Lûk 21

Nempfə kǒ ŋǎ àghɨ abua Mbɔ̧ɔ̧mà

(Mk 12:41-44)

1Mbɨ̀Ꞌɨ̀ Yesò tseke a lob nɨ̧ Mbɔ̧ɔ̧mà ndɔ̀kè àvi me ye ndɨ bòt e màꞋà èkab a èbem akɔ̂b èkab la, 2tà me ye nempfə kǒ kà ye azi kɨꞋɨ̀ ndzì bakwȩkab babe a èbem. 3Tà nê, “KwàꞋ ane nkûŋ, nempfə wàà è zi èkab a èbem tè ntsè bòt bàgème. 4Nkàà nê bòt ko bu e ŋa wuê adzìꞋ ane èghɨ bu nyaŋ bɔ bɔ la, ka tò waa kà bɔ azi la, è ŋa àghɨ àgème tà bɔ la, tè àghɨ à ka tsi nguê tàa nɨ eyu̧ èghɨjɨ bi la.”

Yesò làꞋà ndɨ bɔ̀ɔ li bùù lob nɨ̧ Mbɔ̧ɔ̧mà la

(Mat 24:1-2; Mk 13:1-2)

5Bɔkatè Yesò ko e li ngua shu ndɨ lob nɨ̧ Mbɔ̧ɔ̧mà yu a Jèlusalèm nàa mbɔ̀ nè àti a ntsɔ̧̀ la, mè nè èghɨ bòt àa nkɨ̀Ꞌâ ŋǎ abua Mbɔ̧ɔ̧mà la. Yesò nê, 6“Àfɨ̀Ꞌ aa li me wu, ka wuê èti lemɔꞋ ane àti yàa bɨ yea la è ka tsi ngu àdziꞋa zi. Bɔɔ li bùu yùà etsàa a si.”

NgoꞋtsə tèa li dzəâ a ngɔ̀ŋ la

(Mat 24:3-14; Mk 13:3-13)

7Bɔ biite atò nê, “NyɨꞋtà,” èghɨ bàa àa li ghɨ̌ a ka àfɨ̀Ꞌ à? “Ghǎ aa li nyɨ̀Ꞌte nê èghɨ ngaa e tsiꞋa nkɨ̌ me ghɨ̌ à?”

8Yesò shu abua yɔb nê, “Bɨ̀ me ko awɨ̧ mbɨ̀Ꞌɨ̀ wòt fɨte awɨ̧, na bòt aa li taꞋa kɨꞋɨ ane èlen laã e me shu nê, ‘E ngu tòà’, e mě laꞋnê ‘Àfɨ̀Ꞌ a kuêꞋ’ la. Ka bɨ̀ ka nkùŋè àwɔb. 9Bɨa tseke tê bɨ̀ me zə èlaꞋ è buꞋa è me nù èbeko, ngoꞋtsə tè mě tè me dzəâ ayɔɔ bɔbȩ, mèntɨ̧ɨ̧ mɨ̧ ka bentè. Èghɨ ngaa e bɔ̂ ndɨ àa bɨ̌ ghɨ̌ la, ka è ka wua nyɨ̀Ꞌta nê àfɨꞋa ngɔ̀ŋ nàa lìa la a kuêꞋ.”

10Tà mè nê, “ÈlaꞋ aa li enù beko, bèfɔ̧̀ enù beko. 11SitsǎꞋ mè ngu me nyɨ̀Ꞌna nkwèà nyɨŋa bòt a èdzìꞋ ègème, èchɨɨ nè èghɔ̧ kàbɔ̀ŋ e mè ngu wu a èdzìꞋ ègème a sitsǎꞋ. Mbɔ̧ɔ̧mà naa li nyɨ̀Ꞌte mètàŋ mi a ègwelebuule nè èghɨ àa tàꞋa fàŋe bòt la.

