Lûk 11

Yesò nyɨ̀Ꞌte bɔkatè bi ndɨ bɔ̀ɔ me tsàꞋte a Mbɔ̧ɔ̧mà la

(Mat 6:9-13; 7:7-11)

1Àfɨ̀Ꞌ àko a li nguê, Yesò me tsàꞋte a Mbɔ̧ɔ̧mà àdzìꞋ àko. Mbɨ̀Ꞌɨ̀ tà tsàꞋte tè ndɔ̀Ꞌ la, wakatè tò ko shu abua tò nê, “Tê Yesò, nyɨꞋte awa ndɨ bàa me ntsàꞋtè a Mbɔ̧ɔ̧mà la, mbɨ̀Ꞌɨ̀ Jɔ̌n le lɔ̂Ꞌ nyɨ̀Ꞌte bɔkatè bi la.”

2Yesò shu abua yɔb nê, “Ye ndɨ bɨ̀a me tsàꞋte la:

‘Tǎt wa wu a ègwet la leꞋ,

Ghɨa bòt è kukte èlen lê

Ghɨa Kèfɔ̧̀ wê kɨꞋɨ,

3Ŋa awa àli àgème èghɨjɨ e kùꞋ àwa la.

4WaꞋa bèkàbɔ̀ŋ ba,

mbɨ̀Ꞌɨ̀ bàambɔŋ e waꞋa bèkàbɔ̀ŋ bɔnyɨ ba la.

À ka ntsàà wa àdziꞋa bɔ̀ɔ taãaãte awa la.’ ”

5Yesò ghɨ̀ ale, è shu abua bɔkatè bi nê, “TsiꞋ bà nɨŋ nê, wòt kǒ ane yɨ̧ lɔꞋɔ a ntɨ̧ɨ̧tsəꞋ ngà shu abua shu̧ zi nê, ‘Ewuɔ, ŋa am badzìꞋ èghɨjɨ. 6Shu̧ yaã kǒ e kua lèghȩ̀ȩ̀nè ngu a lob yaã, ka e nka bɔ àghɨa tàa jɨ la.’

7“Tè wòt wu a èbem lob la shu abua tò nê, ‘Ka ŋa am ngoꞋ, mâ gheba ètsələèꞋ am tè ndɔ̀Ꞌ, ba bɔ̧ bɔ̧ è nɔ̀ŋke a si. BetsiꞋa è nka tsi ndɔ̀Ꞌ a si tè ŋa awê àghɨ ako,’ ko àa wu naà?” 8TsiꞋ è shu awɨ̧ ane nkûŋ nê, tà màà mbakà lɔ̀Ꞌɔ a si eŋa èghɨjɨ bu abua tò mbɨ̀Ꞌɨ̀ shu̧, ko taa lɔ̀Ꞌɔ a si eŋa àghɨ àgème taa nkɨà la nkàà nê tà ko nê tàà tɨ̧ɨ̧ abot me ŋwèta ndò̧a wuê lo̧o̧.

9E ngua shu awɨ̧ nê, bɨ̀ lo̧, ko Mbɔ̧ɔ̧mà naa ŋa, nkɨ̂ ko taa ghɨ̌ bɨa ye, mè ndùꞋte ètsələèꞋ ko taa tsɔꞋɔ abua yɨ̧. 10Nkàà nê wòt ègème tà lo̧ la nàà bɔ, wòt tà kɨ la ye, èwe tà luꞋte ètsələèꞋ la bɔ tsɔꞋa abua tò.

11Tǎt wu ane yɨ̧ waã tò lò̧a asəâ ko taa ŋa nyà̧kàbɔ̀ŋ yû̧ abua tò la wu wàà? 12Kò wòt naa və ane yɨ̧ waã tò lò̧a èbu̧nkɔ̀Ꞌ ko tàa ŋa tò ànkàfuŋ la leè? 13Tè bɨ̀a wàa bɨ̀ wu bòt kàbɔ̀ŋ la, e wu ko eŋa èghɨ ntsɔ̧̀ abua bɔ̧ bɨ̧, è me wu tǎt wɨ̧ wu a ègwet la tà kà ŋa Fo Kèfə abua bòt bɔ lo̧ abua tò la tè ntsě?

