Lûk 12

Àghɨa kà wu yùà

(Mat 10:26-27)

1Mbɨ̀Ꞌɨ̀ ènɔ̧̂ bòt e yaãaã tê bòt e tsiꞋa ntɔ̀Ꞌtà beko la, Yesò bɨ̀ shu abua bɔkatè bi nê, “Bɨ̀ me ko awɨ̧ ane yis Bèfalèsiì, è wù àghɨa kà wu yùà la. 2Àghɨ ko bɔ kabà kà a wu li edzəâ àbȩ la a ntsě, àyea a lò̧ò̧te kà wu li pùùla ayaã la à ka wuê. 3Ale, àghɨ àgème à làꞋa a èbem ndzěm la, bɔɔ li zə yùà nèngû̧, àyea à tsèmte a àtû̧ wòt a ntàŋ la, bɔ tsiꞋi tsɔ̀te yùà a èbuꞋ alu̧.

Wòt wɔ̀bȩ̂ nàa me bɔa la

(Mat 10:28-31)

4“Bèshu̧ bɔ̧, e shu awɨ̧ nê, bɨ̀ ka mbɔ̀a bòt bu bɔ̀ɔ bùŋe wòt, ka bɔ̀ ka wu ko e ghɨ̀ àghɨa ko tsa la. 5Maa nyɨꞋte awɨ̧ wòt bɨ̀a me bɔa atò la. Bɨ̀ me bɔa wuê a Mbɔ̧ɔ̧mà. Tà wu wòt tà bùŋà wòt, tà bɔ̀ mètàŋ etsàa atò èwet Satàn la. Ane nkûŋ, bɨ̀ me bɔa wuê atò. 6Tè bɔɔ kà fɨ̧ɨ̧ne bèdzɔɔlekɔt batà̧â̧ ane bèkapà babe? Mbɔ̧ɔ̧mà nàà ka leenè ka wuê wemɔ̀Ꞌ ane yɔb. 7Ka wuê nyèm tu àtsəa yɨ̧ la, Mbɔ̧ɔ̧mà ko kèmpà̧ tùà tègème. È wu ale, bɨ̀ ka mbɔ̀â, ngu nê bɨ tsè àlaã bèdzɔɔlekɔt a mbì Mbɔ̧ɔ̧mà.

Mànkuŋe a Yesò nè màntu̧ a tò

(Mat 10:32-33; 12:32; 10:19-20)

8“Ale, tsiꞋ è shu awɨ̧ nê wòt gème tà tɨ̧ɨ̧ a kètsìà bòt mbɨ̧̀ɨ̧̀ne nê ye wu wòt am la, Waã Wòt naa li mbɨ̧̀ɨ̧̀ne nê tà wu wòt vi mɨ̧̂ a mbì bɔntu̧ Mbɔ̧ɔ̧mà. 9Ka wòt tà tu̧ nê ye ntsě wòt am la, Waã Wòt naa li tu̧ atò a mbì bɔntu̧ Mbɔ̧ɔ̧mà. 10Wòt làꞋà èngǎ̧ kàbɔ̀ŋ adù̧ Waã Wòt ko Mbɔ̧ɔ̧mà naa waꞋa kàbɔ̀ŋ tò, ka wòt tà laꞋa èngǎ̧ kàbɔ̀ŋ adù̧ Fo Kèfə la, betsiꞋa Mbɔ̧ɔ̧mà ka waꞋa a kàbɔ̀ŋ ŋut.

11“AfɨꞋa bòt e səèŋnè àwɨ̧ nɨŋ nkɨ̀Ꞌɨ̂ a lob Mbɔ̧ɔ̧mà, a mbì bɔɔjuŋ bɔ̂ bègɔvanɔ̀ nè bèfɔ̧̀ bɔɔ saꞋa awɨ̧ la, bɨ̀ ka me mɨ̀ɨ̀te ànəa bɨ̀a shu enɨ fà àwɨ̧ la. 12Aa ale, nkàà nê Fo Kèfə naa ŋa awɨ̧ ànəa bɨa shu la àfɨꞋa ngaa.”

