbɔ̂ mbà̧à̧te àtû̧ atò ngɨ̀ tà pem.
52Yesò shu abua bètǎt bèntsìà mèpɨ̧̀ Mbɔ̧ɔ̧mà nè bètǎt bèmbaabà lob nɨ̧ Mbɔ̧ɔ̧mà, nè bɔɔjuŋ bɔ kɨꞋɨ mbɨꞋɨ̀ ebaãaã atò la nê, “Bɨ ghɨ̀ na me kɨꞋɨ ebaãaã am ndzəè mbɨ̀Ꞌɨ̀ bɨ kɨꞋa baãaã tsɔŋ nè nyitsə bɔ̂ mbuꞋtsə à? 53Maà wu ba nɨ̧̀ ba a èbem lob nɨ̧ Mbɔ̧ɔ̧mà àli àgème, ka bɨ̀ ka mbà̧aã am. Ka eyaa wu àfɨ̀Ꞌ àyɨ̧ nè àfɨꞋa Satàn bɔ mètàŋ mi ègème la.”
Pità nê ye bakà ko a Yesò
(Mat 26:57-58, 69-75; Mk 14:53-54, 66-72; Jn 18:12-18, 25-27)
54Bɔ baãaã a Yesò nɨ̀a tò ngà a lob Kefàs wu tà li ngu àtsəa bèntsìà mèpɨ̧̀ Mbɔ̧ɔ̧mà la. Pità me nyaꞋa nkùŋà wɔb akwèn 55TaꞋà èwet ko e wu a kètsìà àsà̧aã bɔ tsəꞋte la, Pità ghà me yɔɔ bɔ̂ bòt bu abot la. 56Mbɨ̀Ꞌɨ̀ Pità tseke me yɔɔ èwet wu la, waàvi àfàꞋ kǒ kɨꞋɨ me lɨ̀ŋke atò tè nê, “Mbê waa lè wu bɔ̂ Yesò nɔ̂.”
57Tà bê ntu̧ nê, “Àvi wàà, e mbakà ko atò.”
58Àfɨ̀Ꞌ a me wu, wòt kǒ mè ndze atò, mbê nê, “À wu wòt kǒ ane yɔb mɨ̧̂.” Pità tu̧ nê, “Mbê wa, è ntsě mmɔ̌.”
59È mè me wu mbɔŋe ane nyèm yemɔ̀Ꞌ, wòt kǒ mè ŋwèèle kwàꞋ ane ètɨ̧̂ nê, “Ane nkûŋ, mbê waa li ngu bɔ̂ Yesò ba, nkàà nê tà wu wòt Galìlî mɨ̧̂.”
60Pità shu nê, “Mbê waa, e mbakà ko ànəa à shua la.” Tà bela ndàꞋà, lu̧nkɔ̀Ꞌ bê ntɔ. 61Yesò Lefɨ̀Ꞌ ghèble avi ndɨ̀ŋkè a Pità àghɨ atò, Pità bê nkù̧ù̧te mèngǎ̧ Yesò è ghɨ̂ shu la nê “Lu̧nkɔ̀Ꞌ naa me laꞋ nê yea ntɔa aa tu̧ ngò̧ tetat nê ye bakà ko am.” 62Pità ndzəè ngà àbȩ ndɨ̀ kwàꞋ ànyaꞋne.
Bɔ ghɨ̧̀ɨ̧̀nè a Yesò
(Mat 26:67-68; Mk 14:65)
63ÀfɨꞋa mbɔŋ bòt bu bɔ tsia awɔb nê bɔ̀ me baabe a Yesò la, e bùꞋ me wȩ̀ȩ̀tè atò 64nkùùle àghɨ atò, mbɔ̂ shu̧u̧ atò, mbììte atò nê, tà shu wòt tà shu̧u̧ atò la. 65Mbɔ̂ ngɨ̀ ale mè ntaꞋa làꞋà mèngǎ̧ nyaŋ nɨŋ ngwȩ̀ȩ̀tè atò.
Ndɨ bɔ̀ le saꞋa a Yesò la
(Mat 26:59-66; Mk 14:55-64; Jn 18:19-24)
66ÈtsəꞋ e me tsi, bɔɔjuŋ Bèjuê, nè bètǎt bèntsìà mèpɨ̧̀ Mbɔ̧ɔ̧mà nè bènyɨꞋtà mbɨ̧te Musì, e nyi a lob, bɔ nɨ a Yesò nkɨ̀Ꞌɨ̂ bɔɔ saꞋa atò. 67Bɔ biite atò nê, “À wu Fɔ̧̀ wu Mbɔ̧ɔ̧mà yɔꞋ ntsà la, à shu awa?”
Yesò bɨ̀ɨ̀lè nê, “E ngu anè è shu awɨ̧, ko bɨ̀ ka bɨ̧ɨ̧ne a. 68E mbììte awɨ̧ èngà̧, ko bɨ̀ ka tsɔꞋa. 69Ka e bùꞋu àfɨ̀Ꞌ yaa, me ghà ne mbì Waã Wòt naa tseke àbâ àbualu̧ a Mbɔ̧ɔ̧mà Àtsèàngɔ̀ŋ.”
70Bɔ mè ntsìꞋi biite atò nê, “Nko nê à wu Waã Mbɔ̧ɔ̧mà à?”
Tà shu abua yɔb nê, “Bɨ shuê nê e ngu wùà.”
71Bɔ mè nê, “Wòt ko tsa bàa mè nkɨ̀a nê tà kɨꞋɨ ndzì ànəê àtsə atò la ntsě. Bàa mbɔŋ e zə ànəa tà shu la.”
Currently Selected:
Lûk 22: mnf
Highlight
Share
Copy
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy
