Lûk 10

Yesò tsàà bɔkatè bi èghem yesà̧à̧mbe ntsɔ̀b babe àbȩ

1Yesò Lefɨ̀Ꞌ li ntsèke tè ndàà bɔkatè ko èghem yesà̧à̧mbe ntsɔ̀b babe nɨŋ nkwèꞋnè ane bɔkatè bi bu èghem ntsɔ̀b babe la. Tà ghɨ̀ ale, ntsàà àwɔb babe babe a mbì, a èpfəè nɨ̧ ègème nè èdziꞋ ègème tà bɔ̂ ndɨ yèa ghǎ la, 2mbɔ̂ shu abua yɔb nê, “Èghɨjɨ e lu̧ a èbem mbȩ ka bòt bɔ̀ɔ fùꞋù la e me koo. È wu ale, bɨ shu̧u̧te a Tǎt mbȩ nê tà tsàa bòt bɔ̀ɔ fùꞋù la a èbem mbȩ zi. 3Bɨ̀ ghǎ, e ngua ntsàà àwɨ̧ mbɨ̀Ꞌɨ̀ bɔɔnjɨ̀ a kètsìà ngwitenyà̧. 4Mbɨ̀Ꞌɨ̀ bɨa ngà la, wòt ka mbèà ka wuê ntaꞋ, ka wuê ambè, eghǎ dzəâ ane gùbtsə. Bɨ̀ ka ntsòkè àfɨ̀Ꞌ nyaŋ a màntsaꞋta wòt alu̧.

5“Bɨ nyi a lob wòt, ànəa mbì bɨ bɔ̂ ndɨ bɨ̀a shu la wu nê, ‘Àlàŋkè à wu a lob ŋàa.’ 6Wòt àlàŋkè wu a lob və, ko mèntsàꞋte àlàŋkè mɨ̧ naa tèꞋa nè tò. Mbə wòt àlàŋkè bakà wuê, ko mèntsàꞋte àlàŋkè mɨ̧ naa kua akwèn ekɨꞋɨ abua yɨ̧. 7Bɨ bɔ̂ ndɨ bɨ̀a tseke a lob ngaa e me jɨa mè nua àghɨ àgème bɔ ŋa abua yɨ̧ la, nkaa nê wɔ̀fàꞋ ègème è bɔ̂ ndɨ tàa bɔ àbȩ̀ ane àfàꞋ àzi la. Bɨ̀ ka me ghȩ̀ȩ̀ne nembuꞋ, nyia a lob yaa ndzəèà nyia àzia.

8“Àpfəèa nɨ̧ àgème bɨ gha bòt àpfəè və e tsɔꞋɔ mètsələèꞋ mɔb abua yɨ̧ la, bɨ jɨ àghɨa àgème bɔ ŋa abua yɨ̧ la, 9mbəâ bòt àghɔ̧ àpfəè və, è shu abua bòt nê, ‘Kèfɔ̧̀ Mbɔ̧ɔ̧mà kɨꞋɨ̀ tê ntsìꞋi a ngèt yɨ̧’. 10Ka bɨ̀ me ghɨ̌ tê nga àpfəèà nɨ̧ ako, bòt àpfəè və e tu̧ etsɔꞋɔ mètsələèꞋ mɔb abua yɨ̧, bɨ ghǎ a kètsìà àpfəè mbɔŋ kwàꞋ èbùꞋ alu̧, shu abua yɔb nê, 11‘Ba yò ka wuê àbeb àpfəè àyɨ̧ a nyî ane èka ba la, dèbe kwèn ta ŋa abua yɨ̧. Ka bɨ̀ ko nê kèfɔ̧̀ Mbɔ̧ɔ̧mà ekɨꞋɨ̀ tê ntsìꞋi a ngèt yɨ̧.’ 12TsiꞋ è shu awɨ̧ nê, Mbɔ̧ɔ̧mà nàa li kù tèsȩte bòt Sodòm nè Gòmolà tè ntsè ndɨ tàa ku e te bòt èpfəè mbɔŋ la.