Èngà̧teme adù̧ àkèghɨ̧̀a wòt èkab

13Àfɨ̀Ꞌ a me wu, wòt kǒ ane ènɔ̧̂ wu shu abua Yesò nê, “NyɨꞋtà, shu abua wanɔ̧ nê, tà ghàbte èghɨ pfə bu tǎt wa li mpfə ntɔ̀ɔ abua ya ba tò la ŋà è bɔ̧.”

14Yesò bɨ̀ɨ̀lè nê, “Àwɔ̀ mbê wa, wàà tsàà am nê è nkɨ̀Ꞌɨ̂ sàꞋà àwɨ̧, mè ngàbtè èghɨ pfə tǎt wɨ̧ à?” 15Tà ghɨ̀ ale, shu abua yɔb bàgème nê, “Bɨ̀ nɨ àfɨ̀Ꞌ, mbɔ̂ me nko mbɨ̀Ꞌɨ̀ èghoꞋ e wu a kètsìà wɨ̧. Mèmpème wòt nè mèntsèke ntsɔ̧̀ tò ntsě ane èghɨ tà bɔ la, ka tà màà mbɔ èghɨ wu nà leꞋ.”

16Yesò ghɨ̀ ale, mbɔ̂ shu awɔb èngà̧teme wàa nê, “Wòt èkab ko li ngu, èghɨjɨ e taꞋa kɔꞋɔ a èbaꞋ tò. 17Tà bùꞋ me mɨ̀ɨ̀te a èntɨ̧ɨ̧ vi nê, ‘E mbakà bɔ àdziꞋa màa paŋe èghɨjɨ bɔ̧ bàà la. Màa ghɨ̌ na à?’

18“Tà tseke tê mè ntsìꞋi shu abua zi zìambɔŋ nê, ‘Ye àghɨa màa ghɨ̀ la. Maa bùù ngǒ taã etsàà a si, e bɔ̧ɔ̧ te nɨ̧ màa paŋe èghɨjɨ bɔ̧ nè èghɨ bɔ̧ ègème a èbèm la. 19AfɨꞋa màa paa la, maa shu abua am mmɔ̌ mbɔŋ nê, “E ngu wòt èsi ntsɔ̧̀. Mâ bɔ èghɨ ntsɔ̧̀ ègème màa nkɨ̀a la ane mèngùꞋ nyaŋ. È nka tsi dèbè ènyit yaã a, maa jɨ, enu, e mě wùꞋte am ntsɔ̧̀.” ’

20“Mbɨ̀Ꞌɨ̀ tà làꞋ ale la, Mbɔ̧ɔ̧mà shu abua tò nê, ‘Ye àkèghɨ̧̀ àko. Fo yê naa dzəâ ane yê kwàꞋ ètsəꞋ waa. Waa nàa li jɨ èghɨ bàà à paŋe la à?’ ”

21Yesò me paa èngǎ̧ vi nê, “Eyaa ndɨ àa li wu ane wòt ègème tàa fèta èghɨ nyaŋ mpàŋa abua zi zìambɔŋ a sitsǎꞋ ŋàa, ka mbɔ̂ ngu wòt ntseb a mbì Mbɔ̧ɔ̧mà la.”

Bɨ̀ zì mèntɨ̧ɨ̧ mɨ̧ ane Mbɔ̧ɔ̧mà

(Mat 6:25-34)

