Lûk 20

Èngà̧ ane àtɔŋ Yesò

(Mat 21:23-27; Mk 11:27-33)

1È li ngu ane àli ako Yesò wu a èbem lob nɨ̧ Mbɔ̧ɔ̧mà nyɨ̀Ꞌta bòt mè ntsɔ̀tà Ntu̧ Ntsɔ̧̀ Mbɔ̧ɔ̧mà. Bètǎt bèntsìà mèpɨ̧̀ Mbɔ̧ɔ̧mà, nè bènyɨꞋtà mbɨ̧te Musì nè bɔɔjuŋ Bèjuê, e kɨꞋɨ̀ 2shu abua tò nê, “Shu awa àdziꞋa à nɨ̀a àtɔŋ yàa àa nɨ̀a ngɨ̀à èghɨ bàa la. Shu awa wòt tà ŋa awê àtɔŋ ngaa la.”

3Yesò bɨ̀ɨ̀lè nê, “Maa biite awɨ̧ èngà̧ mɨ̧̂. Bɨ̀ tsɔꞋɔ wùà, 4wàa ka tà li ntsàà a Jɔ̌n nê tà me zǐ bòt a èdzî la à? È li ngu Mbɔ̧ɔ̧mà kò wuê bɔbȩ à?”

5Bɔ bùꞋ me kààne a kètsìà wɔb shua nê “Bàa laꞋnê ghà à? Ba wu anè nê ‘Mbɔ̧ɔ̧mà’ ko taa biite awa nê, ‘À wu ale ghǎ a ghɨ̀ ka bà ka bɨ̧ɨ̧ne èngǎ̧ tò à?’ 6Ka ba shua nê, abua bɔbȩ, ko ènɔ̧̂ bòt baa aa temte awa, nkàà nê bɔ bɨ̧ɨ̧ne nê Jɔ̌n li ngu ndàꞋàtɔŋ Mbɔ̧ɔ̧mà.”

7Ale, bɔ tsɔꞋɔ èngǎ̧ Yesò nê “Baa bakà ko.”

8Tà shu abua yɔb nê “Ale betsiꞋa è nka shua wɨ̧ àdziꞋa mâ nɨ àtɔŋ ka me ghɨ̌ èghɨ bàa la.”

Èngà̧teme ane bèlentà mbȩ

(Mat 21:33-46; Mk 12:1-12)

9Yesò ghɨ̀ ale, shu bòt bu èngà̧teme waa nê, “Wòt ko li ndɔ̀Ꞌ ndìꞋi èyɨt vȩn a mbȩ zi, ŋǎ abua bòt bɔ me faꞋa la, mbɔ̂ ndzəè ngà àvi a lèghȩ̀ȩ̀nè seè. 10AfɨꞋa màfuꞋa èghɨ a kuêꞋ, tà tsàà àbùꞋ àzi nê, tà ghǎ abua bòt bu fàꞋa a èbaꞋ li la, nɨ èbi nè èghɨ. Tà ghà bòt ngaa e lene atò mbɔ̂ èfəè atò tà gha èbu fə. 11Tǎt èbaꞋ lu mè ntsàà àbùꞋ a tsa, bèŋût e mè ndene atò mbɔ̂ ngɨ̧̀ɨ̧̀nè atò, èfəè atò tà gha èbu fə. 12Tǎt èbaꞋ lu mè ntsà àbùꞋ akwèn, bɔ zì tèfɨŋtsə ane tò mɨ̧̂, mbɔ̂ màꞋà atò àbȩ.

13“Tǎt èbaꞋ lu me ye tê nê, ‘Maa ghɨ̌ na à? Maa tsàa kwàꞋ waã èkɔŋ am, ateko bɔɔ kà̧aã me bɔa tò.’

14“Mbɨ̀Ꞌɨ̀ bɔfàꞋ bu e ye waã ngaa la, bɔ me làꞋ a kètsìà wɔb nê, ‘Eyaa wu waã tǎt èbàꞋ lu. Bɨ̀ kɨꞋɨ bà bùŋe atò mbɨ̀Ꞌɨ̀ jɨ èbàꞋ mbɔŋ!’ 15Ale, bɔ bê màꞋà atò àbȩ akwèn mbȩ yu, mbùŋè atò.”

Yesò bɔ̂ mbììte bòt bu nê, “Bɨ mɨɨtè nê, wòt wu tà bɔ èbaꞋ laa la nàa ghɨ̌ èghà ane bɔfàꞋ bu à?” 16“Ŋut naa kɨꞋɨ ebùŋe bɔfàꞋ bu, èbɔ ŋa èbaꞋ lu abua bɔfàꞋ tsa.”

Bòt bu è zə ale nê, “Mbɔ̧ɔ̧mà ka mbɨ̧̀ɨ̧̀ne a wu ale.”

17Yesò me lɨ̀ŋke àwɔb tè nê, “Èngǎ̧ Mbɔ̧ɔ̧mà è shua nê ghàà?