Èpfəâ kà bɨ̧ɨ̧ne a Yesò

(Mat 11:20-24)

13“Aa li bɨa wɨ̧ bɨ̀a bòt Kolazìn, aa li bɨa wɨ̧ bɨ̀a bòt Bèsedà! Bɔ li ngɨ̀ ale ngɨ̀ tèwuute ènəê taà bɔ ghɨ a kètsìà wɨ̧ la àlaꞋ a bòt Tȩê nè Sidɔ̀n ko bɔ li dzaŋe kwaã epfəə, mè fəèꞋəè muttsə ane yɔb, enɨ nyɨꞋte nê bɔ waꞋa mènəè kàbɔ̀ŋ mɔb. 14Ka Mbɔ̧ɔ̧mà naa li ku tèsȩte bòt Tȩê nè Sidɔ̀n àlia taa li saꞋa ngɔ̀ŋ la, te tsě ndɨ tàa ku tɨ̧ la. 15È me ewu awɨ̧ bɨa bòt Kàpenàwuêm! Bɨ li mbàte ngua nkɨ ŋeꞋe awɨ̧ bɨ̀ambɔŋ etsàà a ègwet, ka tsiꞋ è shu awɨ̧ nê bɔɔ li shuke awɨ̧ a si etsǎ àlaꞋ a bèmpfəà.”

16Yesò shu abua bɔkatè bi nê, “Wòt me zə awɨ̧, tà wua ndzəa am, we tà teme kwèn zi ŋǎ abua yɨ̧ la, wua ntèma kwèn zi ŋǎ abua am, wòt tà teme kwèn zi ŋǎ abua am la, wua ntèma kwèn zi ŋǎ abua wòt wu tà tsàà am la.”

Bòt bu èghem yesà̧à̧mbe ntsɔ̀b babe la e kua

17Mbɨ̀Ꞌɨ̀ bòt bu èghem yesà̧à̧mbe ntsɔ̀b babe e ghà te nkùà la, bɔ wùꞋtè àwɔb, è shu abua Yesò nê, “Tê, ka wuê fote kàbɔ̀ŋ te wua ŋǎ bòt ngoꞋ la, te zə awa ndzəè ane bòt mbɨ̀Ꞌɨ̀ ba ŋwète a mbɨ̧̀ tɔb shu abua yɔb nê, tè dzəa ane bèŋût ane èlen lê la.”

18Yesò bɨ̀ɨ̀lè nê, “E ndɨ ndzě ndɨ Satàn lɔ̀Ꞌɔ a ègwet mbɨ̀ŋkê nkwen mbɨꞋɨ̀ èfâŋ la. 19Bɨ̀ zə. Mâ ŋa awɨ̧ mètàŋ bɨ̀a nɨ eghȩ̀ȩ̀ne a ègwet nyaãtekàbɔ̀ŋ bɔ̂ ènkàfuŋ, nè èghɨ kekweelè wɔ̀mbù̧ Mbɔ̧ɔ̧mà enɔ̀ŋè ntà̧ àwɨ̧ la, mbɔ̂ betsiꞋa àghɨ ane èghɨ bàa à ka zi àlɔꞋ ane yɨ̧. 20Ka, bɨ̀ ka ngùꞋtè àwɨ̧ ndɨ fote kàbɔ̀ŋ tèa ndzəèà awɨ̧ la, bɨ̀ wùꞋte àwɨ̧ wuê ndɨ Mbɔ̧ɔ̧mà shɨ tèlen tɨ̧ a èbem àkatè àzi a ègwet la.”

Yesò wùꞋtè àvi

(Mat 11:25-27; 13:16-17)

21AfɨꞋa mbɔŋ Fo Kèfə ghɨ̀ èntɨ̧ɨ̧ Yesò e lu̧u̧ nê mèngùꞋte, Tà nê, “Tê, Fɔ̧̀ ègwet nè sitsǎꞋ leꞋ, mâ kɔ̀ŋke àwê na à lô̧ èghɨ bàa abua bòt èyì nè bòt àkatè, mbɔ̂ nyɨ̀Ꞌte abua bòt kà ko èdziꞋ la. Oò Tê, à li ngɨ̀ àyaa ane mènkɔ̀ŋke mê, mè nè ndɨ àa bɔ̀ àwê la.