22Yesò shu abua bɔkatè bi, nê, “Ale e ngua shua wɨ̧ nê bɨ̀ ka me mɨ̀ɨ̀te nê bɨ̀a jɨ ghǎ ko nu ghǎ leꞋ. Bɨ̀ ka ndem mɨ̀ɨ̀tè nê bɨ̀a kwaã ghǎ a mbɨ̧̀ tɨ̧ leꞋ. 23Mèmpème e tsè èghɨjɨ, mbɨ̧̀ ènyit mè ntsè ndǐtsə. 24Bɨ̀ lɨ̀ŋkè bèmakwaŋ ndze. Beà kà liꞋ àliꞋ, bè ka wua fùꞋà èghɨjɨ, bè ka wua nɔ̀ŋà èghɨ a ngǒtsə, ka tǎt wɨ̧ wu a ègwet la me jɨa wɔb. Tè bɨ bakà taꞋa tsè banɨ̧̀ mbɔŋ a mbì Mbɔ̧ɔ̧mà à? 25Wòt wu ane yɨ̧ tà me dèbè ènyit zi nyaŋ ko taa kwèꞋne àdziꞋa àfɨ̀Ꞌ ane afɨꞋa tà wu tseke a sitsǎꞋ la wu wàà? 26Bɨ bakà wu ko etsɔꞋte balaate ènəê mbɨ̀Ꞌɨ̀ è baa, èghǎ ghɨ̀ ka bɨ me ŋa awɨ̧ ngoꞋ ane mekǒ à? 27Bɨ̀ lɨ̀ŋkè mèfəèꞋ mu a èbemebàꞋ la ndzě ndɨ nàa ntsəèa la. Nàà kà fàꞋ, è ka wua ngɨ̀à ndǐtsə. Ka e ngua shua wɨ̧ nê èmà ngu wuê fɔ̧̀ Sàlemun nè mèkab mi, ko tà lè kaꞋ bɔ ndǐtsə mbɨ̀Ꞌɨ̀ mekǒ ane mèfəèꞋ mbɔŋ. 28Tè Mbɔ̧ɔ̧mà wu wèè mèfəèꞋ mu a èbemebàꞋ àa ngɨ̀ à ye laane wàa, ètsəꞋ e me tsi bɔ to̧ maꞋa èwet la, è me wu awɨ̧ tà kà ghɨ ale tè ntsě? Bɨ wu kwàꞋ bòt àlȩ̀ȩ̀tè a màndzia mèntɨ̧ɨ̧ ane Mbɔ̧ɔ̧mà. 29Bɨ̀ ka tsi mɨ̀ɨ̀tè nyaŋ ane àghɨa bɨ̀a jɨ e mě nu la. Ko mbɨ̀Ꞌɨ̀ bɨ me mɨ̀ɨ̀tè nyaŋ. 30Bòt kà wu bòt Mbɔ̧ɔ̧mà bàgème ka bɔ̀ɔ ndèbà ènyit yɔb ane ànəa èghɨ bàa la. Tǎt wɨ̧ ko nê bɨà nkɨ̀ŋkà èghɨ mbɔŋ ègème. 31Ale, bɨ̀ bɨa me zə wuê mènəè kèfɔ̧̀ Mbɔ̧ɔ̧mà, ko taa ŋa èghɨ bàagème bɨa nkɨ̀ŋkà la abua yɨ̧.

Jandèlè a kèfɔ̧̀ Mbɔ̧ɔ̧mà

(Mat 6:19-21)

32“Bɨ̀ ka mbɔ̌, bɨ̀a wu bɨ̀ wu mbɨ̀Ꞌɨ̀ àlaã njɨ̀tsə kà ye mètàŋ mɔb la, nkàà nê aà mbɔ̀ a tǎt wɨ̧ a màngɨa bɨa tsiꞋi bèfɔ̧̀ mbɨ̀Ꞌɨ̀ tòà. 33Bɨ̀ fɨ̧̀ɨ̧̀ne èghɨ bɨ̧ ègème, ngàbtè èkab abua bòt mbuŋ. Bɨ̀ kɨ ntaꞋte kà wu lène, mpàŋe èghɨ èkab bɨ̧ a èbèm, nɔ̀ŋè a ègwet, è wù àdziꞋa kà èghɨ mbɔŋ e wu li lɔ̀Ꞌɔ emǐ, tsɔŋ ka wu li elɔ̀Ꞌɔ etsě a ngèt, èsoꞋo è ka meè ngu lɔ̀Ꞌɔ àlia ekwele la. 34Bɨ̀ ghɨ̀ ale, nkàà nê, àdziꞋa bɨ paŋe èghɨ èkab bɨ̧ la, wu àdziꞋa mèntɨ̧ɨ̧ mɨ̧ wu la mɨ̧̂.”