Yesò bɔ̂ Belzebùl

(Mat 12:22-30; Mk 3:20-27)

14Yesò li ngua fəèà fo kàbɔ̀ŋ ane wòt kǒ è ghɨ̂ ŋut kwene mbûꞋ la. Mbɨ̀Ꞌɨ̀ è dzəè la, mbûꞋ yu bùꞋ me làꞋa, ànəa mbɔŋ a taꞋa tsě bòt. 15Ka àbəèꞋ àyɔb a me shu nê, mètàŋ mu Yesò nàa nɨ̀a fəèà fote kàbɔ̀ŋ ane bòt la, dzəa abua Belzebùl, fɔ̧̀ fote kàbɔ̀ŋ. 16ÀbəèꞋ àyɔb ako a me kɨ enyɔꞋte atò shu abua tò nê tà nyɨꞋte awɔb àlȩê nê Mbɔ̧ɔ̧mà ka tà tsàà vi la.

17Ka bɔ me ghɨ̌ ale, Yesò yaŋe ko àghɨa bɔ̀ɔ mɨ̀ɨ̀tà a mèntɨ̧ɨ̧ mɔb la, shu abua yɔb nê, “ÀlaꞋ àgème a tseke ane àyɔ̀ŋ, mè me nù àwɔb bɔ̀ɔmbɔŋ la, à bɔ̂ ndɨ a bele yaŋe kwene la. Ləlob e tseke ane àyɔ̀ŋ la wu ləlob lème. 18È wu ale, Satàn me nù àvi zìambɔŋ, ko kèfɔ̧̀ tò nàà ghɨ̀ na ka tseke ka kwen à? E ndàꞋà anè nkàà nê bɨ laꞋnê wu Belzebùl ka tàa ŋà am mètàŋ mu màa nɨ̀a fəèà fote kàbɔ̀ŋ ane bòt la. 19Ka è wu nkûŋ nê màa nɨa mètàŋ Belzebùl ka nɨa fəèà fote kàbɔ̀ŋ, ko bòt bɨ̧ àa nɨ̀a mètàŋ nèŋà ka fəèà tùà à? Èghɨ bu bòt bɨ̧ àà ngɨ̀à la e nyɨꞋtè nê bɨ fâ̧. 20Ka e ngua nɨa mètàŋ Mbɔ̧ɔ̧mà ka fəèà fote kàbɔ̀ŋ ko a wua nyɨ̀Ꞌta nê kèfɔ̧̀ Mbɔ̧ɔ̧mà kɨꞋɨ tê ntsìꞋi nè nɨ̧̀.

21“Wòt kèkweelè nàa ngɨ̀ tà taŋke èghɨ èbet enɨ baabe lob zi, èghɨ tò ègème e tseke ntsɔ̧̀. 22Ka è wu àfɨꞋa wòt tà kweele tê ntsè atò la, è kɨꞋɨ̀ ndène atò la, tà fàà èghɨ èbet tò bu tàà wua ndzìà èntɨ̧ɨ̧ vi adù̧ la ègème, mbɔ̂ ngàbtè èghɨ tò.

23“Wòt bakà wu wòt am, ko tà wu wɔ̀mbù̧ am, Wòt tàa ka tɨ̀ŋe am efete la, ko nè tà wua ntàa taa.

ÀfɨꞋa fo kàbɔ̀ŋ è kua akwèn la

(Mat 12:43-45)

24“Fo kàbɔ̀ŋ nàa ngɨ̀ e dzə ane wòt è me gheebe a èdziꞋ yuube nkɨà àdziꞋa yeà tseke la. È bakà ye àdziꞋ, è shu abua zi zìambɔŋ nê ‘Maa wènè a lob yaã yu e ndi dzəè la.’ 25Ale, è kua akwèn è kɨꞋɨ è ye ndɨ bɔ tuꞋu lob mbɔŋ nèètè è me bɔ̀ la, 26è mè ngà nɨ fote kàbɔ̀ŋ ko tesà̧à̧mbe te bɨɨte ntsè yùà la, nɨŋ kɨ̀Ꞌɨ̂ bɔ tseke a èbèm. À gha a me lìa, ŋut bê bɨɨ tê ntsè ndɨ tà ghɨ̂ ndzaã ngu la.”