‘Èti lu bèmbɔ̧ɔ̧ lob e li ngwaꞋ nê wu èti kàbɔ̀ŋ la,

wu lùà ka e tsiꞋi ngule èti tɔ̀Ꞌɔ̀ lob la.’ #20:17 Èti tɔ̀Ꞌɔ̀ lob wu mbɨ̀Ꞌɨ̀ lu̧lob wu è li ngua mbà̧aã lob àfɨꞋa mbì la.

18Wòt tà kwene a ègwet èti làa la, tàa bəꞋte atem atem, ka èti ngaa è kwene a ègwet wòt ko aa ŋèꞋne atò.”

Ànəa èkab taksì

(Mat 22:15-22; Mk 12:13-17)

19BènyɨꞋtà mbɨ̧te Musì nè bètǎt bèntsìà mèpɨ̧̀ Mbɔ̧ɔ̧mà è lɔ̀Ꞌɔ àfɨꞋa mbɔŋ me kɨ ebaãaã a Yesò, nkàà nê tà làꞋa èngà̧teme wu ŋa abua yɔb. Ka mbɔ̂ ngɨ̀ ale me bɔa bòt bu.

20Ale, bɔ me chɨ̀Ꞌɨ̀ ngule àfɨꞋa bɔ̀ɔ baãaã atò e ŋa abua gɔvanɔ̀ la. Bɔ ŋa àbu akwèn abua bòt ko nê bɔ gha ngɨ̀ mbɨ̀Ꞌɨ̀ bɔ̂ Yesò ba e bakà bɔ ànəê, mbɨ̀Ꞌɨ̀ Yesò me làꞋa, bɔ ye ànəa bɔ̀ɔ zǐ àtsə atò enɨ ghɨ̌ bɔ̀ɔ mbà̧aã atò adù̧ la. 21Bòt bu e biite a Yesò nê, “NyɨꞋtà, ba ko nê èghɨ àa shua mè nyɨ̀Ꞌta la wu nkûŋ. À kà wua njùta ànəa bòt àa ndàꞋà la, ka mbɔ̂ me nyɨꞋte bòt nkûŋ ndɨ Mbɔ̧ɔ̧mà nàa nkɨà nê bòt è wu la. 22Shu awa, tè mbɨ̧ ta tê bɨ̧ɨ̧nè nê bà me ŋa èkab taksì abua Sisà kò wu nê bà ka ŋa à?”

23Ka Yesò tuꞋa yuŋ wɔb ntsɔ̀Ꞌɔ èngà̧ wu nê, 24“Bɨ̀ nyɨꞋte am àkwȩkab.” Tà biite awɔb nê “Àtsə yàa nè èlen làa adù̧ la wu ayea wàà?”

Bɔ bɨ̀ɨ̀lè nê “Àtsəa Sisà.”

25Ale, Yesò shu abua yɔb nê “Bɨ̀ ŋa àghɨa è wu àyea Sisà la abua tò, ŋà àghɨa è wù àyea Mbɔ̧ɔ̧mà la abua Mbɔ̧ɔ̧mà.”

26Bòt ngaa e ghɨ̀ ale, bɔ ka ye àghɨa Yesò fà̧aã a mbì bòt bu abot betsiꞋa bɔ nɨŋ mbà̧aã atò la. Ale, a taꞋa tsè àwɔb, bɔ̀ ka tsi mbɔ̌ ànəa bɔ̀ɔ shu ane àbɨ̀t yu Yesò ŋa la.

Èngà̧ ane ànəa mànju̧u̧ma

(Mat 22:23-33; Mk 12:18-27)

27Bèsadùsiì ko, bòt bu bɔ̀ɔ shua nê betsiꞋa wòt kà pfə mè njù̧ù̧me la, e kɨ̀Ꞌɨ̂ ndze a Yesò mbììte atò nê, 28“NyɨꞋtà, Musì li shu nê, Wòt pfəa kà bi bɔ̧, wanyɨ tò bɔ ndɨ tàa nɨ nempfə wu mbɨ̀Ꞌɨ̀ ebi bɔ̧ abua wanyɨ vi wu tà pfə la. 29Bòt ko basà̧à̧mbe e li ngu bɔ̧ wòt wemɔ̀Ꞌ. We mbì yɔ̀Ꞌɔ̀ vi vi mpfəè ka bɔ bɔ̧. 30Wòt kwèn tò nɨ a nempfə wu, 31wòt kwen we mbɔŋ mè nɨŋ àvi wu, a mè ntsè wu a èlɨ̀. Ànəê yaa a li ndzè àwɔb bɔ̀ɔsà̧à̧mbe bàgème, bɔ pfəꞋte kà ye wòt tà bi waã bɔ̂ àvi wu la. 32A li ngà me lìa, àvi wu pfə azi mɨ̧̂. 33Naa li ngu ane àlia bèmpfəà be yu̧u̧me la, àvi mbɔŋ wu vi wà ane yɔb wu basà̧à̧mbe la à? Bɔ̀ɔgème e li ndzɔ̀Ꞌɔ atò.”