BɔfàꞋ bɔ tsekè me chɨ̀Ꞌɨ la

35“Bɨ̀ tsela àleb a yɨ̧, ntò̧ò̧tè mèkàꞋà mɨ̧ me chɨꞋɨ àghɨa nkɨ̀Ꞌa la, 36mbɨ̀Ꞌɨ̀ bɔfàꞋ bèa ngɨ̀ be me chɨꞋɨ a tǎt wɔb taa kua adzìꞋa èpǎ̧ ndzɔꞋɔ la. Mbɨ̀Ꞌɨ̀ tà kua tà luꞋte ètsələèꞋ bɔ bê ntsɔꞋɔ wuê kwàꞋ àfɨꞋa mbɔŋ. 37Ntsɔ̧̀ wu bɔfàꞋ bu tǎt wɔb nàa me kua bɔɔ bele àtatsi nchɨ̀Ꞌà atò la. Ane nkûŋ, tsiꞋ è shu awɨ̧ nê tà kɨ̀Ꞌa ko taa kuule àleb azi, ebɔ ghɨ̌ bɔɔ tseke a si, tàa fàꞋa abua yɔb. 38Ateko tà gha ekɨꞋɨ a èntɨ̧ɨ̧ ètsəꞋ ko a ntɔ bèlu̧nkɔ̀Ꞌ leꞋ. Ntsɔ̧̀ wu bɔfàꞋ bu tàa me kɨꞋɨ bɔɔ bele àtatsi la. 39Bɨ̀ ko nê tǎt lob ko àfɨꞋa tsɔŋ nàa kɨꞋɨ ètsəꞋ la, kèlɔ kè ka nyia èghɨ tò mbɨ̀Ꞌɨ̀ bɔ gha ghɨ̌ nkɨ̀Ꞌî mbəèꞋəè lob tò. 40Bɨ̀a mbɔŋ bɨ̀ ye nê bɨ taŋke awɨ̧ ntsɔ̧̀, nkàà nê Waã Wòt naa kɨꞋɨ àfɨꞋa kà bɨ ko nê tàà nkɨ̀Ꞌâ.”

WafàꞋ ntsɔ̧̀

(Mat 24:45-51)

41Mbɨ̀Ꞌɨ̀ Yesò paate èngǎ̧ vi la, Pità bììte atò nê, “Tê, à shua èngà̧teme wàa abua ya, kò wuê abua wòt ègème à?”

42Yesò bɨ̀ɨ̀lè nê, “WafàꞋ ntsɔ̧̀ tà bɔ èyì la wu we ŋa à? Wu wu tǎt àfàꞋ tò zi atò àtsəa beko nê tà me ŋa wɔb èghɨjɨ àfɨꞋa ntsɔ̧̀ la. 43WafàꞋ ngaa naa taꞋa wùꞋtè àvi, na tǎt àfàꞋ tò me kɨꞋɨ àpfəè ndze atò fàꞋà la. 44Ane nkûŋ, tsiꞋ è shua wɨ̧ nê, ko tǎt àfàꞋ waa naa zǐ atò àtsəa èghɨ bi ègème. 45Ka wafàꞋ mbɔŋ shu abua zi zìambɔŋ nê, ‘Tǎt àfàꞋ am tseke nyaŋ,’ mbùꞋ me lene bɔfàꞋ ko bu, mbâ̧tsə nè bèzi, mè njɨ̀a nùa mbèa, 46ko tǎt àfàꞋ tò naa kɨꞋɨ ane àlia tà ghɨ̂ tà kà wua nchɨꞋa tò la, nè àfɨꞋa kà tà koê. Mbɔ̂ ngu saãaãte atò e màꞋa a si, e tsàà atò àdziꞋa bòt bu bɔ tu̧u̧ zǐ èntɨ̧ɨ̧ wɔb ane Mbɔ̧ɔ̧mà la, è wu la.

47“È me wu wafàꞋ wu tà ko àghɨa tǎt vi nàa kɨa nê yè ghɨa, ka tà kà nɔŋe avi e ghɨ̌ yùà la ko bɔɔ li shu̧u̧ atò kwàꞋ ànyaꞋne. 48Ka è me wu wafàꞋ wu kà ko àghɨa tǎt vi nàa nkɨ̀a la, mbɔ̂ me ghɨ̀ àghɨa bɔ bɔ̂ ndɨ bɔ̀ɔ shu̧u̧ atò kwàꞋ ànyaꞋne la, ko bɔɔ li shu̧u̧ atò mpiꞋa. Bɨ̀ ko nê wòt ègème bɔ zǐ atò àtsəa èghɨ nyaŋ la, bɔɔ biite atò mènəè nyaŋ, è we bɔ ŋa nyaŋ nɨŋ fu atò la, bɔ mè ngu me kɨ nyaŋ abua tò.”