12“Ka èghɨ ngaa aa li me laꞋ nê aa ngɨ̀à, bɔ baãaã awɨ̧, ngɨ̧̀ɨ̧̀nè àwɨ̧, ntsàà àwɨ̧ a lobte Mbɔ̧ɔ̧mà Bèjuê bɔ saꞋa awɨ̧, màꞋà àwɨ̧ a tèfȩ. Bɔɔ li esəèŋnè àwɨ̧ enɨ kɨꞋɨ a mbì bèfɔ̧̀ nè bɔɔjuŋ àlaꞋ, ambo yaã. 13Eyaa wu àfɨꞋa bɨ̀a tsɔ̀te Ntu̧ Ntsɔ̧̀ Mbɔ̧ɔ̧mà la. 14Ka bɨ̀ ka me mɨ̀ɨ̀tè àbɨ̀t bɨ̀a li ŋa abua bòt mbɔŋ la àfɨꞋa tsa, nkàà nê, 15maa li zǐ mèngǎ̧ a mètsəê mɨ̧, e mě zì mèyì a ètsə bɨ̧, ndɨ betsiꞋa wòt ane bɔmbù̧ bɨ̧ è ka tu̧ ànəa bɨ shua la. 16Bètǎt bɨ̧ nè bɔnyɨ bɨ̧, bɔ̂ bòt lətelob tɨ̧, nè bèshu̧ bɨ̧ aa li jɨ mènàŋ mɨ̧, e ghɨ̌ bɔɔ bùŋè bòt ko ane yɨ̧. 17Bòt bàgème aa li me pààbè àwɨ̧ ambo yaã. 18Ka nyèm yemɔ̀Ꞌ a ètsə bɨ̧ ka wu li nyɔ. 19Bɨ kuulà mèntɨ̧ɨ̧ mɨ̧ tè ngà ndzəè a mèndìa, ko bɨa li bɔ mèmpème.”

Yesò nê bɔ̀ɔ li bùu a Jèlusalèm

(Mat 24:15-21; Mk 13:14-19)

20Yesò ghɨ̀ ale, shu awɔb nê, “Bɨa li bɨ̀ me ye èlaã bèshujà e tɨ̧ɨ̧te tê è kaale a Jèlusalèm èkua èbu̧u̧ma, bɨ ko nê àfɨꞋa bɔ̀ɔ tsòke àpfəèà nɨ̧ a ngaa la a kuêꞋ. 21AfɨꞋa mbɔŋ, bòt bɔ̀ wu a Jùdià la, è luula nkɔꞋ ngà a ègwet tèbȩtsə, èbe bɔ wu a èbem àpfəèà nɨ̧ a Jèlusalèm la, bɔ dzə àpfəè və. È me wu bòt bu bɔ wu a tèbemtebàꞋ la, bɔ̀ ka tsi nyi a èbem àpfəèà nɨ̧ yu, 22na èli mbɔŋ wu èli Mbɔ̧ɔ̧mà nàa li ghɨ̌ bòt aa ye ngoꞋ nkàà mènəè kàbɔ̀ŋ mɔb mbɨꞋɨ̀ ghɨ̌ ànəa àgème Àkata Mbɔ̧ɔ̧mà a shu la àa wu nkûŋ la. 23Aa li bɨɨ àbâ bèzi bu bɔ kɔte la, nè èbu bɔ̀ɔ nyɔŋa bɔ̧ la àfɨꞋa mbɔŋ. NgoꞋte kàbɔ̀ŋ tea li e ghe a èbem àlaꞋ mbɔŋ, ntsǒ Mbɔ̧ɔ̧mà naa mèe nɔ̀ŋke ègwet bòt Izəèlȩê baa. 24Bɔɔ li kɨ̧ɨ̧me bòt ko, mbà̧à̧ èbeko ane èbùꞋ nɨŋ nga èlaꞋ tsa tsa. Naa li ngu àfɨꞋa mbɔŋ bòt kà wu Bèjuê e tɔ̀Ꞌtè a Jèlusalèm ndàŋkè a si, tè àfɨꞋa mètàŋ bèŋût nàa li mǐ la a kùꞋ.”