Ndaŋe mèntsèke ntsɔ̧̀

27Yesò me laꞋa èngà̧ waa ale, àvi kǒ ane ènɔ̧̂ wu e ghɨ̂ ngu abot la ŋȩ shu abua tò nê, “Ntsɔ̧̀ wu àvi wu tà lè bi awê, mè ndì awê tè à tsə la.”

28Yesò bɨ̀ɨ̀lè èngǎ̧ tò nê, “ÀwɔꞋ, ntsɔ̧̀ wu wuê bòt bu bɔ zə èngǎ̧ Mbɔ̧ɔ̧mà mè ngɨ̀ àghɨa èa shuà la.”

Bèfalèsiì è mè kɨ àlȩê

(Mat 12:38-42)

29Mbɨ̀Ꞌɨ̀ ènɔ̧̂ bòt bu e fetè a ngèt Yesò la, tà shu abua yɔb nê, “Bòt laane wu bòt kàbɔ̀ŋ bɔ̀ɔ ka bɔa Mbɔ̧ɔ̧mà la. Bɨa nkɨà nê è nyɨꞋte awɨ̧ àlȩê ka bɨ̀ ka wu eye. NdàꞋ èwuu ànəa kà ye fɨ̀Ꞌ màa nyɨꞋte awɨ̧ la wu à yu Mbɔ̧ɔ̧mà li ngɨ̀ ane Jɔnà la.” 30Ndɨ Jɔnà, ndàꞋàtɔŋ Mbɔ̧ɔ̧mà li ngu mbɨ̀Ꞌɨ̀ àlȩê abua bòt Ninevè la, wu wuê èlɨ Waã Wòt nàa wu mbɨ̀Ꞌɨ̀ àlȩê abua bòt laane la. 31Naa li ngu ane àlia saꞋa Mbɔ̧ɔ̧mà, fɔ̧̀ àlaꞋ a Sèbà lɔ̀Ꞌɔ a si mbà̧ wɨ̧ ane mènəè kàbɔ̀ŋ mu bɨ̀a ngɨ̀à la, nkàà nê tà li ndzəè tèa tɔ̀Ꞌɔ̀ ngɔ̀ŋ kǒ, nkɨ̀Ꞌɨ̂ ezə mèngǎ̧ fɔ̧̀ Sàlemun li ngua nɨa èyì vi ndàꞋà la. TsiꞋ è shu awɨ̧ nê wòt kǒ naa àdzìꞋ yàa àfɨ̀Ꞌ yaa, èyǐ tò e tsè è we fɔ̧̀ Sàlemun la. 32Naa li ngu ane àlia saꞋa Mbɔ̧ɔ̧mà, bòt àlaꞋ a Ninevè e lɔꞋɔ a si mbà̧ wɨ̧ ane mènəè kàbɔ̀ŋ mu bɨ̀a ngɨ̀à la, nkàà nê bɔ li ngwàꞋ mènəè kàbɔ̀ŋ mɔb àfɨꞋa Jɔnà li ntsɔ̀tè ntu̧ Mbɔ̧ɔ̧mà abua yɔb la. TsiꞋ è shu awɨ̧ nê wòt kǒ naa àdzìꞋ yàa mènəè tò è tsě me Jɔnà la.

ÈkaꞋà mbɨ̧̀ ènyit

(Mat 5:15; 6:22-23)

33“Wòt nàà kà tò̧ èkaꞋà ndò̧, tà kà tsia a èten èpfəêꞋ. Tàa ngɨ̀ tà tsia a ègwet èkɔꞋ, mbɨ̀Ꞌɨ̀ aa me bàŋe bòt bɔ̀ɔ nyìa a lob la. 34Àghɨ a yê a wu mbɨ̀Ꞌɨ̀ èkaꞋà mbɨ̧̀ ènyit. Àghɨ a yê àa ngɨ̀ à wu ntsɔ̧̀, mbɨ̧̀ ènyit ye ègème è lu̧u̧ nè èkaꞋà. Mbə àghɨ a yê a bakà wu ntsɔ̧̀, mbɨ̧̀ ènyit ye ègème è lu̧u̧ nè kèbìꞋà. 35È wu ale, bɨ̀ me ko awɨ̧ mbɨ̀Ꞌɨ̀ èkaꞋà wu bɨa ngȩȩna a èbèm la e tsiꞋi ndzěm. 36Ale, ènyit yê ègème e lu̧a nè èkaꞋà, tè àdziꞋ ènyit yèa ko a bakà wu a èbem ndzěm, ko aa me fəə nenkèm, mbɨ̀Ꞌɨ̀ èkaꞋà àa ngɨ̀ e me bàŋè alu̧ la.”