34Yesò bɨ̀ɨ̀lè èngǎ̧ wɔb nê, “Bòt ngɔ̀ŋ yaa àfɨ̀Ꞌ yaa la, aà ndzɔ̀Ꞌa, 35Ka mbâ̧ tu nè bèzi bu bɔ kùꞋu be bɔ̀ɔ li lɔ̀Ꞌɔ eyu̧u̧me e tseke àfɨ̀Ꞌ yu nga ekɨꞋɨ la, è ka li lɔ̀Ꞌɔ tsi yɔꞋɔ a. 36Bɔɔ li tsiꞋi mbɨ̀Ꞌɨ̀ bɔntu̧ Mbɔ̧ɔ̧mà kà wu li pfə. Bɔ wu bɔ̧ Mbɔ̧ɔ̧mà nkàà nê bɔ yu̧u̧me ayɔɔ bèmpfəà. 37Musì li nyɨ̀Ꞌte nê, bèmpfəà beà njù̧ù̧mâ mbɔ mèmpème. A èbem adzìꞋ yu tà làꞋa ànəa èwet wu è li ngua nkòòlâ ane abàꞋ wu la tà shu nê, Mbɔ̧ɔ̧mà wu ‘Mbɔ̧ɔ̧mà Abàlàghâm, Mbɔ̧ɔ̧mà Asàk nè Mbɔ̧ɔ̧mà Jàkɔ̂b.’ 38Tà wu Mbɔ̧ɔ̧mà bòt yu̧, tà ntsě Mbɔ̧ɔ̧mà bèmpfəà. Nkàà nê, aa abua tò, bòt bàgème bɔ zi mèntɨ̧ɨ̧ mɔb ane tò la e wu bòt yu̧.”

39BènyɨꞋtà mbɨ̧te Musì ko bɔ wu abot la e nê, “NyɨꞋtà, à bɨ̀ɨ̀le ntsɔ̧̀.” 40Ale, wòt kà tsi mè nyɔꞋte a màmbiite atò èngà̧ ko tsa.

Ànəa Fɔ̧̀ wu Mbɔ̧ɔ̧mà li ndzɔꞋ ntsà la

(Mat 22:41-46; Mk 12:35-37)

41Yesò bììte awɔb nê “Bɔ ghɨ̀ na ka me shu nê Fɔ̧̀ wu Mbɔ̧ɔ̧mà li ndzɔꞋ etsàà la naa li wu wòt àndǎ̧ fɔ̧̀ Dàbid à? 42Dàbid zìambɔŋ è shu a èbem Àkata Mèkù̧ nê,

‘Mbɔ̧ɔ̧mà Lefɨ̀Ꞌ li shu abua Lefɨ̀Ꞌ am nê,

Tseke àbâ àbualu̧ am

43tè e ŋà èlu̧ à tsite èka bê a ègwet bɔmbù̧ bê.’

44Fɔ̧̀ Dàbid wu tɔ atò ane tǎt vi, tà ghɨ̀ na ka ntsiꞋi wòt àndǎ̧ Dàbid à?”

Yesò làꞋ ànəa bènyɨꞋtà mbɨ̧te Musì

(Mat 23:1-36; Mk 12:38-40)

45Mbɨ̀Ꞌɨ̀ bòt bu bàgème è wua njùta mènəè Yesò shua la, tà ghèble avi shu abua bɔkatè bi nê, 46“Bɨ̀ me ko awɨ̧ ane bènyɨꞋtà mbɨ̧te Musì. Bɔ taꞋa wua nkɔ̀ŋkà me kwaãaã mèmǎ̧ mɔb ngȩ̀ȩ̀nà, mè ntàꞋa wua nkɔ̀ŋkà bòt aa me tsàꞋtè àwɔb mè nkùkte awɔb àsà̧aã tèwentsə. Bɔ̀ɔ ngɨ̀ bɔ gha èdziꞋi mèpà̧, bɔ̂ lobte Mbɔ̧ɔ̧mà bɔ me kɨ wu ètɨ̧ ntsɔ̧̀ ka tseke a ègwet. 47Mbɔ̂ ngu bɔ̀ɔ̀ba bɔ̀ɔ ngɨ̀ɨ̀la bènempfə fàà èghɨ bɔb, mbɔ̂ ndɔ̀Ꞌ me tsàꞋta Mbɔ̧ɔ̧mà ndà̧à̧nà mbɨ̀Ꞌɨ̀ enɨ èvəèəèlè àghɨ a bòt la. Bɨ̀a li bɔ ngoꞋ è tsě ye bòt bàgème la.”

Currently Selected:

Lûk 20: mnf

Highlight

Copy