Èngǎ̧ Yesò àa ngɨ̀à bòt e sàbtà

(Mat 10:34-36)

49Yesò mè shu abua bɔkatè bi nê, “E nkɨꞋa e zǐ èwet adù̧ sitsǎꞋ. E ghɨ̀ ale ngua ngoꞋa àfɨ̀Ꞌ yaa ko a bɔ̀ am. 50Maa nyi a èbem ngoꞋ mbɨ̀Ꞌɨ̀ bɔ̀ɔ ndzì wòt a èdzî la. Ànəa mbɔŋ aa ndèlà am tè a ghɨ̀ mbakà tsè, ènyit yaã è ka yaa. 51Bɨ̀ ka mɨ̀ɨ̀tè nê, e nkɨꞋa e ŋa àlàŋkè a ngɔ̀ŋ ŋaà. ChaꞋ, tsiꞋ è shu awɨ̧ nê e nkɨꞋa ezǐ àyɔ̀ŋ a kètsìà bòt. 52È wu ale, e buꞋa àfɨ̀Ꞌ yaa, me ghà ne mbì ləlob nè bòt batà̧â̧ nàa sàbte, bòt batat e tɨ̧ɨ̧ abà yɔb, babe e tɨ̧ɨ̧ ayɔb. 53Bètǎt aa me yɔ̀ ne bɔmbâ̧ bɔb, bɔtèsà e me yɔ̀ nè bètǎt bɔb. Bèzi e yɔ̀ nè bɔɔ̀zi bɔb, bɔɔ̀zi e me yɔ̀ nè bènyɨ̌ bɔb. Bènyɨ̌ e yɔ̀ nè bèzi bɔ̧ bɔb, bèzi e yɔ̀ nè bènyɨ̌ bèlu̧ bɔb.”

Bòt e wu me ko lə èghɨ Yesò nàa ngɨ̀à la

(Mat 16:2-3)

54Yesò mè shu abua ènɔ̧̂ bòt bu nê, “Ègwet àa ngɨ̀ è fen àbâ zìa, bɨ nê ‘Mbɨ̀ŋ naa lu’, è bê ndu mbɨ̀Ꞌɨ̀ bɨ shu la.

55“Bɨ̀a ngɨ̀ bɨ̀ ye àfeme a dzə a tsɔꞋɔ la, bɨ nê ‘Nyèm nàà ngà ete’, è bê ntè wuê mbɨ̀Ꞌɨ̀ bɨ shu la. 56Ye bòt ko bɔ̀ɔ shua nê bɔ wu àghɨa kà wu yùà la. Bɨà nkoa ndȩ̀à ègwelebuule nè sitsǎꞋ shua ndɨ àa wu la. Ghǎ ghɨ̂ ka bɨ̀ ka wu eko shu ndɨ àbȩ àa la à?

Ghɨa àlàŋkè nè bòt

(Mat 5:25-26)

57“Tè betsiꞋa bɨ̀ambɔŋ è ka ko nkwàꞋtè àghɨa è wù àghɨa ntsɔ̧̀ la ngɨ̀? 58Wòt fɨ̧̀ɨ̧̀nè àwê a èkɔ̂t, à nyɔ̀Ꞌtè mbà̧à̧ àka tò àfɨꞋa bɨ̀ bele alu̧ la. Ghɨ̀ ale mbɨ̀Ꞌɨ̀ ka tà səèŋnè awê nɨŋ nga a mbì wòt tàa sàꞋa èkɔ̂t la, tà zì awê a tèkitebu bɔkefen, bɔ màꞋà awê a tèfȩ. 59TsiꞋ è shu awê nê à bakà tsə àtsɔb ayê te gha lìa ane nini à kà dzəê.”

Currently Selected:

Lûk 12: mnf

Highlight

Copy