22“Tǎt am è ŋa èghɨ ègème abua am. Wòt kǒ tà lâ ko àghɨa waã wu yùà kà wu tǎt tò la è ntsě; wòt kǒ tà meè ndâ ko a tǎt waã kà wuê waã mbɔŋ la ka wuê, nè bòt waã wu è kɔ̀ŋkè nê bɔ̀ ko atò la.”

23Yesò ghɨ̀ ale, ngèble avi ntsèmtè abua bɔkatè bi nê, “Bɨ wu bòt èsi ntsɔ̧̀, ndɨ̀ wu bɨ ye àghɨa bɨ ye la. 24Ane nkûŋ, tsiꞋ è shu awɨ̧ nê, bèndàꞋàtɔŋ Mbɔ̧ɔ̧mà nyaŋ, nè bèfɔ̧̀ e li ngua ntsènà è nkɨ eye àghɨa bɨ̀a ndzèa la ka bɔ̀ ka ye, mè nkɨ ezə àghɨa bɨ̀a ndzəèa la, ka bɔ̀ ka zə.”

Èngà̧teme adù̧ wòt ntsɔ̧̀ Sàmalìà

(Mat 22:34-40; Mk 12:28-34)

25NyɨꞋtà mbɨ̧te Musì ko li nkɨ̀Ꞌɨ̂ me kɨ etaãaãte a Yesò, mbììte atò nê, “NyɨꞋtà, betsiꞋa e ngɨ̀ nà ka mbɔ̀ mèmpème kàlìà à?”

26Yesò mè mbììte atò nê, “Àkata mbɨ̧te Musì a nyɨꞋte nê ghà à? Àa ngɨ̀ à tɔ ale à shu nê ghà à?”

27NyɨꞋtà wu bɨ̀ɨ̀lè nê, “Me kɔ̀ŋke a tǎt wè Mbɔ̧ɔ̧mà nè èntɨ̧ɨ̧ wê ègème, ŋǎ wê nènkèm abua tò, nè mètàŋ mê ègème, mè me mɨ̀ɨ̀tè wuê atò, mbɔ̂ me kɔ̀ŋkè wanyɨ wè mbɨ̀Ꞌɨ̀ àwɔ̀ mbɔŋ.”

28Yesò shu abua tò nê, “À làꞋa nkûŋ yê.” Mbɔ̂ mè shu abua tò nê, “Ghǎ ngɨ̀ mbɨ̀Ꞌɨ̀ à shu la, ko aa bɔ mèmpème kàlìà.”

29Tà shu ale, nyɨꞋtà mbɨ̧te Musì wu me kɨ enyɨꞋte nê èngǎ̧ vi e lâ mbɔ̀ lə, ale tà mè mbììta Yesò nê, “Wanɔ̧ wu wà à?”