Yesò nyɨ̀Ꞌte mènəè kàbɔ̀ŋ Bèfalèsiì bɔ̂ bènyɨꞋtà mbɨ̧te Musì

(Mat 23:1-36; Mk 12:38-40)

37Mbɨ̀Ꞌɨ̀ Yesò paatè èngǎ̧ vi la, wòt Falèsiì ko kaꞋa atò a lob zi nê, bɔ̀ gha njɨ̀ èghɨjɨ, ale Yesò ghà ntsèke a si a mànjɨa. 38A taꞋa tsě wòt Falèsiì wu e ye nê Yesò nàà njɨ̀a èghɨjɨ kà shuu èbu bi a shua yu bòt ko àa shùà la.

39Yesò shu abua tò nê, “Bɨ̀a Bèfalèsiì, bɨ̀a ngɨ̀ bɨ shùù kwènte ndɔŋ nè kwènte bapfəèꞋ mbɔ̂ tèbèmtsə te lu̧u̧ ne mèkɔb, wuê mbɨ̀Ꞌɨ̀ tèbèm tɨ̧ te lu̧u̧ nè sɔ̧ɔ̧ bɔ̂ èghoꞋ la. 40Ye èkèghɨ̧̀ ko. Ka wu Mbɔ̧ɔ̧mà wu tà bɔ̧ɔ̧ àbȩ la tà bɔ̧ɔ̧ èbèm mɨ̧̂ la à? 41Ka bɨ̀ ŋa èghɨ bu a èbem ndɔŋ tɨ̧ nè bapfəèꞋ bɨ̧ la abua bòt ntseb, ndzè na àghɨa ko a ntsě àa kele awɨ̧ nê bɨ ka fəə a mbì Mbɔ̧ɔ̧mà la.

42“Aa li bɨa awɨ̧, bɨ̀a Bèfalèsiì, bɨ̀a ngɨ̀ bɨ ghàbtè èghɨ mbȩ bɨ̧ ane èdziꞋ èghem, ègha wu ka wuê ane tèfɔbtsə, ŋǎ èghab Mbɔ̧ɔ̧mà. Ka bɨ̀ ka wua nkɨ̀a nê mènəè mɨ̧ tɨ̧ɨ̧ ndɨŋndɨ̀ŋ, bɨ̀ ka mě ngua nkɔ̀ŋkà Mbɔ̧ɔ̧mà. Eyaa wu èghɨ bɨ bɔ ndɨ bɨ̀a ghɨ̀ ka waꞋa ebeko bu la.

43“Aa li bɨa awɨ̧, bɨ̀a Bèfalèsiì, nkàà nê bɨ taꞋa wua nkɔ̀ŋkà ètɨ̧ nɨ̧ a lob Mbɔ̧ɔ̧mà, mè ntaꞋa wua nkɔ̀ŋkà bòt aa me ŋa kènuke abua yɨ̧, ntsàꞋtè àwɨ̧ a èsà̧aã tèwentsə.

44“Aa li bɨa awɨ̧, nkàà nê bɨ wu mbɨ̀Ꞌɨ̀ ètsəsì ka ye àlȩê, bòt àa ntɔ̀Ꞌtà kà ko laꞋ nê bɔ tɔ̀Ꞌtà àghɨa kàbɔ̀ŋ la.” #11:44 Wòt Juê nàa ngɨ̀ tà tɔ̀Ꞌtè àtsəasì, tà kà tsi nkùꞋù è we tàa nyi a lob Mbɔ̧ɔ̧mà la, tè tà ghɨ̀ shuu a lèsɔ̀t mbɨ̀Ꞌɨ̀ mbɨ̧te Musì te shu la.