Mènkɨ̀Ꞌɨ Waã Wòt

(Mat 24:29-31; Mk 13:24-27)

25“Àfɨ̀Ꞌ aa li me wu, àtaãnyèm bɔ̂ àtaã èŋu nè tènto̧tsə e kubte tèkɔtsə, èlaꞋ a sitsǎꞋ e mè mbɔ̌ ngoꞋtsə. Bòt e mè ngu me bɔɔ ndɨ *èdzî e jùꞋà, mèleb tò e ŋeꞋe avi nga ègwet la. 26Bòt aa li bɔa te tsiꞋa nkɨ epfəꞋte, mbɨ̀Ꞌɨ̀ bɔ̀ɔ nchɨ̀Ꞌà àghɨa nkɨ e ghɨ̌ a sitsǎꞋ ègème la, nkàà nê ègwet nè èghɨ àa ègwet la aa li bente. 27ÀfɨꞋa mbɔŋ, ko Waã Wòt naa dzə a èbem mbàꞋ a ègwet, nè mètàŋ bɔ̂ mèngùꞋte ènɨ̧ Mbɔ̧ɔ̧mà. 28AfɨꞋa mènəè maa bùꞋ te me ghɨ̀ la, bɨ lɔꞋte a si ndɔ̀kè ètsə bɨ̧ a ègwet, nkàà nê wu àfɨꞋa Mbɔ̧ɔ̧mà tsiꞋa nkɨ echùꞋù ètsə bɨ̧ etsì àwɨ̧ a èbem ngoꞋ la.”

Nkɨ̀a ane àyɨt a fik

(Mat 24:32-35; Mk 13:28-31)

29Yesò shu èngà̧teme wàa nê, “Bɨ̀ lɨ̀ŋke àyɨt a fik bɔ̂ èbeko nè èyɨt ndze. 30TèfəꞋte fi tèa ngɨ̀ te me dzəâ, bɨ ko nê mènkwenà nàà nkɨ̀Ꞌa. 31Wu wuê èlɨ bɨ yea èghɨ bàà ègème e ghɨ̀à la, bɨ ko nê, kèfɔ̧̀ Mbɔ̧ɔ̧mà kɨꞋɨ tê ntsìꞋi a ngèt yɨ̧ la.

32“Ane nkûŋ, tsiꞋ è shua wɨ̧ nê, bòt ngɔ̀ŋ àfɨ̀Ꞌ yaa aa me laꞋ nê bɔɔ ndèma, èghɨ bàagème e ghɨ̌. 33SitsǎꞋ bɔ̂ ègwet naa li lɔ̀Ꞌɔ lìa, ka àghɨ à ka wu li ekubte ane èngǎ̧ am.”

Bɨ̀ me ko awɨ̧

34Yesò paa èngà̧ waa ale mè shu abua yɔb nê, “Bɨ̀ me ko awɨ̧, mbɨ̀Ꞌɨ̀ bɨ sà àwɨ̧ èghɨjɨ nyaŋ nè mèlùꞋ kèkweelè e tsòke ètsə bɨ̧. Bɨ̀ ka me mɨ̀ɨ̀tè mènəè sitsǎꞋ nyaŋ mbɨ̀Ꞌɨ̀ àli yu a kɨꞋɨ̀ mbà̧à̧ àwɨ̧ kà bɨ koê, mbɨ̀Ꞌɨ̀ àtaã àa ngɨ̀ a baãaã nyà̧ la 35nkàà nê, àlia ngaa aa li kɨꞋɨ kwene ane bòt bàgème bɔ̀ wu a sitsǎꞋ ŋàa la. 36Bɨ̀ me chɨ̀Ꞌɨ àfɨ̀Ꞌ àgeme mè ntsàꞋta a Mbɔ̧ɔ̧mà mbɨ̀Ꞌɨ̀ taa ŋa awɨ̧ mètàŋ bɨ̀a nɨ enû etsě mènəè maa, e mě ko etɨ̧ɨ̧ ntsɔ̧̀ a mbì Waã Wòt ane àli yu tàa li saꞋa bòt bi la.”

37Yesò ghɨ̀ ale, mè me nyɨꞋte èngǎ̧ Mbɔ̧ɔ̧mà abua bòt àli àgème a èbem lob nɨ̧ Mbɔ̧ɔ̧mà nɨa ngà nè mbì. Nyèm ghɨ̀ è fen, tà lɔ̀Ꞌ ngà a ègwet èbȩ Olìf ndi. 38Bòt e li ngua mbùa a ntɔtetsɔ̌Ꞌ ègème nga a èbem lob nɨ̧ Mbɔ̧ɔ̧mà ndzəa ànəa tà shua la.

Currently Selected:

Lûk 21: mnf

Highlight

Copy