30Enɨ bɨ̀ɨ̀le èngǎ̧ tò, Yesò nê, “Wòt ko le lɔ̂Ꞌ ndzəè àpfəèà nɨ̧ a Jèlusalèm me chua nga a Jèlikò. Nchu alu̧, bètsɔŋ e baãaã atò, ntsì ndìte tò shù̧u̧ atò tè tà tsìꞋi we pfəâ, mbɔ̂ sa atò ngà àwɔb. 31Àfɨ̀Ꞌ a me wu, ntsìà mèpɨ̧̀ Mbɔ̧ɔ̧mà kǒ me chua ntsèà alu̧ ngaa, ndzě wòt ngaa, ntù̧ èlu̧ ntsiꞋi chu ntsè nè àbà zia. 32Wòt àndǎ̧ Levì ko chu wuê a èlɨ mbɔŋ ndzə a mbɨ̧̀ ŋut, ntɨ̧ɨ̧ ndzě atò, mbɔ̂ mè ntù̧ alu̧ ntsè me chua nga aba tsa. 33Ka wòt Sàmalìà kǒ, tàa ngȩȩna alu̧ ngaa la, kɨꞋɨ̀ nkwene ane ŋut. Mbɨ̀Ꞌɨ̀ tà ye atò la, tèsȩte ŋut te taꞋa ku atò, 34tà gha adzìꞋa ŋut nɔ̀ŋkè la, ntsəètè mèlùꞋ kèkweelè ane tèfɨŋke tò, mbɔ̂ mè ndzì mèwet adù̧. Mbɨ̀Ꞌɨ̀ tà zì la, tà kùùlè tèfɨŋ tu mbɔ̂ ŋèꞋe atò ntsia a ègwet loà vi, nɨ atò ngà nɔŋe a lob bòt lèghȩ̀ȩ̀nè aa ndzèta a èbèm la, me lɨ̀ŋke atò. 35ÈtsəꞋ e tsi, tà ghaꞋa ambè vi ntsì èkwȩkab bebe ŋǎ abua mbaabà lob bòt lèghȩ̀ȩ̀nè yu mbɔ̂ shu abua tò nê, ‘Me lȩ̂ atò tè e nga nkua. Èkab wu e tsiꞋa nkòa, ko àfɨꞋa màa kua la, maa vəèəè àghɨa à nkweꞋnè ntsòke ane tò la abua yê.’ ”

36Yesò me paate èngǎ̧ vi mbììte atò nê, “Ane mèmɨ̀ɨ̀te mê, wàa ane bòt baa batat la le ghɨ̂ mbɨ̀Ꞌɨ̀ ngule wanyɨ wòt wu bètsɔŋ è le baãaã atò la à?”

37NyɨꞋtà mbɨ̧te Musì wu bɨ̀ɨ̀lè èngǎ̧ Yesò nê, “Wu wòt wu tà lè nyɨꞋte a ntsɔ̧̀ abua ŋut la.”

Yesò bɔ̂ mè shu abua tò nê, “E bùꞋ àfɨ̀Ꞌ yaa ghǎ me ghɨ̌ a èlɨ̀ ngaa.”

Yesò ghà e mùa Màta bɔ̂ Màlià

38Mbɨ̀Ꞌɨ̀ Yesò bɔ̂ bɔkatè bi è bela ngȩ̀ȩ̀nà la, Yesò kɨꞋɨ̀ ndzəè àpfəè ako, àvi ko bɔ̀ɔ ntɔ atò nê Màta la tsɔꞋɔ lob zi abua tò. 39Màta ko nê ye bɔ wanyɨ vi kǒ èlen tò wu Màlià la. Màlià mbɔŋ kɨꞋɨ̀ ntsèke a ngèt èka Yesò me yute mènəè tàa nyɨ̀Ꞌta la. 40Èntɨ̧ɨ̧ Màta e bùꞋ me bɨɨ ngu ndɨ àfàꞋ a yaãaã abua tò zìa zìa la. Ale, tà kɨꞋɨ̀ shu abua Yesò nê, “Tê Yesò, à mɨɨtè nê wu ntsɔ̧̀ nê wanɔ̧ sà am nê, è me fàꞋa mmɔ̌ ndziꞋne? Shu abua tò nê tà kɨꞋɨ ntɨ̀ŋe am.”

41Yesò tɔ atò nê, “Màta, Màta leꞋ, aà ŋǎ awê ngoꞋ ane èghɨ nyaŋ. 42Ka ndàꞋ àghɨ yeamɔꞋ aa və à bɔ ndɨ à ghɨ̂ ngu me ŋa awê ngoꞋ adù̧ la. Màlià lȩ̀ àghɨa ntsɔ̧̀ mbɔŋ. BetsiꞋa bɔ̀ ka lɔꞋ àlia nɨ àyùà abua tò.”

Currently Selected:

Lûk 10: mnf

Highlight

Copy