45NyɨꞋtà mbɨ̧te Musì kǒ shu abua Yesò nê, “NyɨꞋtà, àa ndàꞋà mènəè maa ale ngua ntsɔ̧̀ɔ̧̀tà wa tsɔ̧̀ɔ̧̀te mɨ̧̂.”

46Yesò bɨ̀ɨ̀lè èngǎ̧ tò nê, “Aa li bɨ̀a awɨ̧, bɨ̀a bènyɨꞋtà mbɨ̧te Musì mɨ̧̂, bɨ̀a ngɨ̀ bɨ̀ zi èbòꞋà a kɔ̧te bòt e tsè àwɔb a màŋeꞋa la, ka bɨ ka lɔkè kèti fɨ̧ ekɔ̀te enɨ etɨŋe awɔb bɔ̀ɔ ŋeꞋe.

47“Aa li bɨa awɨ̧, bɨ̀a ngɨ̀ bɨ bɔ̧ɔ̧ ètsəsì bèndàꞋàtɔŋ Mbɔ̧ɔ̧mà bu bètǎt nyaꞋ bɨ̧ e li mbùŋè la. 48Bɨ̀a ngɨ̀ bɨ bɔ̧ɔ̧ ale, bɨ wua nyɨ̀Ꞌta nê bɨ bɨ̧ɨ̧nè àghɨa bètǎt bɨ̧ è le lɔ̂Ꞌ ngɨ̀ la. Bɔ̀ li mbùŋè bèndàꞋàtɔŋ Mbɔ̧ɔ̧mà, bɨ bɔ̧ɔ̧ ètsəsì bɔb. 49Eyaa wu lə Mbɔ̧ɔ̧mà li nɨ̌ èyǐ vi nê, ‘Maa tsàà bèndàꞋàtɔŋ bɔ̧ nè bɔntu̧ bɔ̧ abua yɔb, bɔɔ bùŋe àbəèꞋ àyɔb, è mee ghɨ̧̀ɨ̧̀ne àbəèꞋ la’. 50Ale, Mbɔ̧ɔ̧mà naa li zi bòt laane a èbem ngoꞋ, nkàà bèndàꞋàtɔŋ Mbɔ̧ɔ̧mà bu bàgème, bɔ li mbùŋè e bùꞋu àfɨ̀Ꞌ a ngɔ̀ŋ li mbùꞋ la. 51E bùꞋu ane èvə Abèl eghǎ wu ane èvə Zàkàleyà wu bɔ li mbùŋè atò a kètsìà lob nɨ̧ Mbɔ̧ɔ̧mà nè àdzìꞋ yu bɔ̀ɔ ŋǎ èghɨ abua Mbɔ̧ɔ̧mà la. Ane nkûŋ, tsiꞋ è shu awɨ̧ nê Mbɔ̧ɔ̧mà naa li zi bòt laane a èbem ngoꞋ nkàà wɔb bàgème.

52“Aa li bɨ̀a awɨ̧, bɨ̀a bènyɨꞋtà mbɨ̧te Musì. Bɨ bèa nkȩ̀ yu nàa ntsɔ̀Ꞌɔ ètsələèꞋ lob yu èyì e wu a èbèm la. Bɨ bakà nyi a èbèm, mbɔ̂ bɨ ka meè ŋà èlu̧ bòt ko aa nyi.”

53Mbɨ̀Ꞌɨ̀ Yesò sà abot tè me ghǎ la, bènyɨꞋtà mbɨ̧te Musì nè Bèfalèsiì bu e bùꞋ ndâ me tsɔ̧̀ɔ̧̀te atò, mè me ŋwèèle atò mbììte atò mèngà̧ ane mènəè nyaŋ, bɔ̀ɔ ngɨ̀à ntà̧à̧ta, 54tò mbɨ̀Ꞌɨ̀ tà bela ndàꞋà tà fà̧ èngà̧ nkwene mbɨ̧ bɔ baãaã atò adù̧ la.

Currently Selected:

Lûk 11: mnf

Highlight

Copy